Was etliche tenke iwich tas kepeet
“Wën ich peete, xpiire ich als wën Kot neewer mich weyer, teet mayn hant fest hale un mich lenke wën ich ferloer sin, wën ich net wees was ich mache sol.” — MARÍA.
“Mayn fraa is kextorep noo 13 yoore khëmpfe keeche te kreeps. Ich khan mich noch tenke tas ich yeete taach tsu Kot kepeet hon un ich waar mich sicher tas tee mich heere teet, un teet mayn phayn aach xpiire. Tas hot mich friit kep.” — RAÚL.
“Tas kepeet is een xeen kexenk woo Kot ti mënxe kept.” — ARNE.
Fer María, Raúl, Arne un fiil anere, is tas kepeet een xeen kexenk. Torich tas kepeet, xpiire se tas se khene mit Kot xpreche, tanke un tëm sayn hilef ferlange. Tii klaape hërtslich aan tiise piiplixe wërter: “Tas is ti fertraung woo mer uf tëm hon: ekaal was mer ferlange, Kot heert uns wën tas mit sayn wile xtimt.” (1 Yoohan 5:14)
Awer fiil layt tenke tas es xweer is klaape aan was ti Piipel in lërnt iwich peete tsu Kot. Steve saat was eyer tenkt iwich tas kepeet: “Wii ich 17 yoer alt waar, hon ich tray fraaynte ferloer. Eene fraaynt is umkhom in een auto unfal, un ti anere tswaay sin fersof im meer aan een praya.” Was hot Steve noo tas kemacht? “Ich hon kepeet tsu Kot un kefroot warom tas ales pasiirt weyer, awer ich hon khee antwort kriit. Tan hon ich ketacht: ‘Fer was peete?’” Soo wii Steve, tenke aach fiil tas iire kepeete net keantwort wëre, tes weeche frooe se sich eps wërklich am weyert is peete.
Awer tas is net te eensiche uersache tas ti layt tenke tas se prayche net peete. Etliche mëne tas wën Kot xon ales wees, tan prayche mer net tsu iim peete fer iwich unser propleeme xpreche orer sayn hilef ferlange.
Anere tenke tas Kot iire kepeete net horicht weeche ti xlechte tinge woo se friier kemacht hon. Jenny leet aus: “Ich xpiire mich soo oone weyert un peroye mich fon te xlechte tinge woo ich kemacht hon. Tes weeche xpiire ich tas ich net fertiint hon tas Kot mich heere sol.”
Un tuu, was tenkst tuu iwich tas kepeet? Wëns tuu tich aach soo xpiirst wii tiise layt, wërt es tich kefale raus kriin was ti Piipel saat iwich tas kepeet. Meyer khene traue uf was ti Piipel saat; a tii wërt uns helfe antworte fine fer fiil frooche, soo wii:
-
Meecht Kot wërklich unser kepeete horiche?
-
Warom wëre etliche kepeete net keantwort?
-
Was mus ich mache tas Kot mayn kepeete horicht?
-
Wii khan tas kepeet mich helfe?
a Fiile kepeete fon Kot sayn troye tiiner sin uf kexrip in te Piipel, soo kaar Yeesus sayn kepeete. Ti Hepreeyxe Xrifte, aach kenënt te Alte Testament, pringt mee wii 150 kepeete.
Fiilaycht tuust tuu aach kërn hon
FROOCHE FON TE YUNGE
Warom sole ich tsu Kot peete?
Meecht tas kepeet ploos een hilef sin fer mich peser fine orer macht tas wërklich was aus?
