1-2. (a) Weer waar Eunise kewees, un was hot es xweyer fer tii kelos sayn soon iwer Yeesus un Yeehoowa in lërne? (b) Xprech iwer tas pilt am aanfang fom piichelche.

 ES IS laycht uns foer xtele wii Eunise — Timoteus sayn mama — froo waar im taach fon tëm sayn taaf, opwool ti Piipel net too triwer xprecht. (Xpr. 23:25) Khanst tuu tich foer xtele Eunise sayn aue am xayne wii Timoteus im waser xteet? Timoteus sayn wowo, Loyte, tuut se um krayfe, un Eunise khan net sayn frooe kesicht ferxtekele. Soo wii Timoteus im waser uner keet, halt se sayn luft in. Awer klaych khomt Timoteus noch mool aus tëm waser mit een mechtich frooe kesicht, un yets khan Eunise net mee sayn treene kontroliire. Tas waar net laycht, awer Eunise hot es hin kriit sayn soon lërne Yeehoowa un Yeesus liipe. Torich was fer xwiirichkheete must Eunise triwer wech khome pis tiise taach?

² Timoteus sayn eltere hate net ti selwich relichyoon. Tëm sayn papa waar kreekix awer tëm sayn mama un wowo waare yuuter kewees. (Aph. 16:1) Tsiimlich sicher, waar es in Timoteus sayn yunge yoore woo Eunise un Loyte kriste kep sin; awer tëm sayn fater is net een krist kep. Was fer relichyoon teet Timoteus raus suuche? Neekst sicher, waar eyer xon alt kenuuch fer tiise ëntxlus mache. Teet eyer ti relichyoon fon sayn papa raus suuche? Teet eyer ti yiitixe tratitsyoone, woo  eyer fon khint aan kelërnt hot, wayter noo keen? Orer teet eyer Yeesus sayn tisipel wëre?

3. Tëm noo Xpriiche 1:8, 9, was tenkt Yeehoowa iwer was ti muter mache fer sayn khiner helfe Tëm sayn fraaynt sin?

³ Kraat soo, tuun ti kristliche muter hayt tsu taach sayn familye liipe. Mee wii ales, wole se sayn khiner helfe een ticht fraayntxaft mit Yeehoowa paue. Un Yeehoowa kept fiil weyert fer sayn aanxtrengung. (Lees Xpriiche 1: 8, 9.) b Yeehoowa hot xon fiile muter keholef sayn khiner in lërne tëm tiine un liipe.

4. Was fer kefoore tuun ti muter hayt tsu taach mit mache?

⁴ Als mool, tuut een muter sich frooe: ‘Meecht mayn khint, soo wii Timoteus, raus suuche Yeehoowa tiine?’ Es is normaal sich soo was frooe. Ti eltere wise wii fiil Satanaas sayn welt sayn khiner uner trike tuut. (1 Phe. 5:8) Anere muter mache noch een aner kefoer mit: tii mise sayn khiner aleen kroos tsiie orer mit een man woo Yeehoowa net tiint. Tsum payxpiil: een xwester woo Christine c heest, saat: “Mayn man waar een kuute fater kewees un hot unser familye keliipt. Awer tee wolt net hon tas ich unser khiner wii Yeehoowa sayn Tsayer kroos tsiie teet. Ich hon fiil torich tii yoore keprilt, mich am frooe: ‘Meechte mayn khiner een taach Yeehoowa sayn tiiner wëre?’”

5. Was tuun mer in tiise artikel lërne?

⁵ Wëns tuu een kristlich muter pist, khanst tuu tayn khiner helfe Yeehoowa liipe un tiine, soo wii Eunise es kemacht hot. Wii khanst tuu Eunise noo mache un tayn khiner in lërne torich was tuu saast un was tuu machst? Wii tuut Yeehoowa tich helfe? Tas is was mer in tiise artikel lërne tuun.

6. Tëm noo 2^te Timoteus 3:14, 15, wii is Timoteus een krist kep?

⁶ Wii Timoteus noch een puup waar, hot sayn mama sayn pestes kemacht fer tëm iwer “ti hayliche xrifte” in lërne, soo wii ti yuuter se ferxtan hon. Kewis, in tiise tsayt waar Eunise sayn khëntnis net komplët kewees, wayl tii wust noch kaar niks iwer Yeesus. Soo wii soo, was Timoteus iwer ti Xrifte kelërnt hot, waar kenuuch fer tëm helfe een krist wëre. Awer, teet eyer raus suuche tas mache? Wii een yunge man, khont Timoteus ëntxlise ep eyer een krist wëre teet. Sicher, etwas woo Timoteus keholef hot ‘in kereet wëre fer uf Yeesus se klaape’, waar ti aanxtrengung fon sayn muter. (Lees 2^te Timoteus 3:14, 15.) d Sicher, is Eunise aarich froo kep tas tii es hin kriit hot sayn puup iwer Yeehoowa lërne, opwool tas net laycht waar. Eunise sayn naame khomt fon een wort woo “triwer wech khome” petayt. Un tii hot tas wërklich kemacht: tii is torich ti xwiirichkheete triwer wech khom fer Timoteus helfe Yeehoowa liipe un tiine.

