XTUUTYUM ARTIKEL 31
LIIT 12 Unser Kroose Kot, Yeehoowa
Was hot Kot kemacht fer ti sintiche mënxe rete?
“Wayl Kot ti welt soo fiil keliipt hot, hot eyer sayn eensiche kepoerne Soon kep.” (YOOHAN 3:16)
WAS TUUN MER SIIN?
Was Yeehoowa kemacht hot fer uns helfe keeche ti sint khëmpfe; meyer siin aach was Eyer kemacht hot fer es meechlich lose tas mer fer imer leepe khente, fray fon te sint.
1-2. (a) Was is ti sint un wii khene mer es ap kewine? (Kuk aach ti noote “Tuu peser ferxteen”.) (b) Was tuun mer in tiise artikel un in te anere artikele in tiise Wachthorm xtutiire? (Kuk aach “Informatsyoone fer ti leeser”, in tiise piichelche.)
WII fiil meecht Yeehoowa tich liipe? Tuu khanst ti antwort fine wëns tuu xtutiirst was eyer kemacht hot fer tich fon te sint un fom toot rete. Ti sint a is een xrekliche faynt un tuu khanst tëm net aleen ap kewine. Ti woerheet is tas mer yeete taach sinte un tes weeche, tuun mer xtërpe. (Rom. 5:12) Awer es kept kuute notisye! Mit Yeehoowa sayn hilef, khene mer ti sint ap kewine. Yeehoowa lost uns too tefun sicher.
2 Torich xon unkefeer 6.000 yoore, tuut Yeehoowa ti mënxe helfe keeche ti sint khëmpfe. Warom? Wayl eyer uns liipt. Fon te tsayt aan woo Yeehoowa ti mënxe kemacht hot, tuut eyer uns liipe. Tes weeche hot eyer fiiles kemacht fer uns helfe wën mer een sint mache. Kot wees tas ti sint tsum toot nëmt un tee wil net hon tas mer xtërpe — tee wil hon tas mer fer imer leepe! (Rom. 6:23) Tas is was eyer fer tich winxt. In tiise artikel, tuun mer 3 frooche antworte: (1) Was fer hofnung hot Yeehoowa fer ti sintiche mënxe kep? (2) Was hon imperfekte mënxe in te piiplixe tsayte kemacht fer Yeehoowa kefale? (3) Was hot Yeesus kemacht fer ti mënxe fon te sint un fom toot rete?
WAS FER HOFNUNG HOT YEEHOOWA FER TI SINTICHE MËNXE KEP?
3. Wii sin Aatam un Ewa sintiche mënxe kep?
3 Wii Yeehoowa te eyerste man un fraa kemacht hot, wolt Eyer hon tas se froo weyere. Tee hot tëne een xeen plats fer se leepe, een froo hayrat un een interesant aarwayt kexenkt. Tii solte fon te kans eyert een paratiis mache, soo wii te Eetem kaate, un tëne fol lose mit sayn nookhomer. Yeehoowa hot se ploos een keweenlich kepoot kep. Un tee hot se aan kesaat tas, wën se fer kërn tiise kepoot unfoliche teete, teete se xtërpe. Meyer wise xon was pasiirt is… Een xlechte engel, woo Yeehoowa un ti mënxe net keliipt hot, hot Aatam un Ewa fersuucht sich keeche Kot xtele. Aatam un Ewa hon kemacht was tiise xlechte engel, Satanaas, hon wolt: xtats uf sayn liipliche Fater traue, hon se kesint. Un was Yeehoowa kesaat hat, hot sich erfiilt. Weeche sayn unfolichkheet, hon Aatam un Ewa xwiirichkheete torich te rest fon sayn leepe kelit. Tii sin alt kep un, tsum xlus, kextorep. (Xee. 1:28, 29; 2:8, 9, 16-18; 3:1-6, 17-19, 24; 5:5)
