1. Was mërkt Yeehoowa in sayn folek?

YEEHOOWA KOT “frayt sich mit sayn folek”. (Psal. 149:4) Tas lost uns wërklich froo! Yeehoowa mërkt unser xeene kwaliteete un ales was mer mache khene; un tee heleft uns tëm sayn froynt wëre. Wën mer troy tsu tëm plaype, wërt eyer fer imer ticht pay uns! (Yoo. 6:44)

2. Warom tuun welche es xweyer fine se klaape tas Yeehoowa tëne liipt?

² Awer welche khene fiilaycht rechne: ‘Ich wees tas Yeehoowa liipt sayn folek; awer, wii khan ich sicher sin tas eyer tuut mich liipe?’ Warom tuut yemant soo een sort frooch mache? Oksana * hot fiil kelit wii se noch een khint waar. Tii saat: “Mich taafe lose un aan fange wii pyoneerin tiine hot mich fiil frayt keprung. Awer 15 yoore xpeeter, hon ich aan kefang mich erinere ti xrekliche tinge woo mit mich pasiirt sin wii ich een khint waar. Tan, hon ich aan kefang se rechne tas Yeehoowa waar net mee froo mit mich un tas ich net kuut kenuuch waar fer tëm sayn liip kriin.” Yua is een pyoneerin woo hot aach fiiles kelit wii se een khint waar. Tii saat: “Ich hon mayn leepe tsu Yeehoowa tetikiirt wayl ich wolt tëm froo lose. Awer ich waar mich sicher tas eyer khent mich nii mools liipe.”

3. Was tuun mer in tiise artikel lërne?

³ Kewis, soo wii tiise tswaay xwestere, liipst tuu Yeehoowa aarich fiil. Awer im xtant, pist tuu tich net sicher tas eyer tich liipe tuut. Tan, tiise artikel tuut tich helfe. Meyer tuun ti antwort fer tiise frooche siin: Warom solst tuu net tswayfele tas Yeehoowa khimert sich mit tich? Un was khan tich helfe wëns tuu tenkst tas Yeehoowa tich net liipt?

4. Warom khan es kefeerlich sin tswayfele tas Yeehoowa uns liipt?

⁴ Wën mer sicher sin tas Yeehoowa uns liipt, wëre mer uf kerechent fer unser pestes tëm kepe, soo kaar wën unser leepe xweyer is. Awer, wën mer tswayfele tas eyer khimert sich mit  uns, “unser kraft tuut weenich sin”. (Xpr. 24:10) Tas khan mechtich kefeerlich sin. Wii soo? Wën mer oone muut wëre un wën mer net klaape tas Yeehoowa uns liipe tuut, kriin mer uns net fest xtele keeche Satanaas sayn atake. (Ëfe. 6:16)

5. Was is mit welche priiter pasiirt woo tswayfele hate tas Kot tëne keliipt hot?

⁵ Welche troye kriste hon aan kefang se tswayfele tas Yeehoowa tëne keliipt hot. Tes weeche, sin se xwach im klaape kewoer. Een elteste, woo James heest, saat: “Opwool ich in Petël ketiint hon un ich froo waar tas ich khont in een frëmte xprooch preetiche, hon ich mich als mool kefroot ep Yeehoowa mayn aarwayt aan kenom hot. Een mool, hon ich soo kaar tswayfele kehat tas eyer mayn kepeete keheert hot.” Eva, woo aach in te fol tsayt tiinst xaft, saat: “Ich hon raus kriit wii kefeerlich es is se tenke tas Yeehoowa uns net liipt. Tas influentsiirt ales was mer in tëm sayn aarwayt mache. Too, fine mer uns net mee kuut wën mer tsu tëm xafe; un tas tuut unser frooheet xteele.” Michael, een elteste un rekulaar pyoneer saat: “Wëns tuu klaapst net tas Yeehoowa sich mit tich khimere tuut, tuust tuu tich fon tëm ap lënke.”