7. Wii khont Eunise Timoteus wayter helfe in kaystlich aat foran keen, noo tëm sayn taaf?

⁷ Wii Timoteus sich taafe kelos hot, hot eyer een wichtich tsiil in sayn leepe ketrof. Awer Eunise hot net too teweeche noo kelos sich ketanke mache mit sayn soon. Was teet Timoteus mit tëm rest fon sayn leepe mache? Teet eyer fraaynte mache woo tëm xlecht influentsiire teete? Teet eyer een xuul in Atenas mache un aan fange se klaape aan te falxe  inlërnunge fon te filosofer woo tat waare? Teet eyer sayn kraft, tsayt un yunge yoore fersaue fer mee kelt kriin? Eunise khont net fer Timoteus raus suuche, awer tii khont tëm helfe kuute ëntxlise mache. Wii? Tii khont wayter sayn soon helfe een tiif liip tsu Yeehoowa hon un petanklich sin fer ales was eyer xon fon Yeehoowa un Yeesus kriit hat. Awer soo sorte propleeme pasiire net ploos in te familye woo ti eltere net ti selwich relichyoon hon. Soo kaar wën ti 2 eltere in te woerheet sin, khan es xweyer fer tëne sin sayn khiner helfe Yeehoowa tiine. Was khene se mit Eunise sayn payxpiil lërne?

8. Wën te man Yeehoowa sayn Tsayer is, wii khan ti fraa tëm helfe sayn khiner in kaystlich aat uf phase?

⁸ Xtutiir ti Piipel mit tayn khiner. Wën tayne man Yeehoowa sayn Tsayer is, helf tëm ti kaystliche neetichkheete fon ayre khiner uf phase. Een aat fer tas mache, is ti familye aanpeetung uner xtitse. Xprech kuut iwer ti familye aanpeetung un mach tayn teel tas es een xeen un froo xtun fer ale kaar wërt. Manich mool, khanst tuu soo kaar tayn man helfe een ekstra xtuutyum projëkt orkanisiire. Un wën tayn khiner xon alt kenuuch sin, im xtant khanst tuu tayn man helfe tas puuch Los tich kuut keen! mit tëne xtutiire.

9. Woo khan een muter, woo aleen in te woerheet is, hilef fine?

⁹ Etliche muter mise tas Piipel xtuutyum fon sayn khiner fiire; fiilaycht, wayl se sayn khiner aleen kroos tsiie orer wayl sayn man net in te woerheet is. Wëns tuu soo was mit leepst, mach tich net tsu fiil ketanke — Yeehoowa tuut tich helfe. Penuts ti feramente woo ti Orkanisatsyoon fersoricht fer mit tayn khiner xtutiire. Tuu khanst aach hilef ferlange fer anere eltere woo xon khiner kroos ketsoo hon un tëne frooe wii se tiise feramente penutse fer sayn familye aanpeetung mache. e (Xpr. 11:14) Yeehoowa khan tich aach helfe mit tayn khiner xpreche. Ferlang tëm sayn hilef fer raus kriin was tayn khiner tenke un xpiire. (Xpr. 20:5) Fer een kuut kexpreeche mit tayn khiner aan fange, khanst tuu soo een sort frooch mache: ‘Was is ti kreest xwiirichkheet woos tuu in te xuul mit machst?’

10. Was noch khanst tuu mache fer tayn khiner iwer Yeehoowa lërne?

¹⁰ Lërn tayn khiner iwer Yeehoowa in unerxiitliche aate. Xprech iwer Yeehoowa un tas kanse kuutes woo eyer xon fer tich kemacht hot. (Teut. 6:6, 7; Isa. 63:7) Tas is hauptseechlich wichtich wëns tuu net mit tayn khiner tehëm xtutiire khanst. Christine, iwer weem mer foner traan kexproch hon, saat: “Ti keleechenheete fer iwer Yeehoowa xpreche waare soo weenich, tas wën ich een hat, hon ich tii kuut penutst. Wii mer laafe orer mit een kanoo xpasiire kang sin, hon mer ti xtune kuut penutst fer iwer ti kriatsyoon un kaystliche tinge xpreche. Un wën mayn khiner xon alt kenuuch waare, hon ich se uf kemuut ti Piipel aleen xtutiire.” Tuu kuut xpreche iwer Yeehoowa sayn Orkanisatsyoon un ti priiter un xwestere. Xprech aach kuut iwer ti elteste un tuu se net kritikiire. Wën net, im xtant tuun tayn khiner net mit tëne xpreche keen wën se hilef prayche.