4. Warom tuut Yeehoowa ti sint hase un uns helfe too tekeeche khëmpfe? (Romaaner 8:20, 21)
4 Yeehoowa hot tiise kexicht in te Piipel kelos tas mer ferxteen khente warom eyer ti sint soo fiil hast. Ti sint tuut uns fon unser Fater aus naner mache un tsum toot nëme. (Isa. 59:2) Satanaas hast Yeehoowa un ti mënxe. Tes weeche, hot eyer Aatam un Ewa fersuucht een sint mache; un tee tuut wayter fersuuchunge fer ti mënxe xtele. Wii Aatam un Ewa kesint hon, hot Satanaas fiilaycht ketenkt tas eyer Yeehoowa sayn tsiil fer ti mënxe fersaut hat. Awer tee hot net ferxtan wii kroos Yeehoowa sayn liip is. Kot hot nii sayn tsiil fer Aatam un Ewa sayn nookhomer keënert. Tee liipt ti mënxe un tes weeche, hot eyer klaych een hofnung fer ale kaar kep. (Lees Romaaner 8:20, 21.) b Yeehoowa wust tas etliche raus suuche teete tëm liipe un foliche. Wii Fater un Kriatoer fon te mënxe, hot Kot te weech uf kemacht tas se khonte pefrayung fon te sint kriin un ticht pay tëm khome. Wii hot eyer tas kemacht kriit?
5. Wanee hot Yeehoowa tas eyerste mool hofnung fer ti sintiche mënxe kep? Lee tas aus. (Xeenesis 3:15)
5 Lees Xeenesis 3:15. c Klaych hot Yeehoowa hofnung fer ti sintiche mënxe kep wii eyer kesaat hot was mit Satanaas pasiire teet. Kot hot kesaat tas es een “nookhomer” weyer woo ti mënxe rete teet. Mit te tsayt, teet tiise nookhomer Satanaas fernichte un al ti propleeme woo eyer im Eetem kaate keprung hat, fermache. (1 Yo. 3:8) Awer eyerst teet Satanaas tiise nookhomer wee mache, es wil saan, tëm um pringe. Tas teet Yeehoowa mechtich traurich lose. Awer tiise phayn teet sich am ën loone, wayl fiile mënxe weyere fon te sint un fom toot pefrayt.
WAS HON IMPERFEKTE MËNXE IN TE PIIPLIXE TSAYTE KEMACHT FER KOT KEFALE?
6. Was hon Apël, Noee un anere troye mënxe kemacht fer ticht pay Yeehoowa khome?
6 Xrit noo xrit, hot Yeehoowa taytlich kelos wii sintiche mënxe ticht pay tëm khome khente. Apël — Aatam un Ewa sayn 2te soon — waar te eyerste mënx woo uf Yeehoowa keklaapt hot noo te repelyoon im Eetem kaate. Apël hot Yeehoowa keliipt. Tes weeche, fer Tëm kefale un ticht pay Tëm khome, hot Apël etwas fer Yeehoowa kep. Wayl eyer een xeefer waar, hot Apël etliche yunge leemer fer Yeehoowa keopfert. Wii meecht Yeehoowa sich too teweeche kexpiirt hon? Ti Piipel saat: “Yeehoowa hot Apël un sayn opfer kuut aan kesiin.” (Xee. 4:4) Yeehoowa hot sich aach kefrayt mit te opfere fon anere layt woo tëm keliipt un uf tëm ketraut hon, soo wii Noee. (Xee. 8:20, 21) Wayl Yeehoowa tiise opfere aan kenom hot, hot eyer ketsaycht tas ti sintiche mënxe khonte tëm kefale un ticht pay tëm khome. d
