XTUUTYUM ARTIKEL 35
LIIT 123 Meyer heere Yeehoowa un sayn Orkanisatsyoon aan
Hilef fer tii woo fon te kemaynt raus ketuun kep sin
“[Es] wërt im himel mee frayt kepe weeche eene sinter woo sich peroyt, als iwer 99 kerechte woo sich net peroye prayche.” (LUKAS 15:7)
WAS TUUN MER SIIN?
Warom etliche mise fon te kemaynt raus ketuun wëre un wii ti elteste se helfe khene sich peroye un noch mool ticht pay Yeehoowa khome.
1-2. (a) Wii xpiirt sich Yeehoowa iwer tëne woo een xweyer sint mache un sich net peroye? (b) Was winxt Yeehoowa tas ti sintiche layt mache?
YEEHOOWA tuut net ale sorte aanxtelunge aan nëme; tee hast ti sint. (Psal. 5:4-6) Un tee waart tas mer sayn kesetse, woo in te Piipel xteen, aan heere. Awer Yeehoowa wees tas mer imperfekt sin un tas mer khene net tëm perfekt foliche. (Psal. 130:3, 4) In te selwich tsayt, tuut Yeehoowa net aan nëme “xlechte mënxe, woo ti unfertiint kuutheet fon unser Kot penutse wii een ausreet fer sayn ausferxeemt aanxtelung”. (Yuu. 4) Yawool, ti Piipel saat tas in Kot sayn kriich, te Armaxeton, wëre ti xlechte mënxe fernicht. (2 Phe. 3:7; Apo. 16:16)
2 Awer Yeehoowa wil net hon tas yemant fernicht wërt. Wii mer in tiise piichelche xon kesiin hon, tuut ti Piipel taytlich saan tas Yeehoowa “winxt tas (…) al sich peroye”. (2 Phe. 3:9) Soo wii Yeehoowa, sin ti elteste ketultich wën se fersuuche yemant helfe sich fon sayn sinte peroye un noch mool ticht pay Kot khome. Awer als mool khan sin tas een sintiche persoon sich net peroye wil. (Isa. 6:9) Opwool ti elteste sich aan xtrenge fer tëne noo un noo helfe, tuut se wayter tas ferkheertes mache. Was mise ti elteste in soo een sort situatsyoon mache?
“TUUT TI XLECHT PERSOON (…) RAUS TUUN”
3. (a) Tëm noo te Piipel, was sol kemacht wëre mit yemant woo een xweyer sint macht un sich net peroyt? (b) Warom khene mer saan, wën yemant sich net peroyt, tas eyer raus kesuucht hot fon te kemaynt raus ketuun wëre?
3 Wën een persoon een xweyer sint macht un sich net peroyt, mise ti elteste ti oryentiirung in 1 Korinter 5:13 aan wëne: “Tuut ti xlecht persoon tswixich aych raus tuun.” Ti persoon wees tas wën se sich net peroyt, wërt se fon te kemaynt raus ketuun. Soo es is wii wën tii es raus kesuucht hët. Tii is am ërnte was se keseet hot. (Kal. 6:7) Warom khene mer tas saan? Wayl opwool ti elteste phaar mool fersuucht hon ti persoon helfe sich ënere, hot se tas net kemacht. (2 Khe. 17:12-15) Sayn aktsyoone hon ketsaycht tas se Yeehoowa net aan heere wil. (Teut. 30:19, 20)
