1. Warom host tuu kërn ti layt woo ketultich sin?

 MEYER al hon ketultiche layt kërn. Es is soo kuut mit yemant sin woo khan waarte un net pees too temit wëre. Wën mer feeler mache, sin mer petanklich tas ti anere ketultich mit uns sin. Wii kuut tas unser Piipel leerer waar aach ketultich mit uns wën mer es xweyer kefun hon een piiplix woerheet lërne, aan nëme orer aan wëne. Un meyer sin hauptseechlich petanklich wayl Yeehoowa ketultich mit uns is. (Rom. 2:4)

2. Wanee khan es xweyer sin ketult tsayche?

² Opwool meyer es kuut fine wën ti anere ketultich sin, khan sin tas es net imer laycht fer uns is ketult tsayche. Tsum payxpiil: wole mer saan tas mer ferxpeet sin un ti khare tuun net foran faare; es weyer laycht ti ketult ferliire. Meyer khente aach pees wëre wën ti anere uns pelaytiche. Un als mool khan es xweyer sin wayter Yeehoowa sayn nay welt waarte. Teest tuu kërn ketulticher sin? In tiise artikel, siin mer wii mer khene ketult tsayche un warom tas soo wichtich is. Meyer lërne aach was uns helfe khan ketulticher sin.

3. Wii tuut een ketultich persoon sich aan xtele wën anere tëm pelaytiche?

³ Kuk mool 4 aate wii mer khene ketult tsayche. Eyerst: een ketultich persoon wërt net klaych pees. Wën anere se pelaytiche, halt se sich in ruu un tii tuut net tsurik petsaale. Tii is aach net krop wën se stresiirt is. In Eeksotus 34:6, tuut ti Piipel iwer Yeehoowa saan: “Yeehoowa, een Kot woo parmhërtslich un mitlaytich is, ketultich [noote: “lamsam fer wuutich kepe”] un fol mit leaale liip un woerheet.”

4. Wii tuut een ketultich persoon sich aan xtele wën se etwas waarte mus?

 ⁴ Tsweet: een ketultich persoon khan in ruu waarte. Tii xtrengt sich aan fer net pees orer unruych wëre wën etwas lënger tauert wii es sol sin. (Mat. 18:26, 27) Meyer mise fiile situatsyoone mit ketult waarte. Tsum payxpiil, wën yemant xprecht, mise mer mit ketult horiche un net xteere. (Yoop 36:2) Fiilaycht mise mer aach ketult hon wën mer een Piipel xtutënt helfe een piiplix inlërnung ferxteen orer een xlecht kewoonheet im xtich lose.

5. Wii noch khene mer ketult tsayche?

⁵ Trit: een ketultich persoon tuut sich net imer ayle. Kewis als mool, mise mer etwas fiks mache. Awer wën een ketultich persoon mus een wichtich flicht uf phase, tuut se sich net ayle fer tas aan fange orer fërtich pringe. Xtats tas, hoolt se kenuuch tsayt fer se pleene was se mache tuut. Tan hoolt se kenuuch tsayt fer ti aarwayt kuut mache.

6. Wii tuut een ketultich persoon sich aan xtele wën se propleeme mit macht?

⁶ Fiert: een ketultich persoon xtrengt sich aan fer ti proope aus hale oone sich pexweere. Tes weeche, khan ma saan tas ti ketult un ti persewerans ticht ferpunt sin. Kewis es is net ferkheert unser hërts fer een kuut fraaynt uf mache un saan wii mer uns xpiire tuun iwer unser situatsyoon. Awer een ketultich persoon tuut sayn pestes mache fer wayter aus hale mit een positiiw aanxtelung. (Kol. 1:11) Wii Kot sayn tiiner, mise mer ketult in tiise 4 aate tsayche. Warom? Kuk mool etliche uersache.

7. Tëm noo Tyako 5:7, 8, warom is ti ketult soo wichtich? (Kuk aach tas pilt.)

⁷ Meyer mise ketultich sin fer eewiche leepe kriin. Soo wii ti troye tiiner fon te ferkangne yoore, mise mer ketultich uf Kot waarte pis eyer sayn ferxpreche erfiilt. (Hep. 6:11, 12) Ti Piipel ferklaycht uns mit een pauer.  (Lees Tyako 5:7, 8.) b Een pauer tuut fiil xafe fer sayn plantaaj seeye un kiise, awer tee wees net kenau wanee ti plantse wakse tuun. Soo tuut te pauer mit ketult waarte, mit te hofnung tas eyer ërnte tuut. Kraat soo, tuun mer fiil xafe fer Yeesus noo keen, opwool meyer “[wise] net in was fer taach te Hër khomt”. (Mat. 24:42) Meyer tuun ketultich waarte, mit te sicherheet tas, in te richtich tsayt, tuut Yeehoowa al sayn ferxpreche erfiile. Was khent pasiire wën mer ti ketult ferliire teete? Meyer khente leetich wëre wayl mer soo fiil waarte mise un uns lamsam fon te woerheet ap lenke. Meyer khente aach aan fange uns traan hale aan unser winxe un fersuuche tëne klaych erfiile. Awer wën mer ketultich sin, khene mer pis tas ën aus hale un keret sin. (Mik. 7:7; Mat. 24:13)