7. Apraham waar wilich fer sayn aychne soon opfere. Was lërne mer too temit?
7 Yeehoowa hot Apraham, eene man mit een xtarke klaape, was xweyeres ferlangt: sayn soon Isak opfere. Meyer khene uns kaar net foer xtele wii fiil phayn Apraham too teweeche kexpiirt hot. Awer tee hot Yeehoowa kefolicht. Wii tee sayn soon neekst um keprung hat, hot Kot tëm kexikt xtil hale. Tiise payxpiil hot ketsaycht was Yeehoowa im futuer mache teet: sayn liipe Soon wilich opfere. Eyer teet tas mache weeche sayn kroos liip tsu te mënxe. (Xee. 22:1-18)
8. Was khene mer peser ferxteen weeche ti opfere unich tëm Kesets? (Lewiitikus 4:27-29; 17:11)
8 Hunerte yoore xpeeter, wii Yeehoowa tas Kesets fer ti israeliiter kep hot, hot eyer tëne fiitsaych opfere ferlangt tas se khente fertsayung fon te sinte kriin. (Lees Lewiitikus 4:27-29; e 17:11. f) Tiise opfere hon ketsaycht tas Yeehoowa een peser opfer fersoriche teet, woo ti mënxe fon te kanse sint pefraye teet. Kot sayn profeete waare inspiriirt aus leye tas te ferxprochne nookhomer — woo am ën Kot sayn liipe Soon waar — teet layte un um keprung wëre. Tee weyer keopfert kraat soo wii een xoof. (Isa. 53:1-12) Tenk mool noo: Kot teet sayn aychne Soon opfere fer ti mënxe fon te sint un fom toot rete. Yawool, tas is was wunerliches un tee hot tas aach fer tich kemacht!
WII HOT YEESUS RETUNG KEPRUNG?
9. Was hot Yoohan te Taafer iwer Yeesus kesaat? (Hepreeyer 9:22; 10:1-4, 12)
9 Im yoerkang 29 N.K., hot Yoohan te Taafer Yeesus kesiin un kesaat: “Kukt mool: Kot sayn Lam woo ti sint fon te welt wech xaft!” (Yoo. 1:29) Tiise wërter hon ketsaycht tas Yeesus te nookhomer waar woo Kot ferxproch hat — tee woo sayn leepe opfere teet. Ëntlich mool is te ferxprochne nookhomer tsum foer xayn khom, woo ti mënxe fon te sint kans rete teet! (Lees Hepreeyer 9:22; g 10:1-4, h 12. i)
10. Wii hot Yeesus ketsaycht tas eyer khom is fer ti sintiche layt ruufe?
10 Yeesus hot sich hauptseechlich traan kehal aan te layt woo sich iwerlaat kexpiirt hon weeche sayn sinte. Tee hot se in kelaat sayn nookeener wëre. Tee wust tas ti sint is hinich al ti xwiirichkheete woo ti mënxe layte. Tes weeche hot eyer mëner un fraae keholef woo wii sintiche layt pekhant waare. Tee hot tas mit een ferklaychung aus keleet: “Ti kesunte mënxe prayche khee tokter, awer ti kranke, yaa.” Tan hot eyer kesaat: “Ich sin net ti kerechte ruufe khom, awer ti sinter.” (Mat. 9:12, 13) Yeesus hot kraat tas kemacht. Tsum payxpiil, wii een fraa tëm sayn fiis mit treene kewext hot, hot eyer liiplich mit tëne kexproch un sayn sinte fertsayt. (Luk. 7:37-50) Yeesus hot wichtiche woerheete fer ti samaritaanix fraa in kelërnt, opwool eyer wust tas se een imoraalixe leepe hat. (Yoo. 4:7, 17-19, 25, 26) Weeche ti sint, khomt te toot; awer Kot hot Yeesus soo kaar ti kraft kep fer mëner, fraae un khiner fom toot uf ruufe. (Mat. 11:5)
