XTUUTYUM ARTIKEL 31
Pist tuu ‘ti xtat woo woere funtamente hot’ am waarte?
“Eyer hot ti xtat kewaart woo woere funtamente hot, woo is fon Kot kepleent un kepaut kep.” (HEBREUS 11:10)
LIIT 22 Kot sayn Raych sol khome!
WAS TUUN MER SIIN? *
1. Was hon fiile neewe kelos? Un warom hon se tas kemacht?
MILYOONE fon Kot sayn folek hayt se taach hon etwas neewe kelos. Fiile priiter un xwestere hon ëntxlist leetich plaype. Pheyerche hon ëntxlist khee khiner yets kriin. Familye hon ëntxlist een keweenlicher leepe hon. Al hon tiise ëntxlise kemacht weeche een wichtich uersach — tii wole sayn pestes mache fer Yeehoowa tiine. Tii sin froo un traue tas Yeehoowa tuut tëne kepe ales woo se wërklich prayche. Tuut Yeehoowa mit tëne feele? Nee! Warom khene mer uns sicher fon tas sin? Een uersach is tas Yeehoowa hot Apraham, ‘te fater fon al tii woo klaape hon’, keseechent. (Rom. 4:11)
2. (a) Tëm noo Hebreus 11:8-10, 16, warom waar Apraham wilich fer sayn leepe in Ur hiner lose? (b) Was fer frooche tuun mer in tiise artikel antworte?
2 Apraham hot wilich sayn kuute leepe, woo eyer in Ur hat, hiner kelos. Warom? Wayl eyer hot “ti xtat kewaart woo woere funtamente hot”. (Lees Hebreus 11:8-10, * 16. *) Was is tiise “xtat”? Was fer kefoere hot Apraham mit kemacht, soo lang wii eyer kewaart ti xtat kepaut wëre? Wii khene mer Apraham un ti kriste woo tëm sayn payxpiil noo kang sin, noo mache? Te artikel tuut uns helfe ti antworte fer tiise frooche siin.
WAS IS ‘TI XTAT WOO WOERE FUNTAMENTE HOT’?
3. Was is ti xtat woo Apraham kewaart hot?
3 Ti xtat woo Apraham kewaart hot is Kot sayn Raych. Tiise Raych is fon Yeesus un 144.000 kriste kemacht kep. Phaul nënt tiise Raych wii “een xtat fom lepeentiche Kot, ti himlix Yeruusalem”. (Heb. 12:22; Apo. 5:8-10; 14:1) Yeesus hot sayn tisipele kelërnt im kepeet ferlange tas tiise Raych khome sol, un tas soo Kot sayn wile uf te eyert soo wii im himel kemacht wërt. (Mat. 6:10)
4. Tëm noo Gênesis 17:1, 2, 6, wii fiil wust Apraham iwer ti xtat woo Kot ferxproch hat?
4 Wust Apraham ti kleenichkheete iwer wii Kot sayn Raych orkanisiirt wëre teet? Nee. Fer hunerte yoere, waare tiise kleenichkheete eene “hayliche kehaymnis”. (Efé. 1:8-10; Col. 1:26, 27) Awer Apraham wust tas etliche fon sayn nookhomer teete kheeniche wëre, wayl Yeehoowa hat tas fer tëm ferxproch. (Lees Gênesis 17:1, 2, * 6. *) Apraham sayn klaape aan Yeehoowa sayn ferxpreche waar soo xtark, tas eyer khont neekst siin ti kesalpter, orer Mesias, woo teet kheenich fon Kot sayn Raych sin. Tes weeche, hot Yeesus fer ti yuute in sayn taache kesaat: “Apraham, ayre fater, hot sich aarich kefrayt mit te hofnung fer mayne taach siin, un tee hot iim kesiin un sich kefrayt.” (João 8:56) Es is taytlich tas Apraham wust tas sayn nookhomer teete teel fon een Raych mache, woo teet Yeehoowa sayn unerxtitsung hon. Un tee waar wilich fer se waarte Yeehoowa tiise ferxpreche erfiile.
Wii hot Apraham sayn klaape aan Yeehoowa sayn ferxpreche ketsaycht? (Kuk te apsats 5.)
