1. Warom hon ti papilooner sich mit Tanyël ferwunert?

 TE PROFEET Tanyël waar yung wii eyer inkexpërt tsu Papiloon kenom kep is, wayt wech fon Yeruusalem. Awer opwool eyer yung waar, hon ti papilooner sich ferwunert mit was se kesiin hon: Tanyël ‘hat khee feele un hot kuut aus kesiin’ un tee waar fon een wichtich familye. (1 Sam. 16:7) Tes weeche hon se tëm keiipt fer im palas tiine. (Tan. 1:3, 4, 6)

2. Was hot Yeehoowa iwer Tanyël ketenkt? (Esekyël 14:14)

² Yeehoowa hot Tanyël keliipt, net wayl eyer kuut aus kesiin hot orer weeche sayn wichtich xtel im palas, awer wayl tiise man raus kesuucht hot leaal tsu Kot plaype. In woerheet, wii Yeehoowa kesaat hot tas Tanyël soo wii Noee un Yoop waar, tsiimlich sicher waar Tanyël ploos unkefeer 20  yoore alt. Yawool, foer Yeehoowa, waar te yunge Tanyël soo kerecht wii Noee un Yoop, woo hate Kot troy ketiint torich fiile yoore. (Xee. 5:32; 6:9, 10; Yoop 42:16, 17; lees Esekyël 14:14. b) Un Yeehoowa hot wayter Tanyël keliipt torich sayn lang un interesant leepe. (Tan. 10:11, 19)

3. Was tuun mer in tiise artikel siin?

³ In tiise artikel, tuun mer 2 fon Tanyël sayn kwaliteete noo kuke woo hon tëm weyertlich tsu Yeehoowa kemacht. Eyerst, tuun mer yeete kwaliteet pexraype un siin wii Tanyël se ketsaycht hot. Tan lërne mer was Tanyël keholef hot tiise kwaliteete  ëntwikele. Un tsum xlus, siin mer wii mer tëm noo mache khene. Tiise artikel is hauptseechlich fer ti yunge kexrip kep, awer meyer al khene fon Tanyël sayn payxpiil lërne.

4. Wii hot Tanyël koraaj ketsaycht?

⁴ Koraajiche layt khene pang xpiire, awer tii lose net tiise pang tëne um hale se mache was richtich is. Tanyël waar een koraajich yunge man. Kuk mool 2 situatsyoone woo eyer koraaj ketsaycht hot. Ti eyerst is tsiimlich sicher pasiirt unkefeer 2  yoore noo ti papilooner Yeruusalem fernicht hon. Te papiloonixe kheenich Napukotonosoor hat een xreklich traam iwer een mechtich kroos xtaatue. Tee hot ti kluuche mëner kexikt tëm saan was eyer ketreemt hat un was te traam petayt hot. Wën se tas net mache khonte, teet eyer se al um pringe, too tepay Tanyël! (Tan. 2:3-5) Tanyël must etwas xnel mache. Wën net, teete fiile layt xtërpe. “Soo is Tanyël foer te kheenich khom un hot tëm tsayt ferlangt tas eyer ti ausleyung fom traam fer te kheenich kepe khont.” (Tan. 2:16) Tas tsaycht tas Tanyël koraaj un klaape hat. Wii soo? Ti Piipel saat net tas Tanyël xon friier treem aus keleet hat. Tee hot fer sayn fraaynte Satrak, Mesak un Apetneeko c ferlangt “tas se solte tsum Kot fom himel peete tas eyer parmhërtslich weyer un tiise kehaymnis uf teke teet”. (Tan. 2:18) Yeehoowa hot tiise kepeete keantwort. Mit Kot sayn hilef, hot Tanyël Napukotonosoor sayn traam aus keleet. Tes weeche sin Tanyël un sayn fraaynte net kextorep.

