XTUUTYUM ARTIKEL 34
Tuu host een plats in Yeehoowa sayn kemaynt!
“Soo wii te khërper is ploos eens, awer fiile teele hot, un ale teele fon tiise khërper, opwool se fiil sin, sin ploos eene khërper, soo is aach te Kristus.” (1 CORÍNTIOS 12:12)
LIIT 101 Eenich tuun mer Kot tiine
WAS TUUN MER SIIN? *
1. Was fer priwilëj hon mer?
WAS FER een priwilëj is teel fon Yeehoowa sayn kemaynt mache! Meyer sin in een kaystlich paratiis fol mit froo un friitliche layt. Was is tayn plats in te kemaynt?
2. Was fer ferklaychung hot te aphostel Phaul penutst in etliche fon sayn inspiriirte priife?
2 Meyer tuun fiil iwer tiise sache lërne torich een ferklaychung woo te aphostel Phaul penutst hot in etliche fon sayn inspiriirte priife. In yeete eene fon tiise priife, hot Phaul ti kemaynt mit een mënxliche khërper ferklaycht. Eyer hot aach yeete persoon in te kemaynt mit te khërper teele ferklaycht. (Rom. 12:4-8; 1 Cor. 12:12-27; Efé. 4:16)
3. Was fer tray lisyoone tuun mer in tiise artikel noo kuke?
3 In tiise artikel, tuun mer tray wichtiche lisyoone noo kuke woo khene mer mit Phaul sayn ferklaychung lërne. Eyerst, mer tuun lërne tas yeete eene fon uns een plats * in Yeehoowa sayn kemaynt hot. Tsweet, wole mer siin was khene mer mache wën mer fine tas mer net nutslich in te kemaynt sin. Un trit, mer tuun siin warom prauche mer fiil se tuun hon in te aarwayt woo Yeehoowa uns in te kemaynt kep hot.
YEETE EENE FON UNS HOT EEN TEEL IN YEEHOOWA SAYN KEMAYNT
4. Was tuut Romanos 12:4, 5 uns in lërne?
4 Ti eyerst lisyoon woo mer khene mit Phaul sayn ferklaychung lërne, is tas yeete eene fon uns een wichtiche plats in Yeehoowa sayn familye hot. Phaul tuut sayn ferklaychung soo aan fange: “Soo wii meyer fiile teele in ploos eene khërper hon, awer al ti teele hon net te selwiche tswek, tan, opwool meyer fiile sin, sin mer ploos eene khërper in eenichkheet mit Kristus, awer, yeete eene fon uns is een teel woo eene tsu te anere keheert.” (Rom. 12:4, 5) Was wolt Phaul too saan? Meyer al hon unerxiitliche teele in te kemaynt, awer yeete eene fon uns hot fiil weyert.
Meyer hon unerxiitliche teele in te kemaynt, awer yeete eene fon uns hot fiil weyert (Kuk ti apsetse 5-12.) *
5. Was fer “kexenk” tuut Yeehoowa fer ti kemaynt kepe?
5 Wëns tuu tenkst aan tii woo een plats in te kemaynt hon, fiilaycht tii eyerste woo in tayn khop khome sin tii woo ti kemaynt fiire. (1 Tes. 5:12; Heb. 13:17) Es is wërklich woer tas, torich Kristus, Yeehoowa hot “mëner wii kexenk” fer sayn kemaynt kep. (Efé. 4:8) Tepay mit tiise “mëner wii kexenk”, sin ti Rechiirente Khërperxaft mitkliiter, ti helfer fon te Rechiirente Khërperxaft, ti Filiaale Komisyoone mitkliiter, sirkuyt superintentente, leerer fon piiplixe xuule, elteste un ministeryaale tiiner. Ale tiise priiter sin fom hayliche kayst in kesetst fer Yeehoowa sayn xeef, woo fiil weyert hon, uf phase un ti kemaynt ferxtërke. (1 Ped. 5:2, 3)
6. Tëm noo 1 Tessalonicenses 2:6-8, was tuun tii priiter, woo sin fom hayliche kayst in kesetst, sich aan xtrenge fer se mache?
