1. Tëm noo Hepreeyer 12:1, was mise mer mache fer tas xpringe fom leepe kewine?

 TI PIIPEL ferklaycht unser kristlich leepe mit een xpringe. Ti xpringer woo pis tsum ën hin khome, tuun tas eewiche leepe kriin. (2 Tim. 4:7, 8) Meyer mise uns aan xtrenge fer wayter xpringe, hauptseechlich wayl tas ën fom xpringe is tichter wii noch nii. Te aphostel Phaul, woo pis tas ën fom xpringe fom leepe hin khom is, hot kexproch iwer was uns helfe tuut tas xpringe kewine. Tee hot uns aan kereet ‘ale laste wech xmayse un wayter xpringe in tëm xpringe woo foer uns is’. (Lees Hepreeyer 12:1.) b

2. Was petayt ‘ale laste wech xmayse’?

² Wii Phaul kexrip hot tas mer mise ‘ale laste wech xmayse’, wolt eyer saan tas ti kriste sole khee last nëme? Nee. Tee wolt saan tas mer mise noo lose se nëme al ti laste woo uneetich sin. Soo sorte laste khente uns xteere un miit lose. Fer aus hale, mise mer fiks mërke un wech xmayse al ti uneetiche laste woo mer am nëme sin. Awer in te selwich tsayt, meyer wole net wech xmayse ti laste woo mer traan sole. Wën mer tas mache teete, teete mer net in tëm xpringe plaype. (2 Tim. 2:5) Was fer laste mise mer nëme?

3. (a) Tëm noo Kalater 6:5, was mise mer nëme? (b) Was tuun mer in tiise artikel siin un warom?

 ³ Lees Kalater 6:5. c Too, waar Phaul am xpreche iwer was Kot wil hon tas yeete eene fon uns wii sayn tiiner macht — etwas woo nimant fer uns mache khan. In tiise artikel, tuun mer siin was is tepay in unser “aychne last” un wii meyer tas nëme khene. Meyer tuun aach itentifitsiire uneetiche laste woo meyer, im xtant, am nëme sin un lërne wii meyer tëne wech xmayse khene. Tas ales tuut uns helfe tas xpringe fom leepe kewine.

4. Warom is es net tsu xweyer unser tetikatsyoon erfiile? (Kuk aach tas pilt.)

⁴ Unser tetikatsyoon. Wën meyer uns tsu Yeehoowa tetikiirt hon, hon mer ferxproch tas mer teete tëm aan peete un sayn wile mache. Meyer mise tiise ferxpreche hale. Es is een ërnst responsapiliteet se mache ales was mer ferxproch hon, awer es is net tsu xweyer fer uns. Tas is soo wayl Yeehoowa uns  kemacht hot fer Tëm sayn wile mache. (Apo. 4:11) Tee hot uns noo sayn pilt kemacht un hot in uns te wunx kextelt fer tëm khëne lërne un aan peete. Tes weeche, khene mer ticht pay tëm khome un uns fraye wën mer sayn wile mache. (Psal. 40:8) Un wën mer Kot sayn wile mache un sayn Soon noo keen, tuun mer “nay kraft fine”. (Mat. 11:28-30)

5. Was tuut tich helfe tayn tetikatsyoon erfiile? (1 Yoohan 5:3)

⁵ Wii khanst tuu tiise last nëme? Tswaay tinge khene tich helfe. Eyerst, tuu tayn liip tsu Yeehoowa wayter ferxtërke. Fer tas hin kriin, tenk traan aan ti kuute tinge woo Yeehoowa xon fer tich kemacht hot, un woo eyer noch mache tuut. Woo kreeser tayn liip tsu Kot is, woo laychter wërts fer tich tëm aan heere. (Lees 1 Yoohan 5:3.) d Een tsweete tings woo tich helfe khan, is Yeesus noo mache. Was hot tëm keholef Kot sayn wile mache? Tee hot hilef im kepeet ferlangt un hot sich aan sayn peloonung traan kehal. (Hep. 5:7; 12:2) Soo wii Yeesus, ferlang kraft tsu Yeehoowa im kepeet un hal tayn hofnung fon eewiche leepe xtark in tayn ketanke. Wëns tuu tayn liip tsu Yeehoowa ferxtërkst un Tëm sayn Soon noo machst, tuust tuu es hin kriin tayn tetikatsyoon erfiile.

