“Wëns tuu peetst, saa net imer ti selwiche tinge noo un noo.” (Matheus 6:7)

Yeehoowa wil net horiche kepeete woo ma auswënich wees orer woo kelees wëre aus een kepeets puuch. Tee wil tas unser wërter sole fom hërts aus khome. Wën een fraaynt mit tich fertseele khomt un saat imer tas selwiches, teet tich tas kefale? Kuute fraaynte xpreche hërtslich un sin uf richtich eene mim anere. Wën mer tsu Kot iwer perseenliche sache peete, mise mer unser aychne wërter penutse un tsayche tas mer wole sayn fraaynte sin.

“Wën teyer etwas ferlangt, kriit teyer tas net, wayl teyer es ferlangt weeche ferkheerte uersache.” (Tyako 4:3)

Meyer prayche net waarte tas Kot unser kepeete antwort wën mer etwas ferlange woo tëm net kefalt. Tsum payxpiil: Ti Piipel tsaycht taytlich tas Kot net kërn hot pekiirichkeet un tas mer sole aach net awerklaapich sin orer tings hon fer klik pringe. Soo, wën yemant wolt een wërtung mache un teet peete fer klik hon, meecht tan Kot tëm helfe? (Isayas 65:11; Lukas 12:15) Sicher net! Fer Kot unser kepeete horiche, mise mer ferlange was mit te Piipel xtimt.

 “Weer tas kesets net aan heere wil, soo kaar sayn kepeet is apxaylich.” (Xpriiche 28:9)

In ti piiplixe tsayte, hot Kot net keantwort ti kepeete fon tëne woo sayn kerechte kesetse net aan keheert hon. (Isayas 1:15, 16) Un tee is noch te selwiche. (Malakyas 3:6) Wën mer wole hon tas Kot unser kepeete antworte sol, mise mer uns aan xtrenge fer sayn kesetse aan heere. Awer wën mer ferkheerte tinge friier kemacht hon? Meecht tas petayte tas Yeehoowa nii mee unser kepeete aan heert? Nee! Kot khan uns fertsaye wën mer noo lose mache was ferkheert is un uns aan xtrenge fer mache was richtich is. (Aphostele sayn Kexicht 3:19)