1-2. Was fer ferklaychung khan uns helfe ti wërter fon 1^te Pheeter 2:21 ferxteen?

XTEL TICH mool foer tas tuu mit een krup layt torich een kefeerliche plats am laafe pist, woo fol xnee is. Eene fiirer mit fiil speryens tuut aych lënke. Wën eyer laaft, lost eyer xpuure in te xnee. Awer tan, khanst tuu te fiirer net mee siin. Toch, kriist tuu khee pang. Xtats tas, tuust tuu mit tayn krup te fiirer sayn xpuure soo ticht wiis meechlich is noo keen.

² Tiise xlecht welt woo mer hayt leepe is wii tas kefeerliche plats. Ti woere kriste sin wii tiise krup layt. Awer Yeehoowa hot uns te peste fiirer kep — Sayn Soon, Yeesus Kristus — un meyer khene tëm sayn xrite, tëm sayn xpuure, ticht noo keen. (1 Phe. 2:21) In tiise wërter, Pheeter hot Yeesus mit een fiirer ferklaycht. Soo wii te fiirer fon te ferklaychung, Yeesus hot xrite, orer xpuure kelos, tas mer tëm noo khemte. Awer yets, wole mer ti antwort fer tiise 3 frooche fine: Was petayt Yeesus sayn xrite noo keen? Warom prayche mer tas mache? Un wii khene mer tas hin kriin?

3. Was petayt yemant sayn xrite noo keen?

³ Was petayt yemant sayn xrite noo keen? In te Piipel, ti wërter “keen” un “fiis” hon manich mool se tuun mit was yemant in sayn leepe macht. (Xee. 6:9; Xpr. 4:26) Khan ma saan tas ti aat wii yemant leept sin ti xrite, ti xpuure, woo eyer lost. Tan, wën mer yemant sayn xrite noo keen, petayt es tas mer tëm wii een payxpiil hon, tas mer tëm noo mache.

4. Was petayt Yeesus sayn xrite noo keen?

 ⁴ Tan, was petayt Yeesus sayn xrite noo keen? In khortse wërter, es wil saan tëm sayn payxpiil noo mache. In tëm haupste tekst fon tiise artikel, te aphostel Pheeter is am xpreche iwer tas kuute payxpiil woo Yeesus kelos hot wën eyer ti xwiirichkheete aus kehal hot. Awer, es kept anere aate fer Yeesus noo mache. (1 Phe. 2:18-25) In woerheet, ales was eyer kesaat un kemacht hot, is een payxpiil fer uns.

5. Khene imperfekte mënxe wërklich Yeesus sayn perfekt payxpiil noo keen? Lee tas aus.

⁵ Awer, meyer al sin imperfekt. Tan, meechte mer es hin kriin Yeesus sayn payxpiil noo keen? Yawool! Eriner tich tas te aphostel Pheeter hot kesaat tas mer sole Yeesus sayn xrite “ticht noo keen” — net perfekt noo keen. Tan, wën meyer, imperfekte mënxe, unser pestes mache fer Yeesus sayn xrite noo keen, sin mer te aphostel Yoohan sayn wërter am aan heere: ‘Teyer solt wayter leepe soo wii Yeesus keleept hot.’ (1 Yo. 2:6)

6-7. Warom khene mer saan tas wën mer Yeesus sayn xrite noo keen, xafe mer uns tichter pay Yeehoowa?

⁶ Yeesus sayn xrite noo keen, xaft uns tichter pay Yeehoowa. Warom khene mer tas saan? Eyerst: Yeesus hot imer Yeehoowa in sayn leepe kefalt. (Yoo. 8:29) Tan, wën mer tëm sayn xeene payxpiil noo mache — tëm sayn xrite noo keen — tuun mer aach Yeehoowa kefale. Un meyer khene uns sicher sin tas Yeehoowa sich tichter pay tëne xaft woo sich aan xtrenge fer tëm sayn froynte wëre. (Tya. 4:8)

