XTUUTYUM ARTIKEL 18
Wii khanst tuu kaystliche tsiile xtele un trefe?
“Tuu aan tiise tinge triwer noo tenke; hal tich kans aan tiise tinge aan; soo wërts fer al taytlich tas tuu am foran keen pist.” (1TE TIMOTEUS 4:15)
LIIT 84 Ich wil tuun
WAS TUUN MER SIIN? a
1. Was fer sorte kaystliche tsiile khene mer xtele?
WAYL mer woere kriste sin, liipe mer Yeehoowa aarich fiil. Meyer wole unser pestes tsu tëm kepe. Awer fer tas hin kriin, mise mer kaystliche tsiile xtele — soo wii kristliche kwaliteete ëntwikele, nutsliche apiliteete lërne un aate suuche fer ti anere tiine. b
2. Warom sole mer kaystliche tsiile xtele un uns aan xtrenge fer tëne trefe?
2 Warom sole mer te wunx hon fer een peser tiiner fon Yeehoowa sin? Tas haupste is wayl mer wole unser liipliche Fater im himel kefale. Yeehoowa wërt froo wën eyer siit tas mer unser pestes mache fer unser apiliteete in tëm sayn aarwayt penutse. Meyer wole aach peser tiiner fon Yeehoowa sin, wayl soo khene mer unser priiter un xwestere noch mee helfe. (1 The. 4:9, 10) Ekaal wii lang mer xon in te woerheet sin, meyer al khene kaystlich foran keen. Wole mer yets siin wii mer tas mache khene.
3. Tëm noo 1te Timoteus 4:12-16, was hot te aphostel Phaul Timoteus uf kemuut se mache?
3 Wii te aphostel Phaul sayn eyerst priif fer Timoteus kexrip hot, waar tiise yunge man xon een elteste mit speryens. Soo wii soo, hot Phaul tëm uf kemuut een peser tiiner fon Yeehoowa sin. (Lees 1te Timoteus 4:12-16.) c Wëns tuu Phaul sayn wërter leest, mërk tas eyer wolt tas Timoteus in 2 aate foran keengt: (1) tee solt kristliche kwaliteete ëntwikele — soo wii liip, klaape un moraalix raynheet — un (2) sayn apiliteete ferpesere — wii puuplix leese, ti anere uf muute un in lërne. Mit Timoteus sayn payxpiil im khop, wole mer siin wii tsiile xtele woo mer trefe khene, uns helfe khan peser tiiner fon Yeehoowa sin. Meyer tuun aach etliche aate siin wii mer khene mee mache in Yeehoowa sayn aarwayt.
TUU KRISTLICHE KWALITEETE ËNTWIKELE
4. Tëm noo Filiper 2:19-22, warom waar Timoteus een nutsliche tiiner fon Yeehoowa?
4 Warom waar Timoteus een nutsliche tiiner fon Yeehoowa? Weeche sayn xeene kristliche kwaliteete. (Lees Filiper 2:19-22.) d Weeche ti wërter woo Phaul iwer Timoteus kesaat hot, khene mer mërke tas tiise yunge man waar teemuutich, leaal, flaysich un yemant woo ti layt traue khonte. Timoteus waar aach liiplich un hot sich wërklich mit te priiter kekhimert. Tes weeche, hot Phaul Timoteus keliipt un hot sich net tsurik kehal fon xweyere flichte tëm iwer kepe. (1 Kor. 4:17) Kraat soo, tuut Yeehoowa uns liipe un mer wëre nutslicher in te kemaynt wën mer kwaliteete ëntwikele woo tëm kefale. (Psal. 25:9; 138:6)
Suuch een spetsiifix kwaliteet raus woos tuu ferpesere wilst (Kuk ti apsetse 5-6.)
5. (a) Wii khanst tuu ëntxlise was fer kristlich kwaliteet tuu ferpesere wilst? (b) Tëm noo tas pilt, wii tuut ti yiinger xwester sich aan xtrenge fer sayn tsiil trefe un mee empatii tsayche?
