TI MËNXHEET

Was saat ti Piipel? Kot ‘hot net ti eyert umsonst kemacht, awer hot se kemacht fer pewoont se wëre’. (ISAIIAS 45:18)

TI EYERT

Was saat ti Piipel? “Een xeneratsyoon keet un een aner khomt, awer ti eyert playpt fer imer.” (EKLESYASTES 1:4)

WAS WIL TAS SAAN? Tëm noo te Piipel, wërt ti eyert imer pewoont sin un tii wërt nii fernicht. Tan, was is tas ën fon te welt?

TENK MOOL NOO: Ti Piipel ferklaycht tas ën fon tiise welt mit was in Noee sayn taache pasiirt is. In tëm sayn tsayt, waar ti eyert “fol wyolënts”. (Xeenesis 6:13) Awer Noee waar eene kerechte man kewees. Tes weeche, hot Kot Noee un sayn familye keret; awer ti xlechte layt, hot Eyer mit een sintfluut fernicht. Kuk mool was ti Piipel saat iwer was in Noee sayn taache pasiirt is: “Ti welt fon tiise tsayt [is] fernicht kep wii se mit waser ketekt kep is.” (2^te Pheeter 3:6) Te tekst xprecht iwer tas ën fon te welt woo in tiise tsayt waar. Awer, was is fernicht kep — orer tsum ën khom? Net ti eyert, awer ti xlechte mënxe woo uf te eyert waare. Tan, wën ti Piipel iwer tas ën fon te welt xprecht, is se net am xpreche iwer ti fernichtung fon te eyert. Tii is am xpreche iwer tas ën fon te xlechte layt un fon te xlechte tinge woo uf te eyert pasiire.

TI PROPLEEME UN TI XLECHTICHKHEET

Was saat ti Piipel? “In khorts tsayt, tuun ti xlechte net mee eksistiire; tuu kukst hin woo se waare, un tii sin net mee tat. Awer ti tsaame tuun ti eyert kriin un tii tuun sich mechtich fraye in tëm iwermeesich friit.” (PSALM 37:10, 11)

WAS WIL TAS SAAN? Ti sintfluut in Noee sayn taache hot net ti xlechtichkheet fer imer fernicht. Noo te sintfluut, is tas leepe noch mool fol xwiirichkheete kep weeche ti xlechte layt. Awer klaych, tuut Kot ti xlechtichkheet fer imer tsum ën pringe. Soo wii te psalmist kesaat hot, “tuun ti xlechte net mee eksistiire”. Wii tuut Kot tas mache? Tee macht tas torich sayn Raych — een rechiirung im himel woo tuut iwer ti layt rechiire woo Kot aan heere tuun.

TENK MOOL NOO: Meechte ti layt woo hayt uf te welt rechiire, Kot sayn Raych froo aan nëme? Ti Piipel saat tas se tas net mache tuun. Es is xaat, awer tii tuun sich keeche Kot sayn Raych xtele. (Psalm 2:2) Was wërt te resultaat sin? Kot sayn Raych tuut al ti mënxliche rechiirunge ersetse “un ploos tas raych tuut fer imer plaype”. (Tanyël 2:44) Awer warom mus ti mënxlich rechiirung tsum ën khome?

Was saat ti Piipel? “Noch net mool sayn aychne xrite khan te mënx lënke.” (YEEREMIAS 10:23)

WAS WIL TAS SAAN? Ti mënxe sin net kemacht kep fer sich aleen xike. Tii khene net ti anere layt richtich rechiire orer sayn propleeme resolwiire.

TENK MOOL NOO: Ti ensiklopëtya Britannica Academic saat tas unerxiitliche rechiirunge khene net aleen “resolwiire propleeme soo wii aarmheet, hungernoot, krankheete, natuer unklike, kriiche un wyolënts”. Tii saat noch: “Etliche (…) tenke tas ploos een welts rechiirung khent soo sorte propleeme fer imer resolwiire.” Awer, soo kaar wën al ti rechiirunge fon te welt eenich weyere, teet ti welt noch rechiirt sin fon imperfekte mënxe. Un tii khene net resolwiire ti propleeme woo mer foner traan kexproch hon. Kot sayn Raych is ti eensich rechiirung woo ti kraft hot fer al ti propleeme fon te welt fer imer resolwiire.

Tan, tëm noo was ti Piipel saat, mise ti kuute layt net pang hon weeche tas ën fon te welt. Nee… tii khene tas hërtslich waarte! Tas sin kuute notisye fer ti kuute layt — een wunerlich nay welt fon Kot tuut uf tëm plats fon tiise fersautne un alt welt khome.

Wanee tuut tas ales pasiire? Te neekste artikel leet ti antwort fon te Piipel aus.