1-2. Tëm noo Psalm 34:8, wii khene mer iwer Yeehoowa sayn kuutheet lërne?

XTEL tich mool foer tas yemant tich een ese aan piit woos tuu noch nii kes host. Wii khanst tuu iwer tas ese lërne? Tuu khanst tas kuke, riiche, ti resept unersuuche orer fer yemant frooe wii tas xmekt. Awer ti eensich aat fer se wise ops tuu tas kërn host, is tuu selepst tas xmeke.

² Tas selwiche kilt wën mer wole Yeehoowa sayn kuutheet ferxteen. Meyer khene fiil too triwer lërne wën mer ti Piipel un unser puplikatsyoone leese orer wën mer xpreche mit layt woo tëm sayn seechen kriit hon. Awer meyer tuun ploos wërklich ferxteen wii Yeehoowa kuut is, wën meyer selepst tëm sayn kuutheet “xmeke”. (Lees Psalm 34:8.) * Wole mer een payxpiil siin wii khene mer tas mache. Wole mer saan tas tuu wilst aan fange wii rekulaar pyoneer tiine; awer fer tas hin kriin, must tuu tayn leepe keweenlicher lose. Yeesus hot ferxproch tas wën mer tas Raych im eyerste plats tuun, tuut Yeehoowa ales was mer prayche kepe; fiilaycht hon mer tas xon fiil mools kelees, awer tas noch net in unser leepe kexpiirt. (Mat. 6:33) Awer, mit klaape aan Yeesus sayn ferxpreche, fange mer aan weenicher kelt aus kepe, weenicher xafe un mee tsayt in te preetich aarwayt fertraype. Wën mer tas mache, tuun mer selepst xpiire tas Yeehoowa unser neetichkheete uf phast. Meyer selepst “xmeke” Yeehoowa sayn kuutheet.

3. Tëm noo Psalm 16:1, 2, fer weem tuut Yeehoowa sayn kuutheet tsayche?

³ “Yeehoowa is kuut mit ale kaar”, soo kaar mit tëne woo tëm net khëne. (Psal. 145:9; Mat. 5:45) Awer Yeehoowa xenkt sayn  seechen hauptseechlich fer tii woo tëm liipe un woo tëm mit kans hërts tiine. (Lees Psalm 16:1, 2.) * Wole mer yets siin etliche kuute tinge woo Yeehoowa fer uns kept.

4. Wii tuut Yeehoowa sayn kuutheet tsayche fer tii woo aan fange sich tichter pay tëm xafe?

⁴ Imer wën mer aan wëne was Yeehoowa fer uns saat, mërke mer wii tas kuut fer uns is. Tsum payxpiil: wii mer aan kefang hon tëm khëne un liipe, hot eyer uns keholef noo lose se tenke un se mache was eyer net kërn hat. (Kol. 1:21) Un wii mer uns tetikiirt un ketaaft hon, hon mer noch mee kuutheet fon tëm kriit: een sauwer kewise un een xtark froyntxaft mit tëm. (1 Phe. 3:21)

5. Wii khene mer Yeehoowa sayn kuutheet in te preetich aarwayt siin?

⁵ Meyer tuun noch peser Yeehoowa sayn kuutheet xpiire wën mer uns traan hale aan te preetich aarwayt. Pist tuu een pleet persoon? Fiile fon Yeehoowa sayn Tsayer sin. Im xtant, foer een Yeehoowa sayn Tsayer wëre, host tuu tich nii mools foer kextelt aan te teer fon een frëmte klope un iwer ti Piipel mit tëm xpreche. Awer hayt machst tuu tas kans ofts. Un noch peser: mit Yeehoowa sayn hilef host tuu kelërnt ti preetich aarwayt liipe. Un Yeehoowa hot tich xon in fiile aate keholef. Tsum payxpiil: wën yemant tekeeche is, kept eyer tich ketult; wën yemant interesiirt is, helft eyer tich te richtiche Piipel tekst erinere; un wën fiil layt wole niks iwer ti Piipel in tayn teritooryum wise, kept Yeehoowa tich ti kraft fer wayter preetiche. (Yee. 20:7-9)

