1. Was kept uns een kroos frooheet?

 YEEHOOWA wil hon tas mer froo wëre. Meyer khene uns sicher too tefun sin, wayl ti frooheet is een teel fon te frucht fom kayst. (Kal. 5:22) Un, wayl kepe pringt mee frooheet wii se kriin, xpiire mer een kroos frooheet wën mer in te preetich aarwayt xafe un wën mer unser priiter un xwestere helfe. (Aph. 20:35)

2-3. (a) Tëm noo Kalater 6:4, was fer 2 tinge tuun uns helfe unser frooheet in Yeehoowa sayn tiinst hale? (b) Was tuun mer in tiise artikel siin?

² Lees Kalater 6:4. b In tiise tekst, xprecht te aphostel Phaul iwer 2 tinge woo uns helfe ti frooheet hale. Eyerst: meyer sole unser pestes tsu Yeehoowa kepe. Wën mer unser pestes tëm kepe, kriin mer frooheet. (Mat. 22:36-38) Tsweet: meyer sole uns net mit te anere ferklayche. Ales was mer hon, hon mer fon Yeehoowa kriit. Tan, ekaal was mer kemacht kriin weeche unser kesuntheet, iipung orer apiliteet, meyer sole petanklich tsu Yeehoowa sin. Un wën mer mërke tas anere mee apiliteet wii meyer in te preetich aarwayt hon, sole mer uns aach fraye; tii tuun sayn apiliteete penutse fer eer tsu Yeehoowa pringe, net fer sich selepst. Tan, xtats fersuuche peser wii tii sin, sole mer mit tëne lërne.

³ In tiise artikel, tuun mer siin was mer mache khene wën mer oone muut sin, wayl mer net kemacht kriin ales was mer wole in Yeehoowa sayn tinst. Meyer tuun aach siin wii mer khene  penutse ti apiliteete woo mer xon hon in te pest aat, un was mer mit te anere lërne khene.

4. Was khan uns traurich lose? Kep een payxpiil.

⁴ Fiile fon uns teete kërn mee tsu Yeehoowa mache; awer weeche ti elter orer kesuntheet, kriin mer tas net hin. Tas khan uns traurich lose. Carol hot tas mit kemacht. Tii hot kepreeticht in een plats woo een kroos neetichkheet hat. In te tsayt, hot se 35 Piipel xtuutye kefiirt un hot phaar layt keholef sich tetikiire un taafe lose. Carol hot wërklich fiil in te preetich aarwayt kemacht! Awer tan, is Carol aarich krank kep un must ti meyerst tsayt tehëm plaype. Tii saat: “Ich wees tas weeche mayn krankheet, khan ich net soo fiil wii ti anere mache. Awer, als mool, tenke ich tas ich net soo troy wii tii sin. Ich khan net mache ales was ich wil un tas lost mich oone muut.” Carol wil sayn pestes tsu Yeehoowa kepe un tes weeche fertiint se loop kriin! Meyer khene uns sicher sin tas unser mitlaytiche Kot froo mit tëne sayn aanxtrengung is.

5. (a) Wën mer traurich sin wayl mer net mache khene ales was mer wole, fon was sole mer uns erinere? (b) Tëm noo te pilter, wii hot een pruuter imer sayn pestes tsu Yeehoowa kep?

⁵ Wëns tuu traurich pist wayls tuu net mache khanst ales was tuu wilst, froo tich: ‘Was tuut Yeehoowa fon mich ferlange?’ Yeehoowa wil hon tas tuu tayn pestes kepst, tëm noo tayn situatsyoon yets. Kuk mool tas neekste payxpiil. Een xwester woo 80  yoore alt is, is traurich wayl se khan net mee soo fiil in te preetich aarwayt mache wii se friier kemacht hot, wii se 40  yoore alt waar. Tii kept sayn pestes fer Yeehoowa, awer tii mënt tas Yeehoowa net froo too temit is. Meecht tas woer sin? Tenk mool triwer noo: wën tiise xwester sayn pestes kemacht hot wii se 40  yoore alt waar, un yets tuut se wayter sayn pestes kepe, hot se nii noo kelos sayn pestes tsu Yeehoowa mache. Wën mer tenke tas was mer mache net kenuuch is fer Yeehoowa kefale, mise mer uns fon een tings erinere: is Yeehoowa woo ëntxlist was kenuuch is fer tëm kefale. Un wën mer unser pestes kepe, tuut Yeehoowa uns saan: “Aarich kuut!” (Kuk aach Matheus 25:20-23.)

