In tiise artikel, hon mer kelërnt tas es kept ploos een wichtich uersach woo ti kanse mënxe un engele petreft: ti ferhaylichung fon Yeehoowa sayn kroose naame. Ti sache iwer Yeehoowa sayn soweraaniteet — es wil saan, ep ti aat wii Kot rechiirt ti pest is — is ferpunt mit te ferhaylichung fon Sayn naame. In te selwich aat, ti mënxe sayn troyheet is aach ferpunt mit te ferhaylichung fon Kot sayn naame.

Warom tuun mer yets saan tas ti wichtichste sache hot se tuun mit Yeehoowa sayn naame un sayn ferhaylichung? Wole mer 3 uersache kuke.

Eyerst: im Eetem kaate, hot Satanaas Yeehoowa sayn naame atakiirt — es wil saan, hot kemacht tas ti layt was xlechtes iwer Kot tenke teete. Mit sayn kiftich frooch, hot Satanaas Ewa tsum ferxteen kep tas Yeehoowa net krooshërtslich waar un tas Sayn kepoote fer Aatam un Ewa unkerecht waare. Too hot Satanaas was kesaat woo kans anerste wii Yeehoowa sayn wërter waar. In woerheet, tee hot kesaat tas Kot een liichner is. Soo hot eyer iwer Yeehoowa sayn naame keloo. Tes weeche, is Satanaas “te Taywel” kep, in anere wërter, “eene liichner”. (Yoo. 8:44) Wayl Ewa aan Satanaas sayn liie keklaapt hot, hot se Kot unfolicht; tas hot ketsaycht tas se wolt net Yeehoowa wii sayn rechiirente hon. (Xee. 3:1-6) Pis hayt, tuut Satanaas wayter liie saan iwer ti sort persoon woo Yeehoowa is. Es is laychter fer tëne woo aan Satanaas sayn liie klaape, Kot unfoliche. Tes weeche, fer Kot sayn folek, is ti lii keeche Kot sayn hayliche naame ti xlimst unkerechtichkheet. Es is ti haupst uersach hinich te eelent un ti xlechtichkheet in te welt.

Tsweet: Yeehoowa tuut sayn naame xitse un tëm sauwer mache fon ale fleke un tas pringt nutse fer sayn kans kriatsyoon. Fer Kot, niks is wichticher wii tas mache. Tes weeche, hot eyer kesaat: “Sicher tuun ich mayn kroose naame ferhayliche.” (Ese. 36:23) Un Yeesus hot taytlich kelos was sol tas haupste in te kepeete fon Yeehoowa sayn troye tiiner sin. Tee hot kepeet: “Tayn naame sol kehaylicht wëre.” (Mat. 6:9) Ti Piipel tuut noo un noo tsayche wii wichtich es is Kot sayn naame ferhërliche. Kuk mool etliche payxpiile: “Kept tsu Yeehoowa ti eer woo Tëm sayn naame fertiint.” (1 Kro. 16:29; Psal. 96:8) “Singt liiter tsu Tëm sayn hërliche naame.” (Psal. 66:2) “Ich tuun tayn naame fer imer ferhërliche.” (Psal. 86:12) Un een mool, wii Yeesus im thempel in Yeruusalem waar, hot eyer kesaat: “Fater, ferhërlich tayn naame.” Too hot Yeehoowa selepst fom himel aus keantwort: “Ich hon tëm xon ferhërlicht un tuun tëm noch mool ferhërliche.” (Yoo. 12:28) a

Trit: Yeehoowa sayn tsiil wërt fer imer mit sayn naame ferpunt, orer was ti layt iwer tëm tenke. Tenk wii wichtich Yeehoowa sayn naame wërt noo te letst proop, am ën fon te Tausent  Yoore Rechiirung. Was tuun al ti mënxe un engele iwer Yeehoowa sayn naame tenke in tiise tsayt? Fer uns helfe ti antwort fine, wole mer uns erinere fon 2 sache woo too temit ferpunt sin: ti troyheet fon te mënxe un ti aat wii Yeehoowa rechiirt. Meecht es neetich wëre, in tiise tsayt, tas ti mënxe wayter pewayse tas se troy sin? Nee. Tii wëre perfekt un xon kans keproopt. In tiise tsayt, tuun se xon eewiche leepe hon. Un meecht es neetich wëre se pewayse tas Yeehoowa sayn aat fer rechiire ti pest is? Nee. In tiise tsayt, wëre al im himel un uf te eyert eenich un tii al tuun Yeehoowa sayn rechiirung aan nëme. Awer was khene mer saan iwer Kot sayn naame?

In tiise tsayt, tuun ale layt ti woerheet iwer Yeehoowa wise un tëm sayn naame wërt kans ferhaylicht. Awer Yeehoowa sayn naame wërt wayter tas wichtichste tings fer al sayn tiiner im himel un uf te eyert. Warom? Wayl tii tuun wayter siin Yeehoowa wunerliche tinge mache. Mërk mool: wayl Yeesus mit teemuut ti rechiirung tsurik tsu Yeehoowa kepe tuut, wërt “Kot ales fer ale layt”. (1 Kor. 15:28) Tan tuun ti mënxe uf te eyert “ti hërlich frayheet fon Kot sayn khiner kriin”. (Rom. 8:21) Un Yeehoowa tuut sayn tsiil erfiile: een kroos un eenich familye hon mit sayn khiner im himel un uf te eyert. (Ëfe. 1:10)

Noo tas ales pasiirt, wii tuut Yeehoowa sayn familye im himel un uf te eyert sich xpiire? Sicher, tii tuun noch een xtark wunx hon fer Yeehoowa sayn naame loope. Kot hot te psalmist Tawi kelenkt se xraype: “Yeehoowa Kot (…) sol keloopt wëre. (…) Sayn hërliche naame sol fer imer keloopt wëre.” (Psal. 72:18, 19) Fer ti kans eewichkheet, tuun mer wayter naye uersache fine fer tas mache.

Yeehoowa sayn naame representiirt ales iwer tëm. Soo, wën mer iwer Kot sayn naame tenke, tuun mer uns hauptseechlich fon Sayn liip erinere. (1 Yo. 4:8) Meyer tuun uns imer erinere tas weeche liip, hot Yeehoowa uns kemacht un tas fray khaaf opfer uns kep. Un mer tuun uns imer traan tenke tas eyer tuut mit kerechtichkheet un liip rechiire. Awer meyer tuun wayter Kot sayn liip fer ti kans eewichkheet xpiire. Meyer kriin imer naye uersache fer tichter pay unser Fater khome un fer sayn wunerliche naame mit liiter loope. (Psal. 73:28)