6. In was fer aner aat tuut Yeehoowa uns sayn kuutheet tsayche?

⁶ Yeehoowa iipt uns fer ti preetich aarwayt un tas is een aner aat wii eyer sayn kuutheet fer uns tsaycht. (Yoo. 6:45) In unser mite woch fersamlung, siin mer kuute payxpiile iwer was se saan wën mer preetiche tuun, un meyer sin uf kemuut tas aan wëne. Noch soo, was nayes in te preetich aarwayt fersuuche khan uns mit pang am aanfang lose, kël? Awer wën mer tas mache, fiilaycht kriin mer raus tas es kuut in unser teritooryum pariirt. In te fersamlunge un in te konkrëse wëre mer aach uf kemuut in unerxiitliche aate preetiche. Fer tas, im xtant mise mer was mache woo mer net keweent sin un tas khan uns nerwees lose. Awer wën mer tas mache, lose mer te weech uf fer Yeehoowa uns seechne. Was fer seechen tuut Yeehoowa uns xenke wën mer naye aate suuche fer unser pestes tsu tëm kepe, ekaal unser situatsyoon? Un wii khene mer mee in te preetich aarwayt mache? Wole mer yets tas lërne.

7. Was fer seechen kriin mer wën mer uns aan xtrenge fer mee in te preetich aarwayt mache?

⁷Unser froyntxaft mit Yeehoowa wërt xtërker. Kuk mool tas payxpiil fon een elteste woo Samuel * heest; tee un sayn fraa tuun in Kolompya tiine. Ti tswaay waare xon pyoneere in sayn kemaynt, awer tii wolte mee mache un in een plats tiine woo hilef praycht. Fer tas hin kriin, miste se etliche tinge uf kepe. “Meyer hon Matheus 6:33 aan kewënt un noo kelos uneetiche tinge khaafe — saat Samuel. — Awer te xweyerst ëntxlus waar unser apartament lose. Tee waar soo wii mer kepleent hate un mer hate tee aach xon petsaalt.” In te nay kemaynt woo se waare, praycht tas pheyerche fiil weenicher kelt wii foner traan hon fer se leepe. Samuel saat: “Meyer tuun taytlich siin Yeehoowa unser xrite lënke un unser kepeete antworte. Meyer  sin uns sicher tas eyer froo mit uns is un meyer mërke tëm sayn liip in een ekstra aat.” Meechst tuu aach mee in te preetich aarwayt mache khene? Wëns yaa, say tich sicher: tas tuut tayn froyntxaft mit Yeehoowa ferxtërke un tee tuut tich wayter uf phase. (Psal. 18:25)

8. Was host tuu kelërnt fon tëm payxpiil fon Ivan un Viktoria?

⁸Meyer xpiire mee frooheet in unser tiinst. Ivan un Viktoria tiine wii pyoneere in Kirkhstan. Tii hon raus kesuucht sayn leepe keweenlicher lose. Soo, wën se een insetsung kreechte, weyere se fray fer tas aan nëme — too tepay insetsunge fer in te paueray xafe. Ivan saat: “In yeete paueray projëkt woo mer keholef hon, hate mer imer fiil se tuun. Am ën fom taach waare mer seer miit, awer in te selwich tsayt waare mer tsufriite un in friit wayl mer hon unser kraft penutst fer Yeehoowa tiine. Meyer xpiire uns aach froo weeche ti fiile froynte woo mer kemacht hon un weeche ti xeene momente woo mer mit tëne keleept hon.” (Mar. 10:29, 30)

9. Wii hot een xwester, woo een xweyer situatsyoon mit macht, es hin kriit mee tsu Yeehoowa mache un was fer waar te resultaat?

