1. Was fer frooche tuun mer fiilaycht mache wën mer tenke aan ales was Yeehoowa kemacht hot?

WII xpiirst tuu tich wëns tuu tenkst aan ales was Yeehoowa kemacht hot? Fiilaycht finst tuu tich soo wii te psalmist Tawi, woo in een kepeet tsu Yeehoowa kefroot hot: “Wën ich tayn himele siin, ti aarwayt fon tayn hënt, te moont un ti xtërne woos tuu kemacht host: Was is te xtërpliche man tas tuu aan tëm tenkst? Was is te mënxe soon tas tuu tich mit tëm khimerst?” (Psal. 8:3, 4) Soo wii Tawi, im xtant tenke mer wii kleen sin mer neewich ti xtërne un es khan uns ferwunere tas Yeehoowa uns mërkt. Awer, wii mer noch siin tuun, Yeehoowa hot net ploos Aatam un Ewa kemërkt — Tee hot aach tëne in Sayn familye aan kenom!

2. Was wolt Yeehoowa hon tas Aatam un Ewa mache teete?

² Aatam un Ewa waare Yeehoowa sayn eyerste khiner too hiir uf te eyert un Yeehoowa waar tëne sayn liiplich Fater im himel. Yeehoowa hot tëne een aarwayt in sayn familye kep: tii solte khiner kriin un ti eyert kuut uf phase. Tee hot tëne kesaat: “Tuut khiner kriin, un wërt fiile un tuut ti eyert fol mache, un tuut se uner aych hale.” (Xee. 1:28) Wën Aatam un Ewa folich weyere un kemacht hëte was Yeehoowa kesaat hat, teete tii un sayn nookhomer fer imer teel fon Yeehoowa sayn familye mache.

3. Warom khene mer saan tas Yeehoowa hot een weyertlich plats fer Aatam un Ewa in sayn familye kep?

³ Aatam un Ewa hate een weyertlich plats in Yeehoowa sayn familye. Im Psalm 8:5, hot Tawi iwer ti kriatsyoon fom mënx kesaat: “Tuu host tëm pisye kleener wii ti engele kemacht un host tëm mit eer un hërlichkheet kekroont.” Es is wërklich woer tas ti mënxe hon net fon Yeehoowa kriit ti selwich kraft, xlauheet un apiliteete woo ti engele hon. (Psal. 103:20) Soo wii soo, sin ti mënxe ploos een “pisye kleener” wii tiise mechtiche engele. Tas is wërklich was ekstras, kël? Es is taytlich tas, wii  Yeehoowa unser eyerste eltere kemacht hot, hot eyer tëne een wunerlich leepe kexenkt!

4. Was is pasiirt wayl Aatam un Ewa unfolich waare, un was tuun mer in tiise artikel lërne?

 ⁴ Es is traurich, awer Aatam un Ewa hon sayn plats in Yeehoowa sayn familye ferloer. Un wii mer in tiise artikel noch siin tuun, tas hot xrooe propleeme fer sayn nookhomer keprung. Awer Yeehoowa sayn tsiil hot sich net keënert. Tee wil noch hon tas tii woo tëm aan heere tëm sayn khiner fer imer wëre. Yets, wole mer siin wii Yeehoowa ketsaycht hot tas mer fiil weyert foer tëm hon. Noo heyer, tuun mer lërne was khene mer yets mache fer se tsayche tas mer wole teel fon Yeehoowa sayn familye sin. Un tsum xlus, xpreche mer iwer ti seechen woo Yeehoowa sayn eyertliche khiner tuun fer imer hon.

5. Wii khene mer Kot eere wayl eyer uns tëm noo sayn pilt kemacht hot?

⁵Yeehoowa hot uns tëm noo sayn pilt kemacht. (Xee. 1:26, 27) Tes weeche, khene mer ti sort persoon sin woo Eyer wil in sayn familye hon. Meyer khene aach fiile fon tëm sayn wunerliche kwaliteete ëntwikele un tsayche — wii liip, mitlayt, troyheet un kerechtichkheet. (Psal. 86:15; 145:17) Wën mer tas mache, kepe mer eer tsu Yeehoowa un mer tsayche tas mer petanklich tsu tëm sin. (1 Phe. 1:14-16) Un wën mer uns aan xtele in een aat woo Yeehoowa kefalt, wëre mer froo un tsufriite.