6. Warom mise mer unser flichte in te familye uf phase? (Kuk aach tas pilt.)

⁶ Ti flichte woo mer in te familye hon. In unser xpringe fom leepe, mise mer Yeehoowa un Yeesus mee wii unser parente liipe. (Mat. 10:37) Awer es wil net saan tas mer khene unser flichte in te familye im xtich lose. Kraat tas keeche teel, fer Kot un Yeesus kefale, mise mer unser teel in te familye mache. (1 Tim. 5:4, 8) Tas tuut uns frooer lose. Yeehoowa wees tas ti familye froo wërt wën te man un ti fraa sich mit liip un respekt pehantele, wën ti eltere sayn khiner liipe un iipe, un wën ti khiner sayn eltere aan heere. (Ëfe. 5:33; 6:1, 4)

7. Wii khanst tuu tayn flichte in te familye uf phase?

⁷ Wii khanst tuu tiise last nëme? Ekaal tayn flichte in te familye, tuu ti kluuche aanreete fon te Piipel aan wëne. Tuu net aynfach mache was tuu tenkst richtich is, was ti meyerste layt mache tat woos tuu woonst orer was ti “kelërntne layt” saan. (Xpr. 24:3, 4) Tuu unser puplikatsyoone kuut penutse. Tii hon praktixe aanreete iwer wiis tuu khanst ti piiplixe funtamente aan wëne. Tsum payxpiil, tas piichelche Wii khanst tuu een froo familye hon? un ti lisyoone 49 un 50 fom puuch Los tich kuut keen im leepe fer imer! kepe kuute informatsyoone woo khene pheyerche, eltere un yunge helfe. e Soo kaar wën anere in tayn familye net aan wëne was ti Piipel saat, say pextimt tas mache. Soo, tuut tayn familye nutse kriin un tuu tuust Yeehoowa sayn seechen xpiire. (1 Phe. 3:1, 2)

8. Wii khene unser ëntxlise uns petrefe?

⁸ Ti responsapiliteet weeche unser ëntxlise. Yeehoowa hot uns te fray wile kep; un tee wil hon tas mer froo wëre wën mer kuute ëntxlise mache. Awer, Kot xitst uns net fon te konsekwënse woo unser xlechte ëntxlise pringe. (Kal. 6:7, 8) Soo, wën mer een xlecht ëntxlus kemacht hon, orer was ferkheertes kesaat orer kemacht hon, tuun mer ti resultaate aan nëme. Im xtant, tuut tas soo kaar  unser kewise xteere. Awer wën mer ti responsapiliteet weeche unser ëntxlise aan nëme, tas khan uns uf muute unser sinte erkhëne, unser feeler korikiire un uf phase fer tas net noch mool mache. Soo was mache, tuut uns helfe im xpringe fom leepe plaype.

9. Was khanst tuu mache wëns tuu een xlecht ëntxlus kemacht host? (Kuk aach tas pilt.)

⁹ Wii khanst tuu tiise last nëme? Wëns tuu een xlecht ëntxlus kemacht host, erkhën tas tuu khanst net ënere was xon rom kang is. Tuu net tayn tsayt orer kraft ferliire fer se pewayse tas tuu richtich waarst orer fer ti xult fer ti anere kepe. Xtats tas, erkhën tayn feeler un mach tayn pestes in tayn situatsyoon yets. Wëns tuu tich xultich xpiirst weeche etwas woos tuu ferkheert kemacht host, peet tsu Yeehoowa mit teemuut, erkhën tayn feele un ferlang tëm sayn fertsayung. (Psal. 25:11; 51:3, 4) Wëns tuu yemant wee kemacht host, tuu tich ëntxultiche un, wëns neetich is, suuch ti hilef fon te elteste. (Tya. 5:14, 15) Lërn fon tayn feeler un xtreng tich aan fer tas net noch mool mache. Soo khanst tuu tich sicher sin tas Yeehoowa parmhërtslich mit tich wërt un tas eyer tich helfe tuut. (Psal. 103:8-13)