6 Priiter sin fom hayliche kayst in kesetst fer unerxiitliche flichte uf phase. Un soo wii ti hënt, ti fiis un anere khërper teele xafe fer nutse fer tas kanse khërper pringe, tuun tiise priiter xtram xafe fer nutse fer ti kans kemaynt pringe. Tii tuun net eere fer sich selepst suuche. Xtats tas, tuun se sich aan xtrenge fer sayn priiter un xwestere ferxtërke. (Lees 1 Tessalonicenses 2:6-8. *) Wii petanklich sin mer tsu Yeehoowa weeche tiise krooshërtsliche un kaystliche mëner!
7. Was fer seechen tuun fiile in te fol tsayt tiinst kriin?
7 Welche in te kemaynt fiilaycht sin in kesetst fer se tiine wii misyoneere, spetsyaal pioneere un rekulaar pioneere. Wërklich, priiter un xwestere uf te kans welt hon ëntxlist preetiche un tisipele mache wii sayn fol tsayt aarwayt. Weeche tiise ëntxlus, hon se fiile keholef Yeesus sayn tisipele wëre. Opwool tiise fol tsayt preeticher, in te meyerst tsayt, hon net fiil kelt orer tinge, Yeehoowa tuut tëne peloone mit een leepe fol mit seechen. (Mar. 10:29, 30) Meyer hon iwer kërn tiise liipe priiter un xwestere, un mer sin petanklich tas tii tuun teel fon te kemaynt mache!
8. Warom is yeete puplikatoer fon te kuute oter wichtich fer Yeehoowa?
8 Awer, meecht ploos ti priiter woo een flicht hon, orer woo in te fol tsayt tiinst sin, een plats in te kemaynt hon? Sicher net! Yeete puplikatoer fon te kuute oter is wichtich fer Kot un fer ti kemaynt. (Rom. 10:15; 1 Cor. 3:6-9) Tas is soo, wayl eene fon te haupste opjetiiwe fon te kemaynt is tisipele fon unser Hër, Yeesus Kristus, mache. (Mat. 28:19, 20; 1 Tim. 2:4) Al tii in te kemaynt woo preetiche — tii woo ketaaft sin, un ti puplikatoore woo noch net ketaaft sin — fersuuche tiise aarwayt tas haupste in sayn leepe mache. (Mat. 24:14)
9. Weeche was kepe mer weyert fer unsere xwestere?
9 Yeehoowa kept fer ti xwestere in te kemaynt een plats woo fiil eere hot. Tee kept fiil weyert fer tiise fraae, muter, witfraae un leetiche xwestere woo tuun tëm troy tiine. Ti Piipel tuut ofts xpreche iwer ekstra fraae woo hon Kot kefalt. Tii sin keloopt weeche sayn xeene payxpiile fon kluucheet, klaape, flaysichkheet, koraaj, krooshërtslichkheet un kuute aarwayte. (Luc. 8:2, 3; Atos 16:14, 15; Rom. 16:3, 6; Fil. 4:3; Heb. 11:11, 31, 35) Wii petanklich sin mer tsu Yeehoowa tas mer xwestere mit tiise selwiche xeene kwaliteete in te kemaynt fine!
10. Weeche was kepe mer weyert fer ti elter?
10 Meyer sin aach froo tas es kept fiile elter priiter un xwestere in te kemaynt. Etliche fon tëne hon Yeehoowa troy ketiint torich sayn kanse leepe. Anere, fiilaycht, hon ti woerheet kraat kelërnt. Fiile fon tiise priiter un xwestere sin kesuntheet propleeme am mit mache, wayl tii sin am elter wëre. Weeche tiise propleeme, fiilaycht khene se net mache ales was se wole in te kemaynt un in te preetich aarwayt. Soo wii soo, ti elter mache ales was tii khene in te preetich, un penutse sayn kanse kraft fer ti anere uf muute un iipe. Un meyer tuun nutse fon sayn speryens kriin. Tii sin wërklich xeen — foer Yeehoowa un foer uns. (Pro. 16:31)
11-12. Wii tuun ti yunge in tayn kemaynt tich uf muute?
11 Tenk aach aan ti yunge in te kemaynt. Tii tuun fiile kefoere mit mache wii se in tiise welt wakse, woo is unich te kontrol fon tëm Taywel un sayn xlechte mënunge. (1 João 5:19) Noch, meyer tuun uns al uf kemuut xpiire wën mer siin ti yunge komentaare in te fersamlung kepe, in te preetich xafe, un mit koraaj sayn klaape xitse. Yawool, teyer yunge, hot een wichtiche plats in Yeehoowa sayn kemaynt! (Sal. 8:2)
12 Awer, welche fon unser priiter un xwestere fine es xweyer se klaape tas se een nutslich teel fon te kemaynt sin. Was khan uns helfe se xpiire tas yeete eene fon uns eene plats in te kemaynt hot? Wole mer yets siin.