6. Was mise mer mache wën tswayfele iwer Kot sayn liip sich in unser khop rin xlepe?

⁶ Tswayfele hon tas Yeehoowa uns liipe tuut, khan fiil xaate tsu unser klaape mache — un tiise speryense hon tas taytlich kelos. Awer, was khanst tuu mache wën tiise tswayfele sich in tayn khop rin xlepe? Tuu tëne klaych ap xtose! Ferlang Yeehoowa sayn hilef fer ti “unruyche ketanke” uf sayt lose, un tas eyer tich tëm sayn friit kept, woo ‘tuut tayn hërts un ketanke xitse’. (Psal. 139:23; noote; Fili. 4:6, 7) Un ferkes tich net: tuu pist net aleen. Es kept anere troye priiter un xwestere woo tuun aach keeche tiise nekatiiwe xpiirunge khëmpfe. Soo kaar troye tiiner fon Yeehoowa fon te friirixe tsayte sin mit tiise kefoore um kang. Eene fon tëne waar te aphostel Phaul kewees. Was khene mer mit tëm lërne? Wole mer siin.

7. Was fer propleeme hot Phaul mit kemacht?

⁷ Xpiirst tuu tich als mool iwerlaat weeche ti flichte, wii wën es tsu fiil weyer fer se mache? Tan, khanst tuu Phaul ferxteen. Tee hot sich sorich kemacht net ploos weeche een kemaynt, awer “weeche al ti kemaynte”. (2 Kor. 11:23-28) Host tuu kesunt propleeme  woo tayn frooheet xteele? Phaul hot fiil kelit weeche een xwiirichkheet woo eyer hat. Fiilaycht, waar tas een kesunt propleem un tee wolt wërklich hon tas es rom kengt. (2 Kor. 12:7-10) Finst tuu tich manich mool oone muut weeche tayn imperfektsyoone? Phaul hot tas aach mit kemacht. Tee hot kesaat tas eyer eene “xwache man” waar, wayl eyer praucht imer mit sayn imperfektsyoone khëmpfe. (Rom. 7:21-24)

8. Was hot Phaul keholef aus hale, opwool eyer propleeme mit kemacht hot?

⁸ Phaul hot fiile proope un situatsyoone mit keleept, als mool weeche sayn aychne imperfektsyoone, woo tëm oone muut kelos hon. Noch soo, hot eyer wayter Yeehoowa ketiint. Woo hot eyer kraft kefun fer tas ales aus hale? Tee hat eene xtarke klaape aan tëm fray khaaf opfer. Phaul wust aach tas Yeesus ferxproch hat tas ‘yeete eene woo aan tëm klaape teet, teet eewiche leepe kriin’. (Yoo. 3:16; Rom. 6:23) Tan, waar eyer sich sicher tas Yeehoowa fërtich waar fer se fertsaye ale tii woo sich peroye, soo kaar wën se xweyere sinte kemacht hon. (Psal. 86:5)

9. Was lërne mer fon Phaul sayn wërter in Kalater 2:20?

⁹ Was noch hot Phaul keholef wayter Yeehoowa tiine? Eyer hot keklaapt tas Yeehoowa tëm keliipt hot. Weeche was khont eyer sich sicher too tefun sin? Phaul wust tas Yeehoowa sayn Soon tsu te eyert kexikt hat fer weeche tëm xtërpe. (Lees Kalater 2:20.) * Mërk Phaul sayn wërter: “Kot sayn Soon (...) hot mich keliipt un sich fer mich ap kep.” Phaul hot khee krënse uf Kot sayn liip kextelt; tee hot net ketenkt: ‘Ich ferxteen tas Yeehoowa khan mayn priiter liipe. Awer mich liipe?... Tas khan eyer net.’ Phaul hot ti romaaner erinert: “Kristus is fer uns kextorep wii meyer noch sinter waare.” (Rom. 5:8) Kot sayn liip hot khee krënse — Tee liipt al sayn tiiner, yeete eene fon tëne!

