1-2. Was is tas fray khaaf opfer, un warom prayche mer es hon?

AATAM, eene perfekte man, un sayn khiner hate foer sich een wunerlich keleechenheet: fer imer se leepe. Awer Aatam hot ferkërn kesint un too is ales unerkang. Sicher, hot eyer te toot fertiint. Awer, un sayn khiner? Tii sin noch net uf te welt khom aan tiise tsayt. (Rom. 5:12, 14) Khent Yeehoowa etwas mache fer tëne helfe noch mool eewiche leepe kriin? Yawool. Klaych noo tas Aatam kesint hot, hot Yeehoowa aan kefang se tsayche was teet Eyer mache fer milyoone fon Aatam sayn khiner fom toot un fon te sint pefraye. (Xee. 3:15) In te richtich tsayt, teet Yeehoowa sayn Soon fom himel runer xike tas eyer khent “sayn leepe wii een fray khaaf opfer fer fiile layt kepe”. (Mar. 10:45; Yoo. 6:51)

² Was is tas fray khaaf opfer? In te Kreekixe Xrifte, es petayt te prays woo Yeesus petsaalt hot fer tsurik khaafe was Aatam ferloer hat. (1 Kor. 15:22) Warom waar es neetich een fray khaaf opfer petsaale? Ales was Yeehoowa macht, mus mit sayn kerechtichkheet xtime. Un in tëm Kesets, woo ketsaycht hot was kerecht is, hot Eyer kesaat tas es must leepe fer leepe kep wëre. (Eeks. 21:23, 24) Aatam hat sayn perfekte leepe ferloer. Tan, fer mit Yeehoowa sayn kerechtichkheet xtime, hot Yeesus sayn perfekte leepe keopfert. (Rom. 5:17) Tes weeche, is Yeesus te “Eewiche Fater” fer ale kaar woo aan tëm fray khaaf opfer klaape. (Isa. 9:6; Rom. 3:23, 24)

3. Tëm noo Yoohan 14:31 un 15:13, warom waar Yeesus wilich fer sayn perfekte leepe ap kepe?

³ Yeesus hot een kroos liip tsu sayn Fater un tsu uns. Tes weeche, waar eyer wilich fer sayn leepe wii fray khaaf opfer ap kepe. (Lees Yoohan 14:31; * 15:13. *) Un weeche tiise liip, is eyer  aach troy pis aan toot keplip un hot te wile fon sayn Fater kemacht. Weeche ales was Yeesus kemacht hot, khan Yeehoowa sayn tsiil fer ti mënxe un fer ti eyert erfiilt wëre. Awer, warom hot Yeehoowa erlaupt tas Yeesus soo fiil foer sayn toot layte teet? In tiise artikel, tuun mer ti antwort fine. Meyer tuun aach lërne fon tëm payxpiil fom aphostel Yoohan, woo hot fiil weyert fer tas fray khaaf opfer kep. Noo heyer, tuun mer siin wii khene mer unser petanklichkheet fer tas fray khaaf opfer tsayche un ferkreese.

4. Pexrayp wii Yeesus kextorep is.

⁴ Tenk traan aan wii waare Yeesus sayn letste xtune foer sayn toot kewees. Tee khont fiile engele ruufe fer tëm helfe un xitse. Awer tee hot kelos tas ti romaanixe soltaate tëm in xpërte un kloope teete. (Mat. 26:52-54; Yoo. 18:3; 19:1) Tii hon tëm mit een paytx kehau un tëm fiil wee kemacht. Noo heyer, hon se tëm kexikt een xweyer xtik hols uf sayn pukel nëme, woo waar kraat kepaytxt un fol ufne wee kewees. Yeesus praycht tas nëme pis aans plats woo eyer um keprung weyer. Awer tee hot tas net hin kriit. Tes weeche, hon ti soltaate een aner man kexikt tas mit nëme. (Mat. 27:32) Wii Yeesus pis aans plats khom is woo eyer xtërpe teet, hon ti soltaate tëm sayn hënt un fiis mit neechel uf tëm kweel phoste rin keklopt. Wayl Yeesus sayn kewicht waar kans uf tiise neechel kewees, ti phayn is imer kreeser kep. Tëm sayn froynte waare aarich traurich un tëm sayn mama hot keprilt. Awer ti yitixe relichyeese fiirer hon fon tëm ferxpot. (Luk. 23:32-38; Yoo. 19:25) Yeesus hot phaar xtune kelit. Weeche ti aat wii eyer uf tëm kweel phoste aan kenaachelt waar, sayn hërts un lunge waare ap ketrikt kewees; too, waar es tëm xweyer luft in tsiie. Yeesus wust tas eyer is troy pis aan toot keplip; too, hot eyer fer tas letste mool tsu Yeehoowa kepeet. Tan, hot eyer sayn khop niter kepoo un sayn leepe ap kep. (Mar. 15:37; Luk. 23:46; Yoo. 10:17, 18; 19:30) Es waar wërklich een xreklich toot kewees — lamsam, fol phayn un een xaam foer te anere.