6. Was khene mer mit Maria sayn payxpiil lërne?

⁶ Etwas woo uns helft frooer sin, is uns traan hale aan was mer mache khene, net aan was mer net mache khene. Kuk mool tas payxpiil fon een xwester woo Maria heest. Tii hot een krankheet woo lost se net fiil in te preetich aarwayt mache. Am aanfang, hot se sich unutslich un tiifsinich kexpiirt. Awer too, hot Maria sich traan ketenkt fon een xwester woo must te kanse taach im pet laye wayl se krank waar; tan hot se ëntxlist ti xwester helfe. Maria saat: “Ich hon mich orkanisiirt fer torich telefoon un priife mit tëne preetiche. Imer wën mer mitsamer kexaft hon, sin ich froo un tsufriite hëm tsus kang, wayl ich khont mayn xwester helfe.” Meyer khene aach unser frooheet ferkreese wën mer uns traan hale aan was mer mache khene, xtats aan was mer net mache khene. Awer, un wën mer mee mache khene orer een ekstra apiliteet in Yeehoowa sayn tiinst hon?

7. Was fer nutslich aanreet hot te aphostel Pheeter fer ti kriste kep?

⁷ Te aphostel Pheeter, in sayn eyerst priif, hot ti priiter uf kemuut sayn apiliteete penutse fer ti anere priiter un xwestere uf muute. Pheeter hot kexrip: “Tëm noo tas kexenk woo yeete eene kriit hot, tuut tëm penutse fer eene te anere tiine, wii kuute aankexteltner fon Kot sayn unfertiint kuutheet.” (1 Phe. 4:10) Meyer  sole uns net tsurik hale fon unser apiliteete kuut penutse ploos wayl mer tenke tas ti anere khente naytich orer oone muut weeche tas kepe. Wën mer uns tsurik hale teete, teete mer net unser pestes fer Yeehoowa kepe.

8. Tëm noo 1^te Korinter 4:6, 7, warom sole mer uns net iwer unser apiliteete proose?

⁸ Meyer sole unser apiliteete kuut penutse; awer meyer sole uf phase tas mer net uns weeche tëne proose. (Lees 1^te Korinter 4:6, 7.) c Tsum payxpiil: fiilaycht pist tuu kwap in Piipel xtuutye aan fange. Tuu solst wayter tiise apiliteet penutse! Awer tuu thërfst tich net too triwer proose. Xtel tich mool foer tas tuu een kuut speryens in te preetich aarwayt hast: tuu host een Piipel xtuutyum aan kefang. Tuu pist hërtslich am waarte te momënt woos tuu khanst tas mit tayn preetich aarwayt krup teele. Awer wëns tuu ti preetich aarwayt krup trefst, is een xwester am fertseele iwer een piichelche woo se mit een pewooner kelos hot. Tii hot een piichelche kelos; tuu host een Piipel xtuutyum aan kefang. Was tuust tuu mache? Tuu weest tas tayn speryens teet ti preetich aarwayt krup uf muute, awer tuu ëntxlist waarte fer tas in een aner momënt fertseele. Warom? Wayl tuu wilst net ti frooheet fon te xwester woo tas piichelche kelos hot, kleener mache. Tas weyer tas liiplich tings fer se mache. Awer tuu net noo lose Piipel xtuutye aan piite. Tuu host een apiliteet — penuts tas!

9. Wii sole mer unser apiliteete penutse?

⁹ Wole mer uns nii ferkese: yeete apiliteet woo mer hon is een kexenk fon Kot. Meyer sole tiise apiliteete penutse fer ti kemaynt uf paue, net fer eer fer uns selepst pringe. (Fili. 2:3) Wën mer unser kraft un apiliteete penutse fer Kot sayn wile mache, tuun mer uns fraye — net wayl mer mee wii ti anere mache orer wayl mer pewayse tas mer peser wii ti anere sin, awer wayl mer unser kexenke penutse fer eer fer Yeehoowa kepe.

10. Warom is es net kuut uns mit te anere ferklayche?

¹⁰ Wën een persoon net uf phast, khan se aan fange sayn kwaliteete ferklayche mit een aner persoon sayn xwacheete. Tsum payxpiil: im xtant tuut een pruuter iwer kuute rete hale; tas is tëm sayn kwaliteet. Tee khent aan fange se tenke tas eyer peser wii een aner pruuter is  woo net soo kuute rete hale khan. Awer fiilaycht, is tiise aner pruuter aarich kwap in anere tinge — wii krooshërtslichkheet tsayche, sayn khiner iipe orer flaysich in te preetich aarwayt sin. Meyer sin aarich petanklich tas mer fiile priiter un xwestere hon woo sayn apiliteete penutse fer Yeehoowa tiine un ti anere helfe!

