Ti letste artikele hon ketsaycht tas klaych tuut Kot een ën fer tiise xlecht welt un sayn propleeme pringe. Warom khene mer uns sicher too tefun sin? Wayl Kot sayn Wort, ti Piipel, hot ferxproch:

‘Ti welt tuut rom keen.’ (1^TE YOOHAN 2:17)

Meyer khene uns sicher sin tas etliche layt tas ën iwerleepe tuun wayl tiise selwiche wersikel saat noch:

“Awer weer Kot sayn wile macht, playpt fer imer.”

Tan, wën mer tas ën iwerleepe wole, mise mer Kot sayn wile mache. Awer fer se wise was Kot sayn wile is, mise mer eyerst tëm khëne lërne.

Yeesus hot kesaat: “Tas petayt tas eewiche leepe: tas se tich khëne tuun, te eensiche woere Kot.” (Yoohan 17:3) Fer tas ën iwerleepe un eewiche leepe kriin, mise mer ‘Kot khëne’. Awer, es is net kenuuch ploos klaape tas Kot eksistiirt un etliche tinge iwer tëm wise — meyer mise tëm sayn froynt sin. Wën mer wole een xtark froyntxaft hon, mise mer tsayt mit unser froynt fertraype. Tas is aach soo mit Kot. Wole mer etliche fon te haupste woerheete fon te Piipel siin. Tii tuun uns helfe een froyntxaft mit Kot paue un hale.

Fer unser leepe hale, tuun mer yeete taach ese. Awer Yeesus hot kesaat: “Te mënx sol net ploos fon proot leepe, awer fon yeete wort woo fon Yeehoowa sayn maul khomt.” (Matheus 4:4)

Hayt, khene mer Yeehoowa sayn wërter in te Piipel fine. Wëns tuu tiise hayliche puuch xtutiirst, tuust tuu lërne was Kot xon kemacht hot, was eyer am mache is un was eyer in te futuer mache tuut.

Im xtant wilst tuu Kot aan heere un noo lose etwas mache woo eyer net kërn hot. Wii khanst tuu tas hin kriin wën es xweyer fer tich is tiise ënerunge mache? Was tich fiil helfe khan, is Kot kuut khëne.

Kuk mool was een fraa kemacht hot woo in Asya leept. Tii hat een imoraalix leepe; awer wii se ti Piipel aan kefang hot se xtutiire, hot se kelërnt tas Kot uns xike tuut: “Tuut fon te seksuaal imoraaliteet aus rayse!” (1^te Korinter 6:18) Tii hot in kepeet kraft tsu Kot ferlangt un tii hot es hin kriit sayn imoraalix leepe lose. Awer tii mus noch khëmpfe mit te fersuuchunge. Tii saat: “Ich wees tas ich khan net aleen khëmpfe. Tan, wën imoraalixe ketanke foer khome, tuun ich een hërtslich kepeet tsu Yeehoowa mache. Ti kraft fon te kepeete hot mich tichter pay Yeehoowa kexaft.” Soo wii tiise fraa, milyoone layt sin Kot am khëne. Tee kept tëne ti kraft woo se mise hon fer ënerunge in sayn leepe mache un fer se leepe in een aat woo tëm froo lost. (Filiper 4:13)

Woo peser tuust tuu Kot khëne, woo peser tuut ‘eyer tich khëne’ wii sayn liipe froynt. (Kalater 4:9; Psalm 25:14) Un wëns tuu een kuute froynt fon Kot pist, tuust tuu in tëm sayn nay welt sin. Awer wii meecht tiise nay welt sin? Te neekste artikel tuut tas aus leye.