XTUUTYUM ARTIKEL 33
LIIT 130 Wole mer mit liip fertsaye
Wii khan ti kemaynt Kot sayn mënung iwer sintiche layt noo mache?
“Wën yemant een sint macht, hon mer een helfer.” (1 YOOHAN 2:1)
WAS TUUN MER SIIN?
Wichtiche lisyoone woo mer lërne khene mit was in een kemaynt in Korinto pasiirt is wii een pruuter een xweyer sint kemacht hot.
1. Was wil Yeehoowa fer al ti layt?
YEEHOOWA hot uns mit te apiliteet kemacht fer unser aychne ëntxlise mache. Yeete taach mache mer ëntxlise. Te wichtichste ëntxlus woo yemant mache khan, is sich tsu Yeehoowa tetikiire un teel fon sayn familye wëre. Yeehoowa wil hon tas ale layt tas mache. Warom? Wayl eyer ti layt liipt un winxt tëne tas pestes. Tee wil hon tas se fer imer leepe wii sayn fraaynte. (Teut. 30:19, 20; Kal. 6:7, 8)
2. Was xpiirt Yeehoowa tsu tëne woo een xweyer sint kemacht hon un sich noch net peroyt hon? (1 Yoohan 2:1)
2 Awer Yeehoowa tuut nimant tswinge tëm tiine. Tee erlaupt tas yeete persoon ëntxlist was se mache tuut. Un was pasiirt wën een ketaafte krist Kot sayn kesets iwertreet un een xweyer sint macht? Wën eyer sich net peroyt, mus eyer fon te kemaynt raus ketuun wëre. (1 Kor. 5:13) Awer aach wën tas pasiirt, wil Yeehoowa hon tas ti persoon sich peroyt un noch mool een xtark fraayntxaft mit Tëm ëntwikelt. In woerheet, een wichtich uersach warom Yeehoowa tas fray khaaf opfer fersoricht hot, is tas soo khan eyer fertsaye tii woo sich peroye. (Lees 1 Yoohan 2:1.) a Unser liipliche Fater tuut hërtslich aan hale fer tii woo een xweyer sint kemacht hon, sich peroye. (Sak. 1:3; Rom. 2:4; Tya. 4:8)
3. Iwer was tuun mer in tiise artikel xpreche?
3 Yeehoowa saat uns wii eyer sich xpiirt iwer ti sint un iwer tëne woo xweyer sinte mache; un tee wil hon tas mer tas selwiche xpiire. In tiise artikel, lërne mer was Phaul fer ti kemaynt in Korinto kesaat hot wii een pruuter een xweyer sint kemacht hot. Tan tuun mer siin was Phaul ti kemaynt oryentiirt hot noo tas te man sich peroyt hot. Tsum xlus lërne mer was Yeehoowa xpiirt iwer tii woo een xweyer sint kemacht hon.
WAS IS PASIIRT WII EEN PRUUTER EEN XWEYER SINT KEMACHT HOT?
4. Was is pasiirt in te kemaynt in Korinto? (1 Korinter 5:1, 2)
4 Lees 1 Korinter 5:1, 2. b Torich sayn trit misyoneer rees, hot Phaul xlime notisye kriit iwer ti nay kemaynt in Korinto. Een pruuter in tiise kemaynt hot sëks mit sayn xtiifmuter kemacht. Soo kaar ti layt woo net Yeehoowa aan kepeet hon, wuste tas es xlim waar. Awer ti kemaynt hot net ploos tiise aanxtelung aan kenom. Khan sin tas se sich too teweeche keproost hon. Fiilaycht hon etliche in te kemaynt ketenkt tas se waare parmhërtslichkheet am tsayche soo wii Yeehoowa es macht mit imperfekte mënxe. Awer Yeehoowa tuut net een ferkheert aanxtelung tswixich sayn folek aan nëme. Weeche ti xlim aanxtelung fon tiise man, tsiimlich sicher hon etliche woo Yeehoowa net ketiint hon sich ferxrok un xlecht iwer Kot sayn folek kexproch. Un fiilaycht waar eyer xon am influentsiire ti anere kriste in te kemaynt. Soo, was hot Phaul kexikt tas ti kemaynt mache solt?