6. Wii hot Yeehoowa eer fer ti mënxe kep wii tee ti eyert foer perayt hot?

⁶Yeehoowa hot een ekstra haus fer uns foer perayt. Een lang tsayt foer te eyerste man mache, hot Yeehoowa ti eyert fer ti mënxe foer perayt. (Yoop 38:4-6; Yee. 10:12) Wayl Yeehoowa kuut un krooshërtslich is, hot eyer fiile kuute tinge kemacht tas mer froo weyere. (Psal. 104:14, 15, 24) Als mool, hot Yeehoowa xtil kehal fer se tenke iwer was eyer xon kemacht hat; too hot eyer “kesiin tas es kuut waar”. (Xee. 1:10, 12, 31) Yeehoowa hot aach ti fiile xeene tinge woo eyer kemacht hot ‘unich ti mënxe sayn autoriteet ketuun’; soo hot eyer eer fer uns kep. (Psal. 8:6) Yeehoowa sayn tsiil is tas perfekte mënxe sich fer imer fraye khene soo lang wii se Sayn wunerlich kriatsyoon uf phase. Tuust tuu Yeehoowa imer tanke weeche tiise wunerxeen ferxpreche?

7. Wii tuut Yosuee 24:15 tsayche tas ti mënxe een fray wile hon?

⁷Yeehoowa hot uns ti frayheet kep fer unser aychne ëntxlise mache. Tes weeche, khene mer raus suuche was mer in unser leepe mache tuun. (Lees Yosuee 24:15.) * Tiise apiliteet is fray wile kenënt. Unser liipliche Kot frayt sich wën mer raus suuche tëm tiine. (Psal. 84:11; Xpr. 27:11) Awer meyer khene unser fray wile penutse fer fiil anere kuute ëntxlise mache. Wole mer siin tas payxpiil woo Yeesus uns kelos hot.

8. Wii hot Yeesus sayn fray wile penutst? Kep een payxpiil.

⁸ Een mool waare Yeesus un sayn aphostele aarich miit. Tes weeche, sin se pis een ruu plats kang fer een pisye ruue. Awer ti layt hon tëne kefun un tii wolte wërklich hon tas Yeesus tëne in lërne teet. Yeesus sayn plaan hot net pariirt, awer tee is net pees kep; xtats tas, hot eyer ti layt ketauert. Was hot Yeesus tan kemacht? “Tee hot aan kefang fiil tings tëne in se lërne.” (Mar. 6:30-34) Meyer khene Yeesus noo mache wën mer raus suuche ti interese fon te anere foer unser aychne interese tuun. Wën mer, soo wii Yeesus, fon unser kraft  un tsayt penutse fer ti anere helfe, eere mer unser Fater im himel. (Mat. 5:14-16) Un meyer tsayche aach tsu Yeehoowa tas mer wole teel fon sayn familye mache.

9. Was fer ekstra kexenk hot Yeehoowa fer ti mënxe kep?

⁹Yeehoowa hot fer ti mënxe ti apiliteet kep fer khiner kriin; tii hon aach ti flicht kriit fer ti khiner in lërne Yeehoowa liipe un tiine. Wëns tuu een fater orer muter pist, pist tuu petanklich weeche tiise ekstra kexenk? Yeehoowa hot fiile seechen fer ti engele kep, awer tee hot tëne net ti eer kep fer khiner kriin. Tan, wëns tuu een khint host, say petanklich fer tiise priwilëj! Awer mit tiise priwilëj, khomt aach een flicht: ti khiner tsiie “tëm noo Yeehoowa sayn tisipliin un inlërnung”. (Ëfe. 6:4; Teut. 6:5-7; Psal. 127:3) Fer ti eltere helfe tas mache, fersoricht Kot sayn Orkanisatsyoon fiile feramente woo sich aan te Piipel xtaype. Too tepay sin puplikatsyoone, wiiteos, musik un artikele in te internet. Es is kans taytlich tas unser Fater im himel un sayn Soon liipe unser khiner! (Luk. 18:15-17) Yeehoowa frayt sich wën ti eltere uf tëm traue un wën se sayn pestes mache fer sayn weyertliche khiner uf phase. Tiise eltere helfe aach sayn khiner een wunerlich hofnung hon: fer imer teel fon Yeehoowa sayn familye mache!

10-11. Was is meechlich torich tas fray khaaf opfer woo Yeehoowa uns kexenkt hot?