MËRK TAYN PLATS IN TE KEMAYNT
13-14. Warom tuun etliche fiilaycht tenke tas se net nutslich in te kemaynt sin?
13 Kuk ti tsweet lisyoon woo khene mer mit Phaul sayn ferklaychung lërne. Tee tuut te acht ruufe fer een propleem woo fiile hayt hon: tii fine es xweyer se klaape tas se nutslich in te kemaynt sin. Phaul xraypt: “Wën te fuus saan teet: ‘Wayl ich net een hant sin, sin ich khee teel fom khërper’, es is net weeche tas, tas es noo lose teet een teel fom khërper sin. Un, wën tas oer saan teet: ‘Wayl ich net een au sin, sin ich khee teel fom khërper’, es is net weeche tas, tas es noo lose teet een teel fom khërper sin.” (1 Cor. 12:15, 16) Was wolt Phaul uns in lërne?
14 Wëns tuu tich mit te anere in te kemaynt ferklaychst, tuust tuu fiilaycht net mërke wii fiil weyert tuu host. Fiilaycht etliche priiter in tayn kemaynt sin kexik in te anere in lërne, ti tinge in ortnung lose orer ti anere treeste un uf muute. Am xtant, tenkst tuu tas tuu khanst net soo kuut wii ti anere sin. Tas tsaycht tas tuu teemuutich pist un tas tuu tayn krënse erkhënst. (Fil. 2:3) Awer, phas uf. Wëns tuu tich noo un noo mit te anere ferklaychst woo ekstra apiliteete hon, tuust tuu tich oone muut fine. Soo wii Phaul kesaat hot, fiilaycht khanst tuu soo kaar tenke tas tuu khee plats in te kemaynt host. Was khan tich helfe torich tiise xpiirunge triwer wech khome?
15. Tëm noo 1 Coríntios 12:4-11, was sole mer iwer unser apiliteete erkhëne?
15 Yeehoowa hot fer welche fon te eyerste kriste wunerliche kexenke fom hayliche kayst kep, awer net al ti kriste hon ti selwiche kexenke kriit. (Lees 1 Coríntios 12:4-11.) * Opwool Yeehoowa hot unerxiitliche kexenke un apiliteete fer tëne kep, yeete krist hat noch fiil weyert. Hayt se taach, tuun mer net wunerliche kexenke fom hayliche kayst kriin, awer tas printsiipye tiint noch: fiilaycht hon mer net al ti selwiche apiliteete; awer, foer Yeehoowa, hon mer al fiil weyert.
16. Was fer aanreet fom aphostel Phaul sole mer aan wëne?
16 Xtats uns mit te anere kriste ferklayche, sole mer te aphostel Phaul sayn aanreet aan wëne: “Tas yeete eene sayn aychne aktsyoone noo kukt. Un tan, tuut eyer sich fraye ploos weeche was eyer selepst kemacht hot, oone sich mit yemant aneres ferklayche.” (Gál. 6:4)
17. Was fer nutse tuun mer kriin wën mer Phaul sayn aanreet aan wëne?
17 Wën mer Phaul sayn aanreet aan wëne un unser aychne aktsyoone noo kuke, fiilaycht tuun mer aan fange se mërke tas mer aach ekstra apiliteete hon. Tsum payxpiil, am xtant, een elteste is net eene kuute reetner, awer is eyer kexik in tisipele mache. Orer khan sin tas tee tuut net ales im pest ortnung lose, soo wii ti anere elteste, awer eyer is een aarich liiplich un froyntlich elteste, un ti priiter un xwestere tuun sich kuut fine fer tëm piiplixe aanreete ferlange. Orer fiilaycht is eyer kekhënt wayl eyer tuut ti anere kuut in sayn haus aan nëme. (Heb. 13:2, 16) Wën mer unser apiliteete taytlich mërke, tuun mer uersache hon fer uns kuut fine iwer was meyer khene fer ti kemaynt mache. In te selwich tsayt, tas tuut uns helfe net nayt iwer ti priiter xpiire woo unerxiitliche apiliteete wii unseres hon.