5. In was fer aner situatsyoon must Tanyël koraaj tsayche?

⁵ Een tsayt noo tas Tanyël te traam iwer ti xtaatue aus keleet hot, is sayn koraaj noch mool keproopt kep. Napukotonosoor hot een aner traam kriit woo tëm pang kemacht hot. Te traam hat se tuun mit een kroose paam. Mit koraaj hot Tanyël ti petaytung fom traam aus keleet; tee hot soo kaar kesaat tas te kheenich teet ferikt wëre un tas eyer fer een tsayt net rechiire teet. (Tan. 4:25) Weeche tiise ausleyung, weyer es laycht fer te kheenich tenke tas Tanyël repëlix kep is un tas eyer must um keprung wëre. Soo wii soo, hot Tanyël koraaj ketsaycht un te traam aus keleet.

6. Was meecht Tanyël keholef hon koraajich sin?

 ⁶ Was meecht Tanyël keholef hon koraaj torich sayn kanse leepe tsayche? Sicher, wii tee yung waar, hot eyer mim payxpiil fon sayn eltere kelërnt. Kewis, hon se Yeehoowa sayn kesets fer ti eltere aan keheert un Kot sayn Kesets fer Tanyël in kelërnt. (Teut. 6:6-9) Tanyël wust net ploos ti 10 Kepoote, awer aach fiile kleenichkheete fom kesets; tee wust, tsum payxpiil, was een israeliiter ese thërft un was eyer net ese thërft. d (Lew. 11:4-8; Tan. 1:8, 11-13) Tanyël hot aach tas kexicht fon Kot sayn folek kelërnt un tee wust was mit tëne pasiirt is wën se Yeehoowa net aan keheert hon. (Tan. 9:10, 11) Torich sayn leepe khont Tanyël taytlich siin tas, ekaal was pasiire teet, teete Yeehoowa un sayn xtarke engele tëm helfe. (Tan. 2:19-24; 10:12, 18, 19)

7. Was noch hot Tanyël keholef koraaj hon? (Kuk aach tas pilt.)

⁷ Tanyël hot xtutiirt was Kot sayn profeete kexrip hon, too tepay Yeeremias sayn profetsiie. Mit sayn xtuutyum, hot Tanyël ferxtan tas klaych weyere ti yuute fon Papiloon pefrayt. (Tan. 9:2) Wii Tanyël kesiin hot Yeehoowa sayn wërter sich erfiile, hot eyer noch mee uf Kot ketraut. Un tii woo fest uf Kot traue, khene aarich koraajich sin. (Kuk aach Romaaner 8:31, 32, 37-39.) Un tas haupste: Tanyël hot imer tsu sayn himlixe Fater kepeet. (Tan. 6:10) Tee hot sayn sinte foer Yeehoowa erkhënt, hot hilef ferlangt un hot iwer sayn xpiirunge mit Kot fertseelt. (Tan. 9:4, 5, 19) Soo wii meyer al, is Tanyël net mit koraaj uf te welt khom. Xtats tas, hot eyer tiise kwaliteet ëntwikelt wii eyer xtutiirt, kepeet un uf Yeehoowa ketraut hot.

8. Wii khene mer koraaj ëntwikele?

⁸ Was mise mer mache fer koraaj ëntwikele? Fiilaycht tuun unser eltere uns uf muute koraajich sin, awer tii khene net tiise kwaliteet uns kepe wii wën tas een ërpxaft weyer. Koraaj kriin is wii een nay apiliteet lërne. Wii soo? Een aat wiis tuu een apiliteet lërne khanst, is tayn leerer peopachte un tan tëm noo mache. Kraat soo, lërne mer koraajich sin wën mer peopachte wii anere tiise kwaliteet tsayche un tan sayn payxpiil noo mache. Soo, was hon mer mit Tanyël kelërnt? Soo wii tee, mise mer ti Piipel kuut khëne. Meyer mise aach een xtark fraayntxaft mit Yeehoowa ëntwikele. Meyer kriin tas hin wën mer imer mit Yeehoowa fertseele un tëm saan kraat wii mer uns xpiire. Un meyer mise uf Kot traue mit te sicherheet tas eyer uns helfe tuut. Tan, wën unser klaape keproopt is, wëre mer koraajich sin.

