1. Was khan uns helfe kërn ti piiplixe profetsiie xtutiire?

 “ICH liipe ti piiplixe profetsiie xtutiire” — saat eene yunge pruuter woo Ben heest. Un tuu? Tuust tuu kërn ti piiplixe profetsiie xtutiire? Orer tenkst tuu tas se tsu xweyer sin fer se ferxteen? Fiilaycht tenkst tuu tas es net soo interesant is tëne xtutiire. Awer tuu khanst aan fange tas kërn mache wëns tuu ferxteest warom Kot ti profetsiie in te Piipel kelos hot.

2. Was tuun mer in tiise artikel siin?

² In tiise artikel, xpreche mer net ploos iwer warom mer ti piiplixe profetsiie xtutiire sole, awer aach iwer wii mer tas mache khene. Meyer tuun 2 profetsiie fon Tanyël noo kuke un siin wii se uns hayt helfe khene.

3. Was mise mer mache wën mer wole ti piiplixe profetsiie ferxteen?

³ Meyer mise hilef kriin fer ti piiplixe profetsiie ferxteen. Tenk mool aan tiise ferklaychung: iwerlee tich tas tuu pesuuchst een plats woos tuu net khënst. Awer een fraaynt woo mit tich reest, tuut tas plats kuut khëne. Tee wees kans kenau woo teyer sayt un woo yeete weech hin nëmt. Sicher pist tuu froo tas tiise fraaynt mit tich kang is. Yeehoowa is wii tiise fraaynt. Tee ferxteet kans kenau ti tsayt woo mer am leepe sin un was im futuer pasiire tuut. Soo, wën mer wole ti piiplixe profetsiie ferxteen, mise mer Yeehoowa sayn hilef mit teemuut ferlange. (Tan. 2:28; 2 Phe. 1:19, 20)

4. Warom hot Yeehoowa profetsiie in sayn Wort kexrip kelos? (Yeeremias 29:11) (Kuk aach tas pilt.)

⁴ Soo wii kuute eltere, wil Yeehoowa hon tas sayn khiner een froo futuer kriin. (Lees Yeeremias 29:11.) b Awer anerste wii ti mënxliche eltere, khan Yeehoowa uns kenau saan was im futuer pasiirt. Tee hot ti profetsiie in sayn Wort kexrip kelos tas mer khonte iwer importante ewënte wise eep se pasiire  teete. (Isa. 46:10) Yaa, ti piiplixe profetsiie sin een liiplich kexenk fon unser himlixe Fater. Awer wii khene mer uns sicher sin tas se sich wërklich erfiile tuun?

5. Was khene ti yunge mit Max sayn speryens lërne?

⁵ In te xuul, sin unser yunge tswixich layt woo weenich orer kaar khee respekt tsu te Piipel tsayche. Als mool, ti aktsyoone un wërter fon tiise layt khene mache tas ti yunge tswayfele iwer sayn klaape kriin. Kuk mool ti speryens fon eene pruuter woo Max heest. Tee saat: “Wii ich yinger waar, hon ich tswayfele kriit ep mayn eltere mich ti woer relichyoon in kelërnt hon un ep ti Piipel wërklich fon Kot inspiriirt waar.” Was hon Max sayn eltere kemacht? “Tii sin in ruu keplip — saat eyer —, opwool ich wust tas se sich ketanke kemacht hon.” Max sayn eltere hon ti Piipel penutst fer tëm sayn frooche antworte. Un Max hot aach etwas kemacht. “Ich selepst hon ti piiplixe profetsiie xtutiirt — saat eyer. — Un ich hon fertseelt iwer was ich kelërnt hon mit anere yunge in te kemaynt.” Was fer waar te resultaat? Max leet aus: “Noo tas, hon ich ti sicherheet kriit tas ti Piipel fon Kot inspiriirt is.”

6. Was must tuu mache wëns tuu tswayfele host, un warom?

⁶ Wëns tuu, soo wii Max, aan fangst tswayfele hon ep ti Piipel wërklich ti woerheet hot, prauchst tuu tich net xultich xpiire. Awer es is aarich wichtich etwas klaych too triwer mache, wayl ti tswayfele sin soo wii tas rost. Wën niks kemacht wërt, khan tas rost lamsam was weyertliches fernichte. Fer aan se fange tas “rost” fon tayn klaape wech xafe, must tuu tich selepst frooe: ‘Tuun ich wërklich klaape aan was ti Piipel iwer te futuer saat?’ Wëns tuu tich net sicher pist, tan must tuu piiplixe profetsiie xtutiire woo sich xon erfiilt hon. Awer wii khanst tuu tas mache?