8. Wii tuut ti ketult uns helfe kuut mit te anere rom khome? (Koloser 3:12, 13)

⁸ Meyer mise ketultich sin fer kuut mit te anere rom khome. Ti ketult helft uns ti anere mit acht horiche. (Tya. 1:19) Ti ketult helft uns aach te friit mit te anere hale; wën mer stresiirt sin, tuun meyer net tsu fiks reakiire un was kropes saan. Un wën mer ketultich sin, wëre mer net klaych pees wën yemant unser xpiirunge wee macht. Xtats tsurik petsaale, tuun mer “wayter [uns] naner aus hale un krooshërtslich fertsaye”. (Lees Koloser 3:12, 13.) c

9. Wii tuut ti ketult uns helfe kuute ëntxlise mache? (Xpriiche 21:5)

⁹ Meyer mise ketultich sin fer kuute ëntxlise mache. Xtats uns ayle fer een ëntxlus mache, hoole mer kenuuch tsayt fer unersuuche un tan raus suuche was te pest ëntxlus is woo mer mache khene. (Lees Xpriiche 21:5.) d Tsum payxpiil: wole mer saan tas mer een aarwayt am suuche sin. Fiilaycht wole mer ti eyerst aarwayt woo mer fine, aan nëme, aach wën ti aarwayt unser aanpeetung tsu Yeehoowa xteere tuut. Awer wën mer ketultich sin, tuun mer tsayt hoole fer soo sorte frooche antworte: ‘Wii fiil mus ich reese fer pis ti aarwayt hin khome? Wii fiil xtune mus ich xafe? Wii tuut tiise aarwayt mayn familye un mayn fraayntxaft mit Yeehoowa petrefe?’ Wën mer ketultich sin, hale mer uns wech fon te xlechte ëntxlise.

10. Wii khene mer ketult ëntwikele un hale?

¹⁰ Peet fer mee ketult kriin. Ti ketult is een kwaliteet fon te frucht fon Kot sayn kayst. (Kal. 5:22, 23) Tes weeche, khene mer peete fer hayliche kayst kriin un aach Yeehoowa ferlange fer uns helfe ti frucht fon tiise kayst ëntwikele. Wën een situatsyoon unser ketult proopt, tuun mer ‘wayter hayliche kayst ferlange’ fer uns helfe ketultich sin. (Luk. 11:9, 13) Meyer khene aach tsu Yeehoowa peete fer uns helfe ti tinge siin soo wii eyer se siit. Tan, noo peete, mise mer unser pestes mache fer ketultich yeete taach sin. Woo mee mer tsu Yeehoowa ketult im kepeet ferlange un uns aan xtrenge fer ketult tsayche, woo tiifer tuut tiise kwaliteet in unser hërts kewortselt sin un soo teel fon unser personaliteet wëre.

11-12. Wii hot Yeehoowa xon ketult ketsaycht un wii tsaycht eyer tas noch?

 ¹¹ Tenk triwer noo aan piiplixe payxpiile. In te Piipel, fine mer phaar payxpiile fon layt woo ketultich waare. Wën mer aan tiise payxpiile triwer noo tenke, khene mer lërne wii ketult tsayche. Eep mer etliche fon tiise payxpiile noo kuke, wole mer tas kreeste payxpiil fon ketult siin — Yeehoowa.

¹² Im Eetem kaate, hot Satanaas liie keeche Yeehoowa sayn naame kesaat; tee hot fersuucht Ewa tswayfele mache ep Yeehoowa wërklich een kerechte un liipliche Rechiirente weyer. Xtats te liichner klaych fernichte, hot Yeehoowa ketult un selepst kontrol ketsaycht wayl Eyer wust tas es tsayt nëme teet fer se pewayse tas Sayn rechiirung wërklich ti pest is. Un soo lang wii Eyer waart, tuut Yeehoowa ti kanse liieray keeche sayn naame aus hale. Yeehoowa waart aach mit ketult soo tas mee layt ti xans hon fer eewiche leepe kriin. (2 Phe. 3:9, 15) Was is te resultaat? Milyoone layt hon Tëm khëne kelërnt. Wën mer uns traan hale aan te nutse woo khome weeche Yeehoowa sayn ketult, wërts laychter fer uns se waarte pis Yeehoowa tas ën pringt.

13. Wii hot Yeesus Yeehoowa sayn ketult perfekt noo kemacht? (Kuk aach tas pilt.)

¹³ Yeesus tuut Yeehoowa sayn ketult perfekt noo mache un tee hot tiise kwaliteet ketsaycht wii eyer uf te eyert waar. Es wërt wol net imer laycht fer tëm kewees sin ketult tsayche, hauptseechlich mit te falxe xrayper un fariseer. (Yoo. 8:25-27) Awer soo wii sayn Fater, waar Yeesus ketultich. Wën eyer ferxënt kep is, hot eyer net tsurik petsaalt. (1 Phe. 2:23) Yeesus hot mit ketult sayn proope aus kehal, oone sich pexweere.  Tes weeche, tuut ti Piipel saan tas mer sole “mit acht tenke aan tëm woo soo fiil xlechte wërter fon sintiche layt aus kehal hot”. (Hep. 12:2, 3) Mit Yeehoowa sayn hilef, khene mer aach kwalkee proop mit ketult aus hale.

