Warom hot Yeesus ti wërter fon Psalm 22:1 kraat foer sayn toot aus kexproch?

Kraat foer sayn toot, hot Yeesus ti wërter fon Matheus 27:46 kesaat: “Mayn Kot, mayn Kot, warom host tuu mich im xtich kelos?” Mit tas, hot eyer ti wërter fon Tawi erfiilt, woo in Psalm 22:1 xteen. (Mar. 15:34) Es is ferkheert se tenke tas Yeesus tiise wërter kesaat hot wayl eyer traurich mit Yeehoowa waar, orer wayl eyer sayn klaape fer een tsayt ferloer hot. Yeesus hot kans ferxtan warom praucht eyer xtërpe un tee waar wilich fer tas mache. (Mat. 16:21; 20:28) Tee wust tas, ticht aan sayn toot, praucht Yeehoowa noo lose tëm xitse, es wil saan, tëm sayn “tsaun” wech hoole. (Yoop 1:10) Wayl Yeehoowa tas kemacht hot, khont Yeesus pewayse tas eyer troy tsu Tëm plaype teet, een tuun wii xweyer sayn toot weyer. (Mar. 14:35, 36)

Awer tan, warom hot Yeesus ti wërter fon tiise Psalm kesaat? Meyer khene uns net sicher sin, awer wole mer welche meechliche uersache noo kuke. *

Wolt Yeesus saan tas Yeehoowa teet net tëm sayn toot um hale? Yeesus praucht tas fray khaaf opfer aleen petsaale, oone Yeehoowa sayn hilef. Wii een mënx, praucht eyer xtërpe tas eyer khent “te toot fer ale kaar xmeke”. (Hep. 2:9)

Mit phaar wërter fon tiise Psalm, wolt Yeesus tas ti layt aan tëm rest fon  tiise Psalm tenke teete? In Yeesus sayn taache, es waar keweent tas ti layt ti psalme ausm khop wuste. Tan, wën yemant een xtik fon een psalm saan teet, teete se sich xon fon te kanse psalm erinere. Wën tas is was Yeesus wolt hon, teet eyer sayn yitixe tisipele helfe sich fon te profetsiie fon te Psalm 22 erinere, woo hate mit tëm sayn toot se tuun. (Psal. 22:7, 8, 15, 16, 18, 24) Un noch, ti letste wërter fon tiise Psalm loope Yeehoowa un pexraype Tëm wii kheenich fon te kans eyert. (Psal. 22:27-31)

Wolt Yeesus tsayche tas eyer unxultich waar? Foer Yeesus sayn toot, waar eyer unkerecht xultich aus kexproch fon Kot ferfluuche. (Mat. 26:65, 66) Xpeeter in te nacht, tas yitixe heechste kericht hot sich xnel kesamelt un hot Yeesus kericht. Awer tii hon tas kemacht oone ti kesetse noo keen. (Mat. 26:59; Mar. 14:56-59) Tan, mit te wërter “mayn Kot, mayn Kot, warom host tuu mich im xtich kelos?”, wolt Yeesus fiilaycht tsayche tas eyer niks ferkheertes kemacht hat un tas es waar khee uersach fer tëm um pringe.

Wolt Yeesus ti anere erinere tas ploos wayl Yeehoowa erlaupt hot tas Tawi layte teet, es wolt net saan tas Eyer traurich mit Tawi waar? Tawi sayn frooch wolt net saan tas eyer een xwach klaape hat. Meyer khene uns sicher fon tas sin wayl, noo heyer, hot eyer kesaat tas eyer uf Yeehoowa ketraut hot fer Tëm sayn folek rete un Yeehoowa hot tëm wayter keseechent. (Psal. 22:23, 24, 27) In te selwich aat, ploos wayl Yeesus — “te Soon fon Tawi” — in te kweel phoste am layte waar, es wolt net saan tas Yeehoowa traurich mit tëm waar. (Mat. 21:9)

Tas Yeesus sayn troyheet pewayse khent, praucht Yeehoowa noo lose tëm xitse. Wolt Yeesus ti phayn tsayche woo eyer weeche tas am xpiire waar? Am aanfang, es waar net Yeehoowa sayn tsiil tas sayn Soon layte un xtërpe teet. Tas waar ploos neetich noo Aatam un Ewa sayn sint. Yeesus hat niks ferkheertes kemacht; awer tee praucht xtërpe un layte fer een antwort kepe fer ti frooche woo Satanaas uf keprung hot. Yeesus hot tas aach kemacht fer tsurik khaafe was ti mënxe ferloer hate. (Mar. 8:31; 1 Phe. 2:21-24) Fer tas hin kriin, praucht Yeehoowa — fer tas eyerste mool, fer een kleene xtun — noo lose Yeesus xitse.

Wolt Yeesus sayn nookeener helfe sich traan hale aan warom hot Yeehoowa tëm erlaupt in een kweel phoste xtërpe? * Yeesus wust tas fiile teete xtolpere weeche ti aat wii eyer kextorep is — in een kweel phoste, wii een xpitspuup. (1 Kor. 1:23) Wën sayn nookeener sich traan hale teete aan warom eyer kextorep is, teete se wërklich ferxteen was sayn toot petayt hot. (Kal. 3:13, 14) Tan, teete se tëm aan siin wii een Reter, net wii een xpitspuup.

Een tuun weeche was hot Yeesus tiise wërter kesaat, eyer wust tas wën eyer im kweel phoste am xtërpe waar, waar eyer Yeehoowa sayn wile am mache. Klaych noo te wërter fon tiise Psalm saan, hot eyer aus kexproch: “Es is fërtich!” (Yoo. 19:30; Luk. 22:37) Yawool, Yeehoowa praycht fer een kleen xtun noo lose Yeesus xitse tas eyer khont fërtich pringe ales was eyer kexikt waar fer se mache. Un tas hot tëm aach erlaupt se erfiile ales was “in Mooses sayn Kesets, in te Profeete un in te Psalme” iwer tëm kexrip waar. (Luk. 24:44)