11. Warom hon ti sintiche layt sich kuut mit Yeesus kexpiirt?
11 Es is tsum ferxteen warom ti layt woo ferkheerte tinge kemacht hon, sich kuut mit Yeesus kexpiirt hon. Yeesus hot sayn xpiirunge ferxtan un tee waar mitlaytich kewees. Tes weeche, hate se khee pang fer mit tëm xpreche. (Luk. 15:1, 2) Yeesus hot ti sintiche layt keholef te wunx kriin fer sayn leepe ënere un tëm noo keen; un tee hot tiise layt weeche sayn klaape keloopt un tëne liiplich pehantelt. (Luk. 5:27, 28; 19:1-10) Tee waar parmhërtslich soo wii sayn Fater. (Yoo. 14:9) Torich wërter un aktsyoone, hot Yeesus ketsaycht tas sayn parmhërtsliche Fater liipt ti layt un wil yeete eene fon tëne helfe te khampf keeche ti sint kewine.
12. Was hot Yeesus iwer sayn aychne toot in kelërnt?
12 Yeesus wust tas eyer layte teet. Mee wii een mool, hot tee fer sayn tisipele kesaat tas eyer hinerkang un aan een kweel phoste aan kenaachelt weyer. (Mat. 17:22; 20:18, 19) Tee wust tas sayn opfer teet ti sint fon te welt wech xafe, soo wii Yoohan te Taafer un ti profeete foer raus kesaat hate. Yeesus hot aach aus keleet tas, noo sayn toot, teet eyer “ale sorte layt tsu [tëm] tsiie”. (Yoo. 12:32) Sintiche mënxe khente Yeehoowa kefale wën se uf Yeesus klaape teete un sayn xrite noo keengte. Soo weyere se “fon te sint pefrayt”. (Rom. 6:14, 18, 22; Yoo. 8:32) Tes weeche waar Yeesus koraajix kewees un wilich fer een xlim toot layte fer uns rete. (Yoo. 10:17, 18)
13. Wii is Yeesus kextorep un was lërne mer iwer Yeehoowa too temit? (Kuk aach tas pilt.)
13 Eene fon Yeesus sayn tichte fraaynte hot tëm hinerkang. Tan hon sayn faynte tëm in kexpërt, ferxënt un akusiirt weeche kriime woo eyer net kemacht hat. Tii hon ëntxlist Yeesus mim toot xtroofe un tan hon se tëm ferkweelt. Tsum xlus, hon ti soltaate Yeesus aan een kweel phoste aan kenaachelt fer tëm um pringe. Yeesus hot tiise kanse phayn troy aus kehal. Awer ti phayn woo Yeehoowa kexpiirt hot wii eyer tas kesiin hot, waar noch kreeser. Opwool sayn iwermeesich kraft, hot Yeehoowa sich tsurik kehal etwas mache fer Yeesus rete. Warom teet een liipliche Fater sich soo aan xtele? Weeche liip tsu te mënxe. Yeesus hot kesaat: “Wayl Kot ti welt soo fiil keliipt hot, hot eyer sayn eensiche kepoerne Soon kep, tas yeete eene woo aan tëm klaapt net fernicht wërt, awer eewiche leepe kriit.” (Yoo. 3:16)
Yeehoowa hot fiil phayn kexpiirt wii eyer kelos hot sayn Soon um keprung wëre fer uns fon te sint un fom toot pefraye (Kuk te apsats 13.)
14. Was lërnst tuu mit Yeesus sayn opfer?
14 Yeesus sayn opfer is ti kreest pewaysung tas Yeehoowa ti nookhomer fon Aatam un Ewa liipt. Es pewayst wii fiil Yeehoowa tich liipt. Tee hot sayn aychne liipe Soon keopfert un hot fiil phayn aus kehal fer tich fon te sint un fom toot rete. (1 Yo. 4:9, 10) Yawool, Yeehoowa wil yeete eene fon uns helfe keeche ti sint khëmpfe un tiise khampf kewine!
