XTUUTYUM ARTIKEL 19
Ferxtërk tayn klaape aan Kot sayn ferxpreche fon een nay welt
“Wën [Yeehoowa] was saat, tuut eyer es net mache?” (NUUMERE 23:19)
LIIT 142 Ti hofnung halt uns fest
WAS TUUN MER SIIN? a
1-2. Was mise mer mache soo lang wii mer ti nay welt waarte?
MEYER kepe fiil weyert tsu Yeehoowa sayn ferxpreche iwer een kerecht nay welt woo tiise xlecht welt ersetse tuut. (2 Phe. 3:13) Opwool mer wise net wanee tas pasiire tuut, was mer uf te welt hayt siin tsaycht tas mer mise net fiil lënger waarte. (Mat. 24:32-34, 36; Aph. 1:7)
2 Soo lang wii mer waarte, ekaal wii lang mer xon in te woerheet sin, mise mer unser klaape aan tiise ferxpreche ferxtërke. Warom? Wayl soo kaar een xtarke klaape khan sich ferxweeche. Te aphostel Phaul hot in woerheet kesaat tas te klaape ferliire, is ti “sint woo uns laycht in wikelt”. (Hep. 12:1) Tas unser klaape sich net ferxweecht, mise mer ofts noo kuke ti pewaysunge woo tsayche tas ti nay welt klaych khomt. (Hep. 11:1)
3. Was tuun mer in tiise artikel siin?
3 Wii khene mer unser klaape ferxtërke aan Yeehoowa sayn ferxpreche iwer een nay welt? In tiise artikel, siin mer 3 aate: (1) triwer noo tenke aan tëm fray khaaf opfer, (2) aan Kot sayn kraft tenke un (3) tinge mache woo uns tichter pay Kot xafe. Tan tuun mer siin wii Yeehoowa sayn pexeet fer Hapakuk unser klaape hayt ferxtërke tuut. Awer fer aan fange, wole mer siin etliche situatsyoone woo mer fiilaycht yets mit mache, woo een xtarke klaape aan te nay welt ferlange.
SITUATSYOONE WOO EEN XTARKE KLAAPE FERLANGE
4. Was fer ëntxlise ferlange een xtarke klaape?
4 Yeete taach, mache mer ëntxlise woo een xtarke klaape ferlange. Tsum payxpiil: meyer mache ëntxlise iwer keselxaft, ferkniichung, xuul, hayrat, khiner un aarwayt. Es weyer kuut uns selepst frooe: ‘Tuun mayn ëntxlise tsayche tas ich mich sicher sin tas tiise sisteem khorts tauert un wërt klaych mit Kot sayn nay welt ersetst? Orer tuun ich ti selwiche ëntxlise mache wii tii woo net klaape tas se fer imer leepe khene?’ (Mat. 6:19, 20; Luk. 12:16-21) Meyer tuun ti peste ëntxlise mache wën mer unser klaape ferxtërke tas ti nay welt ticht is.
5-6. Warom mise mer een xtarke klaape hon wën mer propleeme mit mache? Mach een ferklaychung.
5 Meyer mache aach proope mit woo een xtarke klaape ferlange. Tas khent yachtung, xlime krankheete orer was aneres sin woo uns oone muut lost. Am aanfang, fiilaycht xpiire mer tas mer khene te propleem aus hale. Awer soo sorte propleeme tuun ofts lang tauere. Soo meyer mise een xtarke klaape hon fer aus hale un wayter Yeehoowa mit frooheet tiine. (Rom. 12:12; 1 Phe. 1:6, 7)
6 Torich een proop, fiilaycht xpiire mer tas Kot sayn nay welt nii khome tuut. Wil tas saan tas unser klaape xwach is? Net imer. Kuk mool een ferklaychung. In te mite fon een xtarke winter, im xtant xpiire mer tas te somer nii khome tuut. Awer eene taach, khomt te somer. Kraat soo, wën mer aarich traurich sin, khene mer xpiire tas ti nay welt nii khome tuut. Awer wën unser klaape xtark is, wise mer tas ti nay welt khomt wayl Yeehoowa tas ferxproch hot. (Psal. 94:3, 14, 15; Hep. 6:17-19) Mit tiise sicherheet, khene mer Yeehoowa sayn aanpeetung wayter im eyerste plats xtele.
7. Keeche was fer aanxtelung mise mer uns uf phase?
7 Meyer mise aach een xtarke klaape hon wën mer preetiche keen. Fiile layt fer weem mer preetiche tenke tas ti kuute notisye iwer Kot sayn nay welt sin tsu kuut fer woer sin. (Mat. 24:14; Ese. 33:32) Meyer mise uf phase fer net soo een sort aanxtelung iwer Yeehoowa sayn ferxpreche hon. Tes weeche mise mer imer unser klaape ferxtërke. Wole mer 3 aate siin wii mer tas mache khene.
