1. Was hot Tawi iwer Yeehoowa sayn teemuut kesaat?

KHENE mer wërklich saan tas Yeehoowa teemuutich is? Yaa, sicher! Kuk was Tawi iwer Kot kesaat hot: “Tuu kepst mich tayn retung xilt, un tayn teemuut macht mich kroos.” (2 Sam. 22:36; Sal. 18:35) Wii Tawi tiise wërter kexrip hot, fiilaycht waar tee am tenke in te taach woo te profeet Samuël is tsu tëm sayn haus khom fer te futuer kheenich fon Israël salpte. Tawi waar ti yingste fon 8 puupe. Soo wii soo, waar tee woo Yeehoowa raus kesuucht hot fer ufm kheenich Saul sayn plats plaype. (1 Sam. 16:1, 10-13)

2. Was tuun mer in tiise artikel siin?

² Sicher, hat Tawi ti selwiche xpiirunge fon tëm xrayper fom Salmo 113, woo hot iwer Yeehoowa kesaat: ‘Tee tuut sich piike fer te himel un ti eyert aan kuke, tuut te teemuutiche fom xtaap uf heepe. Eyer tuut te aarm uf heepe tas eyer sich mit te heechste hëre setst.’ (Sal. 113:6-8) In tiise artikel tuun mer siin etliche situatsyoone woo Yeehoowa hot teemuut ketsaycht, un was fer wichtiche lisyoone khene mer mit tëm sayn payxpiil lërne. Noo heyer, tuun mer siin was khene mer iwer teemuut lërne mim kheenich Saul, te profeet Taniël un Yeesus.

3. Wii tuut Yeehoowa mit uns um keen, un was tuut tas tsayche?

³ Yeehoowa tsaycht tas eyer teemuutich is torich ti aat woo eyer mit imperfëkte mënxe um keet. Tee tuut net ploos unser aanpeetung aan nëme, awer siit uns aach wii froynte. (Sal.  25:14) Un tas mer een froyntxaft mit tëm hon khene, hot Yeehoowa te eyerste xrit kep un sayn Soon fer uns kexikt wii een opfer fer unser sinte teke. Wii fiil parmhërtslichkheet — wii fiil mitlayt — hot Yeehoowa uns ketsaycht!

4. Was hot Yeehoowa uns kep, un warom?

⁴ Kuk een aner aat wii Yeehoowa tsaycht tas eyer teemuutich is. Wii te Kriatoer, khent Yeehoowa uns mache oone ti apiliteet fer raus suuche wii mer leepe teete. Awer tee hot tas net soo kemacht. Tee hot uns noo tëm sayn pilt kemacht un frayheet kep fer raus suuche was mer mache tuun. Tee wil tas meyer — keweenliche mënxe — tëm tiine fom hërts aus, weeche liip tsu tëm un wayl mer erkhëne tas tëm aan heere is kuut fer uns. (Deut. 10:12; Isa. 48:17, 18) Meyer sin aarich petanklich tas Yeehoowa soo een teemuutiche Kot is!

5. Wii tuut Yeehoowa uns lërne teemuutich sin? (Kuk tas pilt am aanfang fom piichelche.)

⁵ Yeehoowa lërnt uns wii teemuutich sin torich ti aat wii eyer mit uns um keet. Nimant uf te kans Uniwërsum is kluucher wii Yeehoowa. Soo wii soo, is eyer wilich fer aan nëme was ti anere pleene. Tsum payxpiil, Yeehoowa hot ti hilef fon sayn Soon aan kenom fer ales erxafe. (Pro. 8:27-30; Col. 1:15, 16) Un opwool Yeehoowa te Ale Mechtiche is, kept eyer etliche responsapiliteete fer ti anere. Tsum payxpiil, tee hot Yeesus wii Kheenich fom Raych in kextelt un tuut een teel autoriteet fer 144.000 mënxe kepe, woo tuun mit Yeesus rechiire. (Luc. 12:32) Sicher, Yeehoowa hot Yeesus keiipt fer Kheenich un Heechste Priister sin. (Heb. 5:8, 9) Tee tuut aach iipe tii woo tuun mit Yeesus rechiire, tas se khene sayne flichte erfiile. Awer, Yeehoowa tuut net fersuuche yeete kleene tings fon tëne  sayn aarwayt kontroliire. Xtats tas, tee traut tas tii tuun Sayn wile mache. (Apo. 5:10)

