“Playpt wachsam, wayl teyer wist net te taach orer ti xtun.” (MATHEUS 25:13)

“Kukt mit acht; playpt wach; wayl teyer wist net wën es ti pextimt tsayt is.” (MARKUS 13:33)

Tan, Kot hot een “pextimt tsayt” kextelt — es wil saan, “te taach un ti xtun” — fer ti welt tsum ën pringe. (Matheus 24:36) Awer, nimant uf te eyert wees te richtich taach wën tas pasiire tuut. Wil tas saan tas mer net wise khene ep tas ën ticht is? Kewis net! Yeesus hot kesaat tas sayn tisipele uf phase solte etliche ewënte woo teete tsayche tas tas ën ticht is.

Yeesus hot iwer etliche ewënte kexproch woo teete am “ën fon tiise sisteem” pasiire. Tee hot kesaat: “Natsyoon tuut sich keeche natsyoon xtele un raych keeche raych; un es wërt hungernoot kepe un eyertxutere uf een plats noom aner.” (Matheus 24:3, 7) Tee hot aach kexproch iwer “krankheete” woo teete sich fiil ferprayte. (Lukas 21:11) Was mënst tuu: is tas hayt am pasiire?

Hayt, fiile mënxe layte weeche kriiche, hungernoot, eyertxutere un een krankheet noo te aner. Tsum payxpiil: in 2004 is een tsunami pasiirt weeche een mechtich xtark eyertxuter in tëm Intikus Osean. Weeche te tsunami, sin unkefeer 225.000 layt kextorep. Weeche ti pantemii fon coronavirus, sin unkefeer 6.9 milyoone layt uf te kans welt kextorep in 3 yoore. Yeesus hot kesaat tas soo sorte ewënte teete tsayche tas tas ën fon te welt ticht is.

Ti Piipel nënt ti tsayte kraat foer tas ën wii ti “letste taache”. (2^te Pheeter 3:3, 4) Tsweete Timoteus 3:1-5 saat tas ti layt teete sich xlecht aan xtele in te letste taache — kans anerste fon was Kot wil. (Kuk te khaste “ Kraat foer tas ën fon te welt”.) Host tuu xon kemërkt tas ti layt hayt ekoystiix, kiirich un krop sin, un tas se khee liip fer ti anere hon? Tas is een aner pewaysung tas mer am leepe sin ticht am ën fon te welt.

Wii lang tuun ti letste taache taure? Tëm noo te Piipel, ploos “een khorts tsayt”; tan, tuut Kot “fernichte tii woo ti eyert fernichte”. (Apokalipsis 11:15-18; 12:12)

Kot hot xon te taach un ti xtun pextimt fer tiise xlecht welt tsum ën pringe. (Matheus 24:36) Awer es kept een aner kuute notisye: Kot “winxt [net] tas yemant fernicht wërt”. (2^te Pheeter 3:9) Tes weeche, kept Kot fer ale kaar ti xans fer iwer tëm lërne un sayn wile mache. Warom? Wayl tee wil hon tas mer tas ën fon tiise welt iwerleepe un in tëm sayn nay welt leepe tuun. In tiise tsayt, tuut ti eyert een paratiis sin.

Awer was mise ti layt mache fer in tiise nay welt leepe, unich Kot sayn Raych? Kot hot een aarwayt uf te kans welt orkanisiirt woo helft ti layt tas ferxteen. Yeesus hot kesaat tas ti kuute notisye fom Raych teete “uf te kans pewoont eyert kepreeticht” wëre. (Matheus 24:14) Yeehoowa sayn Tsayer penutse pilyoone xtune in te preetich aarwayt. Tii tuun preetiche un layt fon te kans welt in lërne iwer ti hofnung woo ti Piipel kept. Yeesus hot kesaat tas tiise preetich aarwayt teet uf te kans welt kemacht wëre eep tas ën khemt.

Klaych, khome ti mënxliche rechiirunge tsum ën. Awer, kepts kuute notisye: tuu khanst tas ën fon tiise welt iwerleepe un too hiir uf te eyert woone, uf tëm Paratiis woo Kot ferxproch hot. Awer was solst tuu mache fer in tiise nay welt leepe? Te neekste artikel xprecht too triwer.