5. Was hot Phaul kexikt ti kemaynt mache un was wolt eyer too temit saan? (1 Korinter 5:13) (Kuk aach tas pilt.)
5 Lees 1 Korinter 5:13. c Yeehoowa hot Phaul inspiriirt een priif fer ti kemaynt xraype un tëne saan tas te sintiche man woo sich net peroyt hot, solt fon te kemaynt raus ketuun wëre. Wii solte ti troye kriste tëm pehantele? Phaul hot tëne kexikt noo lose keselxaft mit tëm man hon. Was wolt Phaul saan? Phaul hot aus keleet tas tepay in tiise kepoot, waar ‘noch net mool mit tëm man ese’. (1 Kor. 5:11) Wëns tuu mit yemant est, tuust tuu mit tëm fertseele un tsayt mit tëm fertraype. Tes weeche khent teyer aan fange noch mee tsayt mitsamer aus kepe. Soo, es is taytlich tas Phaul fer ti kemaynt saan wolt tas se solte net uneetiche tsayt mit tëm man fertraype. Tas teet ti kemaynt xitse fon sayn xlecht influens. (1 Kor. 5:5-7) Tas khent aach te man helfe se mërke tas eyer was xlimes kemacht hat, sich too teweeche traurich xpiire un sich peroye.
Yeehoowa hot Phaul inspiriirt een priif fer ti kemaynt xraype un tëne saan tas te sintiche man woo sich net peroyt hot, solt fon te kemaynt raus ketuun wëre (Kuk te apsats 5.)
6. Wii hot Phaul sayn priif (a) ti kemaynt petrof? (b) te man woo ti xweyer sint kemacht hot, petrof?
6 Noo tëm priif fer ti kemaynt in Korinto xike, hot Phaul sich kefroot wii ti kemaynt sich too teweeche aan xtele teet. Noo een tsayt, hot Titus kuute notisye fer Phaul keprung. Ti kemaynt hot Phaul sayn oryentiirung aan kenom un te man fon te kemaynt raus ketuun. (2 Kor. 7:6, 7) Un noch peser, noo tas ti kemaynt tas kemacht hot, hot te man sich peroyt. Tee hot sayn aanxtelung keënert un aan kefang Yeehoowa sayn kerechte kesetse foliche. (2 Kor. 7:8-11) Was hot Phaul kesaat tas ti kemaynt tan mache solt?
WII SOLT TI KEMAYNT PEHANTELE TE MAN WOO SICH PEROYT HOT?
7. Was hot te man kemacht noo tas eyer fon te kemaynt raus ketuun kep is? (2 Korinter 2:5-8)
7 Lees 2 Korinter 2:5-8. d Phaul hot kesaat tas ‘ti xtroof woo ti meyerste tëm man kep hon, waar xon kenuuch’. In anere wërter, ti tisipliin hot sayn opjetiiw erfiilt. Was fer opjetiiw? Te man helfe sich peroye. (Hep. 12:11)
8. Wayl te man sich peroyt hot, was hot Phaul ti kemaynt oryentiirt?
8 Wayl te man sich peroyt hot, hot Phaul ti kemaynt oryentiirt: “Teyer [solt] tëm mit kuutheet fertsaye un treeste” un aach “tëm sicher [lose] tas teyer tëm liipt”. Mërk mool tas Phaul wolt hon tas ti priiter mee mache solte wii ploos erlaupe tas te man tsurik tsu te kemaynt khemt. Phaul wolt hon tas ti priiter fer te man tsayche teete, torich wërter un aktsyoone, tas se tëm fertsayt un keliipt hon. Soo teet te pruuter xpiire tas se froo waare tas eyer tsurik tsu te kemaynt khom is.
9. Warom waar es fiilaycht xweyer fer etliche te pruuter woo sich peroyt hat, fertsaye?
9 Im xtant waar es xweyer fer etliche kuutheet fer te man tsayche wii eyer tsurik tsu te kemaynt khom is. Warom khene mer tas saan? Fiilaycht waare etliche noch pees wayl te man propleeme fer ti kemaynt keprung hot. Un khan sin tas etliche in te kemaynt sich ferxeemt hon weeche te man sayn aanxtelung. Tiise priiter hon sich fiil aan kextrengt fer Yeehoowa sayn kesetse aan heere. Soo fiilaycht hon se ketenkt tas es net richtich waar, erlaupe tas yemant woo soo een xweyer sint kemacht hat tsurik tsu te kemaynt khemt. (Kuk aach Lukas 15:28-30.) Awer, warom waar es wichtich tas ti kemaynt fer te pruuter tsayche teet tas se tëm wërklich keliipt hon?