15. Was mise mer mache fer nutse fon Yeesus sayn fray khaaf opfer kriin?
15 Weeche Kot sayn kexenk — tas fray khaaf opfer fon sayn eensiche kepoerne Soon —, khene mer fertsayung fon unser sinte kriin. Awer fer Kot sayn fertsayung kriin, mise mer etwas mache. Yoohan te Taafer un Yeesus hon kesaat was tas is: “Peroyt aych, wayl tas himlixe Raych ticht is.” (Mat. 3:1, 2; 4:17) Soo, wën mer wole tichter pay Yeehoowa khome un keeche ti sint khëmpfe, mise mer uns fon unser sinte peroye. Awer was petayt sich peroye? Un wii tuut tas uns helfe Yeehoowa kefale opwool mer sintiche layt sin? Meyer fine ti antworte fer tiise frooche im neekste xtuutyum artikel.
LIIT 18 Tanke fer tas fray khaaf opfer!
a TUU PESER FERXTEEN: In te Piipel, tas wort sint khan als mool se tuun hon mit was ferkheertes mache orer net mache was Yeehoowa saat richtich is. Awer tas wort khan aach petayte ti imperfektsyoon woo ti mënxe fon Aatam keërpt hon. Weeche ti sint woo mer keërpt hon, tuun meyer al mit te tsayt xtërpe.
b (Romaaner 8:20, 21) Wayl ti kriatsyoon is unich te unutslichkheet kextelt kep, net weeche sayn aychne wile, awer weeche te wile fon tëm woo se uner kextelt hot. In te selwich tsayt, is te funtament fer een hofnung keleet kep: 21 ti kriatsyoon wërt fon te sklaaweray tsu te fernichtung fray kemacht un tuut ti hërlich frayheet fon Kot sayn khiner kriin.
c (Xeenesis 3:15) Un ich tuun fayntxaft mache tswixich tich un ti fraa, un tswixich tayn nookhomer un te nookhomer fon te fraa. Tee tuut tayn khop fertrike, un tuu tuust tëm sayn feerst wee mache.”
d Yeehoowa hot ti opfere fon tiise troye mëner aan kenom wayl eyer wust tas im futuer, teet Yeesus Kristus sayn leepe ap kepe fer ti mënxe fom toot un fon te sint een mool fer imer rete. (Rom. 3:25)
e (Lewiitikus 4:27-29) “‘Wën yemant fom folek sint oone tas fer kërn mache un xultich wërt wayl eyer etwas kemacht hot woo Yeehoowa ferpiit, 28 orer wën eyer mërkt tas eyer een sint kemacht hot, tan sol eyer een kesunt kaprite tsik foer pringe wii opfer fer ti sint woo eyer kemacht hot. 29 Tee sol ti hant uf tëm khop fom sint opfer leye un te opfer fer ti sint xlachte im selwich plats woo ti keprëntne opfer kexlacht wërt.
f (Lewiitikus 17:11) Wayl tas leepe fon een kriatuer is ins pluut, un ich selepst hon tas fer aych kep tas iir khent ayre sinte am altar teke. Wayl is tas pluut woo ti sinte tekt, torich tas leepe woo aan tëm is.
g (Hepreeyer 9:22) Yawool, tëm noo tas Kesets, neekst ales is mit pluut rayn kemacht. Es kept khee fertsayung wën khee pluut aus kexut is.
h (Hepreeyer 10:1-4) Tas Kesets is een xate fon te kuute tinge woo khome teete, net ti wërklichkheet selepst. Tes weeche, tas khan nii perfekt mache tii woo tichter khome fer aan peete mit te selwiche opfere woo wayter yoer noom yoer keopfert sin. 2 Wën net, weyere ti opfere net mee kemacht; wayl wën tii woo een haylich tiinst mache xon rayn kemacht weyere, teete net mee sayn sinte erkhëne. 3 Xtats tas, sin tiise opfere yoer noom yoer een erinerung fon te sinte, 4 wayl es is net meechlich tas tas pluut fon xtiire un fon kaprite pek ti sinte wech hoole tuut.
i (Hepreeyer 10:12) Awer tiise man hot een eensiche opfer fer imer fer ti sinte aan kepoot un sich tsu te rechts sayt fon Kot kesetst,