11. Tëm noo Tyako 3:18, warom is es wichtich te friit tehëm uf muute?

¹¹ Tuu te friit tehëm uf muute. Tuu ofts tsayche tas tuu tayn man un khiner liipst. Xprech iwer tayn man mit liip un respekt un muut tayn khiner uf tas selwiche mache. Soo, tuust tuu te friit tehëm uf muute un tas lost laychter fer tayn khiner iwer Yeehoowa  lërne. (Lees Tyako 3:18.) f Kuk mool Jozsef sayn payxpiil, woo wii spetsyaal pyoneer in Rumeenya tiint. Wii eyer yung waar, hot sayn papa es net laycht kelos fer tee, sayn mama, sayn priiter un xwester Yeehoowa tiine. “Mayn mama must xtram xafe fer friit tehëm hon — saat Jozsef. — Woo kroper mayn papa waar, woo liiplicher waar mayn mama mit tëm. Wii se kemërkt hot tas es net laycht fer uns waar unser papa respektiire un aan heere, hot se iwer Ëfeser 6:1-3 mit uns kexproch. Too, hot se fertseelt iwer unser fater sayn kuute kwaliteete un warom solte mer tëm weyert kepe. Tas hot unser familye keholef friit tehëm hon.”

12. Tëm noo 2^te Timoteus 1:5, wii hot Eunise sayn payxpiil Timoteus keholef?

¹² Lees 2^te Timoteus 1:5. g Tsiimlich sicher hot Timoteus een wichtich lisyoon mit Eunise kelërnt: wën mer een xtark klaape hon, pewayse mer tas torich unser aktsyoone. (Tya. 2:26) Timoteus khont siin tas Eunise sayn xtark liip tsu Yeehoowa hot sayn aktsyoone petrof. Tee khont aach siin tas Yeehoowa tiine, hot sayn muter frooheet kep. Wii hot Eunise sayn payxpiil Timoteus petrof? Te aphostel Phaul hot kesaat tas Timoteus een eerlich klaape hat, soo wii sayn muter. Es waar net umsonst tas Timoteus sayn klaape xtark waar. Tee hot tas payxpiil fon sayn mama kesiin un noo kemacht. Kraat soo, fiile muter hayt, “oone wërter”, hon sayne familye keholef Yeehoowa tiine. (1 Phe. 3:1, 2) Tuu khanst tas selwiche mache. Wii?

13. Warom sol een muter sayn fraayntxaft mit Yeehoowa im eyerste plats xtele?

¹³ Xtel tayn fraayntxaft mit Yeehoowa im eyerste plats. (Teut. 6:5, 6) Soo wii ti meyerste muter, kepst tuu fon fiiles uf. Tuu tuust fon tayn tsayt, kelt, xloof un anere tinge uf kepe fer tayn khiner uf phase. Awer tuu solst net soo fiil tsayt too traan fertraype tas tuu tayn fraayntxaft mit Yeehoowa uf kepst. Hool imer tsayt fer aleen peete, ti Piipel xtutiire un in te fersamlunge keen. Soo, tuust tuu tayn fraayntxaft mit Yeehoowa ferxtërke un aach een kuut payxpiil fer tayn familye un ti anere lose.

14-15. Was host tuu mit te payxpiile fon Leanne, Maria un João kelërnt?

¹⁴ Kuk mool tas payxpiil fon etliche yunge woo kelërnt hon Yeehoowa liipe un uf tëm traue weeche tas payxpiil fon sayne muter. Christine sayn meet, Leanne, saat: “Meyer khonte net ti Piipel xtutiire wën unser papa tehëm waar. Awer unser mama is imer in te fersamlunge kang. Opwool mer net fiil iwer ti Piipel wuste, tëne sayn aktsyoone hon uns keholef een xtarke klaape paue. Meyer waare uns sicher tas Yeehoowa sayn Tsayer ti woerheet in kelërnt hon, soo kaar eep mer aan kefang hon in te fersamlunge keen.”

¹⁵ Maria sayn papa hot als mool ti familye kextrooft wayl se in te fersamlunge kang sin. “Mayn mama is eene fon te koraajichste xwestere woo ich khëne — saat se. — Wii ich kleen waar, wolt ich net etliche tinge mache wayl ich pang hat fon was ti anere saan teete. Awer, wii ich kesiin hon wii se koraajich waar un wii se imer Yeehoowa im eyerste plats ketuun hot, es hot mich keholef torich ti pang fom mënx triwer wech khome.” João sayn fater  hot ti familye ferpoot iwer Yeehoowa orer ti Piipel tehëm xpreche. Tee saat: “Ich tenke was mich te meyerst keholef hot, waar tas mayn mama wilich waar fer fon ales uf kepe — ploos fon sayn liip tsu Yeehoowa net — fer mayn papa froo lose.”