10-11. Was khent pasiire wën ti elteste te man, woo sich peroyt hot, net fertsaye teete?
10 Xtel tich mool foer wii te man sich xpiire teet wën eyer fon te elteste net erlaupt weyer tsurik tsu te kemaynt khome noo tas eyer sich peroyt hot; orer tas ti kemaynt net tëm liip tsayche teet noo tas eyer tsurik khom is. Phaul hot kesaat tas ti “iwermeesich traurichkheet” tëm iwerlaate teet. Es weyer laycht fer tëm tenke tas eyer khent nii mool Yeehoowa noch mool tiine. Tee khent aan fange se tenke tas Yeehoowa tëm nii fertsaye teet un tas sich ënere, umsonst weyer.
11 Was noch khent pasiire wën ti priiter un xwestere te man net fertsaye teete? Tii khente sayn aychne fraayntxaft mit Yeehoowa fersaue. Warom? Wayl tii teete net Yeehoowa noo mache, woo fertsayt tii woo sich peroye. Xtats tas, teete se Satanaas noo mache, woo krop is un khee parmhërtslichkheet tsaycht. In woerheet, teete se lose Satanaas tëne penutse fer te man um hale wayter Yeehoowa tiine. (2 Kor. 2:10, 11; Ëfe. 4:27)
12. Wii khent ti kemaynt in Korinto Yeehoowa noo mache?
12 Soo, wii khent ti kemaynt in Korinto Yeehoowa, xtats Satanaas, noo mache? Tii solte ti persoon woo sich peroyt hat pehantele soo wii Yeehoowa es macht. Mërk mool was etliche piiplixe xrayper iwer Yeehoowa kesaat hon. Tawi hot kesaat: “Tuu pist kuut un imer fërtich fer se fertsaye.” (Psal. 86:5) Mikeyas hot kexrip: “Weer is een Kot soo wiis tuu? Tuu fertsayst te feeler un lost ti iwertreetung fom rest fon sayne folek uf sayt.” (Mik. 7:18) Un Isayas hot kesaat: “Te xlechter sol sayn weech lose, un tee woo xaate macht, sayn ketanke; tee sol retuer tsu Yeehoowa khome, woo parmhërtslich mit tëm wërt; tee sol tsurik tsu unser Kot khome, wayl Eyer tuut iim krooshërtslich fertsaye.” (Isa. 55:7)
13. Warom waar es richtich se erlaupe tas te man tsurik tsu te kemaynt khemt? (Kuk te khaste “ Wanee waar te man in Korinto noch mool in te kemaynt aan kenom?”)
13 Fer Yeehoowa noo mache, solt ti kemaynt in Korinto te man fertsaye un tëm tsayche tas se tëm keliipt hon. Phaul hot kesaat tas wën se te man fertsaye teete, teete se tsayche tas se ‘folich in ales’ weyere. (2 Kor. 2:9) Opwool te man ploos phaar moonate aus te kemaynt keplip is, hot eyer sich peroyt. Soo, es waar net neetich tas ti elteste waarte teete fer tëm tsurik in te kemaynt aan nëme.
WII KHENE MER KERECHT UN PARMHËRTSLICH SIN SOO WII YEEHOOWA?
14-15. Was lërne mer mit te aat wii ti situatsyoon in Korinto resolwiirt waar? (2 Pheeter 3:9) (Kuk aach tas pilt.)