7. Was hot Tanyël keholef ti piiplixe profetsiie xtutiire? (Tanyël 12:10) (Kuk aach tas pilt.)

⁷ Tanyël hot een kuut payxpiil fer uns al kelos iwer wii ti piiplixe profetsiie xtutiire. Tee hot tas kemacht mit te richtich motiwatsyoon: tee wolt ti woerheet khëne lërne. Tanyël waar aach teemuutich; tee wust tas Yeehoowa tëm helfe teet ti profetsiie ferxteen wën eyer ticht pay Kot plaype teet un Tëm aan heere teet. (Tan. 2:27, 28; lees Tanyël 12:10. c) Tanyël hot ketsaycht tas eyer teemuutich waar wii eyer uf Kot sayn hilef ketraut hot. (Tan. 2:18) Tanyël hot aach mit acht xtutiirt. Tee hot ti teele fon te Piipel woo in sayn tsayt xon kexrip waare, unersuucht. (Yee. 25:11, 12; Tan. 9:2) Wii khanst tuu Tanyël noo mache?

8. Warom tuun etliche layt ti piiplixe profetsiie xtutiire, awer was sol unser motiwatsyoon sin?

⁸ Xtutiir mit te richtich motiwatsyoon. Warom tuust tuu ti piiplixe profetsiie xtutiire? Wëns tuu tas machst fer ti woerheet fon te  Piipel khëne lërne, tuut Yeehoowa tich helfe. (Yoo. 4:23, 24; 14:16, 17) Awer etliche layt xtutiire ti profetsiie weeche anere uersache. Welche, tsum payxpiil, xtutiire ti Piipel wayl se tsayche wole tas se net fon Kot khomt. Tii tenke tas, wën ti Piipel net fon Kot is, khene se aus sich selepst raus suuche was richtich un ferkheert is. Anerste wii tii, mise mer xtutiire mit te richtich motiwatsyoon. Awer es kept een aner wichtich kwaliteet woo neetich is fer ti piiplixe profetsiie ferxteen.

9. Was fer kwaliteet is neetich fer ti piiplixe profetsiie ferxteen? Lee tas aus.

⁹ Say teemuutich. Yeehoowa ferxprecht se helfe weer teemuutich is. (Tya. 4:6) Tes weeche mise mer sayn hilef im kepeet ferlange fer ti piiplixe profetsiie ferxteen. Es is aach neetich erkhëne tas mer mise ti hilef fon te troye sklaaw hon. Kot hot tiise sklaaw in kesetst fer uns kaystlich esmitel in te richtich tsayt kepe. (Luk. 12:42) Yeehoowa is een Kot fon ortnung; tes weeche es xtimt tas eyer ploos een kwel penutst fer uns helfe ti woerheet fon te Piipel ferxteen. (1 Kor. 14:33; Ëfe. 4:4-6)

10. Was host tuu mit Esther sayn speryens kelërnt?

¹⁰ Xtutiir mit acht. Fang aan se xtutiire ti profetsiie woos tuu kërn host. Tas is was een xwester, woo Esther heest, kemacht hot. Tii wolt mee wise iwer profetsiie woo kexproch hon iwer ti tsayt woo te Mesias khome teet. Tii saat: “Wii ich 15  yoore alt waar, hon ich een tiif unersuuchung kemacht fer mich sicher lose tas tiise profetsiie foer Yeesus sayn taache kexrip waare.” Was se kelërnt hot iwer ti Role fom Toote Meer hot tëne ti sicherheet too tefun kep. “Etliche fon tëne waare foer Yeesus sayn taache kexrip kep — saat se. — Soo ti profetsiie woo tat trin xteen, sin sicher fon Kot khom. (…) Ich must tas selwiche tinge noo un noo leese fer tas kuut ferxteen.” Awer Esther is froo kep tas se sich aan kextrengt hot. Noo se fiile piiplixe profetsiie mit acht xtutiirt hot, kuk mool wii se sich kexpiirt hot: “Ich khont taytlich siin tas was ti Piipel saat, woer is!”