6-7. Wii khene ti familye xëfe, ti elteste un ti eltere Yeehoowa noo mache?

⁶ Wën unser himlixe Fater — woo praucht fon nimant hilef hon — kept responsapiliteete fer ti anere, wii fiil mee mise meyer tas mache! Tsum payxpiil, pist tuu een familye xëf orer een elteste in te kemaynt? Tuu Yeehoowa sayn payxpiil noo mache: kep responsapiliteete fer ti anere un fersuuch net yeete kleene tings fon tëne sayn aarwayt kontroliire. Wëns tuu Yeehoowa noo machst, tuust tuu net ploos te aarwayt fërtich kriin, awer aach anere iipe un tëne noch sicher fon sich selepst lose. (Isa. 41:10) Was noch khene tii woo een teel autoriteet hon, fon Yeehoowa lërne?

⁷ Ti Piipel tsaycht tas Yeehoowa khimert sich mit was ti engele mëne. (1 Reis 22:19-22) Eltere, wii khent teyer Yeehoowa sayn payxpiil noo mache? Wën es phast, froot tayn khiner was tii mëne iwer wii een aarwayt sol kemacht wëre. Un wën was tii saan xtimt, macht kraat soo.

8. Wii is Yeehoowa ketultich mit Apraham un Sara um kang?

⁸ Een aner aat wii Yeehoowa tsaycht tas eyer teemuutich is, is torich sayn ketult. Tsum payxpiil, Yeehoowa is ketultich wën tëm sayn tiiner, mit respëkt, welche frooche iwer sayn ëntxlise mache. Yeehoowa hot Apraham keheert wii eyer sayn mënung fertseelt hot iwer tas ëntxlus fon Sotooma un Komoora fernichte. (Gên. 18:22-33) Un eriner tich wii is Yeehoowa mit Apraham sayn fraa, Sara, um kang. Tee hot sich net pelaytich orer pees kefun wën se hot kelacht fon te ferxpreche tas tii teet xwanger wëre, opwool se alt waar. (Gên. 18:10-14) Xtats tas, tee hot Sara mit respëkt pehantelt.

9. Was khene ti eltere un ti elteste mit Yeehoowa sayn payxpiil lërne?

⁹ Eltere un elteste, was khent teyer fon Yeehoowa sayn payxpiil lërne? Was macht teyer wën ayre khiner orer yemant in te kemaynt tuut net mit ayre ëntxlise xtime? Tuut teyer klaych saan tas se ferkheert sin? Orer fersuucht teyer tëne sayn mënung ferxteen? Wën tii woo autoriteet hon tuun Yeehoowa noo mache, ti familye un ti kemaynte tuun sicher nutse kriin. Pis yets, hon mer kesiin was khene mer iwer teemuut lërne mit Yeehoowa sayn payxpiil. Yets, wole mer siin wii khene mer teemuut tsayche torich anere payxpiile fon te Piipel.