⁷ Tsweet: Yeesus hot Yeehoowa in een perfekt aat noo kemacht; tes weeche, khont eyer saan: “Weer mich siit, siit aach te Fater.” (Yoo. 14:9) Meyer khene Yeesus sayn kwaliteete un ti aat wii eyer ti anere pehantelt hot  noo mache. Tsum payxpiil: tee hot eene man mit lëpra ketauert, hot empatii ketsaycht fer een fraa woo een xroo krankheet hat un hot mitlayt kexpiirt fer ti layt woo een keliipte im toot ferloer hate. Wën mer Yeesus noo mache, tuun mer aach Yeehoowa noo mache. (Mar. 1:40, 41; 5:25-34; Yoo. 11:33-35) Un woo peser tuun mer Yeehoowa sayn kwaliteete noo mache, woo xtërker wërt unser froyntxaft mit tëm.

8. Lee aus warom Yeesus sayn xrite noo keen, heleft uns “ti welt iwerkhome”.

⁸ Yeesus sayn xrite noo keen, heleft uns fon tiise xlecht welt net ap kelënkt wëre. In sayn letste nacht too hiir uf te eyert, Yeesus khont saan: “Ich hon ti welt iwerkhom.” (Yoo. 16:33) Was wolt eyer saan? Tee hot net erlaupt tas ti welt sayn ketanke, tsiile un aktsyoone tëm influentsiire teete. Yeesus is tsu te eyert khom fer Yeehoowa sayn naame ferhayliche — un tee hot sich imer too traan kehal. Un meyer? Hayt, kepts fiile tinge in te welt woo uns ap lënke khente. Awer wën meyer, soo wii Yeesus, uns traan hale aan Yeehoowa sayn wile mache, kriin mer aach “ti welt iwerkhome”. (1 Yo. 5:5)

9. Was mise mer mache fer in tëm weech plaype woo tsum eewiche leepe nëmt?

⁹ Yeesus sayn xrite noo keen, nëmt tsum eewiche leepe. Wën eene yunge rayche man hot Yeesus kefroot was praucht eyer mache fer tas eewiche leepe kriin, Yeesus sayn antwort waar: “Tuu mich noo keen.” (Mat. 19:16-21) Fer welche yuuter woo net keklaapt hon tas eyer te Kristus waar, hot Yeesus kesaat: “Mayn xeef (...) keen mich noo. Ich kepe tëne eewiche leepe.” (Yoo. 10:24-29) Nikotemus waar een mitkliit fon tëm Sinëtryo un wolt mee iwer Yeesus lërne. Fer tëm, hot Yeesus kesaat tas “yeete eene woo aan tëm klaapt” teet ‘eewiche leepe kriin’. (Yoo. 3:16) Meyer tsayche tas mer aan Yeesus klaape wën mer aan wëne was eyer kelërnt hot un wën mer noo mache was eyer kemacht hot. Soo, plaype mer in tëm weech woo tsum eewiche leepe nëmt. (Mat. 7:14)

10. Was is tepay aan Yeesus peser “khëne”? (Yoohan 17:3)

¹⁰ Fer Yeesus sayn xrite ticht noo keen, prayche mer eyerst tëm khëne. (Lees Yoohan 17:3.) * Fer Yeesus “khëne”, sole mer net noo lose iwer tëm lërne, es wil saan, iwer sayn kwaliteete, sayn ketanke un sayn aanxtelung. Es is ekaal wii lang mer xon in te woerheet sin, prayche mer wayter uns aan xtrenge fer Yeehoowa un Yeesus peser khëne.

11. Was khene mer in te 4 Ewankeelye fine?

¹¹ Tas mer khente sayn Soon peser khëne, Yeehoowa hot, weeche liip, ti Ewankeelye in  Sayn Wort kelos. Tiise 4 piicher — Matheus, Markus, Lukas un Yoohan — xpreche iwer Yeesus sayn leepe un preetich. In tëne, siin mer was hot Yeesus kemacht, kesaat un wii hot eyer sich kexpiirt. Tii helfe uns aan Yeesus sayn payxpiil “mit acht tenke”. (Hep. 12:3) Ti Ewankeelye lërne uns fiil iwer Yeesus un ti xrite woo eyer kep hot. Wën mer tëne xtutiire, tuun mer Yeesus noch peser khëne. Un tan, kriin mer tëm sayn xrite noch tichter noo keen.