4. Warom is es pekhant kemacht wën een persoon woo sich net peroyt hot, fon te kemaynt raus ketuun wërt?
4 Wën yemant sich net peroyt un fon te kemaynt raus ketuun wërt, is es fer ti kemaynt pekhant kemacht tas eyer net mee Yeehoowa sayn Tsayer is. a Te opjetiiw fon tiise pekhantmachung is net ti persoon niter xtele. Xtats tas, es is tas ti priiter khene tas piiplix kepoot aan heere fer noo lose keselxaft mit te persoon hon un “noch net mool [mit tëne] ese”. (1 Kor. 5:9-11) Es kept een kuut uersach too hiner traan. Te aphostel Phaul hot kexrip: “Een pisye heep tuut te kans taaych keere mache.” (1 Kor. 5:6) Wën yemant woo sich net peroyt wayter in te kemaynt plaype teet, khente ti anere tenke tas se prayche sich net aan xtrenge fer Yeehoowa sayn kesetse aan heere. (Xpr. 13:20; 1 Kor. 15:33)
5. Wii sole mer een pruuter orer xwester siin woo fon te kemaynt raus ketuun kep is un warom?
5 Wii sole mer een pruuter orer xwester siin woo fon te kemaynt raus ketuun kep is? Opwool mer noo lose keselxaft mit te persoon hon, es kept noch hofnung fer sayn situatsyoon. Ti persoon is wii een xoof woo sich ferloer hot. Wën een xoof sich ferliirt, khan se noch mool tsurik tsu te trop xeef khome. Tenk tich traan: ti persoon hot sayn leepe tsu Yeehoowa tetikiirt. Es lost uns traurich se wise tas se yets net am leepe is in een aat woo Yeehoowa kefalt un tii khan too teweeche sayn eewiche leepe ferliire. (Ese. 18:31) Awer soo lang wiis noch tsayt kept un Yeehoowa noch wilich is fer parmhërtslichkheet tsayche, hale mer ti hofnung tas ti persoon sich ënere tuut. Soo, wii khene ti elteste een persoon helfe woo fon te kemaynt raus ketuun kep is?
WII HELFE TI ELTESTE TII WOO FON TE KEMAYNT RAUS KETUUN KEP SIN?
6. Was tuun ti elteste mache fer se helfe yemant woo fon te kemaynt raus ketuun kep is?
6 Wën yemant fon te kemaynt raus ketuun kep is, meechte ti elteste noo lose se fersuuche tëm helfe tsurik khome? Nee! Wën ti elteste yemant saan tas eyer fon te kemaynt raus ketuun wërt, tuun se tëm aach saan was eyer mache mus fer tsurik khome. Awer ti elteste tuun noch mee mache. In te meyerst tsayt, tuun ti elteste fer ti persoon saan tas se wole sich noch mool fersamele noo phaar moonate fer se siin ep ti persoon sayn ketanke keënert hot. Noo phaar moonate, wën ti persoon wilich is fer mit te elteste xpreche, tuun ti elteste se uf muute sich peroye un tsurik khome. Soo kaar wën se sich net peroyt, tuun ti elteste fersuuche mit te persoon noch mool im futuer xpreche.
7. Wii tuun ti elteste Yeehoowa sayn mitlayt noo mache wën se mit yemant um keen woo fon te kemaynt raus ketuun kep is? (Yeeremias 3:12)
7 Ti elteste xtrenge sich aan fer soo mitlaytich wii Yeehoowa sin wën se mit yemant um keen woo fon te kemaynt raus ketuun kep is. Tsum payxpiil, in te friirixe tsayte, hot Yeehoowa te eyerste xrit kep fer ti israeliiter helfe eep se sich peroyt hon. Yawool, eep se sayn ketanke keënert hon, hot eyer xon sayn profeete kexikt fer mit tëne xpreche. Im tsweete artikel fon tiise piichelche, hon mer kesiin tas Yeehoowa fer Oseyas kesaat hot tas eyer solt sayn fraa fertsaye un tsurik aan nëme, opwool se noch een xweyer sint am mache waar. Soo hot Yeehoowa sayn folek in kelërnt tas eyer mitlaytich is. (Ose. 3:1; Mal. 3:7) Ti elteste mache Yeehoowa noo un wole wërklich hon tas ti persoon sich peroyt un tsurik tsu te kemaynt khomt. Ti elteste lose es aach net xweyer fer ti persoon tas mache. (Lees Yeeremias 3:12.) b