11. Warom sole mer uns aan xtrenge fer Yeesus sayn payxpiil noo keen?

¹¹ Opwool mer uns net mit te anere ferklayche sole, khene mer fiil mit te anere tiiner fon Yeehoowa lërne. Wole mer, tsum payxpiil, iwer Yeesus xpreche. Meyer sin net perfekt soo wii Yeesus, awer meyer khene fiil fon tëm sayn xeene kwaliteete un aktsyoone lërne. (1 Phe. 2:21) Wën mer uns aan xtrenge fer tëm sayn payxpiil ticht noo keen, wëre mer peser tiiner fon Yeehoowa un mer tuun noch peser preetiche.

12-13. Was lërne mer fom kheenich Tawi?

¹² In Kot sayn Wort, fine mer fiile payxpiile fon troye mëner un fraae woo mer noo mache khene, opwool se imperfekt waare. (Hep. 6:12) Tenk mool, tsum payxpiil, am kheenich Tawi. Yeehoowa hot tëm keruuft wii “een man woo mayn hërts froo macht”, orer wii een aner Piipel saat, “ti sort persoon woo mich kefalt”. (Aph. 13:22) Awer Tawi waar net perfekt. In woerheet, hot eyer etliche xlime feeler kemacht. Noch soo is eyer een kuut payxpiil fer uns. Warom? Wayl wii eyer tisipliniirt kep is, hot eyer khee ausreete kep. Xtats tas, hot eyer te xtark aanreet aan kenom un hot sich hërtslich peroyt fon was eyer kemacht hat. Tes weeche, hot Yeehoowa tëm fertsayt. (Psal. 51:3, 4, 10-12)

¹³ Meyer khene fon Tawi sayn payxpiil lërne wën mer uns frooe: ‘Wii tuun ich mich aan xtele wën ich een aanreet kriin? Tuun ich klaych mayn feeler erkhëne orer tuun ich ausreete suuche? Tuun ich fiks ti xult fer ti anere kepe? Tuun ich mich aan xtrenge fer net mayn feeler noch mool mache?’ Tuu khanst tich eenliche frooche mache wëns tuu leest iwer anere troye mëner un fraae woo in te Piipel xteen. Hon se eenliche propleeme wii tayne mit kemacht? Was fer xeene kwaliteete hon se ketsaycht? Tuu khanst tich aach frooe: ‘Wii khan ich tas payxpiil fon tiise troye tiiner noo mache?’

14. Wii unser priiter un xwestere peopachte khan uns helfe?

¹⁴ Etwas woo uns aach helfe khan, is unser priiter un xwestere peopachte — ekaal ep se  elter orer yinger sin. Tsum payxpiil: kepts yemant in tayn kemaynt woo een propleem troy am aus hale is? Im xtant, sayn koleke wole tëm tswinge was ferkheertes mache, orer tuut sayn familye sich keeche tëm xtele, orer hot eyer een xwach kesuntheet. Hot tiise persoon kwaliteete woos tuu kërn noo mache teest? Wëns tuu tiise persoon sayn payxpiil noo kukst, es khan tich helfe mit tayn aychne propleeme um keen. Meyer sin mechtich petanklich tas tiise priiter un xwestere uns een kuut payxpiil fon klaape kepe. (Hep. 13:7; Tya. 1:2, 3)

15. Was fer aanreet hot te aphostel Phaul kep woo uns helft wayter ti frooheet hale in Yeehoowa sayn tiinst?

¹⁵ Wën yeete eene fon uns unser pestes macht, khene mer ti kemaynt helfe friit un eenichkheet hon. Kuk mool tas payxpiil fon te eyerste kriste. Tii hon unerxiitliche apiliteete un flichte kehat. (1 Kor. 12:4, 7-11) Awer tas waar khee uersach fer eene mit te anere xtrayte. Tes weeche, hot Phaul al uf kemuut sayn teel mache “fer Kristus sayn khërper uf paue”. Tee hot fer ti Ëfeser kexrip: “Wën yeete khërper teel sayn aarwayt richtich macht, tas heleft tas te khërper wakst un sich in liip uf paut.” (Ëfe. 4:1-3, 11, 12, 16) Tii woo Phaul aan keheert hon, hon te friit un ti eenichkheet uf kemuut — etwas woo mer hayt in unser kemaynte siin.

16. Was sole mer pextimt sin se mache? (Hepreeyer 6:10)

¹⁶ Say pextimt net tich mit te anere ferklayche. Xtats tas, lërn fon Yeesus sayn payxpiil un xtreng tich aan fer tëm sayn kwaliteete noo mache. Los ti piiplixe payxpiile un ti payxpiile fon hayt tsu taach tich helfe. Un wiis tuu wayter tayn pestes machst, say tich sicher tas ‘Yeehoowa net unkerecht is fer sich fon tayn aarwayt ferkese’. (Lees Hepreeyer 6:10.) d Tuu wayter Yeehoowa mit frooheet tiine un say tich sicher tas eyer froo is wëns tuu wayter tayn pestes machst fer tëm kefale.