⁹ Soo kaar wën mer xwiirichkheete mit mache, khene mer frooheet in Yeehoowa sayn tiinst fine. Kuk mool ti speryens fon Mirreh, een elter witfraa in te oëst fon Afrika, woo hot wii tokterin kexaft. Wii se sich aposentiirt hot, hot se aan kefang wii pyoneerin xafe. Mirreh layt een xlim sort artritis; tes weeche, khan se ploos een xtun te mool in tëm preetich haus tsu haus xafe; awer wën se mit puplikatsyoone khareche orer displays xaft, khan se mee plaype. Tii hot fiil rik pesuuche un Piipel xtuutye un etliche fon tëne macht se torich telefoon. Was hot Mirreh uf kemuut mee tsu Yeehoowa kepe? “Mayn hërts iwerlaaft liip tsu Yeehoowa un tsu Kristus — saat se. — Un kans oft tuun ich Yeehoowa sayn hilef im kepeet ferlange, tas ich khan mayn pestes tsu tëm kepe.” (Mat. 22:36, 37)

10. Tëm noo 1^te Pheeter 5:10, was kept Yeehoowa fer tii woo wole mee in tëm sayn aarwayt mache?

¹⁰Yeehoowa iipt uns in unerxiitliche aate. Kenny, een pyoneer woo in te Mauriisyus Insele tiint, hot kesiin wii tas woer is. Wii eyer ti woerheet kelërnt hot, hot eyer ti uniwersiteet kelos, sich taafe kelos, un aan kefang wii pyoneer tiine. Tee saat: “Ich fersuuche leepe tëm noo ti wërter fom profeet Isaiias, woo kesaat hot: ‘Hiir sin ich! Xik mich!’” (Isa. 6:8) Kenny hot in etliche paueray projëkte kexaft un aach keholef etliche puplikatsyoone in sayn muter xprooch iwersetse. Tee saat: “Weeche ti iipung woo ich kriit hon, khont ich mayn insetsung kuut uf phase.” Awer Kenny hot mee kelërnt wii ploos sayn aarwayt richtich mache: “Ich hon kelërnt tas es tinge kept woo xweyer sin fer mich mache — saat eyer —, un aach tas ich praucht etliche kwaliteete ëntwikele fer een peser tiiner fon Yeehoowa sin.” (Lees 1^te Pheeter 5:10.) * Was mënst tuu: khenst tuu tayn situatsyoon noo kuke un fiilaycht tich aan piite fer mee iipung fon Yeehoowa kriin?

11. Was fer aanxtrengung hon etliche xwestere in Siit Koreya kemacht fer mee in te preetich aarwayt xafe un was fer waar te resultaat? (Kuk tas pilt am aanfang fom piichelche.)

¹¹ Soo kaar wën ti puplikatoore xon fiil speryens hon, mise se noch keiipt wëre wën se aan fange in een nay aat preetiche. Torich ti pantemii fon coronavirus, hon ti elteste fon een kemaynt in Siit Koreya kexrip: “Phaar priiter hon ketenkt tas, weeche sayn kesuntheet, khonte se net in te preetich  aarwayt xafe. Awer yets khene se preetiche torich wiiteo konferens. Tray xwestere mit mee wii 80 yoore, hon kelërnt wii ti komputatoore penutse un yets sin se in te preetich aarwayt neekst yeete taach.” (Psal. 92:14, 15) Teest tuu aach kërn mee in te preetich aarwayt mache un soo noch peser ferxteen wii Yeehoowa kuut is? Wole mer iwer etliche xrite xpreche woo khene tich helfe tas hin kriin.

12. Was ferxprecht Yeehoowa fer tii woo uf tëm traue?

¹²Lërn uf Yeehoowa traue. Wën mer uf tëm traue un unser pestes tsu tëm kepe, Yeehoowa ferxprecht fiil seechen iwer uns aus xiite. (Mal. 3:10) Fabiola, een xwester woo in Kolompya leept, hot kesiin Yeehoowa tiise ferxpreche in sayn leepe erfiile. Tii wolt wii rekulaar pyoneerin tiine noo se ketaaft kep is. Awer tii praucht xafe fer sayn tray khiner un sayn man helfe fersoriche. Tan, wii se sich aposentiire khont, hot se ërnst tsu Yeehoowa kepeet un tëm sayn hilef ferlangt. Fabiola saat: “Neekst imer, wën ti layt sich aposentiire, nëmt es fiil tsayt fer se aan fange te loon kriin; awer mayns is een moonat tëm noo khom. Tas waar een wuner kewees!” Tswaay moonate xpeeter, hot Fabiola aan kefang wii pyoneerin tiine. Hayt, is se xon mee wii 70 yoore alt un tiint mee wii 20 yoore wii pyoneerin. Torich tiise tsayt, hot se xon 8 layt keholef pis aan taaf hin khome. Tii saat: “Als mool, fine ich mich xwach... Awer Yeehoowa helft mich yeete taach wayter wii pyoneerin tiine.”

