1-2. Was tuun mer in tiise artikel lërne?

WOLE mer saan tas tuu etwas khaaft host woos tuu wërklich prauchst un tas is am khome; awer tas khomt net in te richtich tsayt woos tuu waarte tuust. Wii xpiirst tuu tich? Een pisye ëngstlich? Tsiimlich sicher, xpiirst tuu tich wii Xpriiche 13:12 saat: “Ti hofnung woo sich net klaych erfiilt macht tas hërts krank.” Awer wëns tuu raus kriin teest, tas tas tings woos tuu khaaft host net khom is weeche een kuute uersach? Tan, tsiimlich sicher, teest tuu ketult tsayche un wilich sin fer se waarte.

² In tiise artikel, tuun mer etliche piiplixe funtamente noo kuke woo uns helfe ‘ketultich aan Yeehoowa waarte’. (Mik. 7:7) Tan, tuun mer iwer tswaay situatsyoone xpreche woo mer mise ketultich waarte tas Yeehoowa etwas macht. Tsum xlus, tuun mer xpreche iwer ti kexenke woo Yeehoowa in te futuer kepe tuut fer tii woo wilich sin fer uf tëm waarte.

3. Was tuut Xpriiche 13:11 uns in lërne?

³ Warom mise mer ketult hon? Kuk mool was Xpriiche 13:11 saat: “Te raychtum woo ma xnel kriit, tuut sich ferkleene; awer te raychtum fon weem es lamsam kriit, tuut sich ferkreese.” Was lërne mer too temit? Es is kluucher ti tinge lamsam un sicher mache.

4. Was tuut Xpriiche 4:18 uns in lërne?

⁴ Xpriiche 4:18 saat: “Te weech fon tëm kerechte is wii tas hele moyntslicht, woo wërt heler un heler pis wan te taach  kans hel is.” Tiise wërter tuun taytlich tsayche tas Yeehoowa helft sayn folek Sayn tsiil imer peser ferxteen. Awer tiise wërter khene uns aach helfe ferxteen wii een krist ënerunge in sayn leepe macht un wii eyer sich tichter pay Yeehoowa xaft. Tas khan net ketswung wëre; tas nëmt tsayt. Wën mer mit acht xtutiire un aan wëne ti aanreete woo mer kriin in Kot sayn Wort un torich sayn Orkanisatsyoon, tuun mer xrit noo xrit ti kwaliteete woo Yeesus Kristus hat ëntwikele. Meyer tuun aach Kot peser khëne. Yeesus hot een ferklaychung kemacht woo helft uns tas ferxteen. Wole mer tas siin.

5. Was fer ferklaychung hot Yeesus kemacht fer se tsayche tas es nëmt tsayt fer een persoon ënerunge mache?

⁵ Yeesus hot ti kuute notisye fom Raych mit een kleene soome ferklaycht woo tuut lamsam wakse in te hërtse fon tëne woo liipe was richtich is. Tee hot kesaat: “Un ti soome keen uf un wakse, awer tee [pauer] wees net kenau wii tas pasiirt. Fon tëm pootem selepst khomt te frucht: eyerst ti xtang, tan te eere un tsum xlus te khorn in tëm eere.” (Mar. 4:27, 28) Was wolt Yeesus saan? Tee waar am aus leye tas, soo wii een plans lamsam wakst, een persoon woo ti kuute notisye aan nëmt, tuut aach lamsam in kaystlich aat wakse. Tsum payxpiil, wën unser Piipel xtutënte sich tichter pay Yeehoowa xafe, fange mer aan se siin ti fiile xeene ënerunge woo se mache. (Ëfe. 4:22-24) Awer mer sole nii ferkese: es is Yeehoowa woo macht tiise kleene soome wakse. (1 Kor. 3:7)

6-7. Was lërne mer fon te aat wii Yeehoowa ti eyert kemacht hot?

⁶ In ales was Yeehoowa macht, nëmt eyer ti tsayt woos neetich is fer tas tings fërtich mache; soo, pringt eyer eer fer sayn naame un tuut aach anere helfe. Tsum payxpiil: kuk mool ti aat wii eyer ti eyert xrit noo xrit fer ti mënxe foer perayt hot.