10. Was lërne mer fon Romaaner 8:38, 39?

¹⁰ Lees Romaaner 8:38, 39. * Phaul wust wii xtark Kot sayn liip is. Tee hot kexrip tas niks “kriit uns fon Kot sayn liip aus naner mache”. Phaul hot tas taytlich kemërkt in te ketultich aat wii Yeehoowa mit te israeliter um kang is; un aach weeche ti parmhërtslichkheet  woo Yeehoowa tëm ketsaycht hot. Tan in anere wërter, was Phaul saan wolt, is: ‘Wën Yeehoowa sayn aychne Soon kexikt hot fer weeche mich xtërpe, warom sole ich tswayfele tas Eyer mich liipt?’ (Rom. 8:32)

11. Opwool Phaul feeler kemacht hot, soo wii tii woo in 1^te Timoteus 1:12-15 xteen, warom waar eyer sich sicher tas Yeehoowa tëm keliipt hot?

¹¹ Lees 1^te Timoteus 1:12-15. * Tsiimlich sicher hot Phaul sich als mool traurich kexpiirt weeche ti xlechte tinge woo eyer friier kemacht hat. Es ferwunert uns net tas eyer sich selepst keruuft hot wii te “xlimster” fon te sinter. Foer ti woerheet lërne, hot Phaul ti kriste in een xtat noo te aner keyacht; fiile hot eyer in kexpërt. Un wën tas kericht ëntxlist hot tas een krist mus xtërpe, hot eyer tas pay kextan. (Aph. 26:10, 11) Awer xtel tich mool foer tas Phaul, yets een aphostel, treft sich mit eene yunge krist. Am ën, fint eyer raus tas ti eltere fon tiise yunge pruuter sin um keprung kep, un Phaul hot een teel xult kehat. Wii meecht eyer sich kexpiirt hon? Ti feeler woo Phaul friier kemacht hat, hon tëm traurich kelos. Awer tee wust tas eyer khont niks mache fer tëne ënere, un tee hot ferxtan tas Yeesus is weeche tëm kextorep. Tes weeche hot eyer kexrip: “Weeche Kot sayn unfertiint kuutheet, sin ich was ich sin.” (1 Kor. 15:3, 10) Was is ti lisyoon fer uns? Say tich sicher tas Yeesus is weeche tich kextorep un hot es meechlich kemacht tas tuu een ticht froyntxaft mit Yeehoowa hëst. (Aph. 3:19) Was wichtich fer Yeehoowa is, is was mer  yets un in te futuer mache tuun, net ti feeler woo mer friier kemacht hon, ekaal ep mer xon Yeehoowa sayn Tsayer waare orer net. (Isa. 1:18)

12. Wii khene ti wërter fon 1^te Yoohan 3:19, 20 uns helfe wën mer rechne tas mer unutslich sin un tas mer khene net keliipt wëre?

¹² Wëns tuu traan tenkst tas Yeesus is weeche tayn sinte kextorep, fiilaycht pleenst tuu: ‘Ich sin unutslich; ich sin net kuut kenuuch fer tiise kexenk kriin. Yeehoowa khan mich net fertsaye.’ Warom khanst tuu tich soo fine? Unser imperfekte hërts khan uns hinerkeen un uns tenke mache tas mer unutslich sin, orer tas mer khene net keliipt wëre. (Lees 1^te Yoohan 3:19, 20.) * Wëns tuu aan fangst soo se tenke, ferkes net: “Kot [is] kreeser wii unser hërts.” Yeehoowa liipt tich un tee khan tich fertsaye. Meyer prayche uns sicher too tefun sin. Toch, wii kriin mer tas hin? Meyer sole eftas ti Piipel xtutiire, imer peete un tsayt fertraype mit Yeehoowa sayn troye tiiner. Warom tas ales mache is soo wichtich? Wole mer siin.

13. Wii khan ti Piipel xtutiire uns helfe? (Kuk aach te khaste “ Wii heleft tëne ti Piipel?”)

¹³ Tuu ti Piipel yeete taach xtutiire; soo, tuust tuu mee un mee Yeehoowa sayn xeene kwaliteete ferxteen un mërke wii fiil eyer tich liipt. Wëns tuu yeete taach aan een xtik fon te Piipel triwer noo tenkst, tuust tuu taytlicher tenke; too, kriist tuu ti tinge in tayn ketanke un in tayn hërts “richtich se xtele”. (2 Tim. 3:16) Kuk mool was Kevin saat, eene elteste woo sich unutslich kexpiirt hot: “Leese un triwer noo tenke aan tëm Psalm 103 hot mich keholef mayn ketanke korikiire un se mërke was hot Yeehoowa iwer mich wërklich ketenkt.” Eva, iwer weem mer foner traan kexproch hon, saat: “Am ën fom taach, tuun ich imer triwer noo tenke aan wii fint sich Yeehoowa. Tas lost mayn hërts in ruu un ferxtërkt mayn klaape.”