9. Was fer nutse kriin mer wën mer koraajich sin?

⁹ Meyer kriin fiil nutse wën mer koraajich sin. Kuk mool Ben sayn speryens. Al in sayn xuul in Taytxlant hon aan te ewolutsyoon keklaapt un tii hon ketenkt tas was ti Piipel iwer ti kriatsyoon saat, net woer is. Eene taach, khont Ben fer sayn koleke aus leye warom eyer aan te kriatsyoon keklaapt hot. Mit koraaj, hot eyer tiise xans kuut penutst. Was fer waar te resultaat? “Mayn leerer hot mit acht keheert — saat Ben. — Tee hot aach kopye fon te informatsyoone woo ich penutst hon, kemacht un fer mayn koleke aus keteelt.” Wii hon Ben sayn koleke sich aan kextelt? “Fiile fon tëne hon mayn ausleyung keheert — saat Ben. — Un tii hon mich fertseelt tas se mich too teweeche respektiirt hon.” Wii Ben sayn speryens tsaycht, koraajiche layt tuun ofts te  respekt fon te anere kriin. Tii khene aach eerliche layt helfe Yeehoowa khëne lërne. Yawool, meyer hon kuute uersache fer koraaj ëntwikele.

10. Was is leaaliteet?

¹⁰ In te Piipel, tas hepreeyx wort fer “leaaliteet” orer “leaale liip” hot se tuun mit yemant wayter liipe un troy uf sayn sayt plaype. Tiise wort is ofts penutst fer se pexraype ti liip woo Yeehoowa noo sayn tiiner hot. Tas is aach penutst fer se pexraype ti liip woo Kot sayn tiiner eene noom aner hon. (2 Sam. 9:6, 7) Yeehoowa wil aach hon tas mer leaal tsu tëm sin. Mit te tsayt, khan unser leaaliteet xtërker kepe. Kuk mool wii Tanyël sayn leaaliteet xtërker kep is.

11. Wii hot Tanyël leaaliteet ketsaycht wii eyer xon alt waar? (Kuk tas pilt am aanfang fom piichelche.)

¹¹ Torich sayn kanse leepe, is Tanyël sayn leaaliteet tsu Yeehoowa keproopt kep. Awer eene fon te kreeste proope is pasiirt wii eyer mee wii 90  yoore alt waar. In tiise tsayt, is Papiloon fon te mëter un përser iwerfal kep un waar fon te kheenich Tarius rechiirt. Ti ofitseer woo te kheenich ketiint hon, hon Tanyël kehast un hon tëm sayn Kot net respektiirt. Tes weeche hon se een plaan kemacht fer Tanyël um pringe. Tii hon te kheenich rom kepapelt een kesets aprowiire woo in proop xtele teet ep Tanyël leaal tsum kheenich orer tsu Yeehoowa weyer. Fer net kextrooft wëre un tsayche tas eyer leaal tsum kheenich waar, must Tanyël noo lose tsu Yeehoowa peete torich 30 taache. Tanyël hot raus kesuucht leaal tsu Yeehoowa plaype. Tes weeche is eyer im leepes loch kexmis kep. Awer Kot hot Tanyël sayn leaaliteet peloont un tas maul fon te leepe tsu kemacht. (Tan. 6:12-15, 20-22) Soo wii Tanyël, wii khene mer troy tsu Yeehoowa plaype?