TUU AAN TËM FRAY KHAAF OPFER TRIWER NOO TENKE
8-9. Triwer noo tenke aan tëm fray khaaf opfer khan unser klaape ferxtërke. Wii?
8 Een aat wii mer khene unser klaape ferxtërke, is aan tëm fray khaaf opfer triwer noo tenke. Tas fray khaaf opfer is een karantii tas Yeehoowa sayn ferxpreche erfiile tuut. Wën mer triwer noo tenke aan warom Yeehoowa tas fray khaaf opfer kep hot un was too tepay is, ferxtërke mer unser klaape tas Kot sayn ferxpreche fon eewiche leepe in een nay welt wërt sicher erfiilt. Warom khene mer tas saan?
9 Fer tas fray khaaf opfer kepe, hot Yeehoowa sayn eyerste kepoerne Soon — sayn tichtste fraaynt — fom himel kexikt fer wii eene perfekte mënx uf te welt khome. Wii Yeesus uf te eyert waar, hot eyer ale sorte xwiirichkheete mit kemacht. Tee hot aach kelit un een xlim toot kehat. Yeehoowa hot wërklich een tayer prays petsaalt! Unser liipliche Kot hët nii kelos sayn liipe Soon layte un xtërpe ploos tas mer khente een peser leepe torich een khorts tsayt hon. (Yoo. 3:16; 1 Phe. 1:18, 19) Wayl Kot soo een hooch prays petsaalt hot, tuut eyer sicher uns eewiche leepe in te nay welt kepe.
TENK AAN KOT SAYN KRAFT
10. Tëm noo Ëfeser 3:20, was khan Yeehoowa mache?
10 Een tsweet aat wii mer khene unser klaape ferxtërke, is aan Yeehoowa sayn kraft tenke. Tee hot ti kraft fer se erfiile ales was eyer ferxprecht. Es is woer tas fiile layt hayt tenke tas fer imer leepe in een nay welt is unmeechlich fer ti mënxe. Awer Yeehoowa tuut ofts tinge ferxpreche woo ti mënxe nii mache khente. Tee khan tas mache wayl eyer te Ale Mechtiche Kot is. (Yoop 42:2; Mar. 10:27) Sicher teete mer net waarte tas soo een sort Kot keweenliche ferxpreche mache teet! (Lees Ëfeser 3:20.) b
11. Kep een payxpiil fon Kot sayn wunerliche ferxpreche. (Kuk te khaste “ Etliche wunerliche ferxpreche woo sich erfiilt hon”.)
11 Kuk mool etliche tinge woo Yeehoowa fer sayn folek in te friirixe tsayte ferxproch hot woo unmeechlich aus kesiin hon. Tee hot fer Apraham un Sara kesaat tas se een soon kreechte, opwool se xon alt waare. (Xee. 17:15-17) Tee hot aach fer Apraham kesaat tas sayn nookhomer tas lant fon Kanaan kreechte. Torich ti fiile yoore woo Apraham sayn nookhomer — ti israeliiter — sklaawe im Ejipt waare, im xtant hots aus kesiin tas tiise ferxpreche sich nii erfiile teet. Awer es hot sich erfiilt. Fiile yoore xpeeter, hot Yeehoowa fer Elisapët kesaat tas se een khint kreecht, opwool se xon alt waar. Tee hot aach fer Maria — een yung fraa — kesaat tas se Tëm sayn aychne Soon kreecht. Tas teet een ferxpreche erfiile woo Yeehoowa tausente yoore tsurik, im Eetem kaate, kemacht hat. (Xee. 3:15)
12. Was fer sicherheet iwer Kot sayn kraft kepe uns Yosuee 23:14 un Isayas 55:10, 11?
12 Wën mer tenke aan al ti ferxpreche woo Yeehoowa kemacht hot un wii eyer tëne erfiilt hot, mërke mer tas eyer fiil kraft hot. Tas ferxtërkt unser klaape aan tëm ferxpreche fon een nay welt. (Lees Yosuee 23:14; c Isayas 55:10, 11. d) Un een xtarke klaape lost uns peser foer perayt fer anere helfe se ferxteen tas ti nay welt woo Kot ferxproch hot, net een traam is. Iwer te nay himel un ti nay eyert, hot Yeehoowa selepst kesaat: “Tiise wërter sin troy un woer.” (Apo. 21:1, 5)
MACH TINGE WOO TICH TICHTER PAY KOT XAFE
TI FERSAMLUNGE
Wii khan tiise aktiwiteet tayn klaape ferxtërke? (Kuk te apsats 13.)