5. Wii wise mer tas Apraham ti xtat woo fon Kot kepleent kep is, am waarte waar?
5 Wii hot Apraham ketsaycht tas eyer ti xtat, orer tas Raych woo fon Kot kepleent kep is, am waarte waar? Eyerst, eyer hot sich mit khee mënxliche raych rin kemext. Tee hot sich fon een plats noom aner kewanert un hot ëntxlist khee mënxliche kheenich xtitse. Noch, Apraham hot net fersuucht sayn aychne raych in xtele. Xtats tas, hot eyer wayter Yeehoowa aan keheert un ti erfiilung fon sayn ferxpreche kewaart. Wii Apraham tas kemacht hot, hot eyer een xtark klaape aan Yeehoowa ketsaycht. Wole mer siin etliche kefoere woo Apraham mit kemacht hot un was khene mer fon tëm sayn payxpiil lërne.
WAS FER KEFOERE HOT APRAHAM MIT KEMACHT?
6. Was fer sort xtat waar Ur?
6 Ti xtat woo Apraham hiner kelos hot, waar ëntwikelt un een sicher un kuut plats fer se woone. Ti xtat waar kexitst fon mechtiche kroose mauere un een tiif waser kraap. Ti layt fon Ur waare xlau in rechnunge mache un xraype. Un siit es aus tas ti xtat een haupst plats waar fer kexefte mache, wayl es waare fiile kexefte tokumente tat kefun. Ti hayse waare mit pak xteen kemacht; ti wante waare ferxpayst un noo heyer aan kekhalk. Welche fon tiise hayse hate 13 orer 14 tsimer um rom eene hoof, woo waar mit xteen keleet.
7. Warom praucht Apraham fertraue tas Yeehoowa teet eyer un sayn familye xitse?
7 Apraham praucht fertraue tas Yeehoowa teet eyer un sayn familye xitse. Warom? Ferkes net tas Apraham un Sara hon een kuut un sicher woonung in Ur neewe kelos, fer in parake in te khampe fon Kanaan woone. Eyer un sayn familye waare net mee fon tike mauere un waser kraape kexitst. Xtats tas, yets khente se laycht in te hënt fon sayn faynte fale.
8. Een mool, was is mit Apraham pasiirt?
8 Apraham hot Kot sayn wile kemacht, awer een mool, is tas xweyer kep sayn familye soriche. Tee hot een xroo hungernoot mit kemacht, woo hot tas lant woo Yeehoowa iim kexikt hot, petrof. Ti hungernoot waar soo xroo tas Apraham hot ëntxlist sich mit sayn familye pis Ejipt wanere fer een tsayt tat plaype. Awer, wii eyer in Ejipt waar, hot Faraoo, te rechiirente fon tëm lant, Apraham sayn fraa kehool. Am ën, hot Yeehoowa Faraoo kextrooft un tee hot Sara tsurik tsu Apraham kep. Awer, pis tas pasiirt is, khanst tuu tich foer xtele wii ëngstlich Apraham keplip is? (Gên. 12:10-19)
9. Was fer propleeme hot Apraham in sayn familye mit keleept?
9 Es waare aach ërnst propleeme in Apraham sayn familye. Sayn liipe fraa Sara khont net khiner kriin. Fer fiile yoere, waare se traurich weeche tas. Am ën, hot Sara sayn tiinerin Akar tsu Apraham kep, tas tii khont khiner fer Apraham un Sara kriin. Awer wii Akar xwanger fon Ismaël kep is, hot se aan kefang Sara niter xtele. Ti situatsyoon is soo xlim kep, tas Sara hot kemacht tas Akar fom hëm aus keris is. (Gên. 16:1-6)
10. Was fer situatsyoone hon Apraham sayn fertraue aan Yeehoowa keproopt?
10 Ëntlich mool, is Sara xwanger kep un hot eene soon fer Apraham kep, woo eyer wii Isak kenënt hot. Apraham hot sayn tswaay puupe keliipt, Ismaël un Isak. Awer, weeche te xlecht aat woo Ismaël Isak pehantelt hot, hot Yeehoowa Apraham kexikt Ismaël un Akar fat xike. (Gên. 21:9-14) Noo heyer, hot Yeehoowa Apraham ferlangt fer Isak opfere. (Gên. 22:1, 2; Heb. 11:17-19) In ti tswaay situatsyoone, praucht Apraham fertraue tas Yeehoowa ti ferxpreche iwer tëm sayn tswaay soone erfiile teet.