12. Wii hot Tanyël leaaliteet tsu Yeehoowa ëntwikelt?

¹² Fer leaal tsu Yeehoowa sin, mise mer een xtark liip tsu tëm hon. Tanyël is troy tsu Yeehoowa keplip wayl eyer sayn himlixe Fater aarich fiil keliipt hot. Sicher waar Tanyël sayn liip tsu Yeehoowa xtark wayl eyer tsayt kehool hot fer se tenke iwer Kot sayn kwaliteete un wii Eyer se tsaycht. (Tan. 9:4) Tanyël hot aach triwer noo ketenkt aan al ti kuute tinge woo  Yeehoowa fer tëm un sayn folek kemacht hat un tee waar petanklich too teweeche. (Tan. 2:20-23; 9:15, 16)

13. (a) Wii is ti leaaliteet fon Kot sayn yunge tiiner keproopt? Kep een payxpiil. (Kuk aach tas pilt.) (b) Tëm noo te wiiteo, wii khanst tuu een antwort kepe wën yemant frooe tuut ep mer pay xteen tii woo raus suuche homoseksuaal sin?

¹³ Soo wii Tanyël, ti yunge woo hayt Yeehoowa tiine, hon fiile layt um tëne rom woo khee respekt tsu Kot un sayn kesetse hon. Fiilaycht hon tiise layt net kërn tii woo saan tas se Kot liipe. Etliche fersuuche soo kaar tiise yunge tswinge sayn leaaliteet tsu Kot uf kepe. Kuk mool, tsum payxpiil, was mit Graeme pasiirt is, eene yunge man woo in Austraalya leept. Tee hot een xweyer situatsyoon mit kemacht wii eyer in te mitel xuul waar. Ti leerin hot fer ti xiiler kefroot: “Was teest tuu mache wën een fraaynt tich saan teet tas eyer homoseksuaal is?” Ti leerin hot fer ti xiiler kesaat tas tii woo sayn fraaynt pay xteen teete, solte uf een sayt plaype; un tii woo ketenkt hon tas es ferkheert waar, solte uf te aner sayt plaype. Graeme saat: “Ploos ich un een aner fraaynt, woo Yeehoowa sayn Tsayer is, sin uf te sayt keplip woo ketenkt hon tas es ferkheert waar.” Too is ti situatsyoon noch xlimer kep un Graeme must tsayche tas eyer leaal tsu Yeehoowa waar. Tee saat: “Torich te rest fon te xuul, woo een xtun lang waar, hon ti anere xiiler un soo kaar ti leerin uns ferxënt. Ich hon mayn pestes kemacht fer mayn klaape mit kexik un ferninftichkheet xitse, awer tii hon kaar niks keheert.” Wii hot Graeme sich too teweeche kexpiirt? “Ferxënt sin, waar net kuut — saat eyer —, awer ich hon mich froo kexpiirt wayl ich troy tsu Yeehoowa keplip sin un mayn klaape kexitst hon.” e

14. Was khan uns helfe unser leaaliteet tsu Yeehoowa ferxtërke?

¹⁴ Soo wii Tanyël, woo kreeser unser liip tsu Yeehoowa is, woo kreeser is unser pextimung fer leaal tsu Tëm plaype. Unser liip tsu Kot wërt noch kreeser wën mer iwer sayn kwaliteete lërne. Meyer khene, tsum payxpiil, xtutiire ti tinge woo eyer kemacht hot. (Rom. 1:20) Wëns tuu wilst tayn liip un respekt tsu Yeehoowa ferxtërke, khanst tuu ti sekwëns fon artikele “Hots yemant kepleent?” leese orer ti wiiteos fon tiise sekwëns kuke. Tuu khanst aach leese ti piichelcher A Vida — Teve um Criador? un A Origem da Vida — Cinco Perguntas Que Merecem Resposta. Kuk mool was een yung xwester fon Tanimark, Esther, iwer tiise piichelcher saat: “Ti aat wii ti itee foer kextelt sin, is wunerlich! Tiise piichelcher saan net was tuu klaape solst; tii tuun ploos ti fakte foer pringe un tan tich lose tayn ëntxlus mache.” Ben, iwer weem mer foner traan kexproch hon, saat: “Tiise piichelcher hon mayn klaape ferxtërkt. Tii hon mich ti sicherheet kep tas Kot tas leepe kemacht hot.” Noo tiise piichelcher leese, sicher tuust tuu xtime mit was ti Piipel saat: “Tuu Yeehoowa, unser Kot, fertiinst ti hërlichkheet, ti eer un ti macht, wayls tuu ale tinge kemacht host.” (Apo. 4:11) f

