1. Was host tuu iwer unser Kriatoer kelërnt?

PIST tuu in te woerheet kroos ketsoo kep? Tan, host tuu tsiimlich sicher iwer Yeehoowa fon kleen aan kelërnt. Tuu host kelërnt tas eyer te Kriatoer is, tas eyer xeene kwaliteete hot un tas eyer wil hon tas ti eyert een Paratiis wërt. (Xee. 1:1; Aph. 17:24-27)

2. Was tuun etliche layt tenke iwer tii woo aan een Kriatoer klaape?

² Awer, fiile layt klaape net tas es een Kot kept orer tas eyer al ti tinge kemacht hot. Xtats tas, klaape se tas tas leepe hot aleen aan kefang; tii klaape tas ti kriatuure woo mer hayt khëne, hon sich in te ferkangne tsayte lamsam ëntwikelt fon keweenliche kriatuure. Etliche woo aan tas klaape, hon fiil xuul; manich mool saan se: ‘Ti syens hot xon pewayst tas ti Piipel ferkheert is. Ti layt woo aan een Kriatoer klaape hon khee xuul; tii sin tum un laycht hinerkang.’

3. Warom is es wichtich unser klaape ferxtërke?

³ Tuust tuu, weeche ti mënunge fon tiise layt woo fiil xuul hon, tswayfele tas Yeehoowa unser liiplich Kriatoer is? Ti antwort hot fiil se tuun mit te uersach warom mer klaape tas Yeehoowa te Kriatoer is — hot yemant uns kesaat tas es soo is, orer hon mer aleen ti pewaysunge unersuucht? (1 Kor. 3:12-15) Ekaal wii lang mer xon in te woerheet sin, mise meyer al unser klaape wayter ferxtërke. Wën mer es mache, wëre mer net hinerkang wën ti layt saan tas was ti Piipel lërnt falx is. (Kol. 2:8; Hep. 11:6) Fer uns helfe, tuun mer in tiise artikel 3 frooche noo kuke: (1) Warom tuun fiile layt net aan een Kriatoer klaape? (2) Wii khanst tuu tayn klaape aan Yeehoowa, unser Kriatoer, ferxtërke? (3) Wii khanst tuu tayn klaape xtark hale?

4. Tëm noo Hepreeyer 11:1, aan was tuut te woere klaape sich xtaype?

⁴ Fer etliche layt, te klaape petayt aan etwas klaape oone pewaysunge hon. Awer, tëm noo te Piipel, te woere klaape is anerste. (Lees Hepreeyer 11:1.) * Ti Piipel saat tas te klaape xtaypt sich aan pewaysunge. Tsum payxpiil: opwool meyer khene net Yeehoowa, Yeesus un tas Raych siin, hon mer pewaysunge tas tii eksistiire tuun. (Hep. 11:3) Een syentist, woo Yeehoowa sayn Tsayer kep is, hot tas soo aus keleet: “Unser klaape is net plint, es wil saan, meyer tuun net ap xtose ti syentifixe woerheete.”

5. Warom tuun fiile klaape tas tas leepe aleen aan kefang hot?

⁵ Im xtant frooe mer uns: ‘Warom tuun soo fiile layt klaape tas Kot net te Kriatoer is, opwool soo fiil pewaysunge kepe tas Eyer ales kemacht hot?’ Een uersach is tas etliche hon nii mools ti pewaysunge noo kekukt. Robert, woo hayt een Yeehoowa sayn Tsayer is, saat: “In te xuul hon se nii mools iwer ti kriatsyoon kexproch. Tes weeche, hon ich ketenkt tas es net woer waar. Ploos wii ich 22 yoore alt waar, hon ich mit een Yeehoowa sayn Tsayer kexproch un kelërnt tas ti Piipel kuute pewaysunge kept tas Kot ales kemacht hot.” * (Kuk te khaste “ Een wichtich pexeet fer ti eltere”.)

