XTUUTYUM ARTIKEL 32
LIIT 44 Een kepeet fon een trauriche tiiner
Yeehoowa wil hon tas al sich peroye
“Yeehoowa (…) winxt [net] tas yemant fernicht wërt, awer winxt tas se al sich peroye.” (2 PHEETER 3:9)
WAS TUUN MER SIIN?
Was een persoon mache mus fer sich peroye, warom meyer al uns peroye mise un wii Yeehoowa ti layt helft sich fon sayn sinte peroye.
1. Was macht een persoon woo sich peroyt?
WËN mer was ferkheertes mache, es is aarich wichtich tas mer uns peroye. Tëm noo te Piipel, fer een persoon sich peroye, mus se aan fange hase was se kemacht hot, sayn aanxtelung ënere un pextimt sin tas net noch mool mache. (Mat. 3:8; Aph. 3:19; 2 Phe. 3:9)
2. Warom mise mer al lërne was ti Piipel saat iwer sich peroye? (Neemias 8:9-11)
2 Yeete mënx mus lërne was ti Piipel saat iwer sich peroye. Warom? Wayl meyer al yeete taach sinte. Meyer sin nookhomer fon Aatam un Ewa un tes weeche hon mer ti sint un te toot keërpt. (Rom. 3:23; 5:12) Khee eene fon uns is fray too tefun. Soo kaar layt woo een xtarke klaape hate, soo wii te aphostel Phaul, hon keeche ti sint kekhëmpft. (Rom. 7:21-24) Wil tas saan tas mer sole uns imer traurich weeche unser sinte xpiire? Nee. Yeehoowa is parmhërtslich un tee wil hon tas mer froo wëre. Mërk mool was mit te yuute in Neemias sayn taache pasiirt is. (Lees Neemias 8:9-11.) a Yeehoowa wolt net hon tas se sich tsu traurich xpiire teete weeche ti sinte woo se friier kemacht hon. Yeehoowa wolt hon tas se tëm mit frooheet aan peete teete. Kot wees tas, wën mer uns peroye, tas helft uns froo wëre. Tes weeche tuut eyer uns too triwer lërne. Wën mer uns peroye, khene mer uns sicher sin tas unser parmhërtsliche Fater uns fertsaye tuut.
3. Was tuun mer in tiise artikel siin?
3 In tiise artikel, xpreche mer iwer 3 phunkte iwer sich peroye. Eyerst, was Yeehoowa Israël in kelërnt hot iwer sich peroye. Tsweet, wii Yeehoowa ti layt keholef hot sich peroye. Un trit, was Yeesus sayn tisipele in kelërnt hot iwer sich peroye.
WAS HOT YEEHOOWA ISRAËL IN KELËRNT IWER SICH PEROYE?
4. Was hot Yeehoowa ti israeliiter in kelërnt iwer sich peroye?
4 Wii Yeehoowa sayn kesetse fer ti israeliiter kep hot, hon se ferxproch tëm aan heere. Un Yeehoowa hot ferxproch tas, wën se tiise kesetse foliche teete, teet eyer se xitse un seechne. Tee hot iwer ti kesetse kesaat: “Tiise kepoot woo ich tich hayt kepe, is net tsu xweyer fer tich un is aach net etwas woos tuu net erayche khanst.” (Teut. 30:11, 16) Awer wën ti israeliiter unfolich weyere un anere keeter aan peete teete, teet Yeehoowa noo lose se xitse un tii teete sicher layte. Noch soo, es wolt net saan tas Yeehoowa se kans im xtich lose teet. Tii khente ‘tsurik tsu Yeehoowa, sayn Kot, khome un sayn xtim heere’. (Teut. 30:1-3, 17-20) In anere wërter, tii khente sich peroye. Soo teet Yeehoowa noch mool tichter pay tëne khome un tëne seechne.
5. Wii hot Yeehoowa ketsaycht tas eyer net fon sayn folek uf kep hot? (2 Kheeniche 17:13, 14)
5 Yeehoowa sayn rauskesuuchtne folek hot sich noo un noo keeche tëm repeliirt. Tii hon itole aan kepeet un anere xrekliche tinge kemacht. Tes weeche, hon se kelit. Awer Yeehoowa hot wayter fersuucht sayn folek helfe tëm noch mool tiine. Tee hot noo un noo profeete kexikt fer tëne uf muute sich peroye un tsurik tsu tëm khome. (Lees 2 Kheeniche 17:13, 14.) b