10. Wii tuut Yeehoowa ti payxpiile fon anere penutse fer uns in lërne?

¹⁰ Yeehoowa, unser “Kroose Leerer”, hot payxpiile in sayn Wort kelos fer uns in lërne. (Isa. 30:20, 21) Meyer lërne wën mer triwer noo tenke aan te piiplixe kexichte iwer layt woo hate kwaliteete woo hon Kot kefalt — tepay ti teemuut. Meyer tuun aach lërne wën mer noo kuke was pasiirt is mit tii woo hon net tiise xeene kwaliteete ketsaycht. (Sal. 37:37; 1 Cor. 10:11)

11. Was lërne mer mit Saul sayn xlechte payxpiil?

¹¹ Tenk mool aan was is mim kheenich Saul pasiirt. Wën tee yung waar, hot eyer erkhënt tas eyer krënse hat, un hot soo kaar net mee responsapiliteete klaych aan kenom. (1 Sam. 9:21; 10:20-22) Awer mit te tsayt, Saul is hoochmuutich kep. Tee hot aan kefang sich soo aan xtele klaych wii eyer kheenich kep is. Een mool, eyer hot sayn ketult ferloer wii eyer te profeet Samuël am waarte waar. Xtats traue tas Yeehoowa tas folek helfe teet, Saul hot een ferprëntne opfer kemacht — etwas  woo eyer hat khee recht fer se mache. Was fer waar te resultaat? Saul hot Yeehoowa sayn tsuxtimung ferloer, un am ën, Yeehoowa hot tee wii kheenich net mee aan kenom. (1 Sam. 13:8-14) Sicher, mer sole fon tiise payxpiil lërne, un nii uns hoochmuutich aan xtele.

12. Weeche was is Taniël eene kuute payxpiil fer uns?

¹² Kans anerste wii Saul sayn xlechte payxpiil, kuk mool tas kuute payxpiil fom profeet Taniël. Torich sayn kanse leepe, Taniël is teemuutich keplip un hot imer Yeehoowa sayn orientiirung kesuucht. Tsum payxpiil, wën tee fon Yeehoowa penutst waar fer Napukotonosoor sayn traam aus leye, Taniël hot net kesaat tas eyer hat es aleen raus kriit. Xtats tas, tee hot ti eere fer Yeehoowa kep. (Dan. 2:26-28) Was is ti lisyoon fer uns? Wën ti priiter tuun kërn unsere reete heere orer wën mer kuute resultaate in te preetich hon, meyer sole ti kanse eere fer Yeehoowa kepe. Meyer sole erkhëne tas mer khente niks oone Yeehoowa sayn hilef mache. (Fil. 4:13) Wën mer soo uns aan xtele, tuun mer aach Yeesus sayn xeene payxpiil noo mache. Wii soo?

13. Was fer lisyoone tuun mer mit Yeesus lërne tëm noo sayn wërter in João 5:19, 30?

¹³ Opwool eyer Kot sayn perfëkte Soon waar, Yeesus hot imer uf Yeehoowa ap kehong. (Lees João 5:19, * 30. *) Tee hot nii fersuucht te autoriteet fon sayne himlixe Fater fer sich hoole. Filipenses 2:6 saat uns tas Yeesus “hot net ketenkt Kot sayn plats fer sich nëme, in anere wërter, sich kraat soo wii Kot mache.” Yeesus hot sayn krënse erkhënt un hot ti autoriteet fon sayne Fater respektiirt.

14. Wën se etwas ferlangt hon woo Yeesus khee recht hat fer se kepe, wii hot eyer keantwort?

¹⁴ Tenk iwer was Yeesus kemacht hot wën Tyako, Yoohan un tëne sayn muter hon etwas ferlangt woo Yeesus khee recht hat fer se kepe. Yeesus hot klaych kesaat tas ploos sayn himlixe Fater khont ëntxlise weer teet sich aan te rechts un aan te links sayt fon Yeesus im Raych setse. (Mat. 20:20-23) Yeesus  hot erkhënt tas eyer krënse hat. Tee hot nii etwas kemacht woo Yeehoowa hat net tëm ti autoriteet kep fer se mache. (João 12:49) Wii khene mer Yeesus sayn xeene payxpiil noo mache?

15-16. Wii khene mer te aanreet fon 1 Coríntios 4:6 aan wëne?