18. Was heleft uns peser in te preetich aarwayt xafe?
18 Is ekaal tas plats woo mer in te kemaynt hon. Meyer al sole te wunx hon fer unser tiinst ferpesere un unser apiliteete ëntwikele. Fer uns helfe tas mache, Yeehoowa kept uns mechtich kuut iipung torich sayn orkanisatsyoon. Tsum payxpiil, in unser mite woch fersamlung, wëre mer in kelërnt iwer wii khene mer peser in te preetich aarwayt xafe. Tuust tuu tich aan xtrenge fer tiise iipung aan wëne?
19. Wii khanst tuu es hin kriin ti Xuul fer Preeticher fom Raych mache?
19 Aner wunerlich iipung prokram is ti Xuul fer Preeticher fom Raych. Ti priiter un xwestere woo in te fol tsayt tiinst sin, un woo tswixich 23 un 65 yoer alt sin, khene tiise xuul mache. Fiilaycht, siit es aus tas tuu khenst nii tiise tsiil hin kriin. Awer, xtats een list xraype fon uersache warom khanst tuu tas net mache, xrayp een list mit uersache weeche was wilst tuu tas mache. Tan, pleen was prauchst tuu mache fer tich kwalifitsiire. Mit Yeehoowa sayn hilef un perseenlich aanxtrengung, fiilaycht khanst tuu mache was tuu ketenkt host unmeechlich weyer.
PENUTS TAYN APILITEETE FER TI KEMAYNT FERXTËRKE
20. Was khene mer mit Romanos 12:6-8 lërne?
20 Ti trit lisyoon woo khene mer mit Phaul sayn ferklaychung lërne, xteet in Romanos 12:6-8. * (Lees.) Too, tuut Phaul noch mool tsayche tas al in te kemaynt unerxiitliche apiliteete hon. Awer yets, pringt tee foer tas mer sole yeete apiliteet woo mer hon penutse fer ti kemaynt ferxtërke un uf muute.
21-22. Was khene mer mit Robert un Felice lërne?
21 Kuk tas payxpiil fom pruuter Robert. * Noo tas eyer in te auslënter ketiint hot, waar eyer fer te Petël in sayn aychne lant kexikt. Opwool ti priiter hon tëm ti sicherheet kep tas es waar net wayl eyer hot etwas ferkheertes kemacht, tee hot kesaat: “Ti nekatiiw ketanke woo ich iwer mich selepst hat — tas ich unutslich waar — hot fer fiile moonate ketauert. Manich mool, wolt ich soo kaar noo lose in Petël tiine.” Wii hot eyer sayn frooheet tsurik kriit? Een elteste hot tëm erinert tas Yeehoowa iipt uns in yeete friier insetsung woo mer hate, tas mer nutslicher wëre in te insetsung woo mer yets sin. Robert hot kemërkt tas eyer praucht noo lose se kuke fer was xon rom kang is un aan fange sich traan hale aan was eyer khont yets mache.
22 Te pruuter Felice Episcopo hot een eenlich kefoer mit kemacht. Tee un sayn fraa hon ti Xileat Xuul im yoer 1956 kemacht, un hon im sirkuyt in Poliiwya kexaft. Im yoer 1964, hon se een puup kriit. Felice saat: “Es waar aarich xweyer ti insetsung woo mer keliipt hate, hiner lose. Ich khan saan tas ich neekst een yoer mich peklaae hon. Awer, mit Yeehoowa sayn hilef, hon ich mayn aanxtelung keënert un hon mich traan kehalt in mayn nay flicht wii fater.” Tuust tuu tich soo wii Robert orer Felice xpiire? Tuust tuu tich oone muut fine wayl yets host tuu net ti selwiche priwilëje woos tuu friier hast? Wëns yaa, wërst tuu frooer wëns tuu ënerst woos tuu hin kukst un aan fangst tich traan hale aan was tuu khanst yets mache fer Yeehoowa un ti priiter tiine. Tuu imer fiil se tuun hon un penuts tayn apiliteete fer ti anere helfe. Soo, tuust tuu tich fraye soo lang wiis tuu ti kemaynt ferxtërkst.