⁷ Ti Piipel pexraypt ti aat wii Yeehoowa ti eyert kemacht hot. Tii saat tas ti eyert ‘kemeest kep is’, tas ‘sayn funtamente aan  kesetst kep sin’ un tas ‘sayn ek xteen keleet kep is’. (Yoop 38:5, 6) Yeehoowa hot soo kaar tsayt kehool fer sayn aarwayt noo kuke. (Xee. 1:10, 12) Tenk mool noo: wii meechte ti engele sich kexpiirt hon wii se yeete nay tings woo Yeehoowa kemacht hot, kesiin hon? Tii wëre wool aarich froo kep sin. Weeche tas, hon se aan kefang Kot ‘mit frayt loope’. (Yoop 38:7) Was lërne mer too temit? Es hot tausente yoore kenom fer Yeehoowa ti xtërne, ti eyert un ale lepeentiche kriatuure mache. Awer wii Yeehoowa tas noo kekukt hot, hot eyer kesaat tas “es kuut waar”. (Xee. 1:31)

8. Iwer was tuun mer yets xpreche?

⁸ Ti payxpiile woo mer kesiin hon, lose es klaar tas Kot sayn Wort is fol piiplixe funtamente woo tsayche tas mer mise ketultich sin. Awer yets, wole mer iwer tswaay situatsyoone xpreche woo mer mise wilich sin fer uf Yeehoowa waarte.

9. In was fer situatsyoon mise mer uf Yeehoowa waarte?

⁹Im xtant mise mer waarte tas Yeehoowa unser kepeete antwort. Als mool, tuun mer im kepeet kraft ferlange fer een propleem aus hale orer hilef fer noo lose etwas mache woo Yeehoowa net kërn hot. Awer fiilaycht, mëne mer tas Yeehoowa tuut tsu fiil tsayt nëme fer unser kepeet antworte. Warom tuut Yeehoowa net unser kepeete al klaych antworte?

10. Warom mise mer ketultich iwer unser kepeete sin?

¹⁰ Yeehoowa heert unser kepeete mit acht. (Psal. 65:2) Fer Yeehoowa, unser hërtsliche kepeete pewayse unser klaape aan tëm. (Hep. 11:6) Tee wil aach siin op mer wilich sin fer tëm noo unser kepeete leepe un fer tëm sayn wile mache. (1 Yo. 3:22) Tes weeche, wën mer hilef im kepeet ferlange fer iwer een xlecht kewoonheet orer xwacheet triwer wech khome, mise mer ketultich sin un uns aan xtrenge fer ti ënerunge mache. Yeesus helft uns ferxteen tas etliche fon unser kepeete wëre net klaych keantwort. Tee hot kesaat: “Tuut wayter ferlange un es wërt fer aych kep; tuut wayter suuche, un teyer tuut es fine; tuut wayter klope, un es wërt fer aych uf kemacht; wayl yeete eene woo ferlangt, kriit; un yeete eene woo suucht, fint; un fer yeete eene woo klopt, wërt es uf kemacht.” (Mat. 7:7, 8) Wën mer tiise aanreet noo keen un “wayter peete”, khene mer uns sicher sin tas unser Fater im himel tuut unser kepeete heere un antworte. (Kol. 4:2)

11. Wii helft uns Hepreeyer 4:16 wën es aus siit tas unser kepeete net klaych keantwort sin?

¹¹ Als mool, khan es aus siin tas ti antwort fer een kepeet khomt net klaych. Awer Yeehoowa ferxprecht unser kepeete “in te richtich tsayt” antworte. (Lees Hepreeyer 4:16.) * Tes weeche, sole mer nii Yeehoowa ti xult kepe wën etwas net pasiirt soo xnel wii mer kewaart hon. Tsum payxpiil: fiile tuun xon yoore lang peete tas Yeehoowa tas ën fon tiise sisteem pringt torich sayn Raych. Yeesus hot soo kaar kesaat tas mer sole too triwer peete. (Mat. 6:10) Awer es weyer een tumheet te klaape aan Kot ferliire ploos wayl tas ën net khom is in te xtun woo ti mënxe es kewaart hon! (Hap. 2:3; Mat. 24:44) Meyer tsayche kluucheet wën mer wayter uf Yeehoowa waarte un tsu tëm mit klaape peete. Tas ën tuut in te richtich tsayt khome, wayl Yeehoowa xon raus kesuucht hot “te taach un ti xtun” fer tas pasiire. Un tas wërt ti pest tsayt sin fer ale kaar. (Mat. 24:36; 2 Phe. 3:15)