10. Tenke tas mer mise imer mee mache, is een xweyer last. Warom? (Kalater 6:4)

¹⁰ Tenke tas mer mise imer mee mache. Wën mer uns imer mit te anere ferklayche, khene mer aan fange tsu fiil fon uns selepst waarte un tas khan uns iwerlaate. (Lees Kalater 6:4.) f Meyer khente aach naytich wëre un te wunx ëntwikele fer peser wii ti anere sin. (Kal. 5:26) Wën mer fersuuche se mache was ti anere mache, opwool tas tsu fiil fer uns is, khente mer uns wee mache. Un tenk mool noo: ti Piipel saat tas wën mer etwas waarte “woo sich net klaych erfiilt”, khene mer oone muut wëre; soo, xtel tich mool foer wii mer uns xpiire teete wën mer etwas waarte woo im xtant sich nii erfiile tuut! (Xpr. 13:12) Tas khent unser kraft xteele un mache tas mer lamsamer xpringe teete. (Xpr. 24:10)

11. Was khan tich helfe net tenke tas tuu must imer mee mache?

¹¹ Wii khanst tuu tiise last wech xmayse? Waart net mee fon tich selepst wii Yeehoowa ferlangt. Tee waart nii tas tuu kepst was tuu net host. (2 Kor. 8:12) Say tich sicher tas Yeehoowa ferklaycht net was tuu machst mit was ti anere mache. (Mat. 25:20-23) Tee kept weyert fer tayn flaysich aarwayt, tayn troyheet un tayn persewerans. Say teemuutich un ferxtee tas fiilaycht khanst tuu net yets mache ales was tuu wilst weeche tayn elter, kesuntheet orer situatsyoon. Soo wii Parsilay, say wilich fer een flicht net aan nëme wën tayn kesuntheet orer elter es xweyer lost tas erfiile. (2 Sam. 19:35, 36) Soo wii Mooses, nëm hilef aan un, wën es phast, kep etliche fon tayn flichte fer ti anere. (Eeks. 18:21, 22) Wëns tuu teemuutich pist, tuust tuu net soo fiil fon tich selepst waarte tas tuu iwerlaat im xpringe fom leepe wërst.

12. Host tuu ti responsapiliteet weeche ti anere sayn xlechte ëntxlise? Lee tas aus.

¹² Tenke tas tuu ti responsapiliteet host weeche ti anere sayn xlechte ëntxlise. Meyer khene net ëntxlise fer ti anere mache. Un meyer khene se net imer xitse fon te konsekwënse fon sayn xlechte ëntxlise. Tsum payxpiil: een soon orer een tochter khan mit te tsayt ëntxlise noo lose Yeehoowa tiine. Tas khan ti eltere aarich traurich lose.  Awer ti eltere woo sich xultich xpiire weeche ti xlechte ëntxlise fon sayn khint, sin een xweyer last am nëme. Tas is een last woo Yeehoowa wil net hon tas se nëme tuun. (Rom. 14:12)

13. Wii khan een papa orer mama mit te xlechte ëntxlise fon sayn khint um keen?

¹³ Wii khanst tuu tiise last wech xmayse? Eriner tich tas Yeehoowa hot fer uns al ti frayheet kep fer unser aychne ëntxlise mache — too tepay op mer tëm tiine tuun orer net. Yeehoowa wees tas tuu net een perfekt papa orer mama pist. Tee wil aynfach hon tas tuu machst tas pestes woos tuu khanst. Te ëntxlus woo tayn khint macht, is tëm sayn responsapiliteet, net tayns. (Xpr. 20:11) Noch soo, fiilaycht machst tuu tich ketanke weeche ti feeler woos tuu wii papa orer mama kemacht host. Wën tas soo is, xprech mit Yeehoowa iwer tayn xpiirunge un ferlang sayn fertsayung. Tee wees tas tuu khanst net ënere was xon rom kang is. In te selwich tsayt, Yeehoowa waart net tas tuu tayn khint xitst fon te konsekwënse fon sayn xlechte ëntxlise. Eriner tich: wën tayn khint sich aan xtrengt fer tsurik tsu Yeehoowa khome, tuut Eyer tëm hërtslich wilkhome. (Luk. 15:18-20)