¹⁰Yeehoowa hot uns sayn liipste Soon kep tas mer khene noch mool teel fon Sayn familye mache. Wii mer im  apsats 4 kesiin hon, Aatam un Ewa hon kesint un tes weeche khonte se net mee teel fon Yeehoowa sayn familye mache. Un tas hot aach sayn khiner petrof — tii hon sayn plats aach ferloer. (Rom. 5:12) Aatam un Ewa hon fer kërn Yeehoowa unfolicht; tes weeche hon se fertiint aus fon Yeehoowa sayn familye ketuun wëre. Awer, was teet mit sayn khiner pasiire? Yeehoowa liipt ti mënxe; weeche tas, hot eyer te weech uf kemacht tas tii woo tëm aan heere, khene in Sayn familye aan kenom wëre. Kot hot tas kemacht torich tas fray khaaf opfer fon Yeesus Kristus — Sayn eensiche kepoerne Soon. (Yoo. 3:16; Rom. 5:19) Weeche tas fray khaaf opfer, khont Yeehoowa 144.000 troye mënxe wii sayn khiner aan nëme. (Rom. 8:15-17; Apo. 14:1)

¹¹ Milyoone anere troye mënxe tuun aach Yeehoowa aan heere un tëm sayn wile mache. Tii hon ti hofnung fer teel fon Yeehoowa sayn familye mache noo te letste proop, am ën fon te Tausent Yoore Rechiirung. (Psal. 25:14; Rom. 8:20, 21) Weeche tiise hofnung, tuun se xon hayt Yeehoowa — sayn Kriatoer — wii “Fater” ruufe. (Mat. 6:9) Tii woo fom toot uf keruuft wëre, tuun aach ti oportuniteet kriin fer Yeehoowa sayn kesetse lërne. Tii woo raus suuche tëm aan heere, tuun mit te tsayt aach teel fon Sayn familye mache.

12. Was fer frooch tuun mer yets antworte?

¹² Wii mer kesiin hon, hot Yeehoowa te eyerste xrit kep fer ti mënxe in fiile aate eere. Tee hot xon ti kesalpte wii sayn khiner aan kenom. Un tee hot fer tas “kroos folek” ti hofnung kep fer Sayn khiner in te nay welt wëre. (Apo. 7:9) Awer was khene mer hayt mache fer tsu Yeehoowa tsayche tas mer wole fer imer teel fon sayn familye sin?

13. Was mise mer mache fer teel fon Yeehoowa sayn familye sin? (Markus 12:30)

¹³Tsaych tayn liip tsu Yeehoowa: tuu Tëm mit tayn kans hërts tiine. (Lees Markus 12:30.) * Weeche sayn kuutheet, hot Yeehoowa uns fiile kexenke kep. Eene fon te kreeste is ti apiliteet  fer tëm tiine. Un meyer tsayche tas mer Yeehoowa liipe wën mer tëm “sayn kepoote aan heere”. (1 Yo. 5:3) Yeesus hot uns een kepoot kep woo Yeehoowa wil hon tas mer aan heere: tisipele mache un tëne taafe. (Mat. 28:19) Yeesus hot uns aach kexikt eene ti anere liipe. (Yoo. 13:35) Yeehoowa hot een familye fon layt woo tëm aan peete uf te kans welt. Un ale tii woo Tëm aan heere wëre hërtslich wilkhom in tiise familye. (Psal. 15:1, 2)

14. Wii khene mer liip fer ti anere tsayche? (Matheus 9:36-38; Romaaner 12:10)

¹⁴Liip ti anere. Ti liip is Yeehoowa sayn haupst kwaliteet. (1 Yo. 4:8) Xon eep mer tëm kekhënt hon, hot Yeehoowa uns liip ketsaycht. (1 Yo. 4:9, 10) Meyer mache Tëm noo wën mer liip tsu te anere tsayche. (Ëfe. 5:1) Eene fon te peste aate fer tas mache is ti layt iwer Yeehoowa lërne, soo lang wiis noch tsayt kept. (Lees Matheus 9:36-38.) * Wën mer ti layt helfe, kepe mer tëne ti keleechenheet fer teel fon Yeehoowa sayn familye mache. Un noo tas yemant sich taafe lost, mise mer tëm wayter liipe un respektiire. (1 Yo. 4:20, 21) Wii khene mer tas mache? Kuk mool een tings: imer wëns meechlich is, sole mer klaape tas was hinich ti aner persoon sayn aanxtelung is, is was kuutes. Tan, wën mer net ferxteen khene warom ti aner persoon was kemacht hot, tuun mer net tenke tas es waar weeche ekoystiixe uersache. Xtats tas, tuun mer unser pruuter eere un tëm aan siin wii kreeser wii uns. (Lees Romaaner 12:10; * Fili. 2:3.)

15. Fer weem sole mer parmhërtslichkheet un kuutheet tsayche?

¹⁵Tsaych parmhërtslichkheet un kuutheet fer al ti layt. Wën mer wole teel fon Yeehoowa sayn familye fer imer mache, mise mer Kot sayn Wort in unser leepe aan wëne. Tsum payxpiil: Yeesus hot in kelërnt tas mer sole parmhërtslichkheet un kuutheet fer ale kaar tsayche, soo kaar fer unser faynte. (Luk. 6:32-36) Awer, als mool khan es xweyer fer uns sin tas mache. Wën tas unser situatsyoon is, mise mer lërne se tenke un uns aan xtele soo wii Yeesus. Wën mer unser pestes mache fer Yeehoowa aan heere un Yeesus noo mache, tsayche mer tsu Yeehoowa tas mer wole fer imer teel fon sayn familye sin.

