Te aphostel Phaul hot fer ti kriste in Thesaloonika kexrip: “Wën yemant net aan heert was mer in tiise priif saan, tuut tëm markiire.” (2 The. 3:14) Friier hon mer kesaat tas es een oryentiirung fer ti elteste waar. Wën yemant in te kemaynt wayter een piiplix aanreet unfolich hot, khente ti elteste een reet fer ti kemaynt hale fer tëne aan saan. Nochter hon ti puplikatoore noo kelos tsayt mit tiise persoon fertraype aus te fersamlunge un preetich aarwayt.

Awer es is neetich een ënerung mache. Yets ferxteen mer tas Phaul sayn aanreet een ëntxlus is woo yeete krist in etliche situatsyoone mache sol. Tes weeche es is net neetich tas ti elteste een reet hale fer ti kemaynt aan saan. Warom hon mer keënert ti aat wii mer 2 Thesalooniker 3:14 ferxteen? Mërk mool iwer was Phaul am xpreche waar wii eyer tiise oryentiirung kep hot.

Phaul hot kemërkt tas etliche in te kemaynt sich unfolich aan kextelt hon. Tee hot se aanreete fon te Piipel kep, awer tii wolte se net aan heere. Wii eyer tëne eente pesuucht hot, hot eyer se tiise kepoot kep: “Wën yemant net xafe wil, sol eyer aach net ese.” Noch soo, wolte etliche net xafe fer sich fersoriche, opwool se tas mache khonte. Tii waare aach xneepich kewees. Wii solte ti kriste tiise layt pehantele woo sich unfolich aan kextelt hon? (2 The. 3:6, 10-12)

“Tuut tëm markiire” — hot Phaul kesaat. Tas kreekix wort woo Phaul too penutst hot, hot se tuun mit te persoon itentifitsiire un uf phase fer net influentsiirt wëre. Phaul hot tiise aanreet fer ti kans kemaynt kep, net ploos fer ti elteste. (2 The. 1:1; 3:6) Soo yeete krist woo kemërkt hot tas een pruuter orer xwester een aanreet fon te Piipel net aan keheert hot, teet raus suuche noo lose “mit tëm um keen”.

Wolt tas saan tas ti persoon solt pehantelt wëre wii yemant woo fon te kemaynt raus ketuun kep is? Nee, wayl Phaul aach kesaat hot: “Siit tëm (…) wii eene pruuter un tuut tëm wayter aan reete.” Soo ti kriste teete noch keselxaft mit tiise persoon hon in te fersamlunge un preetich aarwayt, awer teete net tsayt mit tëne fertraype aus tiise aktiwiteete. Warom? “Tas eyer sich xeemt” — hot Phaul aus keleet. Wayl eyer markiirt kep is, khent eyer sich weeche sayn aktsyoone xeeme un sayn aanxtelung ënere. (2 The. 3:14, 15)

Wii khene ti kriste hayt tiise aanreet aan wëne? Eyerst mise mer uns sicher sin tas ti persoon sich wërklich “unfolich aan xtelt”, soo wii Phaul es pexrip hot. Tee waar net am xpreche iwer een pruuter orer xwester woo, weeche sayn kewise orer wayl eyer was aneres kërn hot, een aner ëntxlus wii unseres macht, awer woo khee piiplix funtament iwertreet. Un tee waar net am xpreche iwer tii woo uns keëricht hon. Xtats tas, waar Phaul am xpreche iwer tii woo een aanreet fon te Piipel kriit hon, awer woo ëntxlist hon tas unfoliche.

Hayt tsu taach, wën mer mërke tas een pruuter orer xwester wayter een piiplix aanreet unfolicht, a tuun mer ëntxlise noo lose keselxaft mit tëm hon aus te preetich aarwayt orer ti fersamlunge. Tas is een ëntxlus woo mer aleen mache sole. Tes weeche tuun mer net mit te anere too triwer fertseele, heechstens mit unser parente woo im selwiche haus woone. Wën ti persoon sayn mënung un aanxtelung ënert, khene mer noch mool keselxaft mit te persoon hon aus te fersamlunge un preetich aarwayt.