Es is traurich, awer wii ich unkefeer 13 yoore alt waar, mayn ticht froyntxaft mit Yeehoowa hot aan kefang sich ferxweeche. Es hot aus kesiin tas mayn xuul koleke fiil frayheet hate — tii hon ales was se wolte kemacht un ich wolt tas aach fer mich hon. Ich hon ketenkt tas ti reekle fon mayn eltere un ti kristliche kesetse waare tsu xtram kewees, tas Yeehoowa aan peete waar tsu xweyer. Ich hon wayter keklaapt tas Yeehoowa eksistiirt hot, awer ich hon mich kaystlich leyer kefun.

Ich hon net noo kelos se preetiche, awer ich hon tas kemacht wii weenich es meechlich waar. Un ich hon mich nii in kericht fer preetiche keen. Tan, waar es xweyer ti kexpreeche mit te layt aan fange un hale. Tes weeche, hat ich khee rik pesuuche orer Piipel xtuutye, un tas hot mayn frooheet kexteelt. Weeche tas ales, mayn liip tsu te preetich aarwayt is imer kleener kep. Ich hon mich kefroot: ‘Wii khan yemant wayter preetiche een woch noom aner, een moonat noom aner?’

Wii ich 17 yoore alt waar, wolt ich mee selepstëntich sin. Too hon ich mayn reese thaxe kephakt un sin ich pis Austraalya kewanert. Es waar aarich  xweyer fer mayn eltere mich siin tehëm fat keen. Tii hon sich soriche kemacht, awer tii hon ketenkt tas ich teet wayter Yeehoowa tiine.

In Austraalya, hon ich noch weenich in Yeehoowa sayn aarwayt kemacht un ich hon aan kefang in te fersamlunge feele. Ich sin froyntin fon welche yunger kep woo soo wii ich ketenkt hon. Fer tëne, waar es aach khee propleem een nacht in te fersamlung sin, un in te nacht truf pay te boate saufe un tanse keen. Wën ich aan tiise tsayt tenke, khan ich mërke tas ich waar mit een fuus in te woerheet un mit tëm aner fuus in te welt; awer in khee eene fon te tswaay hon ich mich kuut kefun.

Unkefeer 2 yoore xpeeter, hon ich een xwester khëne kelërnt. Tii hot mich keholef se tenke iwer wii ich am leepe waar, awer tii hot tas net in te tsayt kemërkt. Tas is pasiirt wii ich mit anere 4 letiche xwestere am woone waar. Meyer hon te sirkuyt superintentent un sayn fraa, Tamara, in kelaat fer in unser haus in te woch fon tëm pesuuch plaype. Soo lang wii sayn man ti sache fon te kemaynt uf kephast hot, Tamara hot tsayt mit uns aus kep un mit uns kelacht. Ich hon tas iwer kërn kehat! Tii waar ferninftich kewees un es waar laycht mit tëne fertseele. Es hot mich ferwunert se siin yemant woo hot soo fiil aan Yeehoowa sayn aarwayt kemacht, awer in te selwich tsayt waar soo xamant kewees.

Tamara waar wërklich ufmuutich. Sayn liip tsu te woerheet un te preetich aarwayt hot mich tiif petrof. Tii waar seer froo wii se aarich fiil tsu Yeehoowa kexaft hot; un ich waar aarich traurich wii ich kans weenich tsu tëm kep hon. Tamara sayn kuut aanxtelung un woere frooheet hon mayn leepe influentsiirt. Weeche tëne sayn payxpiil, hon ich mich fon een wichtich woerheet erinert: Yeehoowa wil hon tas mer tëm mit frooheet tiine. (Psal. 100:2)

Ich wolt ti selwich frooheet hon woo Tamara hat. Awer fer tas kriin, praychte ich kroose ënerunge mache. Es hot tsayt ketauert, awer ich hon aan kefang kleene xrite kepe: ich hon mich in  kericht fer ti preetich aarwayt un als mool wii hilef pyoneerin ketiint. Tes weeche, hon ich mich net soo nerwees im preetich kexpiirt un ich hon mich sicher kefun. Wayl ich hon eftas ti Piipel in te preetich aarwayt penutst, sin ich noch frooer kep. Klaych, waar ich yeete moonat wii hilef pyoneerin am tiine.

Yets, mayn froynte waare net ploos ti yunge layt, awer aach ti elter. Toch, tii hate was eenliches: tii hon al sayn pestes tsu Yeehoowa kep un tëm sayn aarwayt keliipt. Weeche tëne sayn payxpiil, hon ich ketenkt iwer was waar tas haupste in mayn leepe kewees un ich hon aach een kuut kaystlich rutiin ëntwikelt. Too hon ich aan kefang noch mee frooheet in te preetich aarwayt xpiire un mit te tsayt, sin ich rekulaar pyoneerin kep. Fer tas eyerste mool in fiile yoore, hon ich mich noch mool froo kexpiirt un mich tehëm in te kemaynt kefun.