6. Warom tuun etliche saan tas es kheen Kot kept?

⁶ Etliche klaape net aan een Kriatoer wayl se saan: ‘Ich klaape ploos aan was ich siin khan.’ Awer in woerheet, klaape se aan tinge woo se net siin tuun, soo wii te wint; tii mache tas wayl  se pewaysunge hon tas te wint eksistiirt. Te sort klaape woo in te Piipel foer khomt, xtaypt sich aach aan “pewaysunge fon wërklichkheete woo ma net siit”. (Hep. 11:1) Es khost fiil tsayt un aanxtrengung fer tiise pewaysunge aleen xtutiire un fiile layt hon net ti lust fer tas mache. Yemant woo ti pewaysunge net xtutiirt, tuut fiilaycht rechne: ‘Es kept kheen Kot.’

7. Tuun al ti layt woo fiil xuul hon ti mënung ap xtose tas Kot ales kemacht hot? Lee tas aus.

⁷ Etliche syentiste hon ti pewaysunge noo kekukt un hayt klaape se tas Kot tas Uniwërsum kemacht hot. * Soo wii Robert, iwer weem meyer foer heyer kexproch hon, etliche hon net keklaapt tas es een Kriatoer kept wayl ti kriatsyoon waar nii mools in te uniwersiteet in kelërnt. Awer fiile syentiste hon Yeehoowa  khëne kelërnt un hayt liipe se Tëm. Soo wii tiise syentiste, mise mer unser aychne klaape aan Kot ferxtërke, een tuun wii fiil xuul meyer hon. Nimant khan tas fer uns mache.

8-9. (a) Was fer frooch tuun mer yets noo kuke? (b) Wii tuut ti kriatsyoon xtutiire tich helfe?

⁸ Wii khanst tuu tayn klaape aan tëm Kriatoer ferxtërke? Wole mer 4 aate noo kuke.

⁹Tuu ti kriatsyoon xtutiire. Tuu khanst tayn klaape aan tëm Kriatoer ferxtërke wëns tuu ti tiere, ti planse un ti xtërne mit acht kukst. (Psal. 19:1; Isa. 40:26) Woos tuu mee too triwer xtutiirst, woo xtërker wërt tayn sicherheet tas Yeehoowa te Kriatoer is. Unser puplikatsyoone hon eftas artikele woo kleenichkheete iwer ti kriatsyoon aus leye. Tuu net fon tiise artikele aus rayse, fiilaycht am tenke: ‘Tii sin tsu xweyer fer se ferxteen.’ Lërn was tuu khanst. Un tuu noch mool kuke im jw.org ti xeene wiiteos iwer ti kriatsyoon woo in te forichte rechyonaale konkrëse ketsaycht kep sin.

10. Kep een payxpiil woo tsaycht tas es een Kriatoer kept. (Romaaner 1:20)

¹⁰ Wëns tuu ti kriatsyoon xtutiirst, phas mit acht uf ti tinge woos tuu khanst iwer te Kriatoer lërne. (Lees Romaaner 1:20.) * Tsum payxpiil: ti Sun kept hits un licht, woo neetich sin fer tas leepe too uf te eyert. Awer etliche fon te Sun sayn xtraale khene xaate mache. Tsum klik, sin ti mënxe fon tiise xtraale kexitst. Wii? Es kept ti osoonyo xicht um ti eyert rom, woo uns fon tiise xlechte xtraale xitst. Woo xtërker sin ti xlechte xtraale, woo kreeser wërt ti osoonyo xicht. Was mënst tuu? Mus tas net yemant too te hiner sin — een liipliche un xlaue Kriatoer?

11. Woo khanst tuu informatsyoone fine woo khene tayn klaape aan een Kriatoer ferxtërke? (Kuk te khaste “ Informatsyoone fer tayn klaape aan tëm Kriatoer ferxtërke”.)

¹¹ Im jw.org orer in tëm Índice das Publicações da Torre de Vigia, khanst tuu fiile informatsyoone iwer ti kriatsyoon fine woo khene tayn klaape ferxtërke. Fiilaycht khanst tuu aan fange mit te artikele un wiiteos fon te sekwens “Teve um projeto?” Tii sin khorts un kepe uns interesante informatsyoone iwer ti planse un ti tiere. Tii tsayche aach wii ti syentiste fersuuche projëkte mache tëm noo was se in te natuer siin.