5. Fer Yeesus, was waar xlimer wii ti aat wii eyer kextorep is?

⁵ Ti aat wii Yeesus kextorep is waar xroo kewees. Awer fer tëm, tas xlimste waar ti uersach woo se kep hon fer tëm um pringe: tii hon kesaat tas eyer Kot ferfluucht hat, es wil saan, tas eyer khee respekt tsu Tëm un Sayn naame ketsaycht hot. (Mat. 26:64-66) Yeesus hot sich ketanke kemacht iwer was ti layt khente iwer tëm weeche tas tenke. Un tee hat ti hofnung tas Yeehoowa khont fiilaycht etwas mache tas tiise xaam net iwer tëm khemt. (Mat. 26:38, 39, 42) Tan, warom hot Yeehoowa erlaupt tas sayn liipe Soon layte un xtërpe teet? Wole mer 3 uersache kuke.

6. Warom praycht Yeesus uf een kweel phoste aan kenaachelt wëre?

⁶ Eyerst uersach: Yeesus praycht uf een kweel phoste aan kenaachelt wëre fer ti yuuter pefraye fon een ferfluuchung. (Kal. 3:10, 13) Tii hate ferxproch tas tii teete tas Kesets aan heere; awer tii hon tas net kemacht. Tes weeche, waar tas folek ferfluucht kewees. Awer xon friier, hate se iwich sich een aner ferfluuchung, een woo se fon Aatam keërpt hon: ti sint. (Rom. 5:12) Tas Kesets hot kesaat tas es waare welche sinte woo te toot fertiint hon; wën yemant tas kemacht hët, praycht eyer xtërpe. Un in welche situatsyoone, hon se ti persoon sayn toote khërper uf een phool aan kehong — tas hot ketsaycht tas se waar fon Kot ferfluucht kewees. * (Teut. 21:22, 23; 27:26) Awer Yeesus is tas Kesets in een perfekt aat noo kang. Tan, wën  eyer uf een kweel phoste aan kenaachelt waar, hot eyer ti ferfluuchung woo iwich Israël waar, iwer sich kenom. Soo, opwool ti yuuter tëm ap kextos hate, khonte se pefrayt wëre fon te ferfluuchung woo iwich tëne waar.

7. Was is een tsweet uersach warom hot Yeehoowa erlaupt tas sayn Soon layte teet?

⁷ Tsweet uersach: Yeehoowa waar Yeesus am iipe fer ti flicht woo eyer teet in te tsukhunft kriin: Hooche Priister sin. Tee hot kemërkt wii xweyer is es troy tsu Yeehoowa plaype wën ma xrooe proope mit macht. Un tee hot soo fiil kelit tas eyer hot hilef tsu Yeehoowa “mit krayxe un treene” ferlangt. Yeesus wees wii fine mer uns wën mer ëngstlichkheete orer xwiirichkheete mit mache. Un tas lost uns sicher tas eyer khan unser neetichkheete ferxteen un uns helfe wën mer keproopt sin. Meyer sin aarich petanklich tsu Yeehoowa tas eyer uns een parmhërtsliche Hooche Priister kep hot, woo khan unser xwacheete ferxteen. (Hep. 2:17, 18; 4:14-16; 5:7-10)

8. Was is een trit uersach warom hot Yeehoowa erlaupt tas Yeesus soo krop keproopt weyer?

⁸ Trit uersach: Yeehoowa hot erlaupt tas Yeesus soo fiil layte teet foer sayn toot, fer een wichtich frooch antworte: Khene ti mënxe troy tsu Yeehoowa plaype soo kaar wën se xroo keproopt sin? Satanaas saat: ‘Nee!’ Tee saat aach tas ti layt tuun Kot tiine ploos wayl se wole etwas fon Tëm kriin. Tee klaapt net tas mer Kot liipe; tee tenkt tas mer soo wii Aatam sin, woo Kot net keliipt hot. (Yoop 1:9-11; 2:4, 5) Yeehoowa hot erlaupt tas Yeesus soo krop keproopt weyer wayl Eyer sich sicher waar tas eyer troy plaype teet — un tas is wërklich pasiirt. Un tas hot pewayst tas Satanaas een liichner is.