16. Wii khan een muter sayn payxpiil ti anere petrefe?

¹⁶ Wëns tuu een muter pist, eriner tich tas tayn payxpiil khan ti anere petrefe. Wii soo? Kuk mool wii Eunise sayn payxpiil te aphostel Phaul petrof hot. Tee hot kexrip tas Timoteus ‘sayn eerliche klaape waar eyerst in Eunise kewees’. (2 Tim. 1:5) Wanee hot Phaul Eunise sayn klaape tas eyerste mool kesiin? Tsiimlich sicher, in sayn eyerst misyoneer rees, wii eyer Loyte un Eunise in Listra khëne kelërnt hot. Un im xtant, waar tee woo se keholef hot kriste wëre. (Aph. 14:4-18) Tenk mool noo: wii Phaul tsu Timoteus kexrip hot — unkefeer 15  yoore xpeeter —, hot eyer sich noch traan ketenkt fon Eunise sayn troye aktsyoone un tee hot kesaat tas se een payxpiil fer ti anere waar. Kewis, hot Eunise sayn payxpiil te aphostel Phaul fiil uf kemuut; un tsiimlich sicher, aach anere kriste in tiise tsayt. Tuust tuu tayn khiner aleen in te woerheet tsiie? Tan, say tich sicher tas tayn troye payxpiil tuut aach anere ferxtërke un uf muute.

17. Was solst tuu mache wëns aus siit tas tayn aanxtrengung khee resultaat in tayn khint pringt?

¹⁷ Un, wëns aus siit tas tayn aanxtrengung khee resultaat in tayn khint pringt? Eriner tich: es nëmt tsayt fer een khint iipe. Soo wii tas pilt tsaycht, wëns tuu een soome  seye tuust, im xtant froost tuut tich: ‘Meecht tas eene taach een paam wëre woo friichte kept?’ Tuu khanst net ti resultaate kontroliire, awer tuu tuust wayter kiise. Soo, hot te paam een peser oportuniteet fer se wakse. (Mar. 4:26-29) Kraat soo, khanst tuu tich als mool frooe ep tayn aanxtrengung wërklich tayn khint am helfe is Yeehoowa liipe. Tuu khanst net kontroliire ti ëntxlise woo tayn khiner mache. Awer, wëns tuu tayn pestes machst fer tëne iipe, kepst tuu tëne ti pest oportuniteet woos meechlich is fer Yeehoowa sayn fraaynte wëre. (Xpr. 22:6)

18. Wii khan Yeehoowa tayn khiner helfe tëm sayn fraaynte wëre?

¹⁸ Fon te piiplixe tsayte aan, hot Yeehoowa xon fiile yunge layt keholef sayn fraaynte wëre. (Psal. 22:9, 10) Un tee khan aach tayn khiner helfe tëm sayn fraaynte wëre, wën se tas wole. (1 Kor. 3:6, 7) Soo kaar wën tayn khiner Yeehoowa net mit kans hërts tiine, tuut Kot se wayter liipe. (Psal. 11:4) Wën se een kleen pewaysung kepe tas se Yeehoowa kefale wole, is Eyer fërtich fer tëne helfe tëm sayn fraaynte wëre. (Aph. 13:48; 2 Kro. 16:9) Tee khan tich helfe tas richtich tings saan wën tayn khiner tas te meyerst heere prayche. (Xpr. 15:23) Orer, khan eyer een liipliche pruuter orer xwester in te kemaynt uf muute ekstra acht fer tayn khiner kepe. Un soo kaar wën se kroos wëre, khan Yeehoowa se traan tenke mache etwas woos tuu se in kelërnt host wii se khiner waare. (Yoo. 14:26) Wëns tuu wayter tayn khiner torich tayn wërter un payxpiil iipst, tuut Yeehoowa tich seechne.

19. Warom khanst tuu sicher sin tas Yeehoowa sich mit tich kefalt?

¹⁹ Yeehoowa liipt tich, ekaal was fer ëntxlus tayn khiner mache. Tee liipt tich wayls tuu tëm liipst. Wëns tuu tayn khiner aleen in te woerheet tsiie tuust, ferxprecht Yeehoowa tas eyer een Fater fer tayn khiner wërt un tas eyer tich xitse tuut. (Psal. 68:5) Tuu khanst net kontroliire ep tayn khiner raus suuche tuun Yeehoowa tiine orer net. Awer wëns tuu wayter uf Yeehoowa traust un tayn pestes machst, tuust tuu sicher tëm kefale.