11. Warom praucht Apraham ketultich uf Yeehoowa waarte?
11 Torich tiise kanse tsayt, Apraham praucht lërne wii uf Yeehoowa ketultich waarte. Neekst sicher, hat eyer mee wii 70 yoer wën eyer un sayn familye Ur hiner kelos hon. (Gên. 11:31–12:4) Un fer etwas wii 100 yoer, hot eyer in parake keleept, un is hiner un heyer im lant fon Kanaan kang. Apraham is kextorep wën tee 175 yoer alt waar. (Gên. 25:7) Awer tee hot net kesiin Yeehoowa sayn ferxpreche erfiile — tas lant fon Kanaan fer tëm sayn nookhomer kepe. Un tee hot net kenuuch keleept fer se siin ti xtat, Kot sayn Raych, fest kextelt. Soo wii soo, ti Piipel saat tas wën Apraham kextorep is, waar eyer “alt un tsufriite”. (Gên. 25:8) Opwool eyer fiil xwiirichkheete mit kemacht hot, Apraham hot sayn klaape xtark kehal un hot froo uf Yeehoowa kewaart. Warom khont eyer aus hale? Wayl torich Apraham sayn leepe, Yeehoowa hot iim kexitst un tëm wii een froynt pehantelt. (Gên. 15:1; Isa. 41:8; Tia. 2:22, 23)
Soo wii Apraham un Sara, wii tuun Kot sayn tiiner klaape un ketult tsayche? (Kuk te apsats 12.) *
12. Was sin mer am waarte, un was tuun mer yets noo kuke?
12 Soo wii Apraham, meyer sin am waarte ti xtat woo woere funtamente hot. Awer, mer sin net am waarte tas se kepaut wërt. Kot sayn Raych waar im yoer 1914 fest kextelt, un hot xon ti kans kontrol fom himel. (Apo. 12:7-10) Awer mer sin am waarte tas tiise Raych ti kans eyert rechiirt. Soo lang wii mer tas waarte, kepts fiile situatsyoone woo mer mise mit leepe woo sin eenlich mit was Apraham un Sara mit kemacht hon. Hayt se taach, meecht Yeehoowa sayn tiiner es hin kriin Apraham sayn payxpiil noo mache? Ti leepes kexichte, woo in Te Wachthorm xteen, tsayche tas, soo wii Apraham un Sara, fiile hayt hon klaape un ketult. Wole mer welche fon tiise kexichte noo kuke un siin was khene mer too temit lërne.
TII HON NOO KEMACHT APRAHAM SAYN PAYXPIIL
Bill Walden waar wilich fer fon etwas uf kepe un hot Yeehoowa sayn seechen kriit
13. Was host tuu mit Bill sayn leepes kexicht kelërnt?
13 Say wilich fer fon etwas uf kepe. Fer Kot sayn xtat, tas Raych, im eyerste plats in unser leepe tuun, mise mer soo wii Apraham sin, woo hot wilich fon fiile tinge uf kep fer Kot kefale. (Mat. 6:33; Mar. 10:28-30) Kuk tas payxpiil fon tëm pruuter Bill Walden. * Im yoer 1942, Bill waar neekst fërtich mit sayn uniwersiteet fon paueray inxenerii, wën tee hot aan kefang ti Piipel mit Yeehoowa sayn Tsayer xtutiire. Eene fon Bill sayn leerer in te uniwersiteet hat xon een aarwayt fer tëm kefun, woo eyer khont xon noo ti uniwersiteet xafe. Awer Bill hot tas net aan kenom. Tee hot aus keleet tas tee hot ëntxlist peser Kot tiine, xtats een aarwayt suuche woo teet fiil petsaale. Pisye tsayt tëm noo, ti rechiirung hot Bill fer te militeer tiinst kexikt. Mit respëkt, hot eyer ‘nee’ kesaat. Tes weeche, mist eyer een xult fon 10.000 tolare petsaale, un aach 5 yoer in te katee plaype. Tray yoere tëm noo, waar eyer pefrayt. Xpeeter, waar eyer in kelaat fer te Xileat Xuul mache, un hot wii misyoneer in Afrika ketiint. Nochter, hot Bill sich mit Eva kehayrat un hon se mitsamer in Afrika ketiint, woo petayt hot fon fiile tinge uf kepe. Noo phaar yoere, sin se retuer fer ti Fereenichte Xtaate fon Amërika kang fer Bill sayn muter uf phase. Bill saat iwer sayn kanse leepe: “Es khomt treene in mayn aue wën ich tenke aan ti wunerlich priwilëj, fer torich mee wii 70 yoere, fon Yeehoowa in sayn aarwayt penutst wëre. Ich tuun ofts tëm tanke wayl eyer hot mich keholef mayn leepe penutse fer tëm tiine.” Pist tuu wilich fer tayn leepe penutse in Yeehoowa sayn fol tsayt tiinst?