5 Tuu een spetsiifix tsiil xtele. Mach een kepeet un tenk iwer was fer teel fon tayn personaliteet must tuu ferpesere. Suuch een spetsiifix kwaliteet raus woos tuu ferpesere wilst. Tsum payxpiil: khenst tuu mee empatii orer een xtarke wunx fer tayn priiter helfe ëntwikele? Prauchst tuu friitlicher sin orer ti anere laychter fertsaye? Fiilaycht khanst tuu fer een ticht fraaynt ferlange wiis tuu tich ferpesere khanst. (Xpr. 27:6)
6. Wii khanst tuu tayn tsiil trefe fer een kwaliteet ëntwikele?
6 Xtreng tich aan fer tayn tsiil trefe. Een aat fer tas mache is ërnst xtutiire ti kwaliteet woos tuu ferpesere wilst. Xtel tich mool foer tas tayn tsiil is ti anere laychter fertsaye. Im xtant, khanst tuu leese un triwer noo tenke iwer piiplixe payxpiile fon layt woo ti anere laycht fertsayt hon un anere woo tas net kemacht hon. Tenk iwer Yeesus sayn payxpiil; tee hot ti anere laycht fertsayt. (Luk. 7:47, 48) Tee hot sich aach net traan kehal aan tëne sayn feeler, awer aan was tii mache khonte. Ti fariseer in Yeesus sayn taache waare kans anerste — tii hon “ti anere wii kaar niks aan kesiin”. (Luk. 18:9) Noo tas tuu aan tiise payxpiile triwer noo tenkst, froo tich: ‘Was tuun ich aan te anere siin? Aan was fer kwaliteete tuun ich raus suuche mich traan hale?’ Wëns net laycht fer tich is yemant fertsaye, mach een list fon te kuute kwaliteete fon tiise persoon. Tan, froo tich: ‘Wii teet Yeesus tiise persoon siin? Teet eyer tii fertsaye?’ Soo een sort xtuutyum khan uns helfe unser ketanke ënere. Am aanfang, khan es xweyer sin yemant woo uns pelayticht hot, fertsaye. Awer, tas wërt laychter fer uns wën mer uns wayter aan xtrenge fer uns ferpesere.
LËRN NUTSLICHE APILITEETE
Piit tich aan fer se lërne wii te Raych Saal uf phase (Kuk te apsats 7.) i
7. In was fer aate tuut Yeehoowa kwape aarwayter hayt penutse? (Xpriiche 22:29)
7 Een aner tsiil woos tuu xtele khanst is een nutslich apiliteet lërne. Tenk aan wii fiile aarwayter neetich sin fer ti Raych Saale, Konkrëse Saale un filyaale uf paue. Fiile fon tiise aarwayter hon sayn apiliteete kelërnt wii se mit priiter un xwestere woo fiil speryens hate kexaft hon. Wii tas pilt tsaycht, sin ti priiter un xwestere am lërne ti apiliteete woo neetich sin fer ti Konkrëse Saale un Raych Saale uf phase. Torich tiise un anere aate, is Yeehoowa, “te Kheenich fon eewichkheet”, un Yeesus, ‘te kheenich fon tëne woo wii kheenich rechiire’, kwape aarwayter am penutse fer wunerliche tinge mache. (1 Tim. 1:17; 6:15; lees Xpriiche 22:29. e) Meyer wole flaysich sin un unser apiliteete penutse fer eer fer Yeehoowa pringe, net fer uns selepst. (Yoo. 8:54)
8. Wii khanst tuu ëntxlise was fer apiliteet tuu lërne prauchst?
8 Tuu een spetsiifix tsiil xtele. Was fer apiliteet khanst tuu lërne? Tuu khanst tas fer ti elteste frooe orer fiilaycht fer tayn sirkuyt superintentent. Tsum payxpiil: wën se tich saan fer tayn apiliteet fer in lërne un xpreche ferpesere, ferlang tëne hilef fer se ëntxlise was fer spetsiifixe kwaliteet must tuu ëntwikele. Tan xtreng tich aan fer tas mache. Wii khanst tuu es hin kriin?