¹⁵ Meyer khene Yeesus sayn payxpiil noo mache wën mer aan wëne te aanreet woo in 1 Coríntios 4:6 xteet, woo saat: ‘Keet net iwer ti tinge woo kexrip sin.’ Wën yemant een aanreet uns ferlangt, sole mer nii ti anere tswinge fer unser mënunge aan nëme, orer tas eyerste tings woo in unser khop khom saan. Xtats tas, sole mer ti acht pringe fer was ti Piipel un unser puplikatsyoone aan reete. In tiise aat, tsayche mer tas mer ferxteen tas mer net ales wise. Meyer tuun teemuut tsayche, wayl meyer erkhëne tas Yeehoowa sayn aanreete sin imer peser wii unseres. (Apo. 15:3, 4)

¹⁶ Tepay mit eere fer Yeehoowa pringe, es kept noch aach anere kuute uersache fer teemuutich sin. Wole mer yets lërne wii khan ti teemuut frooheet pringe un uns helfe peser mit te anere um keen.

17. Weeche was sin ti teemuutiche layt frooer?

¹⁷ Wën mer teemuutich sin, sin mer frooer. Weeche was? Wayl wën mer erkhëne tas kepts tinge woo mer net mache khene, tuun mer petanklich un froo wëre fer yeete hilef woo mer kriin. Tsum payxpiil, tenk aan te situatsyoon woo Yeesus hot 10 mëner, woo lëpra hate, keheelt. Ploos eene fon tëne is tsu Yeesus retuer khom fer se tanke tas eyer tëm fon tiise xroo krankheet keheelt hot — etwas woo tiise man khent nii aleen mache. Tiise teemuutiche man waar petanklich fer ti hilef woo eyer kriit hat, un weeche tas, hot eyer eere fer Yeehoowa kep. (Luc. 17:11-19)

18. Wii tuut ti teemuut uns helfe mit te anere kuut um keen? (Romanos 12:10)

 ¹⁸ Es is laychter fer ti teemuutiche layt kuut mit te anere um keen un xtarke froyntxafte hon. Warom? Wayl tii tuun uf te anere layt traue un froo erkhëne tas se xeene kwaliteete hon. Teemuutiche layt wëre froo wën ti anere tuun kuut sayn aarwayt mache un fine es net xweyer tëne loope un eere. (Lees Romanos 12:10.) *

19. Weeche was sole mer keeche ti hoochmuut khëmpfe?

¹⁹ Im keeche teel, hoochmuutiche layt fine es xweyer ti anere loope. Tii fine es peser wën tii selepst tas kriin. Es is laychter tas tii sich mit te anere ferklayche un fersuuche imer peser wii ti anere wëre. Xtats ti anere iipe un responsapiliteete fer tëne kepe, een hoochmuutich persoon tuut ofts tenke tas tii selepst mus tas tings mache, wayl in tëne sayn mënung, ti anere teete net tas richtich mache. Een hoochmuutich persoon hot eftas nayt un wunx fer wichticher wii ti anere wëre. (Gál. 5:26) Fer soo sorte layt, es is xweyer froyntxafte hon woo tuun lang tauere. Wën mer mërke tas mer een propleem mit hoochmuut hon, meyer sole eerlich fer Yeehoowa peete tas eyer uns heleft unser ‘ketanke naye mache’, tas ti hoochmuut khee teel fon unser personaliteet wërt. (Rom. 12:2)

20. Warom sole mer teemuutich sin?

²⁰ Meyer sin aarich petanklich fer Yeehoowa sayn payxpiil! Meyer siin sayn teemuut in te aat wii eyer mit sayn tiiner um keet — un meyer wole tëm noo mache. Meyer wole aach noo mache ti xeene payxpiile fon tii woo sin teemuutich mit Yeehoowa kang. Wole mer imer fer Yeehoowa ti eere un ti hërlichkheet kepe, woo ploos eyer fertiint. (Apo. 4:11) Wën mer soo mache, khene mer mit unser himlixe Fater keen, woo ti teemuutiche layt liipt.