11. Warom is es kuut uns sicher sin tas ti Piipel woer is?

¹¹ Wën mer siin wii etliche profetsiie fon Kot sayn Wort sich xon erfiilt hon, tuun mer noch mee uf Yeehoowa un sayn lenkung traue. Ti piiplixe profetsiie xpreche aach iwer unser hofnung fer te futuer. Soo, wën mer se xtutiire, hale mer een positiiw aanxtelung, soo kaar wën mer propleeme mit mache. Wole mer yets khorts xpreche iwer 2 profetsiie woo Tanyël kexrip hot un woo sich hayt erfiile. Tëne ferxteen khan uns helfe kluuche ëntxlise mache.

12. Was representiire ti fiis fon ayse un leet? (Tanyël 2:41-43)

¹² Lees Tanyël 2:41-43. d Im kheenich Napukotonosoor sayn traam, woo Tanyël tëm aus keleet hot, waare ti fiis fon te kroose xtaatue fon ‘ayse un woych leet kemacht’. Wën mer tiise profetsii mit anere profetsiie ferklayche woo in te piicher Tanyël un Apokalipsis xteen, ferxteen mer tas ti fiis representiire ti welt rechiirung fon Kroos Pritaanya  un Nort Amërika. Tas is ti xtarkst welt rechiirung fon unser tsayt. Tanyël saat iwer tiise welt rechiirung: “Tas raych [wërt] halpe xtark un halpe xwach.” Warom is tas halpe xwach? Wayl ti keweenliche layt — es wil saan, tas leet — lose net ti rechiirung sich kreftich wii ayse aan xtele. e

13. Was fer wichtiche woerheete lërne mer fon te profetsii iwer ti fiis fon te kroos xtaatue?

¹³ Meyer khene fiile woerheete lërne mit te xtaatue woo Tanyël pexrip hot, hauptseechlich mit te fiis. Eyerst: ti welt rechiirung fon Kroos Pritaanya un Nort Amërika hot xon ketsaycht wii xtark se is. Tsum payxpiil: ti Fereenichte Xtaate fon Amërika un ti Kroos Pritaanya waare tswixich ti natsyoone woo te 1^te un te 2^te Welt Kriich kewun hon. Awer tiise welt rechiirung wërt yeete taach xweecher, wayl ti layt khëmpfe eene keeche ti aner un keeche ti rechiirung. Tsweet: tas is ti letst welt rechiirung woo foer khomt eep Kot sayn Raych al ti mënxliche rechiirunge fernicht. Opwool als mool anere natsyoone keeche tiise welt rechiirung keen, tii tuun se net ersetse. Meyer wise tas, wayl “te xteen” — woo Kot sayn Raych representiirt — tuut ti fiis fon ayse un leet ferprokle, woo ti welt rechiirung fon Kroos Pritaanya un Nort Amërika representiire. (Tan. 2:34, 35, 44, 45)

14. Wii khan ti profetsii iwer ti fiis fon ayse un leet uns helfe kuute ëntxlise mache?

¹⁴ Meechte mer klaape aan Tanyël sayn profetsii iwer ti fiis fon ayse un leet? Wën yaa, tas sol ti aat wii mer leepe petrefe. Wayl mer wise tas tiise welt klaych fernicht wërt, tuun mer uns net traan hale aan fiil kelt fertiine orer materyaalixe tinge samele. (Luk. 12:16-21; 1 Yo. 2:15-17) Tiise profetsii helft uns aach se siin wii aylich es is preetiche un in lërne. (Mat. 6:33; 28:18-20) Yets woo mer een khorts xtuutyum fon tiise profetsii kemacht hon, khene mer uns frooe: ‘Meechte mayn ëntxlise tsayche tas ich klaape tas Kot sayn Raych al ti mënxliche rechiirunge klaych fernichte tuut?’