9. Was fer payxpiil hot te aphostel Yoohan fer uns kelos?

⁹ Fiile priiter hon yachtung un ale sorte proope torich sayn kanse leepe mit kemacht. Awer tii hon wayter kepreeticht un aus kehal weeche sayn klaape aan tëm fray khaaf opfer. Kuk mool tas payxpiil fom aphostel Yoohan. Tee hot tsiimlich sicher mee wii 60 yoore troy kepreeticht ti woerheet iwer Yeesus un tas fray khaaf opfer. Un wii eyer unkefeer 100 yoore alt waar, tas Romaanix Raych hot kemënt tas eyer soo kefeerlich waar tas se praychte tëm in xpërte in te insel fon Patmos. Warom waar eyer in kexpërt? Tee selepst saat: “Ich hon iwer Kot kexproch un hon tsaye iwer Yeesus kep.” (Apo. 1:9) Yoohan hot wërklich een xeen payxpiil fon klaape un persewerans kelos.

10. Wii tuun ti piicher woo Yoohan kexrip hot tsayche tas eyer fiil weyert fer tas fray khaaf opfer kep hot?

¹⁰ In te piiplixe piicher woo Yoohan kexrip hot, hot eyer kesaat wii fiil hot eyer Yeesus keliipt un wii petanklich waar eyer weeche tas fray khaaf opfer. Tee xprecht mee wii 100 mools iwer tas fray khaaf opfer un ti nutse woo fon tëm khomt. Tsum payxpiil, tee hot kexrip: “Wën yemant een sint macht, hon mer een helfer pay te Fater: Yeesus Kristus, eene kerechter.” (1 Yo. 2:1, 2) Yoohan sayn wërter tuun aach foer pringe wii wichtich is es “tsaye fon Yeesus se kepe”. (Apo. 19:10) Tas ales tsaycht tas Yoohan hot fiil weyert fer tas fray khaaf opfer kep. Wii khene mer tas aach mache? Wole mer siin.

11. Was khan uns helfe wech fon te sint plaype?

¹¹ Xtreng tich aan fer wech fon te sint plaype. Wën mer wërklich weyert fer tas fray khaaf opfer kepe, tuun mer net tenke: ‘Ah... wën ich fersuucht sin, prayche ich mich net aan xtrenge fer net sinte. Wën ich was ferkheertes mache, is ploos fertsayung fer Yeehoowa ferlange.’ Xtats tas, wën mer fersuucht sin etwas ferkheertes mache, tuun mer klaych ‘Nee!’ saan un tenke: ‘Wii khan ich soo was mache, noo tas ales was  Yeehoowa un Yeesus fer mich kemacht hon?’ Meyer khene aach kraft tsu Yeehoowa ferlange un tsu tëm aan hale: ‘Piite, helef mich wech fon te sint plaype!’ (Mat. 6:13)

12. Wii khene mer aan wëne te aanreet fon 1^te Yoohan 3:16-18?

¹² Liip tayn priiter un xwestere. Wën mer tëne liipe, tsayche mer tas mer fiil weyert fer tas fray khaaf opfer kepe. Tas is soo wayl Yeesus is net ploos weeche uns kextorep, awer aach weeche tëne — unser priiter un xwestere. Tan, wën eyer wilich waar fer sayn leepe tsu tëne kepe, sicher hon se fiil weyert foer tëm sayn aue. (Lees 1^te Yoohan 3:16-18.) * Wii khene mer unser liip tsu unser priiter un xwestere tsayche? Meyer khene tas mache torich ti aat wii mer mit tëne um keen. (Ëfe. 4:29, 31–5:2) Tsum payxpiil, meyer helfe tëne wën se xweyere kefoore mit leepe, wii een krankheet orer een natuer unklik. Awer was khene mer mache wën een pruuter orer een xwester saat orer macht etwas woo uns pelayticht?