14. Was khene mer mit Apraham sayn ketult lërne? (Hepreeyer 6:15) (Kuk aach tas pilt.)

¹⁴ Fiilaycht hon etliche fon uns ketenkt tas tas ën een lang tsayt tsurik khome teet. Un yets khan sin tas mer uns ketanke mache tas mer net kenuuch leepe tuun fer tas ën siin. Was khan uns helfe wayter mit ketult waarte? Kuk mool Apraham sayn payxpiil. Wii eyer 75  yoore alt waar un khee khiner hat, hot Yeehoowa tëm ferxproch: “Ich tuun fon tich een kroos natsyoon mache.” (Xee. 12:1-4) Hot Apraham ti erfiilung fon tiise ferxpreche kesiin? Ploos een teel. Noo tas eyer torich te Eufrates flus kang is un 25  yoore kewaart hot, hot eyer een wuner kesiin wii sayn soon Isak uf te welt khom is. Un noo 60  yoore, sin sayn enkelskhiner, Esau un Yaakop, uf te welt khom. (Lees Hepreeyer 6:15.) e Awer Apraham hot nii kesiin sayn nookhomer een kroos natsyoon wëre un tas Ferxprochne Lant ërpe. Noch soo, hat tiise troye man een ticht fraayntxaft mit sayn Kriatoer. (Tya. 2:23) Un wën Apraham fom toot uf keruuft wërt, kriit eyer tsum wise tas weeche sayn klaape un ketult, waare al ti natsyoone fon te eyert keseechent! Sicher, tas tuut tëm aarich froo lose. (Xee. 22:18) Was lërne mer too temit? Fiilaycht, tuun mer net siin al Yeehoowa sayn ferxpreche sich yets erfiile. Awer wën mer ketult soo wii Apraham tsayche, khene mer uns sicher sin tas Yeehoowa uns yets  peloone tuut un hauptseechlich in Tëm sayn nay welt. (Mar. 10:29, 30)

15. Was khanst tuu in tayn perseenlich xtuutyum noo kuke?

¹⁵ In te Piipel, fine mer fiil anere payxpiile fon layt woo ketultich waare. (Tya. 5:10) Was mënst tuu een perseenlich xtuutyum too triwer mache? f Tsum payxpiil: opwool Tawi aarich yung waar wii eyer kesalpt kep is fer kheenich iwer Israël sin, must eyer phaar yoore waarte fer ti rechiirung kriin. Simeoon un Ana hon Yeehoowa troy ketiint soo lang wii se te ferxprochne Mesias kewaart hon. (Luk. 2:25, 36-38) Soo lang wiis tuu tiise kexichte xtutiirst, suuch ti antwort fer tiise frooche: ‘Was meecht tiise persoon keholef hon ketult tsayche? Was fer nutse hot se too temit kriit? Wii khan ich tiise persoon noo mache?’ Tuu khanst aach nutse kriin wëns tuu lërnst iwer tii woo net ketult ketsaycht hon. (1 Sam. 13:8-14) Tuu khanst tich frooe: ‘Warom hon se ti ketult ferloer? Was fer xlechte tinge sin mit tëne too teweeche pasiirt?’

16. Was fer nutse kriin mer wën mer ketultich sin?

¹⁶ Tenk iwer ti nutse woo khome wën mer ketultich sin. Wën mer ketultich sin, hon mer kreeser frooheet un ruu. Tes weeche khan ti ketult unser mentaal un fiisix kesuntheet ferpesere. Wën mer ketultich mit te anere sin, khene mer peser mit tëne um keen. Ti eenichkheet in te kemaynt wërt aach xtërker. Wën yemant uns pelayticht un meyer ketult tsayche, lose mer net te propleem xlechter wëre. (Psal. 37:8, noote; Xpr. 14:29) Awer tas haupste: wën mer ketult tsayche, tuun mer unser himlixe Fater noo mache un noch tichter pay tëm khome.

17. Was sole mer pextimt sin se mache?

¹⁷ Ti ketult is wërklich een xeen kwaliteet woo fiil nutse fer uns pringt! Es is net imer laycht ketultich sin, awer mit Yeehoowa sayn hilef, khene mer tiise kwaliteet wayter ëntwikele. Un soo lang wii mer ti nay welt ketultich waarte, khene mer uns sicher sin tas “Yeehoowa sayn aue phase ale uf woo tëm tiif respektiire, tii woo uf tëm sayn leaale liip waarte”. (Psal. 33:18) Tes weeche, wole mer pextimt sin uns wayter mit te ketult “aan tsiie”!