12. Wëns tuu ti Piipel xtutiirst, aan was solst tuu tich traan hale?

¹²Tuu ti Piipel xtutiire. Te syentist iwer weem mer im apsats 4 kexproch hon, hot net klaych aan kefang aan een Kriatoer se klaape; tas hot tsayt kenom. Tee saat: “Mayn klaape hot sich kextaypt net ploos aan te syens, awer aach aan was ich aan te Piipel kelërnt hon.” Fiilaycht tuust tuu ti Piipel xon kuut khëne. Awer fer tayn klaape aan tëm Kriatoer ferxtërke, must tuu wayter Kot sayn Wort xtutiire. (Yos. 1:8; Psal. 119:97) Tsum payxpiil: tenk traan aan wii ti Piipel tuut richtich pexraype ti tinge woo xon lang heyer pasiirt sin. Tenk aach traan aan te piiplixe profetsiie un wii ti unerxiitliche xrayper tuun eene mit te aner xtime. Wëns tuu es machst, tuust tuu tayn klaape ferxtërke tas een liiplich un kluuch Kriatoer uns kemacht hot un tas ti Piipel tëm Sayn Wort fer uns is. * (2 Tim. 3:14; 2 Phe. 1:21)

13. Kep een payxpiil fon een kluuch aanreet woo mer in te Piipel fine.

 ¹³ Wëns tuu Kot sayn Wort xtutiirst, mërk mool wii nutslich sayn aanreete sin. Tsum payxpiil: fiile yoore tsurik, hot ti Piipel xon kesaat tas ti liip tsum kelt tuut xaate pringe un ‘fiil wee mache’. (1 Tim. 6:9, 10; Xpr. 28:20; Mat. 6:24) Tuut tas noch hayt tsu taach kile? Een puuch woo xprecht iwer ti aanxtelung fon te layt hayt, saat: “In te meyerst tsayt, ti layt woo tenke tas kelt hon tas wichtichste im leepe is, hon net frooheet un sin tiifsinich. Un soo kaar ti layt woo wole ploos een pisye mee kelt hon, sin aach net froo un hon mee kesuntheet propleeme.” Tan, ti Piipel sayn xtark aanreet — tas mer sole net tas kelt liipe — is mechtich kuut! Khanst tuu iwer anere aanreete tenke woo tich xon keholef hon? Woo mee weyert mer kepe fer ti piiplixe aanreete, woo mee tuun mer aan unser liipliche Kriatoer sayn kluucheet traue. (Tya. 1:5) Un tes weeche tuut unser leepe frooer wëre! (Isa. 48:17, 18)

14. Wëns tuu ti Piipel xtutiirst, was tuust tuu iwer Yeehoowa lërne?

¹⁴Tuu ti Piipel xtutiire mit tëm richtich tsiil: Yeehoowa peser khëne. (Yoo. 17:3) Wëns tuu ti Piipel xtutiirst, lërnst tuu iwer Yeehoowa sayn personaliteet un kwaliteete — ti selwiche kwaliteete woos tuu mërkst wëns tuu ti kriatsyoon xtutiirst. Tiise kwaliteete keheere tsu een Persoon woo wërklich eksistiirt; tii sin net etwas woo uf keprung kep is. (Eeks. 34:6, 7; Psal. 145:8, 9) Woo peser tuu Yeehoowa khënst, woo kreeser wërt tayn klaape aan tëm, woo tiifer wërt tayn liip tsu tëm, un woo xtërker wërt tayn froyntxaft mit tëm.

15. Was fer nutse kriist tuu wëns tuu iwer tayn klaape fertseelst?

¹⁵Tuu iwer tayn klaape aan Kot mit te anere fertseele. Wëns tuu es machst, wërt tayn aychne klaape ferxtërkt. Awer wole mer saan tas tuu fer yemant preetichst woo tswayfele hot tas Kot eksistiirt un tuu weest net was se saan. Was solst tuu tan mache? Fersuuch ti piiplix antwort fine in eene fon unser puplikatsyoone un tan fertseel mit te persoon iwer tas. (1 Phe. 3:15) Tuu khanst aach hilef fer een aner Yeehoowa sayn Tsayer ferlange. Ekaal op ti persoon ti antwort fon te Piipel aan nëmt orer net, sicher tuust tuu nutse kriin wayls tuu ti unersuuchung kemacht host. Tayn klaape wërt xtërker. Tan, wën yemant woo xlau aus siit orer woo fiil xuul hot saat tas es kheen Kriatoer kept, tuust tuu net aan tëm klaape.