13. Warom sole mer unser priiter un xwestere fertsaye?

¹³ Finst tuu es als mool xweyer een pruuter orer een xwester fertsaye? (Lew. 19:18) Wën yaa, khanst tuu tiise aanreet aan wëne: “Tuut aych wayter naner aus hale un krooshërtslich fertsaye, soo kaar wën yemant uersache hot fer sich keeche een aner peklaae. Yeehoowa hot aych krooshërtslich fertsayt un teyer solt tas selwich mache.” (Kol. 3:13) Imer wën mer unser priiter un xwestere fertsaye, pewayse mer fer unser Fater im himel tas mer fiil weyert fer tas fray khaaf opfer kepe. Awer wii khene mer unser petanklichkheet fer tiise kexenk fon Yeehoowa noch kreeser lose? Wole mer yets lërne.

14. In was fer aat khene mer unser petanklichkheet fer tas fray khaaf opfer noch kreeser lose?

¹⁴ Tank Yeehoowa fer tas fray khaaf opfer. “Fer mich is es wichtich yeete taach iwer tas fray khaaf opfer in mayn kepeete fertseele un ‘tanke xeen’ fer Yeehoowa saan weeche tas” — saat Joanna, een xwester woo 83 yoore alt is un woo in Intya leept. Yeete taach wëns tuu aleen peete tuust, khanst tuu mit Yeehoowa fertseele iwer ti sinte woos tuu im taach  kemacht host. Tuu khanst tëm ferlange fer tich fertsaye. Kewis, wën mer een xweyer sint mache, sole mer mit te elteste xpreche. Tii tuun uns horiche un liipliche aanreete fon te Piipel kepe. Un tii tuun aach mit uns peete un ferlange tas Yeehoowa tas fray khaaf opfer wayter penutst fer unser sinte teke; soo, ‘wëre mer kaystlich keheelt’. (Tya. 5:14-16)

15. Warom sole mer tsayt hoole fer iwer tas fray khaaf opfer leese un triwer noo tenke?

¹⁵ Tuu iwer tas fray khaaf opfer triwer noo tenke. “Wën ich leese iwer was Yeesus kelit hot, wëre mayn aue fol treene” — saat Rajamani, een xwester woo 73 yoore alt is. Fiilaycht es macht aach tayn hërts wee wëns tuu tenkst aan was Yeesus kelit hot. Awer woo mee tas mer too triwer tenke, woo xtërker wërt unser liip tsu tëm un tsu Yeehoowa. Un fer noch tiifer aan tëm fray khaaf opfer traan tenke, was mënst tuu fon een ekstra xtuutyum too triwer mache?

16. Wii ti anere iwer tas fray khaaf opfer in lërne khan uns helfe? (Kuk tas pilt am aanfang fom piichelche.)

¹⁶ Tuu ti anere iwer tas fray khaaf opfer in lërne. Woo mee tas mer mit te anere fertseele iwer tas fray khaaf opfer, woo xtërker wërt unser petanklichkheet weeche tas. Meyer hon xeene puplikatsyoone un wiiteos woo khene uns helfe fer ti anere aus leye warom is Yeesus fer uns kextorep. Tsum payxpiil, mer khene ti lisyoon 4 fom piichelche Kuute Notisye fon Kot fer Tich! penutse. Te thitel fon tiise lisyoon is “Weer is Yeesus Kristus?” Orer meyer khene tas kapitel 5 fom puuch Was khan ti Piipel uns in lërne? kuke. Te thitel fon tëm kapitel is “Tas fray khaaf opfer — Tas kreeste kexenk fon Kot”. Un yeetes yoer, hon mer een kroos keleechenheet fer unser petanklichkheet weeche tas fray khaaf opfer xtërker lose: in tëm Aantenke fon Yeesus sayn toot keen, un ti anere flaysich in laate fer aach mit keen. Yeehoowa hot uns een mechtich kroos eer kep: ti anere iwer sayn Soon in lërne.

17. Warom khan ma saan tas tas fray khaaf opfer is Kot sayn kreeste kexenk fer ti mënxe?

¹⁷ Meyer hon wërklich kuute uersache fer petanklich sin weeche tas fray khaaf opfer. Weeche tëm, khene mer een xtark froyntxaft mit Yeehoowa hon, opwool mer imperfekt sin. Weeche tas fray khaaf opfer, ale ti xlechte tinge woo te Taywel kemacht hot wëre fermacht. (1 Yo. 3:8) Weeche tas fray khaaf opfer, wërt Yeehoowa sayn tsiil fer ti eyert erfiilt: tii wërt een Paratiis sin un yeete eene woo uf tëne woont, tuut Yeehoowa aan peete un liipe. Tan, wole mer yeete taach keleechenheete fine fer petanklichkheet tsayche fer tas fray khaaf opfer — Kot sayn kreeste kexenk fer ti mënxe!