8. Wii tuut Yeesus sayn kexicht iwer te ferloerne soon uns helfe se ferxteen wii mitlaytich un parmhërtslich Yeehoowa is? (Lukas 15:7)
8 Tenk tich traan Yeesus sayn kexicht iwer te ferloerne soon, woo mer im tsweete artikel noo kekukt hon. Klaych wii te fater te soon kesiin hot, “is eyer kexprung, un hot tëm um kekrif un liiplich kekhust”. (Luk. 15:20) Mërk mool tas te fater net kewaart hot tas sayn soon eyerst fertsayung aan hale teet. Xtats tas, is te fater tsum soon kexprung, wayl eyer tëm keliipt hot. Tas is soo wii Yeehoowa sich xpiire tuut iwer tii woo tëm kelos hon. Un ti elteste xtrenge sich aan fer tëm noo mache. Tii wole hon tas tiise ferloerne xeef tsurik tsu Yeehoowa khome. (Luk. 15:22-24, 32) Wën een sintiche persoon tsurik khomt, tuun Yeehoowa, Yeesus, ti engele un ti kemaynt sich fiil fraye! (Lees Lukas 15:7.) c
9. Was wil Yeehoowa hon tas ti sintiche layt mache?
9 Pis yets hin, hon mer kelërnt tas Yeehoowa net erlaupt in te kemaynt plaype tii woo sich net peroye fon sayn sinte. Awer tee lost se net im xtich. Tee wil hon tas se tsurik khome. Un wën ti layt sich peroye, mërk mool was Yeehoowa iwer tëne xpiirt: “Ich tuun se heele fon sayn untroyheet. Ich tuun se liipe mit mayn fray wile, wayl mayn wuut hot sich (…) ap kelenkt.” (Ose. 14:4) Wayl ti elteste wise wii Yeehoowa sich xpiirt, tuun se peopachte kwalkee tings woo tsaycht tas ti persoon aan kefang hot sich peroye. Tiise wërter in Oseyas 14:4 tsayche aach fer tii woo Yeehoowa kelos hon, tas Eyer se liipt un wil hon tas se tsurik khome.
10-11. Wii tuun ti elteste fersuuche se helfe tii woo friier fon te kemaynt raus ketuun kep sin?
10 Es kept etliche woo friier, fiilaycht haufe yoore tsurik, fon te kemaynt raus ketuun kep sin. Wii tuun ti elteste fersuuche tëne helfe? Khan sin tas tiise layt xon noo kelos hon se mache ti sint woo se aus te kemaynt kextelt hot. Im xtant, khene se sich noch net mool traan tenke warom se fon te kemaynt raus ketuun waare. Ekaal wii lang yemant aus te kemaynt is, tuun ti elteste sich aan xtrenge fer tëm fine un pesuuche. In te pesuuche, tuun se ti persoon uf muute tsurik tsu te kemaynt khome un aach tëne frooe ep se khene een kepeet fer tëne mache. Kewis, wën ti persoon xon een lang tsayt wayt wech fon te woerheet is, is se kaystlich xwach. Soo, wën ti persoon saat tas se wil tsurik tsu te kemaynt khome, khene ti elteste yemant ferlange een Piipel xtuutyum tëne fiire. Tas khan kemacht wëre soo kaar wën ti persoon noch net in te kemaynt tsurik aan kenom kep is. In al ti situatsyoone, sin ti elteste woo tiise pleen mache tuun.
11 Ti elteste fersuuche Yeehoowa sayn mitlayt tsu te mënxe noo mache. Tes weeche wole se soo fiil layt wiis meechlich helfe se wise tas ti teer fer tsurik tsu Yeehoowa khome uf is. Klaych wii ti persoon tsaycht tas se sayn ketanke un aanxtelung keënert hot, khan se noch mool in te kemaynt aan kenom wëre. (2 Kor. 2:6-8)
12. (a) In was fer situatsyoone mise ti elteste ekstra uf phase? (b) Warom sole mer net rechne tas layt woo etliche sorte sinte kemacht hon, nii nutse fon Yeehoowa sayn parmhërtslichkheet kriin khene? (Kuk aach ti noote.)