23. Fer was sole mer tsayt hoole, un was tuun mer im neekste artikel noo kuke?
23 Yeete eene fon uns hot fiil weyert foer Yeehoowa. Tee wil tas mer teel fon sayn familye mache. Wën mer tsayt hoole fer triwer noo tenke aan was khene mer mache fer ti priiter un xwestere ferxtërke, un tan uns aan xtrenge fer tas mache, tuun mer net uns fine wii wën meyer khee teel fon te kemaynt sin. Awer, wii tuun mer ti anere in te kemaynt siin? Wii khene mer tsayche tas mer tëne liipe un respektiire? Im neekste artikel, tuun mer tiise wichtiche sache noo kuke.
LIIT 24 Venham para o monte de Jeová!
^ parágrafo 5 Meyer al wole xpiire tas mer weyert foer Yeehoowa hon. Awer, als mool, khene mer uns frooe: ‘Was is mayn teel in te kemaynt?’ Tiise artikel tuut uns helfe siin tas yeete eene fon uns een wichtiche plats in te kemaynt hot.
^ parágrafo 3 TUU PESER FERXTEEN: Tas plats woo mer in Yeehoowa sayn kemaynt hon, hot se tuun mit te flicht woo yeete eene fon uns hot fer ti kemaynt ferxtërke un helfe. Es hot niks se tuun mit unser ras, wii fiil kelt mer hon, weer unser familye is, was unser kewoonheete sin orer wii fiil xuul mer hon.
^ parágrafo 6 (1 Tessalonicenses 2:6-8) Meyer sin aach net ti eere fom mënxe am suuche, nee, net fon aych orer fon te anere, opwool mer khente een ekonomix last fer aych sin, wii aphostele fom Kristus. 7 Im keeche teel, meyer hon aych liiplich pehantelt, soo wii een muter woo tuut sayn aychne nëneche soriche un wërme. 8 Soo, weeche unser hërtslich liip tsu aych, waare mer pextimt, net ploos ti kuute oter fer aych kepe, awer aach unser aychne leepe, wayl mer hon aych fiil keliipt.
^ parágrafo 15 (1 Coríntios 12:4-11) Es kept unerxiitliche kexenke, awer es kept te selwiche kayst; 5 un es kept unerxiitliche aate fer se tiine, toch es kept te selwiche Hër; 6 un es kept unerxiitliche aktiwiteete, toch es is te selwiche Kot woo ales macht in ale. 7 Awer ti aat wii te kayst tsaycht sich, is fer yeete eene kept mit eene nutsliche tswek. 8 Wayl fer eene, is tas wort fon kluucheet kep torich te kayst; fer aner, tas wort fon khëntnis, torich te selwiche kayst; 9 fer aner, te klaape, torich te selwiche kayst; fer aner, kexenke fer se heele, torich tiise eensiche kayst; 10 fer noch aner, kexenke fer wunere mache; fer aner, kexenke fer se profetisiire; fer aner, inspiriirte pexeete erkhëne; fer aner, unerxiitlixe xprooche xpreche; un fer aner, xprooche aus leye. 11 Awer tas ales is torich tas selwiche un eensiche kayst kemacht, woo tuut tas fer yeete eene aus teele, soo wii eyer wil.
^ parágrafo 20 (Romanos 12:6-8) Meyer hon unerxiitliche kexenke tëm noo ti unfertiint kuutheet woo uns kep waar; tes weeche, wën tas kexenk fon profetsii is, wole mer profetisiire tëm noo unser klaape; 7 wën es fer se tiine is, wole mer tiine; weer tas kexenk fer in lërne hot, tas eyer in lërnt; 8 weer tas kexenk fer uf muute hot, tas eyer uf muut; weer aus teelt, mach es mit krooshërtslichkheet; weer fiirt, mach es mit flaysichkheet; weer parmhërtslichkheet tsaycht, mach es mit frayt.
^ parágrafo 21 Etliche naame waare keënert.
^ parágrafo 66 PILTER AUSLEYUNGE Sayte 22-23: Ti tray pilter tsayche was pasiirt foer, torich un noo een fersamlung. Pilt 1: Een elteste tuut een pesuucher hërtslich wilkhome, een yunge pruuter tuut te som fërtich lose un een xwester fertseelt mit een elter xwester. Pilt 2: Yunge un alt priiter un xwestere tuun sich meele fer antworte in Te Wachthorm xtuutyum kepe. Pilt 3: Een pheyerche heleft te Raych Saal sauwer mache. Een muter heleft sayn meetche een tonatiiw in te kontripuytsyoon khaste tuun. Een yunge pruuter tuut ti puplikatsyoone uf phase un een aner pruuter tuut een alt xwesterche uf muute.