9. Wii khanst tuu tayn tsiil trefe fer een apiliteet lërne?
9 Xtreng tich aan fer tayn tsiil trefe. Iwerlee tich tas tuu wilst een peser leerer sin. Tuu khanst mit acht tas piichelche Say een pësere leeser un leerer xtutiire. Wëns tuu een insetsung in te fersamlung fon mite woch kriist, ferlang fer een pruuter woo fiil speryens hot tayn teel heere un tich itee kepe iwer wiis tuu tich ferpesere khanst, eeps tuu tas in te fersamlung foer xtelst. Tuu tich een kuut tsayt foer heyer fer tayn insetsunge in richte. Tan, tuun ti layt mërke tas tuu flaysich pist un yemant woo se traue khene. (Xpr. 21:5; 2 Kor. 8:22)
10. Kep een payxpiil iwer wii yemant een apiliteet wayter ferpesere khan.
10 Was khanst tuu mache wën tayn tsiil is een apiliteet lërne woo xweyer fer tich is? Kep net uf. Een pruuter woo Garry heest, khont net kuut leese. Tee tenkt sich noch traan aan wii ferxeemt eyer sich kexpiirt hot wii eyer in hart xtim in te fersamlunge kelees hot. Awer tee hot wayter sich aan kextrengt fer sich ferpesere. Yets, saat eyer tas, weeche ti iipung woo eyer kriit hot, khan eyer reete in Raych Saale un konkrëse mache!
11. Soo wii Timoteus, was tuut uns helfe mee in Yeehoowa sayn aarwayt mache?
11 Meecht Timoteus een mechtich kuute leerer un reetner kep sin? Ti Piipel saat es net. Awer sicher, hot Timoteus peser sayn flichte uf kephast wayl eyer Phaul sayn aanreet noo kang is. (2 Tim. 3:10) In te selwich aat, wën mer unser apiliteete ferpesere, kriin mer es hin mee in Yeehoowa sayn aarwayt mache.
SUUCH AATE FER TI ANERE HELFE
12. Wii hon ti anere priiter tich xon keholef?
12 Meyer kriin fiil nutse fon was ti priiter mache fer uns helfe. Tsum payxpiil: wën mer in een krankehaus sin, sin mer petanklich tas mer een pesuuch kriin fon te elteste woo tiine in te Krankehaus Ferpiinungs Komisyoon orer in te Krupe fer ti pasyente pesuuche. Wën mer propleeme in unser leepe mit mache, sin mer petanklich tas een liiplich elteste tsayt hoolt fer uns horiche un treeste. Un wën mer hilef prayche fer een Piipel xtuutyum fiire, sin mer froo tas een pyoneer mit fiil speryens in unser xtuutyum mit helft un uns aanunge kept. Tiise priiter un xwestere al helfe uns mit frooheet. Meyer khene tiise selwich frooheet xpiire wën mer uns aan piite fer unser priiter tiine. Tas is soo wii Yeesus kesaat hot: “Kepe pringt mee frooheet wii se kriin.” (Aph. 20:35) Wëns tuu wilst mee fer Yeehoowa mache in tiise orer anere aate, was khan tich helfe tayn tsiil trefe?
13. Fon was sole mer uns erinere wën mer een tsiil xtele?
13 Xtel net een tsiil woo net spetsiifix is. Tsum payxpiil: tuu khanst tenke: ‘Ich teet kërn mee in te kemaynt mache.’ Awer es khan xweyer sin se wise wii soo een sort tsiil trefe orer soo kaar ops tuu es xon ketrof host. Tes weeche, is es peser een taytlich un spetsiifix tsiil raus suuche. Tuu khanst soo kaar uf xraype tayn tsiil un wiis tuu tëm trefe wilst.
14. Warom sole mer net xtreng sin wën mer tsiile xtele?
14 Wën mer tsiile xtele, sole mer aach net xtreng sin. Warom? Wayl mer hon net te kanse kontrol iwer unser situatsyoon. Kuk mool was mit tëm aphostel Phaul pasiirt is. Tee hot keholef een nay kemaynt in te xtat fon Thesaloonika uf mache. Sicher waar tëm sayn tsiil tat plaype un tiise kriste helfe. Awer Phaul sayn keechner hon tëm ketswung fon te xtat faart keen. (Aph. 17:1-5, 10) Wën Phaul tat keplip weyer, hët eyer sayn priiter ins kefoer kextelt. Awer Phaul hot net uf kep. Xtats tas, hot eyer kemacht was eyer khont in sayn nay situatsyoon. Xpeeter, hot eyer Timoteus kexikt fer ti priiter in Thesaloonika helfe een xtarke klaape hon. (1 The. 3:1-3) Sicher, sin ti priiter in Thesaloonika froo kep tas Timoteus wilich waar fer se tiine woo es neetich waar!