12 Als mool mise ti elteste ekstra uf phase eep se yemant tsurik in te kemaynt aan nëme. Tsum payxpiil, wën een persoon xaate fer een khint keprung hot, aphostasii pratikiirt hot orer kepleent hot sayn hayrat tsum ën pringe, mise ti elteste sich sicher lose tas ti persoon sich wërklich peroyt hot. (Mal. 2:14; 2 Tim. 3:6) Es is woer tas, fer ti kemaynt xitse, wole ti elteste sich sicher sin tas yemant woo fer kërn hinerlistich un krop mit te anere waar, sich wërklich peroyt hot. Awer tii mise sich aach traan tenke tas Yeehoowa tuut tsurik aan nëme kwalkee sintiche persoon woo sich wërklich peroyt hot un noo kelos hot tas ferkheertes mache. Tii sole net rechne tas tiise persoon nii nutse fon Yeehoowa sayn parmhërtslichkheet kriin khan. d (1 Phe. 2:10)
WAS KHAN TI KEMAYNT MACHE?
13. Was is te unerxiit tswixich ti aat wii mer pehantele yemant woo tisipliniirt kep is un yemant woo raus ketuun kep is?
13 Wii mer im letste artikel kesiin hon, als mool, wërt es pekhant kemacht tas yemant tisipliniirt kep is. In soo een situatsyoon, khene mer wayter keselxaft mit tëm hon. Tas is soo wayl ti persoon sayn ferkheerte ketanke un aanxtelung keënert hot. (1 Tim. 5:20) Tee is noch teel fon te kemaynt un praycht fon sayn priiter un xwestere uf kemuut wëre fer wayter mache was richtich is. (Hep. 10:24, 25) Awer ti situatsyoon is anerste wën een persoon fon te kemaynt raus ketuun is. Meyer lose noo keselxaft mit te persoon hon un meyer tuun “noch net mool ese” mit tiise persoon. (1 Kor. 5:11)
14. Was khan een krist ëntxlise se mache wën een persoon woo raus ketuun kep is, tsu een fersamlung khomt? (Kuk aach tas pilt.)
14 Petayt tas kepoot in 1 Korinter 5:11 tas mer khene net tsu een fersamlung in laate yemant woo fon te kemaynt raus ketuun kep is, orer tas mer khene net tëm ti tsayt piite wën eyer tsu een fersamlung khomt? Nee. Kewis, hon mer khee keselxaft mit te persoon. Awer im xtant, wën ti persoon unser parent is orer unser ticht fraaynt waar eep se fon te kemaynt raus ketuun kep is, khene mer penutse was mer fon te Piipel kelërnt hon un raus suuche tëne tsu een fersamlung in laate. Un wën ti persoon khomt? Wii sole mer tëne pehantele? Friier, hon mer tëne net kekriis. Awer yets, mus yeete krist penutse was eyer fon te Piipel kelërnt hot fer se ëntxlise was eyer mache tuut. Etliche khene ëntxlise ti persoon kriise orer wilkhome wën se tsu te fersamlung khomt. Awer meyer sole net lange kexpreeche orer keselxaft mit te persoon hon.
Yeete krist mus penutse was eyer fon te Piipel kelërnt hot fer se ëntxlise ep eyer tuut yemant, woo fon te kemaynt raus ketuun kep is, in laate tsu een fersamlung orer tëm kriise wën eyer tsu een fersamlung khomt (Kuk te apsats 14.)
15. Iwer was fer sorte sintiche layt is 2 Yoohan 9-11 am xpreche? (Kuk aach te khaste “ Hon Yoohan un Phaul iwer ti selwich sort sint kexproch?”)