15. Wii noch khene mer unser fraayntxaft mit Yeehoowa ferxtërke?

¹⁵ Een aner aat wii mer khene unser liip tsu Yeehoowa ferxtërke, is iwer tas leepe fon sayn Soon, Yeesus, xtutiire. Samira, een yung xwester woo in Taytxlant leept, hot tas kemacht. Tii saat: “Ich hon Yeehoowa peser khëne kelërnt wii ich iwer Yeesus xtutiirt hon.” Wii se een khint waar, hot Samira es xweyer kefun se ferxteen  tas Yeehoowa xpiirunge hat. Awer tii khont ferxteen wii Yeesus sich kexpiirt hot. “Ich hat Yeesus aarich kërn — saat se —, wayl eyer fraayntlich waar un ti khiner keliipt hot.” Woo kreeser Samira sayn khëntnis iwer Yeesus waar, woo peser hot se Yeehoowa khëne kelërnt un keliipt. Warom? Tii saat: “Ich hon mit te tsayt ferxtan tas Yeesus sayn Fater perfekt noo kemacht hot; tii sin neekst ekaal. Ich hon kemërkt tas, een uersach warom Yeehoowa Yeesus tsu te eyert kexikt hot, is tas mer khente Tëm peser khëne lërne.” (Yoo. 14:9) Wëns tuu wilst tayn fraayntxaft mit Yeehoowa ferxtërke, was mënst tuu tsayt hoole fer een tiif xtuutyum iwer Yeesus mache? Sicher tas tuut tayn liip un leaaliteet tsu Kot xtërker lose.

16. Warom sole mer leaal sin? (Psalm 18:25; Mikeyas 6:8)

¹⁶ Wën mer leaal tsu te anere sin, khene mer tichte fraaynte hon woo leaal tsu uns sin. (Rut 1:14-17) Un wën mer leaal tsu Yeehoowa sin, khene mer inerlich friit xpiire. Warom? Wayl Kot ferxprecht leaal sin mit tëne woo leaal tsu tëm sin. (Lees Psalm 18:25; g Mikeyas 6:8. h) Tenk mool noo: opwool mer soo kleen sin ferklaycht mim Ale Mechtiche Kriatoer, tee ferxprecht uns imer liipe. Un wën mer tiise ticht fraayntxaft mit Yeehoowa hon, khee propleem orer faynt — noch net mool te toot — khan uns fon tëm aus naner mache. (Tan. 12:13; Luk. 20:37, 38; Rom. 8:38, 39) Yawool, es is aarich wichtich Tanyël noo mache un wayter leaal tsu Kot plaype!

17-18. Was noch khene mer fon Tanyël sayn payxpiil lërne?

¹⁷ In tiise artikel, hon mer ploos 2 fon Tanyël sayn kwaliteete noo kekukt. Awer meyer khene noch fiil mit tëm lërne. Yeehoowa hot, tsum payxpiil, wisyoone un treem fer Tanyël kep un aach ti apiliteet fer ti profetsiie ferxteen. Fiile fon tiise profetsiie hon sich xon erfiilt. Anere kepe kleenichkheete iwer ewënte woo noch pasiire tuun un woo ti kanse layt uf te eyert petrefe tuun.

¹⁸ Im neekste artikel, tuun mer 2 profetsiie woo Tanyël kexrip hot, noo kuke. Ekaal ep mer yung orer alt sin, tiise profetsiie ferxteen khan uns al helfe kluuche ëntxlise yets mache. Tas khan uns aach helfe unser koraaj un leaaliteet ferxtërke tas mer foer perayt wëre fer was klaych pasiire tuut.