15. Wii khene mer unser tsiil um truke wën unser situatsyoon sich ënert? Kep een payxpiil.
15 Meyer khene fiil fon Phaul sayn speryens in Thesaloonika lërne. Im xtant hon mer een tsiil kextelt, awer unser situatsyoon ënert sich un halt uns um tiise tsiil trefe. (Ekl. 9:11) Wën soo was mit tich pasiirt, say wilich fer een aner tsiil xtele woos tuu trefe khanst. Tas is was een pheyerche — Ted un Hiedi — kemacht hot. Wayl eene fon tëne een kesuntheet propleem kriit hot, muste se Petël lose. Awer weeche sayn liip tsu Yeehoowa, hon se anere aate kesuucht fer mee in Tëm sayn aarwayt mache. Eyerst, hon se aan kefang wii rekulaare pyoneere tiine. Mit te tsayt, sin se in kesetst kep wii spetsyaale pyoneere, un tan is Ted keiipt kep fer wii ersetse sirkuyt superintentent tiine. Tan, is een ënerung pasiirt aan wii alt khont yemant sin fer wii sirkuyt superintentent in kesets wëre. Ted un Hiedi hon kemërkt tas tii tsu alt waare fer tiise insetsung kriin. Tii sin traurich kep, awer tii wuste tas se khonte Yeehoowa in anere aate tiine. Ted saat: “Meyer hon kelërnt tas es net ploos een aat kept fer Yeehoowa tiine.”
16. Was fer lisyoon khene mer mit Kalater 6:4 lërne?
16 Meyer hon khee kontrol iwer ales was in unser leepe pasiirt. Tes weeche, weyer es net kuut tas mer tenke teete tas mer ploos weyert fer Yeehoowa hon weeche unser flichte. Meyer sole uns aach net mit te anere ferklayche woo ti flichte hon woo meyer kërn hëte. Hiedi leet aus: “Wëns tuu tayn leepe mit te anere sayns ferklaychst, ferliirst tuu tayn frooheet.” (Lees Kalater 6:4.) f Es is wichtich tas mer aate suuche fer ti anere helfe un Yeehoowa tiine. g
17. Wii khanst tuu es hin kriin mee tsu Yeehoowa mache?
17 Tuu kriist es hin mee tsu Yeehoowa mache, wëns tuu tayn leepe keweenlich halst un wëns tuu tich wech halst fon uneetiche xulte. Xtel kleene tsiile woo tich helfe kreeser tsiile trefe. Tsum payxpiil: wën tayn tsiil is een rekulaar pyoneer wëre, tuu khanst eyerst phaar moonate wii hilef pyoneer tiine. Wëns tuu wilst een ministeryaale tiiner wëre, im xtant khanst tuu mee in te preetich aarwayt xafe un ti kranke un alte in te kemaynt pesuuche. Ti speryens woos tuu yets kriin tuust, khan te weech uf mache fer anere flichte in te futuer hon. Say pextimt tayn pestes mache in yeete flicht woos tuu kriist. (Rom. 12:11)