Eleni un Aristotelis Apostolidis hon kexpiirt tas Yeehoowa hot tëne ferxtërkt
14-15. Was host tuu mim leepes kexicht fom pheyerche Apostolidis kelërnt?
14 Waart net tas tayn leepe tuut khee propleeme hon. Apraham sayn payxpiil lërnt uns, tas soo kaar tii woo tuun sayn kanse leepe in Yeehoowa sayn tiinst penutse, tuun aach propleeme mit mache. (Tia. 1:2; 1 Ped. 5:9) Kuk mool wii tas wërklich pasiirt is torich tas leepes kexicht fon Aristotelis Apostolidis. * Tee waar im yoer 1946 in Kreesya ketaaft, un im yoer 1952 hot eyer sich mit te xwester Eleni ferloopt, woo hat ti selwiche tsiile wii tee. Awer, Eleni is krank kep, un ti toktere hon raus kriit tas tii eene keweks in tas kehërn hat. Te keweks waar wech kehoolt, awer phaar yoer tëm noo tas tii sich kehayrat hon, hot te keweks noch mool kewakst. Ti toktere hon tii noch mool operiirt, awer yets, Eleni khont net mee phaar teele fon sayn khërper weekele, un tii khont aach net mee richtich xpreche. Eleni hot wayter flaysich in te preetich kexaft, opwool sayn krankheet un ti yachtung fon te rechiirung aan tiise tsayt.
15 Fer 30 yoere, hot Aristotelis sayn fraa uf kephast. Torich tiise tsayt, hot eyer wii elteste ketiint, in konkrëse komisyoone kexaft un in ti paueray fon een Konkrës Saal keholef. Tan, im yoer 1987, Eleni hot sich wee kemacht weeche een unklik wën tii am preetiche waar. Tii hot tray yoere in koma keplip un tan, is se kextorep. Am ën fon sayn speryens, tuut te pruuter Aristotelis saan: “Torich ti yoere, xlime situatsyoone, xweyere kefoere un unkewaartne ewënte hon een iwermeesich pextimung un persewerans ferlangt. Awer, Yeehoowa hot imer mich ti neetich kraft kep fer torich tiise propleeme triwer wech khome.” (Sal. 94:18, 19) Wii fiil tuut Yeehoowa liipe tii woo sayn pestes fer tëm mache, opwool se propleeme mit leepe!
Wayl Audrey Hyde hot sayn aue am futuer kehal, hot se wayter positiiw ketenkt
16. Was fer kuut aanreet hot te pruuter Knorr fer sayn fraa kep?
16 Hal tayn aue am futuer. Apraham hot sich traan kehal aan te peloonunge woo Yeehoowa tëm im futuer kepe teet. Tas hot iim keholef torich ti propleeme triwer wech khome. Ti xwester Audrey Hyde hot fersuucht ti selwich positiiw ketanke hon, opwool se fiile propleeme mit kemacht hot. Sayn eyerste man, te pruuter Nathan Knorr, is weeche kreeps kextorep, un sayn tsweete man, Glenn Hyde, is aarich krank mit Alzheimer kep *. Tii saat tas etwas woo tii keholef hot, waar was te pruuter Knorr kesaat hot phaar woche eep eyer kextorep is. Tii saat: “Nathan hot mich erinert: ‘Noom toot, unser hofnung is sicher un prayche mer nii noch mool layte.’ Tee hot mich aan kereet: ‘Kuk forem, wayl tat is woo tayn peloonung is.’ . . . Un tee hot noch kesaat: ‘Tuu imer fiil se tuun hon. Fersuuch tayn leepe penutse fer etwas fer ti anere mache. Tas tuut tich helfe frooheet fine.’” Was fer nutslich aanreet is tas — imer fiil se tuun hon fer ti anere helfe un ‘sich in ti hofnung fraye’! (Rom. 12:12)
17. (a) Warom hon mer kuute uersache fer unser aue am futuer hale? (b) Wii tuut Miqueias 7:7 uns helfe seechen im futuer kriin?