13. Wii khene ti fersamlunge unser klaape ferxtërke?
13 Een trit aat fer unser klaape ferxtërke, is tinge mache woo uns tichter pay Kot xafe. Tenk, tsum payxpiil, wii fiil nutse mer kriin torich ti fersamlunge. Anna, e woo torich ti yoore fiile flichte in te fol tsayt tiinst hat, saat: “Ti fersamlunge helfe mich een xtarke klaape hale. Soo kaar wën te reetner net soo een kuute leerer is orer niks nayes saat, tuun ich ofts was heere woo mich helft ti Piipel peser ferxteen; un tas ferxtërkt mayn klaape.” Unser klaape khan aach xtërker wëre wën mer ti komentaare fon unser priiter heere. (Rom. 1:11, 12; 10:17)
TI PREETICH AARWAYT
Wii khan tiise aktiwiteet tayn klaape ferxtërke? (Kuk te apsats 14.)
14. Wii tuut ti preetich aarwayt unser klaape ferxtërke?
14 Meyer ferxtërke aach unser klaape wën mer in te preetich aarwayt xafe. (Hep. 10:23) Barbara, woo Yeehoowa xon mee wii 70 yoore tiint, saat: “Ti preetich aarwayt hot imer mayn klaape ferxtërkt. Woo mee ich mit te anere iwer Yeehoowa sayn wunerliche ferxpreche fertseele, woo xtërker wërt mayn klaape.”
TAS PERSEENLICH XTUUTYUM
Wii khan tiise aktiwiteet tayn klaape ferxtërke? (Kuk te apsats 15.)
15. Wii tuut tas perseenlich xtuutyum unser klaape ferxtërke? (Kuk aach ti pilter.)
15 Es kept noch etwas woo unser klaape ferxtërkt: tas perseenlich xtuutyum. Susan saat tas fer tëne is kuut se pleene was se xtutiire tuut. Tii saat: “Suntaach, tuun ich Te Wachthorm fon te neekste woch xtutiire. Moontaach un tiinstaach, tuun ich ti mitewoch fersamlung in richte. Ti anere taache, tuun ich was aneres woo mich kefalt xtutiire.” Wayl Susan sayn xtuutyum ruutin halt, tuut se sayn klaape imer xtark hale. Irene, woo xon fiile yoore in te haupst sets tiint, saat tas piiplixe profetsiie xtutiire, ferxtërkt sayn klaape. Tii saat: “Ich fine es wunerlich tas Yeehoowa sayn profetsiie erfiile sich soo kaar in te kleenichkheete.” f
“TII TUUT SICH OONE TSWAYFEL ERFIILE”
16. Warom tuun Yeehoowa sayn wërter fer Hapakuk uns hayt helfe? (Hepreeyer 10:36, 37)
16 Etliche fon Yeehoowa sayn tiiner sin xon een lang tsayt tas ën fon tiise welt am waarte. Es khan aus siin tas tas ën is tsu fiil am tauere fer se khome. Awer Kot wees wii sayn tiiner sich xpiire tuun. Tee hot fer te profeet Hapakuk tiise sicherheet kep: “Ti wisyoon is noch fer ti pextimt tsayt. Un tii keet flot richt tsu sayn ën, un tuut net liie. Aach wën tii lang tauert, tuu uf se waarte! Wayl tii tuut sich oone tswayfel erfiile. Tii tuut sich net ferxpeete!” (Hap. 2:3) Hon Kot sayn wërter ploos Hapakuk keholef orer khene se uns hayt aach helfe? Yeehoowa hot te aphostel Phaul kelenkt tiise wërter fer ti kriste aan wëne, woo ti nay welt hërtslich am waarte sin. (Lees Hepreeyer 10:36, 37.) g Yawool, meyer khene uns sicher sin tas, soo kaar wën mer tenke tas Kot sayn ferxpreche fer uns rete tsu fiil am tauere is fer sich erfiile, tuut tas “sich oone tswayfel erfiile. [Tas] tuut sich net ferxpeete!”
