“Wën teyer tëm Fater etwas ferlangt in mayne naame, wërt tee tas aych kepe.” (Yoohan 16:23)

Yeesus sayn wërter tsayche kenau tas Yeehoowa wil net hon tas mer sole tsu iim peete torich pilter, hayliche, engele orer unser foereltere, awer in Yeesus sayne naame. Wën mer tsu Kot peete in Yeesus sayne naame, erkhëne mer tas Kot unser kepeete horicht weeche was Yeesus fer uns kemacht hot. Yeesus saat: “Nimant khomt tsum Fater heechstens torich mich.” (Yoohan 14:6)

“Foer iim, xiit ayre hërts aus.” (Psalm 62:8)

Wën mer tsu Yeehoowa peete, mise mer xpreche mit iim soo wii een soon mit sayne liipliche fater xprecht. Xtats peete un imer ti selwiche wërter saan woo mer auswënich wise, orer aus een kepeets puuch leese, mise mer tsu iim peete hërtslich un mit respekt.

“Ekaal was mer ferlange, Kot heert uns wën tas mit sayn wile xtimt.” (1 Yoohan 5:14)

Yeehoowa saat uns torich ti Piipel was eyer wërt fer uns mache un was meyer mache sole fer iim. Wën mer wole tas Kot sol unser kepeete aan nëme, mise mer peete tëm noo sayne wile. Fer tas hin kriin, mise mer ti Piipel xtutiire fer iim kuut khëne lërne. Soo, wërt tee unser kepeete horiche.

Peet iwich was tuu prauchst. Meyer khene peete tsu Kot un ferlange tas ese, tsaych fer aan tsiie un een plats fer woone; meyer khene aach peete un ferlange kluucheet fer kuute ëntxlise mache un kraft fer mit te xwiirichkheete um keen; meyer khene ferlange tas tee uns een xtarke klaape kept, uns fertsayt un uns heleft. (Lukas 11:3, 4, 13; Tyako 1:5, 17)

Peet iwich anere. Liipliche eltere fraye sich wën ti khiner sich kuut kepe eene mim anere un sich liipe. Yeehoowa wil aach tas sayn khiner hiir uf ti eyert sole sich khimere eene mim anere. Meyer khene peete iwich unser familye, unser man orer fraa, unser khiner un fraaynte. Te tisipel Tyako hot kexrip: “Peet eene fer ti anere.” (Tyako 5:16)

Say petanklich. Ti Piipel saat iwich unser Kriatoer: “Eyer hot aych reen fom himel un friichte in sayn tsayt kep; tee hot aych kesoricht mit fiil ese un ayre hërts mit frayt kefilt.” (Aphostele sayn Kexicht 14:17) Wën mer tenke aan ales was Kot fer uns kemacht hot, wëre mer peete fer iim tanke. Sicher wole mer aach Kot aan heere fer tsayche tas mer petanklich sin. (Koloser 3:15)

Als mool, khan sin tas tuu ti lust ferliirst wayl tayn kepeete net klaych keantwort wëre. Meecht tas petayte tas Kot sich net khimert um tich? Sicher net! Kuk was etliche saan woo tsaycht tas als mool ales was mer mache mise is wayter peete.

Steve, woo kenënt is woer im eyerste artikel, saat: “Wën ich hët net wayter kepeet, tenke ich tas ich hët khene nii mee froo sin.” Warom hat Steve ferënert sayn mënung iwich kepeet? Tee hat aan kefang ti Piipel xtutiire un hat kelërnt iwich ti neetichkheet fer peete un net noo lose tsu peete. Tee saat: “Ich peete tsu Kot fer tanke ti hilef woo mayn liipe fraaynte mich kepe. Hayt sin ich frooer wii ich noch nii waar.”

Jeeny, woo tacht tas se soo weenich weyert hët tas Kot iir net horiche teet, saat: “In mayn xlimste tsayte, hon ich aan kehal tas Kot selt mich helfe ferxteen warom ich mich soo oone weyert kexpiirt hon.” Wii hat tas kepeet keholef? “Peete tsu Kot hat keholef mich in een richtich aat aan siin. Ich hon ferxtan tas wën soo kaar mayn hërts mich xultich xpiire macht, tuut Kot mich net pexultiche. Peete hat mich aach keholef net uf kepe.” Was waar te resultaat? “Tas kepeet hot mich keholef Yeehoowa aan siin wii eene Fater, eene liipliche Kot, un eene woere Fraaynt woo sich um mich khimert. Wën ich foran mich aan xtrenge fer iim kefale, wërt tee mich imer helfe un xtitse.”

Kuk aach Isabel sayn payxpiil. Wii tii xwange waar, hon ti toktere kesaat tas iire nëneche teet uf te welt khome mit een xlime feeler. Tii is aarich traurich kewoer. Etliche layt hon soo kaar kesaat tii solt tas khint wech traype. Isabel saat: “Ich tacht ich teet xtërpe fon phuer traurichkheet.” Was hat tii kemacht? “Ich hon fiil kepeet un Kot sayn hilef ferlangt.” Mit te tsayt, is iire soon, Gerard, uf te welt khom. Tee hot wërklich een feeler. Meecht Isabel tenke tas Kot wërklich iire kepeet keantwort hot? Yaa, sicher. Wii soo? Tii saat: “Wën ich mayne soon siin, yets mit 14 yoer alt, hon ich kroos frayt, ale tëm eyer een feeler hot. Ich siin tas tee ti pest antwort waar fer mayn kepeete, ti kreest seechen woo Yeehoowa khont mich kepe.”

Hërtsliche wërter, soo wii tii, mache uns tenke am Psalm, woo saat: “Tuu wërst heere was ti tsaame ferlange, oo Yeehoowa. Tuu wërst iire hërts ferxtërke un acht tsu iir kepe.” (Psalm 10:17) Kans sicher, hon mer kuute uersache fer wayter peete!

In te Piipel, fine mer fiile kepeete woo een anert persoon kemacht hot: Yeesus. Kans sicher, tas pekhanteste is tas kepeet woo eyer sayn tisipele in kelërnt hot. Was khene mer lërne mit tiise kepeet? Wole mer mool siin.