16. Wii khene mer te kuute naame fon Yeehoowa sayn familye xitse?

¹⁶Xits te kuute naame fon Yeehoowa sayn familye. In een familye, tuut eftas te yingste puup sayn elter pruuter noo mache. Wën te elter pruuter ti piiplixe oryentiirunge in sayn leepe aan wënt, wërt eyer eene kuute payxpiil fer sayn yinger pruuter. Awer wën te elter pruuter xlechte tinge macht, fiilaycht tuut te yinger pruuter tëm sayn xlechte payxpiil noo keen. Tas is net fiil anerste in Yeehoowa sayn familye. Tsum payxpiil: wole mer saan tas yemant woo troy waar, fangt aan xlechte un imoraalixe tinge mache orer wërt een aphostate. Im xtant, tuun ti anere aan fange tëm noo mache un sich aach xlecht aan xtele. Tii woo tas mache, tuun te kuute naame fon Yeehoowa sayn familye fersaue. (1 The. 4:3-8) Meyer thërfe net ti xlechte payxpiile noo keen orer etwas lose unser froyntxaft mit unser liipliche Fater im himel fersaue.

17. Was sole mer net iwer materyaalixe tinge tenke, un warom?

¹⁷Trau uf Yeehoowa, net uf materyaalixe tinge. Yeehoowa ferxprecht uns ese, tsaych un  woonung kepe wën mer Sayn Raych im eyerste plats tuun un wën mer tëm sayn kepoote aan heere. (Psal. 55:22; Mat. 6:33) Wën mer aan tiise ferxpreche traue, tuun mer net tenke tas ti materyaalixe tinge fon te welt uns xitse orer frooheet pringe khene. Meyer wise tas kans kenau: ti eensich aat fer woere friit kriin is Yeehoowa sayn wile mache. (Fili. 4:6, 7) Soo kaar wën mer kelt hon fer fiile tinge khaafe, mise mer kuut tenke ep mer kenuuch tsayt un kraft hon fer tas penutse un uf phase. Meechte mer net aan fange uns tsu fiil ketanke mache mit tiise tinge? Meyer mise traan tenke tas Yeehoowa hot uns aarwayt in sayn familye kep; tes weeche, sole meyer net lose ti materyaalixe tinge unser acht fon tiise aarwayt ap lënke. Sicher, wole mer net wii te yunge man sin woo hat sayn materyaalixe tinge soo kërn tas eyer ëntxlist hot Yeesus net noo keen. Tes weeche, hot eyer ti oportuniteet ferloer fer Yeehoowa tiine un aan kenom wëre wii eene fon Sayn khiner. (Mar. 10:17-22)

18. Was fer seechen un eer tuun ti foliche mënxe fer imer hon?

¹⁸ Foliche mënxe tuun ti kreeste eer kriin — Yeehoowa liipe un aan peete fer imer! Tii woo ti eyertlich hofnung hon, hon aach een aner uersach fer sich fraye: tii tuun ti eyert uf phase — tas perfekt haus woo Yeehoowa fer ti mënxe kepleent hot. Klaych, tuut tas Raych mache tas ti eyert un ales was too truf is xeen wërt. Yeesus tuut al ti propleeme resolwiire woo pasiirt sin weeche Aatam un Ewa sayn ëntxlus fer Yeehoowa sayn familye im xtich lose. Yeehoowa tuut milyoone toote uf ruufe un tëne een wunerlich oportuniteet kepe: fer imer se leepe, mit perfekt kesuntheet, in een Paratiis too uf te eyert. (Luk. 23:42, 43) Wën ti mënxe woo Yeehoowa tiine perfekt kepe, tuun se al ti “eer un hërlichkheet” hon woo Tawi kexrip hot. (Psal. 8:5)

19. Was sole mer net ferkese?

¹⁹ Wëns tuu tsu tas “kroos folek” keheerst, host tuu wërklich een wunerlich hofnung! Kot liipt tich un tee wil hon tas tuu teel fon sayn familye machst. Tan, mach tayn pestes fer tëm kefale. Hal imer Yeehoowa sayn ferxpreche in tayn khop un in tayn hërts. Kep imer weyert fer tas priwilëj woo mer hon: unser himlixe Fater aan peete; un fray tich mit te hofnung fer tëm fer imer loope!