17. Wii hot een xwester te aanreet woo Yeehoowa fer Hapakuk kep hot, aan kewënt?
17 Fiile fon Yeehoowa sayn tiiner tuun Kot sayn aanreet fer Hapakuk aan wëne. Etliche sin xon fiile yoore am waarte. Louise, tsum payxpiil, hot aan kefang Yeehoowa tiine in 1939. “In tëne tsayt — saat se —, hon ich ketenkt tas te Armaxeton khome teet eep ich fërtich mit te Mitel Xuul weyer. Tas is net pasiirt… Torich ti yoore, ti kexichte in te Piipel leese iwer layt woo kewaart hon Yeehoowa sayn ferxpreche erfiile, tuut mich helfe tas selwiche mache. Ich leese iwer Noee, Apraham, Yoosef un anere woo een lang tsayt kewaart hon fer se kriin ti peloonung woo Yeehoowa ferxproch hat. Imer klaape tas ti ferxpreche sich erfiile tuun, helft mich un anere ti sicherheet hon tas ti nay welt ticht is.” Fiil anere, woo Yeehoowa xon een lang tsayt tiine, xtime too temit.
18. Ti kriatsyoon peopachte khan unser klaape aan te nay welt ferxtërke. Wii?
18 Es is woer tas ti nay welt noch net too is. Awer tenk aan etliche tinge woo xon too sin: ti xtërne, ti peem, ti tiere un ti mënxe. Nimant teet tswayfele tas tiise tinge wërklich eksistiire, opwool es waar een tsayt woo se net eksistiirt hon. Tii sin yets too wayl Yeehoowa se kemacht hot. (Xee. 1:1, 26, 27) Unser Kot hot aach ferxproch tas eyer een nay welt mache tuut. Tee tuut tiise ferxpreche erfiile. In te nay welt, tuun ti layt eewiche leepe hon, mit perfekt kesuntheet. Meyer khene uns sicher sin tas, in Kot sayn pextimt tsayt, tuut ti nay welt eksistiire soo wii tas Uniwërsum um uns rom. (Isa. 65:17; Apo. 21:3, 4)
19. Wii khanst tuu tayn klaape ferxtërke?
19 Soo lang wii ti nay welt noch net too is, mach ales was tuu khanst fer tayn klaape ferxtërke. Say petanklich fer tas fray khaaf opfer. Tenk iwer Yeehoowa sayn kraft. Mach tinge woo tich tichter pay Yeehoowa xafe. Wëns tuu tas machst, khanst tuu tswixich tëne sin “woo torich te klaape un ti ketult, ti ferxpreche ërpe”. (Hep. 6:11, 12; Rom. 5:5)
LIIT 139 Siist tuu tich xon in te Naye Welt?
a Fiile hayt klaape net aan te Piipel sayn ferxpreche fon een nay welt. Tii tenke tas es ploos een traam is. Awer meyer khene uns sicher sin tas al Yeehoowa sayn ferxpreche sich erfiile tuun. Noch soo, mise mer uns aan xtrenge fer unser klaape xtark hale. Wii khene mer tas mache? Tiise artikel leet tas aus.
b (Ëfeser 3:20) Un tsu tee, woo torich sayn kraft — woo in uns xaft — khan fiil mee mache wii mer ferlange orer wii mer uns foer xtele khene,
c (Yosuee 23:14) “Palt tuun ich xtërpe, un iir wist kans kenau, fon ayer kans hërts un kans seel, tas ti kanse kuute ferxpreche woo Yeehoowa fer aych kemacht hot, hon sich kenau erfiilt. Tii al hon sich fer aych erfiilt. Khee eensich wort is keplip oone sich erfiile.
d (Isayas 55:10, 11) Wayl, soo wii te reen un te xnee fom himel runer fale un tuun net tsurik khome eep se ti eyert kans nas mache un mache tas tii fruchtpar wërt un pliie tuut, un soo kept se soome fer tii woo seeye tuun un proot fer tii woo ese tuun, 11 soo wërt tas wort sin woo fon mayn maul raus khomt. Es tuut net tsurik tsu meer khome oone sich erfiile, awer es is sicher tas es macht was mich kefalt, un tuut tas opjetiiw, fer tas woo ich se kexikt hon, sicher erfiile.
e Etliche naame waare keënert.
f Fiile artikele iwer piiplixe profetsiie khene kefun wëre unich tas theema “Profecias” im Índice das Publicações da Torre de Vigia. Kuk, tsum payxpiil, te artikel “O que Jeová prediz se cumpre” in A Sentinela 1te Yanuer fon 2008.
g (Hepreeyer 10:36, 37) Wayl teyer mist aus hale fer Kot sayn wile fërtich mache un tan siin ti erfiilung fon Sayn ferxpreche. 37 Wayl, ploos “noch een kleen pisye tsayt”, un “tee woo khome tuut, khomt, un tee tuut sich net ferxpeete”.
