Klaych khomt een nay welt!
Kot hot ti eyert kemacht tas ti kerechte mënxe khente uf tëne fer imer leepe. (Psalm 37:29) Tee hot fer te eyerste man un ti eyerst fraa, Aatam un Ewa, een xeen plats fer se woone kep: te Eetem kaate. Tii un sayn khiner hon ti flicht kriit fer uf te eyert planse un se uf phase. (Xeenesis 1:28; 2:15)
Kewis is ti eyert hayt net tas Paratiis woo Kot kepleent hot. Awer Kot hot net fon sayn plaan uf kep. Was meecht tee mache fer fon te eyert een paratiis mache? Wii ti letste artikele ketsaycht hon, Kot tuut net ti eyert fernichte. Xtats tas, lost eyer ti kerechte mënxe too truf woone. Wën Kot sayn ferxpreche erfiile tuut, wii wërt tas leepe too uf te eyert sin?
Ploos een rechiirung iwer ti kans eyert
Klaych, tuut Kot sayn himlixe Raych iwer ti kans eyert rechiire. Ti eyert tuut een froo plats sin. Ti layt tuun mitsamer in friit woone un een kuut aarwayt hon woo tëne froo lost. Kot hot Yeesus raus kesuucht fer iwer ti eyert rechiire. Yeesus is kans anerste wii fiile rechiirente hayt tsu taach: tee tuut sich wërklich mit te layt khimere. Tee tuut mit liip rechiire un wërt een kuut, parmhërtslich un kerechte Kheenich sin. (Isaiias 11:4)
Eenichkheet tswixich al ti mënxe
Ti layt wëre net keteelt weeche sayn lant orer ras. Ti mënxheet tuut ploos een folek sin. (Apokalipsis 7:9, 10) Ti kanse layt woo uf te eyert woone, tuun Kot un ti anere liipe. Tii tuun mitsamer in friit xafe fer sayn haus, ti eyert, uf phase — soo wii Kot es imer wolt. (Psalm 115:16)
Friit tswixich ti mënxe un ti natuer
Wën Kot sayn Raych rechiire tuut, tuut Kot tas weter kans unich kontrol hale — tas ales tuut noch mool kuut pariire! (Psalm 24:1, 2) Wii Yeesus uf te eyert waar, hot eyer ketsaycht was eyer mache khont mit Kot sayn kraft: tee hot een kefeerlich xtorm peruycht. (Markus 4:39, 41) Wën Yeesus ti eyert rechiire tuut, tuut nimant pang fon te natuer unklike hon. Unich Kot sayn Raych, tuun mer aach in friit mit te tiere leepe un net mee ti natuer fersaue. (Oseyas 2:18)
Perfekt kesuntheet un fiil ese
Ale tuun perfekt kesuntheet hon. Nimant tuut xtërpe, orer alt un krank wëre. (Isaiias 35:5, 6) Ti eyert wërt xeen un sauwer soo wii te Eetem kaate waar. Un in te nay welt, soo wii im Eetem kaate, tuut ti eyert fiil ese kepe un ti kanse mënxe tuun kenuuch hon fer sich sat ese. (Xeenesis 2:9) Soo wii es pasiirt is mit Kot sayn folek friier, al im Paratiis ‘tuun sich sat mit proot ese’. (Lewiitikus 26:4, 5)
Woere friit un sicherheet
Unich Kot sayn raych tuun ti kanse mënxe friit hon, un tii tuun sich naner pehantele mit kuutheet un kerechtichkheet. Es tuut kheen kriiche kepe, nimant tuut sayn autoriteet xlecht penutse un ale kaar tuun kenuuch hon. Ti Piipel ferxprecht: “Tii tuun sich uner sayn traupe kriste un sayn fayche paam setse, un nimant tuut tëne angst mache.” (Mikeyas 4:3, 4)
Al tuun een xeen haus un een kuut aarwayt hon
Yeete familye tuut een haus hon. Un tii prayche kheen pang hon fer tas ferliire. Ti kans aarwayt woo mer mache tuun, tuut uns frayt kepe. Soo wii ti Piipel saat, tii woo in te nay welt leepe, “tuun net umsonst xweyer xafe”. (Isaiias 65:21-23)
Ti pest inlërnung
Ti Piipel ferxprecht: “Ti eyert wërt sicher fol mit Yeehoowa sayn khëntnis.” (Isaiias 11:9) Ti mënxe woo unich Kot sayn Raych leepe tuun, tuun fon te mechtich kroos kluucheet fon Yeehoowa, sayn Kriatoer, lërne. Tii tuun aach lërne iwer ti xeene tinge woo eyer kemacht hot. Nimant tuut sayn khëntnis penutse fer wafe paue orer fer xaate fer ti anere pringe. (Isaiias 2:4) Xtats tas, tuun al lërne wii in friit leepe un wii ti eyert uf phase. (Psalm 37:11)
Eewiche leepe
Kot hot ti eyert in een liiplich aat in kericht tas mer khente frooheet yeete taach fine. Un tee wil hon tas ti mënxe fer imer uf te eyert woone. (Psalm 37:29; Isaiias 45:18) Fer tas meechlich mache, tuut Kot “te toot fer imer wech xafe”. (Isaiias 25:8) Ti Piipel ferxprecht: “Es kept kheen toot mee, kheen traurichkheet, kheen krayxe un kheen phayn.” (Apokalipsis 21:4) Ti mënxe woo tas ën fon tiise welt iwerleepe tuun un tii woo fon toot uf keruuft wëre in te nay welt, tuun fon Kot een xeene kexenk kriin — ti oportuniteet fer eewiche leepe hon. (Yoohan 5:28, 29; Aphostele sayn Kexicht 24:15)
Hayt, tuun milyoone layt sich xon in richte fer unich Kot sayn Raych leepe, woo klaych khomt. Opwool se net perfekt sin, xtrenge se sich aan fer ti sort layt sin woo Kot wil in sayn nay welt hon. Wii mache se tas? Tii lërne iwer Yeehoowa un tee woo eyer kexikt hot: Yeesus Kristus. (Yoohan 17:3)
Lërn mee iwer wiis tuu khanst tas ën fon tiise welt iwerleepe un teel mache fon te peser welt woo klaych khomt. Xprech mit een Yeehoowa sayn Tsayer fer een Piipel xtuutyum kratis mache mim puuch Los tich kuut keen im leepe fer imer!