12. Wii khene mer kreeser nutse fon te Ewankeelye kriin?

¹² Fer kreeser nutse fon te Ewankeelye kriin, prayche mer mee mache wii ploos tëne leese. Meyer sole tëne xtutiire un too triwer noo tenke. (Kuk aach Yosuee 1:8, noote.) Tan, meyer tuun yets 2 aanunge noo kuke woo helfe uns in te Ewankeelye triwer noo tenke un aan wëne was mer tat leese.

13. Was khene mer mache tas ti Ewankeelye leepe kriin?

¹³ Eyerst: mach ti kexichte fon te Ewankeelye leepe kriin. Xtel tich mool foer un fersuuch heere, siin un xpiire was am pasiire is. Fer tich helfe tas mache, mach unersuuchunge in te puplikatsyoone fon Yeehoowa sayn Orkanisatsyoon. Kuk was pasiirt foer un noo tas kexicht woos tuu am leese pist. Suuch mee informatsyoone iwer ti layt un ti pletse woo in tëm kexicht foer khome. Ferklaych tas kexicht woos tuu am xtutiire pist mit tëm selwiche kexicht in een aner Ewankeelyum; fiilaycht finst tuu tat naye kleenichkheete.

14-15. Wii khene mer aan wëne was mer in te kexichte fon te Ewankeelye lërne?

¹⁴ Tsweet: tuu aan wëne was tuu in te kexichte fon te Ewankeelye lërnst. (Yoo. 13:17) Noo een kexicht fon te Ewankeelye xtutiire, froo tich: ‘Kepts een lisyoon woo ich in mayn leepe aan wëne khan? Wii khan ich tiise kexicht penutse fer yemant aneres helfe?’ Tenk in een spetsiifix persoon. Tan, in te richtich tsayt, khanst tuu mit liip un kexik iwer tiise lisyoon woos tuu kelërnt host mit te persoon xpreche.

¹⁵ Wole mer tiise 2 aanunge in een kexicht mitsamer penutse. Meyer tuun noo kuke tas  kexicht fon te aarm witfraa woo Yeesus in tëm thempel peopacht hot.

16. Pexrayp was in Markus 12:41 am pasiire is.

¹⁶ Mach tas kexicht leepe kriin. (Lees Markus 12:41.) * Xtel tich mool foer: es waar 11^te Nisan kewees, fom yoer 33 noo Kristus — weenich wii een woch foer Yeesus sayn toot. Yeesus hot neekst te kanse taach im thempel kelërnt un ti relichyeese fiirer hon tëm net in ruu kelos. Friier, welche hon tëm sayn autoriteet im frooch kextelt; anere wolte tëm mit xrooe frooche witich ti ek xtele. (Mar. 11:27-33; 12:13-34) Yets, waar Yeesus in een aner teel fom thempel — tsiimlich sicher, waar eyer in tëm Hoof fon te Fraae, wayl eyer khont ti kelt khaste siin. Tee hot sich kesetst un hot aan kefang se peopachte wii ti layt sayn kelt in te khaste rin ketuun hon. Tee hot kesiin fiile rayche mënxe haufe nikele aan tëne rin xmayse. Fiilaycht, waar eyer soo ticht tas eyer heere khont wii ti nikele in te khaste rin kefal sin.

17. Was hot ti witfraa fon Markus 12:42 kemacht?

¹⁷ Lees Markus 12:42. * Noo een tsayt, hot Yeesus een witfraa kemërkt. Tii waar aarm un waar in neetichkheet. (Luk. 21:2) Tëne sayn leepe waar net laycht kewees; tsiimlich sicher, hat se net kenuuch fer sich fersoriche. Soo wii soo, is se ruych pis eene fon te khaste kang un hot 2 nikelche tat rin kexmis. Tii waare soo kleen tas ma khont net heere wën se rin kefal sin. Awer Yeesus wust was fer sort nikele hot se rin ketuun — es waare 2 lëpte kewees, ti kleenste nikele woo ti layt aan tiise tsayt penutst hon. Tas waar net kenuuch kelt fer soo kaar 1 xpërling khaafe, woo waar eene fon te pilichste feechel woo ti layt kekhaaft hon fer se ese.