13-14. Was fer payxpiile khene tich helfe aan Yeehoowa traue un te wunx kriin fer mee in tëm sayn aarwayt mache?

 ¹³Lërn fon tëne woo uf Yeehoowa ketraut hon. Ti Piipel is fol payxpiile fon layt woo sich aan kextrengt hon in Yeehoowa sayn aarwayt. In fiile situatsyoone, praychte tiise tiiner te eyerste xrit kepe fer tan een ekstra seechen fon Yeehoowa kriin. Tsum payxpiil: Yeehoowa hot Apraham keseechent ploos noo tas eyer fon sayn haus fat kang is, “oone se wise woo eyer hin keengt”. (Hep. 11:8) Yaakop is keseechent kep ploos noo tas eyer mit een engel kekhëmpft hot. (Xee. 32:24-30) Een aner mool, waar ti natsyoon fon Israël fërtich fer in tëm Ferxprochne Lant rin keen, awer foer tëne waar te Yortan flus mit sayn peese waser kewees. Es waar ploos noo tas ti priister een xrit im waser kep hon, tas tas folek torich khome khent. (Yos. 3:14-16)

¹⁴ Hayt tsu taach, kepts aach payxpiile fon Yeehoowa sayn Tsayer woo uf Kot ketraut hon un woo sich aan kextrengt hon fer mee mache. Tuu khanst aach mit tëne lërne. Tsum payxpiil: te pruuter Payton un sayn fraa Diana hon imer kërn kelees ti speryense fon priiter un xwestere woo hon mee tsu Yeehoowa kemacht — wii tii woo in te sekwens fon artikele “Eles se ofereceram” * foer khome. Payton saat: “Tëne sayn speryense leese waar wii wën mer yemant siin khente was kuutes ese. Woo mee tas mer es kekukt hon, woo kreeser waar unser wunx fer aach ‘xmeke un siin tas Yeehoowa kuut is’.” Mit te tsayt, hon Payton un Diana sich kewanert fer een plats woo mee hilef praucht. Host tuu aach xon artikele fon tiise sekwens kelees? Un host tuu xon ti wiiteos Pregação em Territórios Isolados: Austrália un Pregação em Territórios Isolados: Irlanda im jw.org kesiin? Tiise artikele un wiiteos khene tich helfe aate fine fer mee in Yeehoowa sayn aarwayt mache.

15. Warom is es kuut tsayt aus kepe mit layt woo wole mee tsu Yeehoowa mache?

¹⁵Fertrayp tsayt mit layt woo wole mee tsu Yeehoowa mache. Es is laychter fer uns was nayes xmeke wën mer mit layt sin woo tas kërn ese. In te selwich aat, wën mer tsayt aus kepe mit layt woo hale Yeehoowa im eyerste plats in sayn leepe, kriin mer aach te wunx fer mee tsu tëm mache. Tas is was mit een pheyerche pasiirt is: Kent un Veronica. “Unser froynte un familye hon uns uf kemuut naye aate fon tiinst ‘xmeke’ — saat Kent. — Tsayt aus kepe mit layt woo tas Raych im eyerste plats tuun, hot uns ti sicherheet kep fer se fersuuche was nayes mache.” Hayt, tiine Kent un Veronica wii spetsyaale pyoneere in Sërwya.