6. Wii hot Yeehoowa sayn profeete penutst fer sayn folek in lërne tas es wichtich waar sich peroye? (Kuk aach tas pilt.)
6 Yeehoowa hot ofts sayn profeete penutst fer tas folek xtark aan reete un korikiire. Tsum payxpiil, tee hot torich Yeeremias kesaat: “Khom tsurik, tuu repëlixe Israël. (…) Ich tuun aych net xeep kuke, wayl ich sin leaal. (…) Ich plaype net fer imer pees mit aych. Tuu ploos tayn xult erkhëne, wayls tuu tich keeche Yeehoowa tayn Kot repeliirt host.” (Yee. 3:12, 13) Torich Yoël, hot Kot kesaat: “Khomt mit ayre kanse hërts tsu mich tsurik.” (Yoël 2:12, 13) Yeehoowa hot Isayas kexikt aus xpreche: “Macht aych sauwer. Nëmt ayre xlechtichkheet foer mayn aue wech. Lost noo tas xlechtes mache.” (Isa. 1:16-19) Un torich Esekyël, hot Yeehoowa kefroot: “Meecht ich mich fraye mim toot fom xlechte? (…) Meecht ich net rechter winxe tas eyer sayn weeche lost un lepeentich playpt? (…) Ich fraye mich net wën yemant xtërpt. (…) Soo, khomt tsurik un leept.” (Ese. 18:23, 32) Yeehoowa wërt mechtich froo wën ti layt sich fon sayn sinte peroye, wayl tee wil hon tas se fer imer leepe. Tes weeche, tuut Yeehoowa net aan fange ti layt helfe ploos noo tas se sich peroyt hon. Wole mer etliche payxpiile too tefun siin.
Yeehoowa hot ofts sayn profeete penutst fer tas repëlixe folek uf muute sich peroye (Kuk ti apsetse 6-7.)
7. Was hot Yeehoowa tas folek in kelërnt torich te profeet Oseyas un sayn fraa?
7 Mërk mool was Yeehoowa sayn folek in kelërnt hot torich te profeet Oseyas un sayn fraa, Koomer. Koomer hot atultëryo kemacht un hot Oseyas im xtich kelos fer mit anere mëner plaype. Meecht es unmeechlich kewees sin tas se sich peroye teet? Yeehoowa, woo hërtse leese khan, hot fer Oseyas kesaat: “Kee noch een mool, liip ti fraa woo fon een aner man keliipt is un woo atultëryo macht, soo wii Yeehoowa tas folek fon Israël liipt in te tsayt woo se tsu anere keeter keen.” (Ose. 3:1; Xpr. 16:2) Mërk mool tas Koomer noch een xweyer sint am mache waar. Awer Yeehoowa hot Oseyas kexikt tëne fertsaye un se noch mool wii sayn fraa aan nëme. c Torich tiise payxpiil, wolt Yeehoowa fer ti israeliiter tsayche wii eyer sich iwer tëne kexpiirt hot. Opwool se xlime tinge wayter kemacht hon, hot Yeehoowa se noch keliipt. Tee hot noo un noo profeete kexikt fer tëne helfe sich peroye un sayn leepe ënere. Tas payxpiil lost es taytlich tas Yeehoowa ti hërtse noo kukt. Meyer lërne aach tas eyer fersuucht ti layt helfe woo noch xweyere sinte am mache sin, sich peroye. (Xpr. 17:3) Wole mer mee too triwer xpreche.
WII HELFT YEEHOOWA TI LAYT SICH PEROYE?
8. Was hot Yeehoowa kemacht fer Kayn helfe sich peroye? (Xeenesis 4:3-7) (Kuk aach tas pilt.)
8 Kayn waar Aatam un Ewa sayn eyerste soon. Tee hot fon sayn eltere keërpt te wunx fer se mache was ferkheert is, awer tee hot tas net kontroliirt. Ti Piipel saat tas “sayn aktsyoone xlecht waare”. (1 Yo. 3:12) Fiilaycht waar tas ti uersach warom Yeehoowa Kayn un sayn opfer net kuut aan kesiin hot. Xtats sayn aanxtelung ënere, “is Kayn wuutich un aach traurich kep”. Was hot Yeehoowa tan kemacht? Tee hot mit Kayn kexproch. (Lees Xeenesis 4:3-7.) d Mërk mool tas Yeehoowa hot mit kuutheet mit Kayn kexproch un hot kesaat tas, wën eyer tas richtiches mache teet, weyer tee keseechent. Awer Yeehoowa hot tëm aach aan kesaat tas eyer khent was ferkheertes mache weeche sayn wuut. Es is xaat, awer Kayn wolt Yeehoowa net aan heere. Tee hot net kelos tas Yeehoowa tëm helfe teet sich peroye. Opwool Kayn Yeehoowa net aan keheert hot, hot Yeehoowa net noo kelos sich aan xtrenge fer ti sintiche layt helfe sich peroye.