14. Wii khan tas kepeet uns helfe?

¹⁴ Tuu imer peete. (1 The. 5:17) Wëns tuu wilst yemant sayn froynt wëre, prauchst tuu mit tëm fertseele un saan wii finst tuu tich. Tas kilt aach fer unser froyntxaft mit Yeehoowa. Wën mer iwer unser xpiirunge, ketanke un soriche mit Yeehoowa fertseele, tsayche mer tas mer uf tëm traue un tas mer wise tas eyer uns liipt. (Psal. 94:17-19; 1 Yo. 5:14, 15) Yua, iwer weem mer foer heyer kexproch hon, saat: “Wën ich tsu Yeehoowa peete, saan ich net ploos was mit mich im taach los kang is. Ich tuun kërn mit tëm fertseele iwer was ich xpiire un tenke. Mit te tsayt, hon ich aan kefang Yeehoowa aan siin, net wii een xëf fon een faprik,  awer wii een Fater woo liipt sayn khiner aarich fiil.” (Kuk te khaste “ Host tuu es xon keleest?”)

15. Wii tsaycht Yeehoowa tas eyer sich mit uns khimert?

¹⁵ Tuu tsayt mit troye froynte fertraype; tii sin een kexenk fon Yeehoowa. (Tya. 1:17) Unser Fater im himel khimert sich mit uns. Tes weeche, hot eyer uns een kaystlich familye fon priiter un xwestere kep woo ‘imer liip tsayche’. (Xpr. 17:17) In sayn priif fer ti koloser, Phaul hot iwer welche kriste kexproch woo hate tëm uner xtitst. Tee hot kesaat tas eyer ‘fiil troost torich tëne kriit’ hat. (Kol. 4:10, 11) Soo kaar Yeesus praucht unerxtitsung kriin. Un tee waar petanklich fer ti hilef woo sayn froynte — mënxe un engele — tëm kep hon. (Luk. 22:28, 43)

16. Wii khene troye froynte uns helfe uns tichter pay Yeehoowa xafe?

¹⁶ Tuust tuu ti hilef fon tayn froynte in te kemaynt suuche un aan nëme? Wën mer iwer unser propleeme fertseele mit een rayfe froynt, wil tas net saan tas mer xwach sin; in woerheet, tas khan uns xitse. Kuk mool was James, iwer weem mer foner traan kexproch hon, saat: “Xtarke froyntxafte mit rayfe kriste hon, hot mich fiil keholef. Wën ti nekatiiwe ketanke mich iwerlaate, tiise kiltiche froynte tuun mich mit ketult horiche un saan tas se mich liipe. Torich was se mache, mërke ich tas Yeehoowa mich liipt un tas eyer sich mit mich khimert.” Tes weeche, is es wichtich tichte froyntxafte mit unser priiter un xwestere paue un hale.

17-18. Weer mise mer horiche, un warom?

¹⁷ Satanaas wil hon tas mer uf kepe unser khampf fer tas richtiches mache. Eyer wil hon tas mer klaape tas Yeehoowa uns net liipt, un tas mer net kuut kenuuch sin fer keret wëre. Awer, wii mer xon kesiin hon, tas is net woer.

¹⁸ Yeehoowa liipt tich. Tuu host fiil weyert foer tëm sayn aue. Wëns tuu tëm aan heerst, tuust tuu, soo wii Yeesus, ‘fer imer in Tëm sayn liip plaype’. (Yoohan 15:10) Tan, horich net Satanaas orer tayn hërts! Tii wole tich ploos niter xupe. Xtats tas, horich Yeehoowa, woo siit tas kuutes in yeete eene fon uns. Say tich sicher: “Yeehoowa frayt sich mit sayn folek” — un tuu pist too tepay!