15 Ti Piipel saat tas mer sole net pekriise etliche sintiche layt. Wën mer tas mache teete, weyere mer “mitxultich fon (…) sayn xlechte aarwayte”. (Lees 2 Yoohan 9-11.) e Awer ti wersikele um tiise tekste rom tsayche tas se am xpreche sin iwer een aphostate orer yemant woo ti anere uf hetst tas ferkheertes mache. (Apo. 2:20) Tes weeche, wën yemant aphostate inlërnunge aus prayt orer een ferkheert aanxtelung uf hetst, tuun ti elteste tëm net pesuuche. Kewis es is noch meechlich tas ti persoon sich peroyt. Awer pis tas pasiirt, tuun mer se net ti tsayt piite orer tsu een fersamlung in laate.
MACH KOT SAYN MITLAYT UN PARMHËRTSLICHKHEET NOO
16-17. (a) Was wil Yeehoowa hon tas ti sintiche layt mache? (Esekyël 18:32) (b) Wii khene ti elteste mit Yeehoowa xafe wën se helfe tii woo een xweyer sint kemacht hon?
16 Was hon mer in tiise piichelche kelërnt? Yeehoowa wil net hon tas yemant fernicht wërt. (Lees Esekyël 18:32.) f Tee wil hon tas ti sintiche layt tsurik tsu tëm khome. (2 Kor. 5:20) Tes weeche hot Yeehoowa imer sayn tiiner, woo tëm im xtich kelos hon, uf kemuut sich peroye un tsurik tsu tëm khome. Es is een eer fer ti elteste mit Yeehoowa xafe fer se helfe tii woo een xweyer sint kemacht hon, sich peroye. (Rom. 2:4; 1 Kor. 3:9)
17 Es kept fiil frooheet im himel wën sintiche layt sich peroye! Unser himlixe Fater Yeehoowa kriit tiise frooheet yeetes mool woo eene fon sayn ferloerne xeef tsurik tsu te kemaynt khomt. Wën mer triwer noo tenke iwer Yeehoowa sayn mitlayt, parmhërtslichkheet un unfertiint kuutheet, tuut unser liip tsu tëm wakse. (Luk. 1:78)
LIIT 111 Mer hon fiile tings fer uns fraye
a Meyer tuun noo lose se saan tas tiise persoon tesasosiirt is. Tëm noo Phaul sayn wërter in 1 Korinter 5:13, tuun mer yets saan tas tiise persoon fon te kemaynt raus ketuun kep is.
b (Yeeremias 3:12) Kee un mach tiise wërter fer te Nort pekhant: “‘“Khom tsurik, tuu repëlixe Israël — saat Yeehoowa. — Ich tuun aych net xeep kuke, wayl ich sin leaal — saat Yeehoowa. — Ich plaype net fer imer pees mit aych.
c (Lukas 15:7) Un ich saan aych: Kraat soo, wërt im himel mee frayt kepe weeche eene sinter woo sich peroyt, als iwer 99 kerechte woo sich net peroye prayche.
d Ti Piipel saat tas etliche layt khene net fertsayt wëre. Tiise layt hon ëntxlist sich imer keeche Yeehoowa xtele. Ploos Yeehoowa un Yeesus khene richte ep een persoon fertsayt wëre khan orer net. (Mar. 3:29; Hep. 10:26, 27)
e (2 Yoohan 9-11) Yeete eene woo keet iwer ti inlërnunge fon Kristus un net in tëne playpt, tuut net pay Kot plaype. Weer in tiise inlërnunge playpt, playpt paym Fater un aach paym Soon. 10 Wën yemant pay aych khomt un net tiise inlërnunge pringt, nëmt tee net in ayre haus aan un piit tëm aach net ti tsayt. 11 Wayl weer ti tsayt fer tëm piit, is mitxultich fon tëm sayn xlechte aarwayte.
f (Esekyël 18:32) “‘Ich fraye mich net wën yemant xtërpt — saat te Soweraan Hër Yeehoowa. — Soo, khomt tsurik un leept.’”