Yeehoowa hot fersuucht Kayn helfe sich peroye un hot kesaat tas eyer keseechent weyer too teweeche (Kuk te apsats 8.)
9. Wii hot Yeehoowa Tawi keholef sich peroye?
9 Yeehoowa hot te kheenich Tawi fiil keliipt. Tee hot soo kaar iwer Tawi kesaat: “Tee is eene man woo mayn hërts froo macht.” (Aph. 13:22) Awer Tawi hot etliche xlime feeler kemacht, soo wii atultëryo un yemant um pringe. Tëm noo tas mosayxe Kesets, hot Tawi te toot fertiint. (Lew. 20:10; Nuu. 35:31) Awer Yeehoowa wolt Tawi helfe sich peroye. e Tee hot te profeet Natan kexikt te kheenich Tawi pesuuche, opwool eyer sich noch net peroyt hat. Natan hot een ferklaychung penutst fer Tawi sayn hërts aan krayfe. Tawi hot kemërkt tas eyer fiil phayn tsu Yeehoowa sayn hërts keprung hat un tee hot sich peroyt. (2 Sam. 12:1-14) Tee hot een Psalm kexrip woo tsaycht wii fiil eyer sich peroyt hot. (Psal. 51, iwerxrift) Tiise Psalm hot fiile layt woo kesint hon, ketreest un se aach uf kemuut sich peroye. Meyer sin aarich petanklich tas Yeehoowa Tawi mit liip keholef hot sich peroye.
10. Wëns tuu tenkst iwer Yeehoowa sayn ketult un fertsayung, wii xpiirst tuu tich?
10 Yeehoowa hast ale sorte sinte. (Psal. 5:4, 5) Awer tee liipt uns un, wën mer een sint mache, tee wil uns helfe uns peroye un tichter pay tëm khome. Yeehoowa tuut sich imer aan xtrenge fer ti sintiche layt helfe — soo kaar ti xlimste fon tëne. Es treest uns aarich fiil tas wise. Wën mer tenke iwer Yeehoowa sayn ketult un fertsayung, kriin mer te wunx fer troy tsu tëm plaype un uns klaych peroye wën mer sinte. Yets wole mer siin was Yeesus sayn tisipele in kelërnt hot iwer sich peroye.
WAS HON YEESUS SAYN NOOKEENER KELËRNT IWER SICH PEROYE?
11-12. Was lërne mer iwer Yeehoowa mit een kexicht woo Yeesus fertseelt hot? (Kuk tas pilt.)
11 Wii mer im letste artikel kesiin hon, im eyerste yoer hunert — in te tsayt woo te Mesias tsum foer xayn khom is — hot Yeehoowa Yoohan te Taafer un Yeesus Kristus penutst fer ti layt in lërne wii wichtich es is sich peroye. (Mat. 3:1, 2; 4:17)
12 Wii Yeesus uf te eyert waar, hot eyer ti layt in kelërnt tas sayn Fater unser sinte fertsaye wil. Yeesus hot tiise wichtich lisyoon in kelërnt wii eyer ti kexicht fom ferloerne soon fertseelt hot. Te yunge man hot ëntxlist fon sayn haus faart keen un etliche xlechte tinge mache. Awer noo een tsayt, is “tee aan sich khom” un is tsurik hëm kang. Wii hot sayn papa sich aan kextelt? Yeesus hot kesaat tas, “wii [te soon] noch wayt wech waar, hot sayn fater iim kesiin un hot mitlayt kexpiirt; tan is eyer kexprung, un hot tëm um kekrif un liiplich kekhust”. Te soon hat khee hofnung tas sayn papa tëm fertsaye teet. Soo hot eyer ferlangt fer wii een aarwayter in sayn haus xafe. Awer te papa wolt tëm wërklich fertsaye. Tee hot tëm “mayne soon” kenënt un hot tëm tsurik in te familye aan kenom. Te fater hot kesaat: “Tee waar ferloer un is wiiter kefun kep.” (Luk. 15:11-32) Wii Yeesus im himel waar, hot eyer ofts kesiin wii sayn Fater mitlaytich waar mit tëne woo sich peroyt hon fon sayn sinte. Ti kexicht woo Yeesus fertseelt hot, tuut uns fiil treeste un tsaycht wii parmhërtslich unser Fater Yeehoowa is.