12. Wën khan es hauptseechlich xweyer sin ketultich wëre?

 ¹²Im xtant mise mer ketultich sin wën mer unkerechtichkheet mit mache. In te welt, ti layt fon unerxiitliche lënter, rase, kultuure orer sëks sin ofts xlecht pehantelt. Anere sin xlecht pehantelt wayl se een propleem im khop orer im khërper hon. Fiile fon Yeehoowa sayn folek tuun weeche sayn klaape unkerechtichkheet mit mache. Awer wën mer xlecht pehantelt wëre, mise mer traan tenke aan was Yeesus kesaat hot: “Weer pis tsum ën aus halt, wërt keret.” (Mat. 24:13) Awer was sole mer mache wën mer tsum wise kriin tas yemant in te kemaynt een xweyer sint kemacht hot? Eyerst, mise ti elteste tas tsum wise kriin. Awer noo heyer, tuust tuu ketultich sin un klaape tas tii tuun tas in Yeehoowa sayn aat uf phase? Un was mise ti elteste mache wën se tsum wise kriin tas yemant een xweyer sint kemacht hot?

13. Was wil Yeehoowa hon tas ti elteste mache wën yemant een xweyer sint kemacht hot?

¹³ Wën ti elteste tsum wise kriin tas yemant een xweyer sint kemacht hot, tuun se im kepeet “ti kluucheet fon oowe” ferlange; soo khene se ti situatsyoon siin soo wii Yeehoowa siit. (Tya. 3:17) Ti elteste sayn tsiil is, wëns meechlich is, ti sintiche persoon helfe sich peroye un fon sayn “xlechte weech tsurik khome”. (Tya. 5:19, 20) Tii wole aach mache ales was meechlich is fer ti kemaynt xitse un fer treeste tii woo wee kemacht kep sin. (2 Kor. 1:3, 4) Wën se tsum wise kriin tas yemant een xweyer sint kemacht hot, te eyerste xrit woo ti elteste kepe mise is raus kriin was wërklich pasiirt is. Tas khan tsayt nëme. Tan, tuun se peete, aanreete fon te Piipel kepe un “im richtich moos” tisipliniire. (Yee. 30:11) Opwool ti elteste tuun net ti tinge uf xupe, tuun se aach net sich ayle fer een ëntxlus mache. Wën ti elteste Yeehoowa sayn oryentiirung noo keen, tuut ti kans kemaynt nutse too tefun kriin. Awer, soo kaar wën ti elteste ales richtich mache, khan ti unxultich persoon woo petrof kep is, sich noch wee xpiire. Is tas tayn situatsyoon? Tan, was khanst tuu mache fer ti phayn xweecher lose?

14. Wën een aner krist tich wee kemacht hot, was fer piiplixe payxpiil khan tich treeste?

¹⁴ Hot yemant xon tich xroo wee kemacht, fiilaycht soo kaar een pruuter orer een  xwester? Tuu khanst kuute payxpiile in te Piipel fine woo uns lërne wii uf Yeehoowa waarte fer ti sache in te ray mache. Tsum payxpiil: Yoosef sayn priiter hon tëm unkerecht pehantelt. Awer tee is net weeche tëne sayn sinte een piterlich persoon kep. Xtats tas, hot eyer imer noch wayter sayn pestes kemacht fer Yeehoowa tiine. Un Yeehoowa hot tëm sayn ketult un persewerans peloont. (Xee. 39:21) Mit te tsayt, khont Yoosef fertsaye tii woo tëm wee kemacht hate un siin wii Yeehoowa tëm keseechent hat. (Xee. 45:5) Soo wii Yoosef, meyer wëre ketreest wën mer ticht tsu Yeehoowa khome un wën mer ti sache in tëm sayn hënt lose; Tee tuut ti unkerechtichkheet in te richtich tsayt korikiire. (Psal. 7:17; 73:28)

