Een jurament is ‘een ërnst ferxpreche fer etwas mache, un ofts penutst Kot wii tsayer’. Een jurament khan aus kexproch orer uf kexrip sin.

Im xtant, khene etliche tenke tas es ferkheert is een jurament mache, wayl Yeesus kesaat hot: “Teyer solt kaar khee jurament mache. (…) Wën teyer ‘yaa’ saat, sol tas ‘yaa’ petayte; un wën teyer ‘nee’ saat, sol tas ‘nee’ petayte. Wayl te rest khomt fom Xlechte.” (Mat. 5:33-37) Kewis, wust Yeesus tas ti israeliiter, tëm noo tas mosayxe Kesets, muste juramente in etliche situatsyoone mache un tas etliche fon Yeehoowa sayn troye tiiner hate juramente kemacht. (Xee. 14:22, 23; Eeks. 22:10, 11) Tee wust aach tas te aychne Yeehoowa hat juramente kemacht. (Hep. 6:13-17) Tes weeche, wolt Yeesus net saan tas mer sole nii een jurament mache. Xtats tas, hot eyer ti layt aan kesaat fer khee jurament mache iwer tinge woo net wichtich orer neetich sin. Meyer sole imer mache was mer ferxpreche, wayl tas is was Yeehoowa fon uns waart.

Tan, was solst tuu mache wën se fer tich ferlange fer een jurament mache? Eyerst: say tich sicher tas tuu mache khanst was tuu ferxproch host. Wëns tuu net sicher pist, es weyer peser te jurament net mache. Ti Piipel saat: “Es is peser khee jurament mache wii een mache un net erfiile.” (Ekl. 5:5) Tsweet: kuk etliche piiplixe funtamente noo woo mit tëm jurament phase un tan mach een ëntxlus tëm noo tayn keiipt kewise. Was sin etliche fon tiise piiplixe funtamente?

Etliche juramente keen net keeche Yeehoowa sayn wile. Tsum payxpiil: wën een man un een fraa woo Yeehoowa sayn Tsayer sin sich hayrate, tuun se een ferxpreche eene fer te aner mache. Tiise ferxpreche is een sort jurament. Foer Kot un anere tsayer, tuun te man un ti fraa ferxpreche tas se sich naner liipe un respektiire tuun, un tas se tas mache tuun “ti tsayt woo ti tswaay leepe tuun”. (Fiilaycht, etliche woo sich hayrate, tuun net tiise kenaue wërter penutse; awer noch soo, wën se sich hayrate, tuun se een ferxpreche foer Kot mache.) Noo tëm, wëre se pekhant kemacht wii man un fraa un tii sole ferhayrat plaype sayn leepe lang. (Xee. 2:24; 1 Kor. 7:39) Tiise ferxpreche is richtich un xtimt mit Kot sayn wile.

Etliche juramente keen keeche Yeehoowa sayn wile. Tsum payxpiil: een woere krist teet nii een jurament mache fer een lant mit wafe xitse orer fer sayn klaape aan Kot uf kepe. Tas mache teet keeche Kot sayn kesetse keen. Ti kriste sole “khee teel fon te welt” sin; tes weeche, khene mer uns net rin mexe in te welt sayn sache orer kriiche. (Yoo. 15:19; Isa. 2:4; Tya. 1:27)

Kepts juramente woo yeete eene mus, tëm noo sayn aychne kewise, ëntxlise se mache orer net. Als mool, eep mer ëntxlise een jurament  mache orer net, mise mer triwer noo tenke aan Yeesus sayn aanreet fer “tsurik tsum Sësar petsaale was tsum Sësar keheert, awer tsu Kot was tsu Kot keheert”. (Luk. 20:25)

Tsum payxpiil: xtel tich mool foer tas een krist wil een pasaport mache orer een pewooner fon een aner lant sin. Awer tee kriit tsum wise tas fer tas hin kriin, mus eyer een jurament fon leaaliteet mache. Wën in tiise lant, te jurament fon leaaliteet een ferxpreche is fer etwas mache woo keeche Kot sayn kesetse keet, tëm sayn kewise — woo tëm noo te Piipel keiipt is —, teet tëm net erlaupe tiise jurament mache. Awer fiilaycht, tuut ti rechiirung tëm erlaupe ënerunge in te wërter fon tiise jurament mache, tas sayn kewise net kexteert is.

Khan sin tas een jurament fon leaaliteet mache woo keënert kep is, xtimt mit tëm funtament woo in Romaaner 13:1 xteet, woo saat: “Yeete eene sol sich unich ti autoriteet fon te heechere autoriteete hale.” Tes weeche, khan een krist ëntxlise tas es net ferkheert is ferxpreche etwas se mache woo Kot xon saat tas ti kriste mache mise.

Es is aach wichtich tayn kewise, woo tëm noo te Piipel keiipt is, aan heere wën se tich ferlange fer een tings penutse orer fer etwas mache wëns tuu een jurament machst. Ti friirixe romaaner un skiiter hon sayn xwaarte penutst fer juramente mache; soo, hon se hilef aan kehal fer een kot fon kriich. Tas hot wii een karantii ketiint tas se mache teete was se ferxproch hon. Ti kreeker hon ti hënt tsum himel keheep wën se een jurament kemacht hon. Mit tas, hon se erkhënt tas es een kot kept woo peopacht was kesaat un kemacht is un mit weem ti mënxe een aprechnung mache mise.

Kewis, een tiiner fon Yeehoowa teet nii een tings penutse woo tas lant representiirt un woo mit te falx aanpeetung ferpuun is fer een jurament mache. Awer was solst tuu mache wën se tich in een kericht ferlange fer tayn hant uf te Piipel tuun un een jurament mache fer ti woerheet saan? In tiise situatsyoon, fiilaycht tuust tuu ëntxlise tas mache, wayl ti Piipel xprecht iwer troye layt woo etwas spetsiifix kemacht hon wën se een jurament kemacht hon. (Xee. 24:2, 3, 9; 47:29-31) Es is wichtich tich erinere tas, wëns tuu soo een jurament machst, pist tuu foer Kot am ferxpreche tas tuu ti woerheet saan tuust. Tuu must fërtich sin fer ti woerheet saan fer yeete frooch woo se tich mache.

Meyer kepe fiil weyert fer unser fraayntxaft mit Yeehoowa. Tes weeche, sole mer peete un ërnst triwer noo tenke iwer kwalkee jurament woo se ferlange fer uns se mache. Meyer sole uns sicher sin tas tiise juramente net keeche unser kewise orer piiplixe funtamente keen. Un wëns tuu ëntxlist een jurament mache, must tuu tas in hale. (1 Phe. 2:12)