Te fater in Yeesus sayn kexicht fom ferloerne soon xpringt fer sayn soon, woo tsurik hëm khom is, um krayfe (Kuk ti apsetse 11-12.)
13-14. (a) Was hot te aphostel Pheeter kelërnt iwer sich peroye? (b) Was hot Pheeter ti anere in kelërnt iwer sich peroye? (Kuk aach tas pilt.)
13 Te aphostel Pheeter hot phaar wichtiche lisyoone mit Yeesus kelërnt iwer wii Yeehoowa fertsayt tii woo sich peroye. Pheeter hot phaar feeler kemacht un Yeesus hot tëm krooshërtslich fertsayt. Tsum payxpiil, noo tas Pheeter 3 mool kesaat hot tas eyer Yeesus net kekhënt hot, is eyer mechtich traurich kep. (Mat. 26:34, 35, 69-75) Awer noo Yeesus sayn ufxtaye, is eyer fer Pheeter tsum foer xayn khom wii eyer aleen waar. (Luk. 24:33, 34; 1 Kor. 15:3-5) Yeesus wust tas Pheeter sich peroyt hat un tee wolt tëm sicher lose tas eyer tëm fertsayt hot. (Kuk Markus 16:7 un ti xtuutyum noote “e a Pedro”.)
14 Pheeter hot selepst kexpiirt wii kuut es is sich peroye un fertsayt wëre. Tes weeche hot eyer ti anere too triwer in kelërnt. Een tsayt noom Phingste Taach, hot Pheeter fer ti yuute aus keleet tas se te Mesias um keprung hate. Awer tee hot se liiplich uf kemuut: “Peroyt aych un treet aych rom, tas ayre sinte aus kewixt wëre. Tan, pringt Yeehoowa ti tsayte woo eyer aych nay kraft kept.” (Aph. 3:14, 15, 17, 19) Pheeter hot in kelërnt tas wën een persoon sich peroye wil, mus se sich rom treye — es wil saan, sayn ferkheerte ketanke ënere, noo lose tas ferkheertes mache un aan fange se mache was Kot kefalt. Pheeter hot aach ketsaycht tas Yeehoowa se kans fertsaye teet. Es weyer wii wën Yeehoowa mache teet tas ti sinte aus kewixt un ferxwint weyere. Phaar yoore xpeeter, hot Pheeter ti kriste sicher kelos: “Yeehoowa (…) is ketultich mit aych, wayl eyer net winxt tas yemant fernicht wërt, awer winxt tas se al sich peroye.” (2 Phe. 3:9) Wën mer uns fon unser sinte peroye, soo kaar wën se xlim sin, es treest uns se wise tas Yeehoowa uns kans fertsaye tuut.
Yeesus hot sayn aphostel woo sich peroyt hot liiplich fertsayt un uf kemuut (Kuk ti apsetse 13-14.)
15-16. (a) Wii hot te aphostel Phaul iwer ti fertsayung kelërnt? (1 Timoteus 1:12-15) (b) Was tuun mer im neekste artikel siin?
15 Saulus fon Tarsus hot fiile xlime tinge kemacht. Tee hot, tsum payxpiil, Yeesus sayn liipe nookeener wyolënt keyacht. Ti meyerste kriste hon tsiimlich sicher ketenkt tas eyer sich nii ënere teet. Awer Yeesus wust tas Saulus sich ënere un peroye khent. Yeesus un sayn Fater hon ti kuute kwaliteete fon Saulus kesiin. Yeesus hot kesaat: “Tiise man is fer mich een rauskesuuchtne waase.” (Aph. 9:15) Yeesus hot soo kaar een wuner penutst tas Saulus sich peroye khent. (Aph. 7:58–8:3; 9:1-9, 17-20) Saulus, woo xpeeter wii aphostel Phaul kenënt kep is, hot sich peroyt un is een krist kep. Phaul hot ofts kesaat tas eyer mechtich petanklich waar weeche ti parmhërtslichkheet un kuutheet woo Yeehoowa un Yeesus tëm ketsaycht hon. (Lees 1 Timoteus 1:12-15.) f Phaul hot kesaat: “Kot, in sayn kuutheet, fersuucht mache tas tuu tich peroyst.” (Rom. 2:4)
16 Een mool hot Phaul tsum wise kriit tas ti kriste in Korinto erlaupt hon tas eene man woo seksuaal imoraaliteet pratikiirt hot, in te kemaynt plaype teet. Was hot Phaul too triwer kemacht? Ti wërter woo eyer fer ti korinter kesaat hot, lërne uns fiil in iwer Yeehoowa sayn liiplich tisipliin un wii wichtich es is parmhërtslichkheet tsayche. Im neekste artikel, xpreche mer mee iwer was in te kemaynt in Korinto pasiirt is.