15. Was hot een xwester keholef ti unkerechtichkheet uf sayt lose?

¹⁵ Kewis, net al ti unkerechtichkheete sin soo xlim wii tii woo Yoosef mit kemacht hot. Awer een tuun wii xlecht mer pehantelt kep sin, tas khan unser hërts wee mache. Wën mer een propleem mit yemant hon — soo kaar tii woo net Yeehoowa aan peete — ti piiplixe oryentiirunge aan wëne khan uns helfe. (Fili. 2:3, 4) Kuk mool ti neekst speryens: een xwester hot raus kriit tas een fraa woo mit tëne kexaft hot, hot keloo un xlecht iwer tii fer ti anere kexproch. Tas hot ti xwester wërklich wee kemacht. Awer, xtats klaych etwas mache, hot se tsayt kehool fer aan Yeesus sayn payxpiil traan tenke. Wën tee ferxënt kep is, hot eyer net tsurik ferxënt. (1 Phe. 2:21, 23) Mit tas im khop, hot ti xwester ëntxlist niks iwer ti sache mache. Xpeeter hot se raus kriit tas tiise fraa waar een xroo krankheet am mit mache, un waar aarich stresiirt. Ti xwester hot kerechent: ‘Tsiimlich sicher, wolt se net saan was se kesaat hot.’ Tes weeche, waar se froo wayl se ti unkerechtichkheet mit ketult aus kehal hot un tas hot se in friit kelos.

16. Was khan tich treeste wëns tuu een unkerechtichkheet mit machst? (1^te Pheeter 3:12)

¹⁶ Wëns tuu am layte pist weeche een unkerechtichkheet orer een aner uersach, erinert tich: “Yeehoowa is ticht pay tëne woo een ferprochne hërts hon.” (Psal. 34:18) Tee liipt tich weeche tayn ketult un wayls tuu tayn last  uf tëm xmayst. (Psal. 55:22) Tee is te Richter fon te kans eyert. Eyer siit ales was pasiirt. (Lees 1^te Pheeter 3:12.) * Tan, wëns tuu xwiirichkheete mit machst woos tuu net resolwiire khanst, was machst tuu? Tuust tuu uf Yeehoowa waarte?

17. Tëm noo Isaiias 30:18, was fer sicherheet kept uns Yeehoowa?

¹⁷ Klaych, tuut unser Fater im himel uns fiil seechne torich sayn Raych. Isaiias 30:18 saat: “Yeehoowa tuut ketultich waarte fer aych kuutheet tsayche, un tee tuut sich uf xtele fer aych parmhërtslichkheet tsayche. Wayl Yeehoowa is een Kot fon kerechtichkheet. Froo sin ale tii woo uf tëm waarte.” Tii woo uf Yeehoowa waarte tuun fiile seechen yets un in te nay welt woo klaych khomt kriin.

18. Was fer seechen waarte uns?

¹⁸ Wën Yeehoowa sayn tiiner in te nay welt rin keen, al ti ëngstlichkheete un kefoore woo se hayt mit mache tuun ferkeen un tii tuun nii net tsurik khome. Es tuut kheen mee unkerechtichkheet orer phayn kepe. (Apo. 21:4) In te nay welt, tuun mer uns net ketanke mache ep mer tas neetiches kriin tuun, wayl es tuut tan kenuuch fer ale kaar kepe. (Psal. 72:16; Isa. 54:13) Was fer een xeen tsayt wërt tas sin!

19. Mit was fer opjetiiw tuut Yeehoowa uns xon hayt foer perayte?

¹⁹ Yeehoowa is yets uns xon am foer perayte fer unich tëm sayn rechiirung leepe. Wii macht eyer tas? Tee heleft uns kwaliteete ëntwikele woo tëm kefale un torich unser xlechte kewoonheete triwer wech khome. Tuu net tayn muut ferliire un kep net uf! — een leepe woo fiil peser is, khomt klaych, klaych... Wole mer tiise wunerliche futuer imer in unser khop hale un wole mer ketultich aan Yeehoowa waarte, pis tas eyer macht was eyer ferxproch hot.