16. Was khan pasiire wën mer unser klaape net xtark hale?

¹⁶ Een tuun wii lang mer xon Yeehoowa tiine, meyer mise wayter unser klaape aan tëm ferxtërke un hale. Warom? Wayl wën mer net uf phase, khan unser klaape xwach wëre. Eriner tich: te klaape xtaypt sich aan pewaysunge fon wërklichkheete woo ma net siit. Was mer net siin, khan laycht ferkest wëre. Tes weeche hot Phaul kesaat tas te klaape ferliire is “te sint woo uns laycht in wikelt”. (Hep. 12:1) Tan, wii khene mer uns wech fon tiise fal hale? (2 The. 1:3)

17. Was khan uns helfe unser klaape xtark hale?

¹⁷ Eyerst: hal tsu Yeehoowa aan fer Sayn hayliche kayst kriin un mach tas ofts. Warom? Wayl te klaape is een fon te kwaliteete woo te hayliche kayst helft uns ëntwikele. (Kal. 5:22, 23) Meyer khene net unser klaape aan tëm Kriatoer xtark hale oone ti hilef fon sayn hayliche kayst. Wën mer wayter fer Yeehoowa ferlange fer tëm sayn hayliche kayst kriin, tuut tee uns tas kepe. (Luk. 11:13) Meyer khene soo kaar peete: “Kep uns mee klaape.” (Luk. 17:5)

18. Tëm noo Psalm 1:2, 3, was fer kexenk hon mer hayt?

 ¹⁸ Un noch: tuu Kot sayn Wort reeklich xtutiire. (Lees Psalm 1:2, 3.) * In te tsayt woo tiise psalm kexrip kep is, weenich israelite hate een kopye fon Kot sayn Kesets tehëm. Awer, te kheenich un ti priister khonte kopye hon; un yeete 7 yoore, hon “ti mëner, ti fraae, ti khiner” un ti frëmte layt woo in Israël kewoont hon sich kesamelt fer ti leesung fon Kot sayn Kesets se heere. (Teut. 31:10-12) In Yeesus sayn taache, waar tas net fiil anerste. Weenich hon een kopye fon te Xrifte kehat, un ti meyerste kopye waare in te Sinakooke kewees. Awer hayt tsu taach, khene ti meyerste layt teele orer ti kans Piipel leese. Tas is een weyertliche kexenk! Wii khene mer tsayche tas mer petanklich fer tiise kexenk sin?

19. Was mise mer mache fer unser klaape xtark hale?

¹⁹ Meyer khene tsayche tas mer petanklich fer ti Piipel sin — tiise kexenk fon Yeehoowa — wën mer tii imer leese. Meyer sole uns orkanisiire fer ti Piipel leese un xtutiire un net ploos tas mache wën uns tsayt iwrich playpt. Wën mer kans ticht noo keen unser rutiin fer ti Piipel xtutiire, tuun mer unser klaape xtark hale.

20. Was sole mer pextimt sin fer se mache?

²⁰ Anerste wii ti “xlaue un kluuche layt” fon tiise welt, hon mer een fest klaape woo sich in Kot sayn Wort xtaypt. (Mat. 11:25, 26) Ti Piipel leet uns aus warom ti situatsyoon uf te eyert imer xlechter is, un was tuut Yeehoowa too triwer mache. Tan, say pextimt fer tayn klaape ferxtërke un soo fiil layt wii es meechlich is helfe klaape aan unser Kriatoer hon. (1 Tim. 2:3, 4) Un wole mer wayter mit hofnung waarte te taach wën al ti layt too uf te eyert tuun Yeehoowa loope un ti wërter fon Apokalipsis 4:11 saan: “Tuu Yeehoowa, unser Kot, fertiinst ti hërlichkheet (...) wayls tuu ale tinge kemacht host.”