14 Ti aat wii ti situatsyoon in Korinto resolwiirt waar, xteet in te Piipel fer uns in lërne. (Rom. 15:4) Meyer lërne tas Yeehoowa net erlaupt tas tii woo een xweyer sint mache un sich net peroye, wayter in te kemaynt plaype. Fiilaycht, etliche tenke tas wayl Yeehoowa parmhërtslich is, sol Eyer erlaupe tas soo een sort persoon in te kemaynt playpt. Awer Yeehoowa sayn mënung is anerste. Opwool Yeehoowa parmhërtslich is, tuut eyer net aan nëme ale sorte aanxtelung. Sayn kesetse iwer was richtich un ferkheert is, ënere sich net. (Yuu. 4) Wën Yeehoowa erlaupe teet tas tii woo sich net peroye, wayter in te kemaynt plaype teete, weyer tas net parmhërtslich, wayl es teet al in te kemaynt in kefoer xtele. (Xpr. 13:20; 1 Kor. 15:33)
15 Awer, meyer lërne aach tas Yeehoowa net hon wil tas yemant fernicht wërt. Tee wil ti layt rete, imer wëns meechlich is. Tee tsaycht parmhërtslichkheet fer tii woo sayn ketanke un aktsyoone ënere un woo wole sayn fraaynte noch mool sin. (Ese. 33:11; lees 2 Pheeter 3:9. e) Tes weeche, wii te man sich peroyt hot un sayn aanxtelung keënert hot, hot Yeehoowa Phaul penutst fer ti kemaynt in lërne tas se solte tëm fertsaye un noch mool in te kemaynt aan nëme.
Meyer mache Yeehoowa sayn liip un parmhërtslichkheet noo wën mer hërtslich wilkhome tii woo noch mool in te kemaynt aan kenom sin (Kuk ti apsetse 14-15.)
16. Wii xpiirst tuu tich iwer ti aat wii ti situatsyoon in Korinto resolwiirt waar?
16 Was in te kemaynt in Korinto pasiirt is, tsaycht tas Yeehoowa liiplich un kerecht is, un tas eyer macht was richtich is. (Psal. 33:5) Too triwer lërne, muut uns uf tëm noch mee loope. Wayl meyer al sinte un fertsayung prayche, sin mer aarich petanklich tas Yeehoowa parmhërtslich is. Meyer sin aach petanklich tas Yeehoowa tas fray khaaf opfer fersoricht hot wayl soo, khan eyer unser sinte fertsaye. Es treest uns fiil se wise tas Yeehoowa ti layt aarich liipt un tas pestes tëne winxt!
17. Was fer frooche tuun mer in te 2 neekste artikele antworte?
17 Un wën yemant hayt een xweyer sint in te kemaynt macht? Wii khene ti elteste Yeehoowa sayn liip noo mache un ti persoon helfe sich peroye? Wii sole ti priiter un xwestere sich aan xtele wën ti elteste ëntxlise yemant aus te kemaynt tuun orer noch mool in te kemaynt aan nëme? In te 2 neekste artikele, tuun mer tiise frooche antworte.
LIIT 109 Liipt eene te anere fom kans hërts
a (1 Yoohan 2:1) Mayn khinerche, ich xraype aych tiise tinge tas teyer net sinte macht. Awer, wën yemant een sint macht, hon mer een helfer pay te Fater: Yeesus Kristus, eene kerechte.
b (1 Korinter 5:1, 2) In woerheet, es is mich kesaat kep tas es kept tswixich aych yemant woo seksuaal imoraaliteet pratikiirt. Tiise sort imoraaliteet is soo xlim tas noch net mool tswixich ti natsyoone fine mer soo was: te man leept mit te fraa fon sayn fater. 2 Is tas etwas fer sich proose? Solt teyer net traurich sin soo tas tiise man aus te kemaynt ketuun weyer?
c (1 Korinter 5:13) un Kot woo richt tii woo yaus sin? “Tuut ti xlecht persoon tswixich aych raus tuun.”
d (2 Korinter 2:5-8) Wën yemant traurichkheet keprung hot, hot eyer net ploos mich traurich kelos, awer tee hot teyer al in een moos traurich kelos — fer net tsu xtreng sin aan was ich saan. 6 Ti xtroof woo ti meyerste tëm kep hon, is xon kenuuch. 7 Yets, solt teyer tëm mit kuutheet fertsaye un treeste. Wën net, khan ti iwermeesich traurichkheet tëm iwerlaate. 8 Tes weeche, muute ich aych uf: lost tëm sicher tas teyer tëm liipt.
e (2 Pheeter 3:9) Yeehoowa is net lamsam fer sayn ferxpreche erfiile, wii etliche tenke, awer tee is ketultich mit aych, wayl eyer net winxt tas yemant fernicht wërt, awer winxt tas se al sich peroye.