18. Tëm noo Markus 12:43, 44, was hot Yeesus kesaat iwer ti witfraa sayn kontripuytsyoon?

¹⁸ Lees Markus 12:43, 44. * Yeesus hot sich ferwunert mit tiise fraa! Too, hot eyer sayn tisipele keruuft, tëne ti witfraa hin ketsaycht un iwer tëne kesaat: “Tiise aarm witfraa hot mee wii ti anere in te kelt khaste rin ketuun.” Tan, hot eyer aus keleet: “Ti anere [hauptseechlich ti rayche] hon kep was se iwrich hate, awer tii, woo soo aarm is, hot ales was se hat kep; ales was se hat fer sayn leepe hale.” Wën tiise troy witfraa sayn letste nikelche ap kep hot, hot se in woerheet sayn leepe uf Yeehoowa sayn liiplich hënt ketuun. (Psal. 26:3)

19. Was fer wichtich lisyoon lërne mer mit Yeesus sayn wërter iwer ti aarm witfraa?

¹⁹ Tuu aan wëne was tuu mit tëm kexicht lërnst. Meyer khene uns frooe: ‘Was fer lisyoon khan ich mit Yeesus sayn wërter iwer ti aarm witfraa lërne?’ Tenk een pisye iwer ti witfraa: sicher, wolt se mee tsu Yeehoowa kepe, awer tii hot tas pestes woo se khont kep. Un Yeesus wust tas, foer Yeehoowa sayn aue, tëne sayn kontripuytsyoon waar mechtich kroos kewees! Un tas is ti lisyoon fer uns: Yeehoowa wërt froo wën mer unser pestes mit kanse hërts un seel tsu tëm kepe. (Mat. 22:37; Kol. 3:23) Yeehoowa frayt sich wën mer mache ales was mer khene in tëm sayn aanpeetung, too tepay ti tsayt un kraft woo mer fertraype in te fersamlunge un in te preetich aarwayt.

20. Wii khene mer ti lisyoon woo mer iwer ti witfraa kelërnt hon penutse fer ti anere helfe? Kep een payxpiil.

 ²⁰ Wii khene mer tiise lisyoon aan wëne fer ti anere helfe? Meyer khene aan spetsiifixe layt tenke woo prauche erinert wëre tas sayn aanxtrengung hot fiil weyert foer Yeehoowa. Tsum payxpiil: fiilaycht khënst tuu een alt xwester woo sich xultich orer unutslich xpiirt wayl se khan net mee soo fiil in te preetich aarwayt mache; im xtant is se xwach orer net mee soo kesunt. Orer fiilaycht khënst tuu eene pruuter woo oone muut is wayl eyer een xroo krankheet hot un fiil phayn xpiirt un kriit net in al ti fersamlunge keen. Wii khanst tuu tëne helfe? Tuu khanst tëne torich xeene wërter uf muute. (Ëfe. 4:29) Tuu khanst aach mit tëne ti ufmuutich lisyoon teele woos tuu kelërnt host mit tëm kexicht iwer ti witfraa. Tiise ufmuutiche wërter khene tëne sicher lose tas Yeehoowa frayt sich wën mer unser pestes tsu tëm kepe. (Xpr. 15:23; 1 The. 5:11) Wën mer ti anere loope wayl se sayn pestes tsu Yeehoowa kepe — ekaal wii fiil tas is — keen mer Yeesus sayn xrite ticht noo.

21. Was pist tuu pextimt se mache?

²¹ Meyer sin aarich petanklich fer ti Ewankeelye! In tëne, sin fiile kexichte iwer Yeesus woo helfe uns tëm noo mache un sayn xrite ticht noo keen. Was mënst tuu fon een perseenlich xtuutyum orer een familye aanpeetung iwer ti Ewankeelye mache? Awer fer noch mee nutse fon tiise xtuutye kriin, prayche mer leepe fer ti kexichte kepe un ti lisyoone aan wëne. Meyer prayche noo mache was Yeesus kemacht hot, awer aach horiche was eyer kesaat hot. Tes weeche, in tëm neekste artikel, tuun mer siin was khene mer mit Yeesus sayn letste wërter foer sayn toot lërne.