14. Warom is ti iwermeesich xult een last woo mer wech xmayse mise?

¹⁴ Iwermeesich xult. Wën mer sinte, is es tsum ferxteen tas mer uns xultich xpiire. Awer Yeehoowa wil net hon tas mer uns wayter soo xpiire. Tas is een last woo mer wech xmayse mise. Wën mer unser sint erkhënt hon, uns peroyt hon un am mache sin ales was mer khene fer ti sint net noch mool mache, khene mer traue tas Yeehoowa uns fertsayt hot. (Aph. 3:19) Wën mer al tiise xrite kep hon, wil Yeehoowa net hon tas mer uns wayter xultich xpiire. Tee wees tas soo was mache, khent uns xaate pringe. (Psal. 31:10) Wën mer iwerlaat mit traurichkheet kepe, khente mer noo lose im xpringe fom leepe keen. (2 Kor. 2:7)

15. Was khan tich helfe mit te iwermeesich xult um keen? (1 Yoohan 3:19, 20) (Kuk aach tas pilt.)

 ¹⁵ Wii khanst tuu tiise last wech xmayse? Wëns tuu tich wayter xultich xpiirst, hal tich traan aan te “woere fertsayung” woo Kot kept. (Psal. 130:4) Wën Kot fertsayt tii woo sich eerlich peroye, ferxprecht eyer: “Ich tuun mich fon sayn sint net mee erinere.” (Yee. 31:34) Was wil tas saan? Kot tuut net mee tenke iwer tayn sint woo eyer xon fertsayt hot. Soo, tenk net tas ti konsekwënse fon tayn sint een pewaysung sin tas Kot tich net fertsayt hot. Un playp net pees mit tich selepst wëns tuu etliche priwilëje in te kemaynt ferloer host weeche tayn sint. Yeehoowa tuut net wayter iwer tayn sinte tenke — un tuu solst tas aach net mache! (Lees 1 Yoohan 3:19, 20.) g

16. Soo lang wii mer im xpringe fom leepe keen, was mise mer ferxteen?

¹⁶ Soo lang wii mer im xpringe fom leepe keen, mise mer ‘xpringe soo tas mer ti peloonung kriin khene’. (1 Kor. 9:24) Meyer khene tas mache wën mer ferxteen ti unerxiit tswixich ti laste woo mer nëme mise un ti laste woo mer wech xmayse mise. In tiise artikel, hon mer ploos phaar payxpiile kesiin fon was meyer nëme mise un was meyer wech xmayse mise. Awer es kept anere. Yeesus hot kesaat tas mer khente “iwerlaat [wëre] mit tsu fiil ese, trinke un mit te soriche fom leepe”. (Luk. 21:34) Tiise un anere tekste khene tich helfe ënerunge itentifitsiire woo im xtant tuu mache must, soo lang wiis tuu im xpringe fom leepe keest.

17. Warom khene mer uns sicher sin tas mer tas xpringe fom leepe kewine tuun?

¹⁷ Meyer khene uns sicher sin tas mer tas xpringe fom leepe kewine tuun wayl Yeehoowa kept uns ti neetich kraft. (Isa. 40:29-31) Tes weeche, tuu wayter xpringe! Mach te aphostel Phaul sayn payxpiil noo: tee hot sich fiil aan kextrengt fer ti peloonung, woo foer tëm waar, kriin. (Fili. 3:13, 14) Nimant khan uf tayn plats xpringe, awer mit Kot sayn hilef, khanst tuu es hin kriin. Yeehoowa khan tich helfe tayn laste nëme un ti uneetiche laste wech xmayse. (Psal. 68:19) Mit Kot uf tayn sayt, khanst tuu tas xpringe phake un kewine!