LIIT 33 ‘Xmays tayn laste uf Yeehoowa’
a (Neemias 8:9-11) Neemias, woo in te tsayt te rechiirente waar, Ëstras, te priister un apxrayper, un ti lewiiter woo tas folk am in lërne waare, hon fer al kesaat: “Te taach hayt is haylich fer Yeehoowa, ayer Kot. Tuut net yaamare un aach net prile.” Wayl tas kans folk waar am prile wii se ti wërter fom Kesets keheert hon. 10 Tee hot fer tëne kesaat: “Keet, est tas peste ese un trinkt siise ketrenke un xikt ese fer tii woo niks in kericht hon; wayl tiise taach is haylich fer unser Hër. Sayt net traurich wayl ti frayt woo fon Yeehoowa khomt, is ayre kraft.” 11 Un ti lewiiter hon tas kans folk peruycht, am saan: “Tuut net prile, wayl tiise taach is haylich; tuut net traurich kepe.”
b (2 Kheeniche 17:13, 14) Yeehoowa hot wayter Israël un Yutaa ërnst aan kereet torich sayn kanse profeete un sayn kanse witente, mit tiise wërter: “Lost noo uf ayre xlechte weeche keen! Heert mayn kepoote un mayn kesetse aan, tëm noo tas kans kesets woo ich fer ayre foerkhomer kexikt hon un woo ich fer aych torich mayn tiiner, ti profeete, pekhant kemacht hon.” 14 Awer tii hon tas net keheert un hon wayter sich tik khopich aan kextelt wii sayn foerkhomer, woo khee klaape aan Yeehoowa, sayne Kot, ketsaycht hate.
c Tas waar een ekstra situatsyoon kewees. Hayt tuut Yeehoowa net xike tas te man orer fraa woo hinerkang kep is, wayter in een hayrat playpt mit te persoon woo atultëryo kemacht hot. Yeehoowa hot Yeesus oryentiirt aus leye tas ti persoon raus suuche khan sich tiworsiire fon yemant woo atultëryo kemacht hot. (Mat. 5:32; 19:9)
d (Xeenesis 4:3-7) Noo een tsayt, hot Kayn etwas fon te ërntung kenom fer een opfer fer Yeehoowa mache. 4 Awer Apël hot etliche fon te eyerste kepoerne fon sayn trop xeef, mit tëne sayn fet, kenom. Un Yeehoowa hot Apël un sayn opfer kuut aan kesiin, 5 awer Eyer hot Kayn un sayn opfer net kuut aan kesiin. Tan is Kayn wuutich un aach traurich kep. 6 Tes weeche hot Yeehoowa fer Kayn kesaat: “Warom pist tuu soo wuutich kep un warom pist tuu soo traurich? 7 Wëns tuu aan fangst tas kuutes mache, tuust tuu mich noch mool kefale, kël? Awer wëns tuu net aan fangst tas kuutes mache, is ti sint aan te teer un tuut tich aan kuke, un hot een xtarke wunx fer tich fange. Meechst tuu tii kewine khene?”
e Kuk te artikel “O que o perdão de Jeová significa para você?” in A Sentinela 15te Nofemper fon 2012, sayte 21-23, apsetse 3-10.
f (1 Timoteus 1:12-15) Ich sin petanklich tsu Yeesus Kristus, unser Hër, woo hot mich kraft kep. Tee hot mich een tiinst fertraut wayl foer tëm waar ich troy kewees, 13 opwool friier waar ich een ferfluucher, yachter un hoochnaasiche man. Awer es waar mich parmhërtslichkheet ketsaycht wayl ich wust net was ich am mache waar un hat khee klaape. 14 Toch, ti unfertiint kuutheet fon unser Hër waar seer kroos kewees, tsusamer mit tëm klaape un ti liip woo in Yeesus Kristus is. 15 Ma khan aan tiise wërter traue un tii fertiine kans aan kenom wëre: Yeesus Kristus is tsu te welt khom fer sintiche layt rete. Tswixich tëne, sin ich te xlimste.