17 Meyer hate nii soo fiil uersache, wii hayt, fer unser aue am futuer hale. Ti ewënte woo sin am ti welt pasiire, tuun taytlich tsayche tas mer sin in tëm letste xtik fon te letste taache fon tiise sisteem fon tinge. Klaych, prayche mer net mee lënger waarte fer Kot sayn Raych ti eyert rechiire siin. Meyer tuun fiile seechen kriin, tepay ti frooheet fon siin unser keliipte fom toot uf xtaye. In tiise tsayt, Yeehoowa tuut Apraham weeche sayn klaape un ketult peloone — Eyer tuut tee un sayn familye tsurik tsum leepe uf te eyert pringe. Tuust tuu tat sin fer tëne wilkhome? Tuu khanst, wëns tuu, soo wii Apraham, wilich pist fer weeche Kot sayn Raych fon etwas uf kepe, wëns tuu tayn klaape halst opwool ti propleeme un wëns tuu lërnst ketultich uf Yeehoowa waarte. (Lees Miqueias 7:7.) *
LIIT 74 A canção do Reino
^ parágrafo 5 Ti erfiilung fon een ferxpreche waarte khan unser ketult proope — un in etliche situatsyoone, unser klaape. Was fer lisyoone khene mer mit Apraham lërne, woo tuun uns helfe ketultich waarte Yeehoowa sayn ferxpreche erfiile? Un was fer kuut payxpiil hon etliche fon Yeehoowa sayn tiiner hayt se taach fer uns kelos?
^ parágrafo 2 (Hebreus 11:8-10) Torich tas klaape hot Apraham aan keheert wii eyer keruuft kep is, un eyer is tsu een plats kang woo eyer wii ërpxaft kriin teet; eyer is kang, opwool eyer wust net woo eyer hin keent. 9 Torich tas klaape, hot eyer wii auslënter in tëm ferxprochne lant keleept, wii wën eyer in een frëmte lant weyer, un hot in parake kewoont mit Isak un Yaakop, woo ërper fom selwich ferxpreche mit tëm waare. 10 Wayl tee hot ti xtat kewaart woo woere funtamente hot, woo is fon Kot kepleent un kepaut kep.
^ parágrafo 2 (Hebreus 11:16) Awer yets, fersuuche se eene peser plats hin kriin — eene plats woo tsum himel keheert. Tes weeche, tuut Kot sich fon tëne net xeeme, tas se Tëm wii sayn Kot ruufe, wayl Tee hot een xtat fer tëne foer perayt.
^ parágrafo 4 (Gênesis 17:1, 2) Wii Apran 99 yoere alt waar, is Yeehoowa foer Apran khom un hot tëm kesaat: “Ich sin te Ale Mechtiche Kot. Kee foer mich un tsaych tas tuu khee feeler host. 2 Ich tuun mayn pakt mit tich fest xtele un mache tas tuu fiil — wërklich fiil — nookhomer host.
^ parágrafo 4 (Gênesis 17:6) Ich tuun mache tas tuu aarich, seer fruchtpar wërst, un tas natsyoone fon tich ap xtame, un kheeniche tuun fon tich khome.
^ parágrafo 13 Tas leepes kexicht fom pruuter Walden xteet in tëm piichelche A Sentinela 1te Teetsemper fon 2013, sayte 8-10.
^ parágrafo 14 Tas leepes kexicht fom pruuter Apostolidis xteet in tëm piichelche A Sentinela 1te Feepruer fon 2002, sayte 24-28.
^ parágrafo 16 Tas leepes kexicht fon te xwester Hyde xteet in tëm piichelche A Sentinela 1te Yuuli fon 2004, sayte 23-29.
^ parágrafo 17 (Miqueias 7:7) Awer, ich tuun uf Yeehoowa wachsam hofe. Ich tuun ketultich uf te Kot fon mayn retung waarte. Mayn Kot tuut mich heere.
^ parágrafo 61 PILT AUSLEYUNG Sayt 5: Een alt pheyerche tuut wayter Yeehoowa troy tiine opwool se kefoere hon. Wayl tii tuun sayn aue aan Yeehoowa sayn ferxpreche fer ti futuer hale, sayn klaape halt sich xtark.