Xtel een spetsiifix tsiil woos tuu trefe khanst (Kuk te apsats 18.) j
18. Was host tuu mit Beverley sayn payxpiil kelërnt? (Kuk aach tas pilt.)
18 Nimant is tsu alt fer tsiile xtele un trefe. Kuk mool tas payxpiil fon Beverley, een xwester woo 75 yoore alt waar. Weeche een xlim krankheet, waar es xweyer fer tii se laafe. Awer tii wolt mee mache fer in te kampanya fom Aantenke mit helfe. Soo hot se spetsiifixe tsiile kextelt. Un Beverley is aarich froo kep wii se sayn tsiil fon te kampanya ketrof hot. Tëne sayn aanxtrengung hot soo kaar anere uf kemuut aach xtram xafe in te preetich aarwayt. Yeehoowa kept fiil weyert fer ti aarwayt fon unser elter priiter un xwestere, soo kaar wën sayn situatsyoon tëne um halt mee mache. (Psal. 71:17, 18)
19. Was sin etliche tsiile woo mer xtele khene?
19 Xtel tsiile woos tuu trefe khanst. Tuu kwaliteete ëntwikele woo Yeehoowa kefale. Lërn apiliteete woo tich nutslicher lose fer Yeehoowa un sayn Orkanisatsyoon. Suuch aate fer tayn priiter un xwestere peser helfe. h Mit Yeehoowa sayn seechen, soo wii Timoteus, “wërts fer al taytlich tas tuu am foran keen pist”. (1 Tim. 4:15)
LIIT 38 Yeehoowa Halt tich Xtark
a Timoteus waar een kwape preeticher fon te kuute notisye. Soo wii soo, hot Phaul tëm uf kemuut wayter mee in Yeehoowa sayn aarwayt mache. Wayl Timoteus Phaul sayn aanreet aan keheert hot, is tee nutslicher fer Yeehoowa kep un hot sayn priiter un xwestere keholef. Pist tuu, soo wii Timoteus, wilich fer Yeehoowa tiine un tayn priiter un xwestere peser helfe? Kewis. Was fer tsiile tuun tich helfe tas hin kriin? Un was is tepay in tsiile xtele un trefe?
b TUU PESER FERXTEEN: Tepay in kaystliche tsiile, is ales was mer mache fer Yeehoowa peser tiine un tëm froo lose.
c (1te Timoteus 4:12-16) Los nii tas yemant tich niter xtelt wayls tuu yung pist. Xtats tas, say fer ti troye mënxe een payxpiil in te aat wiis tuu xprechst, wiis tuu tich aan xtelst, in te liip, im klaape, in moraalix raynheet. 13 Pis ich khome, tuu wayter tich aan xtrenge fer puuplix se leese, fer uf se muute, fer in se lërne. 14 Tuu net xlecht uf phase tas priwilëj woos tuu host, woos tuu torich een profetsii kriit host wën ti elteste khërperxaft tich in kesetst hot. 15 Tuu aan tiise tinge triwer noo tenke; hal tich kans aan tiise tinge aan; soo wërts fer al taytlich tas tuu am foran keen pist. 16 Tuu wayter acht iwer tich selepst un iwer tayn inlërnung kepe. Tuu tich aan tiise tinge wayter hale, wayl wëns tuu tas machst, tuust tuu tich selepst un tii woo tich aan heere rete.
d (Filiper 2:19-22) Ich hofe im Hër Yeesus aych klaych Timoteus xike, tas ich tan uf kemuut wëre wën ich kuute notisye iwer aych kriin. 20 Wayl ich hon nimant woo pextimt is wii eyer, woo iir wërklich uf phase tuut. 21 Wayl ti anere al keen noo tsu sayn aychne interese, net ti interese fon Yeesus Kristus. 22 Awer iir khënt ti pewaysung fon sayn kuut aarwayt: eyer hot mit mich wii sklaaw kexaft — soo wii een khint mit sayn papa — fer ti kuute notisye pekhant mache.
e (Xpriiche 22:29) Host tuu een man kesiin woo kuut sayn aarwayt macht? Tee xtelt sich uf foer kheeniche un net foer keweenliche layt.
f (Kalater 6:4) Tas yeete eene sayn aychne aktsyoone noo kukt. Un tan, tuut eyer sich fraye ploos weeche was eyer selepst kemacht hot, oone sich mit yemant aneres ferklayche.
g Kuk “Servir onde há mais necessidade” im puuch Organizados para Fazer a Vontade de Jeová, kapitel 10, apsetse 6-9.
h Kuk ti lisyoon 60, “Continue a fortalecer sua amizade com Jeová” in tëm puuch Los tich kuut keen im leepe fer imer!