16. Tëm noo Yeesus sayn ilustratsyoon in Lukas 12:16-21, warom mise mer wilich sin fer etliche tinge uf kepe?

¹⁶Kep fon etliche tinge uf fer mee tsu Yeehoowa mache. Meyer prayche net fon ales was mer kërn hon uf kepe fer Yeehoowa kefale. (Ekl. 5:19, 20) Awer, wën mer raus suuche net mee tsu Yeehoowa mache wayl mer wole net fon etwas woo mer kërn hon uf kepe, khente mer een feele mache — te selwich feele woo te man fon Yeesus sayn ilustratsyoon kemacht hot: tee hot xtram kexaft fer kuute tinge samele, awer hot sich net mit Kot kekhimert. (Lees Lukas 12:16-21.) * Christian, eene pruuter woo im Frankraych leept, saat: “Ich waar net tas pestes fon mayn tsayt un kraft fer Yeehoowa un fer mayn familye am kepe.” Tan, hon tee un sayn fraa te ëntxlus kemacht fer wii pyoneere tiine. Fer tiise tsiil trefe, praychte se sayn aarwayt lose. Fer sich fersoriche, hon se aan kefang hayser un skritoorye sauwer mache, un tii hon aach kelërnt mit weenicher tsufriite sin. Sin se  froo weeche sayn ëntxlus fer etliche tinge uf kepe fer wii pyoneere tiine? “Yets, hon mer fiil mee frooheet in te preetich aarwayt — saat Christian. — Meyer fraye uns aach wën mer siin ti Piipel xtutënte un rik pesuuche iwer Yeehoowa lërne.”

17. Was khan uns tsurik hale etwas nayes in te preetich aarwayt mache?

¹⁷Say wilich fer in naye aate preetiche. (Aph. 17:16, 17; 20:20, 21) Shirley, een pyoneerin in te Fereenichte Xtaate fon Amërika, hot aan kefang in een nay aat preetiche weeche ti pantemii fon coronavirus. Eyerst, waar se een pisye ëngstlich fer tsaye torich telefoon kepe. Awer wii te sirkuyt superintentent ti kemaynt pesuucht hot, hot Shirley iipung kriit fer tas mache un fon tat aan tuut se eftas torich telefoon preetiche. Tii saat: “Am aanfang, hat ich pang, awer yets liipe ich tas! Meyer trefe mee layt wii wën mer haus tsu haus kepreeticht hon.”

18. Was khene mer mache wën etwas lost es xweyer fer uns mee tsu Yeehoowa kepe?

¹⁸Mach een plaan un kee tëm noo. Wën mer een propleem hon, mise mer tsu Yeehoowa peete un tan pleene aan was mer mache khene. (Xpr. 3:21) Sonia, een rekulaar pyoneerin woo in een romanii krup in Europa tiint, saat: “Ich xraype kërn mayn pleen uf een papiir. Tan lose ich tiise papiir uf een plats woo ich eftas siin. Uf mayn tix hon ich een pilt fon een krayts weech. Wën ich een ëntxlus mache mus, kuke ich tiise pilt un ich tenke: ‘Woo tuut tiise ëntxlus mich hin nëme?’” Sonia fersuucht aach positiiw sin wën een xwiirichkheet foer khomt. Tii leet aus: “Yeete nay situatsyoon khan fer mich orer een mauer sin — woo mich um halt een tsiil trefe —, orer een prik sin — woo mich helft tas hin kriin. Tas ales hëngt aan mayn aanxtelung ap.”

19. Was sole mer pextimt sin se mache?

¹⁹ Yeehoowa xenkt uns fiile seechen un meyer khene tsayche tas mer petanklich weeche yeete eene fon tëne sin. Wii? Wën mer unser pestes mache fer tëm loope. (Hep. 13:15) Fiilaycht, khene mer naye aate fine fer mee tsu Yeehoowa mache; un tan tuut eyer uns noch mee seechne. Tes weeche, wole mer yeete taach naye aate suuche fer ‘xmeke un siin tas Yeehoowa kuut is’. Wën mer tas mache, wëre mer soo wii Yeesus, woo kesaat hot: “Mayn esmitel is te wile fon tëm woo mich kexikt hot mache un sayn aarwayt fërtich pringe.” (Yoo. 4:34)