Een yoer xpeeter, hon ich Alex khëne kelërnt. Tee waar een kuut un eerlich persoon kewees, un tee hot Yeehoowa un tas preetich keliipt. Tee waar een ministeryaal tiiner un xon 6 yoore pyoneer kewees. Alex hot aach welche moonate in Malauii ketiint, een lant woo praycht mee puplikatoore hon. Tat, hot eyer tsayt mit misyoneere fertrip, woo een kuut payxpiil tsu tëm waare. Tii hon tëm uf kemuut wayter tas Raych im eyerste plats fon sayn leepe tuun.

Ich un Alex hon uns kehayrat im yoerkang 2003 un hon mer wayter in te fol tsayt tiinst kexaft. Meyer hon fiile wunerliche lisyoone kelërnt un Yeehoowa hot uns wërklich keseechent.

In 2009, waare mer in kelaat fer wii misyoneere in Lëst-Timor tiine; tas is een kleene lant in tëm insel krup fon Intoneesya. Meyer waare ferxrok, froo un nerwees — ales in te selwich tsayt. Finef moonate xpeeter, sin mer pis te haupst xtat fon Lëst-Timor khom: Dili.

 Tat, unser leepe waar kans anerste wii es friier waar. Meyer praychte uns traan keweene mit een naye kultuer, xprooch un ese. In te preetich aarwayt, hon mer eftas layt ketrof woo aarm waare, woo weenich orer kaar khee xuul hate un woo uf sayt kelos waare. Meyer hon aach fiile layt kesiin woo fiisixe un emotsyonaale propleeme hate weeche te kriich un ti wyolënts. *

Ti preetich aarwayt waar wunerxeen kewees! Tsum payxpiil: een mool, hon ich een meetche ketrof; tii waar 13 yoore alt un waar aarich traurich kewees. Sayn muter is phaar yoore friier kextorep un tii hot sayn papa ploos tan un wan kesiin. Soo wii fiile khiner fon sayn elter, tas meetche wust net was teet se fon sayn leepe mache. Een mool, hot se keprilt un mit mich iwer sayn xpiirunge fertseelt. Awer, ich hon niks ferxtan wayl ich khont net ti xprooch kenau fertseele. Ich wolt tëne uf muute; too, hon ich fer Yeehoowa ferlangt mich helfe tas mache. Tan, hon ich aan kefang ufmuutiche tekste fon te Piipel fer tëne leese. Torich ti neekste phaar yoore, hon ich kesiin ti ënerunge woo se hot in sayn kanse leepe weeche ti woerheet kemacht: sayn aanxtelung, wii se sich aan ketsoo un uf keraumt hot... Tii hot sich taafe kelos un hayt, hot se sayn aychne Piipel xtuutye. Yets, hot se een kroos kaystlich familye un xpiirt se sich wërklich keliipt.

Yeehoowa is ti aarwayt in Lëst-Timor am seechne. Opwool ti meyerste priiter sich in te letste 10 yoore taafe kelos hon, tuun fiile wii pyoneere, ministeryaale tiiner orer elteste xafe. Anere tuun in te RTO xafe un helfe ti puplikatsyoone fer ti xprooche fom plats iwersetse. Es hot mich aarich kefrayt wën ich tëne kesiin hon in te fersamlunge singe, lache un Yeehoowa sayn froynt wëre.

Tas leepe in Lëst-Timor waar kans anerste wii tas leepe in Austraalya kewees. Awer, es waar een frooes leepe. Als mool, sin mer in een onipus kereest woo fol layt waar; awer net ploos tas — trin waare aach apketrokne fixe un kemiise lester fon te kexefte pletse. Als mool, hon mer een Piipel xtuutyum in tëm haus kefiirt — awer trin waar es hays, te pootem waar mit krunt kemacht un mit uns waare ti hingele kewees. Opwool meyer manich mool kefoore mit kemacht hon, hon ich eftas ketenkt: ‘Tas leepe too is wunerxeen!’

Wën ich retuer kuke, sin ich petanklich tas mayn eltere hon sayn pestes kemacht fer mich iwer Yeehoowa lërne un mich uner xtitse, soo kaar wën mayn froyntxaft mit Yeehoowa xwach waar. Xpriiche 22:6 hot sich in mayn leepe erfiilt. Mayn papa un mama sin froo tas tii khene mich un Alex siin Yeehoowa tiine. Xon fon 2016 aan, tiine mer in te sirkuyt aarwayt in tëm teritooryum fon te Australaasya sayn filyaal.

Es is xweyer se klaape tas fer een tsayt, sin ich net kërn preetiche kang. Yets, liipe ich ti preetich aarwayt! Ich hon kemërkt tas, ekaal was in unser leepe pasiirt, ti woere frooheet khomt fon Yeehoowa mit kans hërts tiine. Yawool, ti letste 18 yoore woo ich Yeehoowa mit Alex ketiint hon, sin ti frooeste yoore fon mayn leepe. Yets, ferxteen ich tas ti wërter fon Tawi tsu Yeehoowa sin wërklich woer: “Al tii woo aan tich xuts suuche, tuun froo wëre; tuun imer yukse fon frayt. (...) Un tii woo tayn naame liipe, fraye sich aan tich.” (Psal. 5:11)