15. Weer sin ti kheeniche fom nort un fom siit hayt? (Tanyël 11:40)

¹⁵ Lees Tanyël 11:40. f Tanyël 11 xprecht iwer 2 kheeniche, orer rechiirunge, woo eene keeche te aner khëmpfe. Wën mer tiise profetsii mit anere profetsiie fon te Piipel ferklayche, ferxteen mer tas “te kheenich fom nort” is Ruslant un ti natsyoone woo tëm pay xteen un tas “te kheenich fom siit” is ti welt rechiirung fon Kroos Pritaanya un Nort Amërika. g

16. Wii tuut “te kheenich fom nort” Kot sayn folek pehantele?

¹⁶ Kot sayn tiiner woo unich ti rechiirung fom “kheenich fom nort” leepe, sin terek yachtung am mit mache. Etliche fon unser priiter sin ferklopt un in kexpërt weeche sayn klaape. Xtats unser priiter mit pang lose, tuut ti yachtung fom “kheenich fom nort” tëne sayn klaape uf Yeehoowa un sayn  Wort ferxtërke. Warom? Wayl tii wise tas ti yachtung keeche Kot sayn folek erfiilt ti profetsiie im puuch Tanyël. h (Tan. 11:41) Tas wise, khan uns helfe unser hofnung xtark hale un troy tsu Yeehoowa plaype.

17. Was fer xwiirichkheete hon Kot sayn tiiner, unich te rechiirung fom “kheenich fom siit”, mit kemacht un was tuun se noch mit mache?

¹⁷ Friier, hot “te kheenich fom siit” Kot sayn folek aach terek keyacht. Tas is pasiirt, tsum payxpiil, torich te 1^te un te 2^te Welt Kriich. Fiile priiter sin in kexpërt kep weeche sayn neutraliteet un etliche woo in te xuul waare sin faart kexikt kep. In te letste yoore, is ti leaaliteet fon Kot sayn tiiner, unich te rechiirung fom “kheenich fom siit”, in anere aate keproopt kep. Tsum payxpiil, torich ti tsayt fon te waal, khent een krist sich fersuucht xpiire een politix partay orer kantitaat pay xteen. Opwool eyer net fer een politix partay weele tuut, khent eyer in sayn ketanke orer hërts tenke tas een politix partay peser wii te aner is. Awer fer  wërklich neutral sin, mise mer uf phase net ploos mit was mer mache, awer aach mit was mer tenke un xpiire. (Yoo. 15:18, 19; 18:36)

18. Wii xpiire mer uns iwer te khampf tswixich ti kheeniche fom nort un fom siit? (Kuk aach tas pilt.)

¹⁸ Tii woo net aan te piiplixe profetsiie klaape, khene sich mechtich ëngstlich xpiire wën se siin ti kheeniche fom nort un fom siit sich “eene te aner xupe”. (Tan. 11:40) Ti 2 kheeniche hon kenuuch nuklear pompe fer tas kanse leepe uf te eyert fernichte. Awer mer wise tas Yeehoowa tuut net erlaupe tas soo was pasiirt. (Isa. 45:18) Soo, xtats uns mit pang iwer te futuer lose, tuut te khampf tswixich ti kheeniche fom nort un fom siit unser klaape ferxtërke. Tas pewayst tas tas ën fon tiise welt ticht is.

19. Was sole mer uns erinere iwer ti piiplixe profetsiie?

¹⁹ Meyer wise net wii etliche profetsiie sich erfiile tuun. Soo kaar te profeet Tanyël wust net ti petaytung fon yeete profetsii woo eyer kexrip hot. (Tan. 12:8, 9) Awer net kenau wise wii een profetsii sich erfiile tuut, wil net saan tas se net erfiilt wërt. Meyer khene uns sicher sin tas Yeehoowa tuut uns helfe se wise was mer prayche kraat in te richtich xtun, soo wii eyer xon friier kemacht hot. (Amo. 3:7)

20. (a) Was fer ufmuutiche piiplixe profetsiie tuun sich klaych erfiile? (b) Was mise mer wayter mache?

²⁰ Ti natsyoone tuun “friit un sicherheet” aus xpreche. (1 The. 5:3) Tan klaych tëm noo, tuun ti rechiirunge ti falxe relichyoone atakiire un fernichte. (Apo. 17:16, 17) Too tuun se Kot sayn folek atakiire. (Ese. 38:18, 19) Tas nëmt tsum Armaxeton kriich. (Apo. 16:14, 16) Meyer khene uns sicher sin tas tiise ewënte klaych pasiire tuun. Pis tat hin, wole mer petanklichkheet tsayche fer unser liiplich Fater im himel. Wii? Meyer mise acht kepe fer ti piiplixe profetsiie un anere helfe tas aach mache.