1. Warom kepe mer komentaare in te fersamlunge?

 WAROM keen mer tsu te fersamlunge? Hauptseechlich fer Yeehoowa loope, awer aach fer uns naner uf muute in tiise letste taache. (Psal. 26:12; 111:1; 1 The. 5:11) Wën mer unser hant heepe un komentaare kepe, sin mer tiise 2 tinge am mache.

2. Wanee khene mer komentaare in te fersamlunge kepe?

² Yeete woch, hon mer oportuniteete fer komentaare in unser fersamlunge kepe. In te wochën, tsum payxpiil, khene mer komentaare kepe in Te Wachthorm xtuutyum. In unser mitewoch fersamlung, khene mer komentaare kepe in te teele woo frooche kemacht wëre, soo wii Suuch wunerliche tinge fon te Piipel un tas Kemaynt Piipel xtuutyum.

3. (a) Was fer kefoore khene mer mit mache wën mer komentaare kepe? (b) Wii khan Hepreeyer 10:24, 25 uns helfe?

³ Meyer al wole Yeehoowa loope un unser priiter un xwestere uf muute. Awer wën mer antworte kepe, khene mer phaar kefoore mit mache. Khan sin tas mer uns ëngstlich xpiire fer komentaare kepe; orer im xtant hon mer een xtark wunx fer komentaare kepe, awer ti priiter tuun uns net imer ruufe wën mer unser hant heepe. Was khan uns helfe mit tiise kefoore um keen? Phaul sayn priif fer ti hepreeyer khan uns helfe ti antwort fine. Wii eyer kexrip hot iwer wii wichtich es is uns fersamele, hot eyer kesaat tas mer sole uns konsentriire aan “uns naner uf muute”. (Lees Hepreeyer 10:24, 25.) b Soo kaar mit een keweenlich komentaar, woo unser klaape tsaycht, khene  mer ti anere uf muute. Wën mer uns too traan tenke, es helft uns net soo ëngstlich plaype fer ti hant heepe. Un wën mer net imer keruuft sin, khene mer froo plaype wayl anere in te kemaynt ti xans hon fer een komentaar kepe. (1 Phe. 3:8)

4. Iwer was fer 3 phunkte tuun mer in tiise artikel xpreche?

⁴ In tiise artikel, tuun mer iwer 3 phunkte xpreche. Eyerst tuun mer siin wii mer khene uns naner uf muute in een kleen kemaynt, wën es weenich layt kept fer komentaare kepe. Tan tuun mer siin wii mer uns naner uf muute khene in een kroos kemaynt, woo fiile ti hant heepe fer antworte kepe. Tsum xlus, tuun mer siin wii mer ti anere uf muute khene torich was mer saan wën mer komentaare kepe.

5. Wii khene mer uns naner uf muute wëns weenich layt in te kemaynt kept?

⁵ In een kleen kemaynt orer krup, kepts net soo fiile priiter woo ti hant heepe, woo te fiirer raus suuche khan. Als mool mus eyer een pisye waarte pis ti priiter sich aan meele. Wën soo was pasiirt, khan ti fersamlung leetich aus siin, un sicher tas tuut net uf muute. Was khanst tuu mache? Say wilich fer tayn hant ofts heepe. Soo tuust tuu ti anere uf muute aach eftas komentiire.

6-7. Was khan tich helfe net soo nerwees plaype fer komentaare kepe?

⁶ Un wën komentaare kepe tich nerwees lost? Fiile xpiire sich soo. Awer fer tayn priiter un xwestere mee uf muute, was mënst tuu aate suuche fer net soo nerwees plaype?

⁷ Fiilaycht es khan tich helfe etliche itee kuke woo xon in anere etitsyoone fon Te Wachthorm foer khom sin. c Tsum payxpiil: tuu tich kuut foer perayte. (Xpr. 21:5) Woo peser tuu te artikel khënst, woo laychter wërts fer tich sich kuut fine fer komentaare kepe. Los aach tayn komentaare khorts. (Xpr. 15:23; 17:27) Tuu tuust net soo nerwees plaype wëns tuu een khorts komentaar kepst. Een komentaar mit eene orer tswaay itee khan laychter sin fer tayn priiter un xwestere ferxteen wii een lang komentaar mit fiile itee. Wëns tuu een khorts komentaar kepst mit tayn aychne wërter, tuust tuu tsayche tas tuu tich kuut foer perayt host un tas tuu te artikel kuut ferxtan host.

8. Wii siit Yeehoowa unser aanxtrengung fer unser pestes kepe?

⁸ Un wëns tuu fersuuchst tiise itee aan wëne, awer noch soo wërst tuu nerwees fer mee wii eene orer tswaay komentaare kepe? Say tich sicher tas Yeehoowa fiil weyert kept fer tayn aanxtrengung fer tayn pestes mache. (Luk. 21:1-4) Unser pestes mache petayt net een iwerxweyer last iwer uns tuun — een last woo mer net nëme khene. (Fili. 4:5) Soo, ëntxlis was tuu mache khanst, xtel tas tsiil fer tas trefe un ferlang Yeehoowa sayn hilef im kepeet fer tayn hërts in ruu lose. Fer aan fange, khanst tuu tas tsiil xtele fer een khorts komentaar kepe.

9. Warom khan tas xweyer sin komentaare in kroose kemaynte kepe?

⁹ Wën tayn kemaynt fiile puplikatoore hot, khanst tuu een aner kefoer mit mache.  Fiilaycht soo fiile priiter tuun sich aan meele fer komentaare kepe, tas ofts wërst tuu net keruuft. Danielle, d tsum payxpiil, tuut imer kërn komentaare in te fersamlung kepe. Fer tii, tas is teel fon sayn aanpeetung, een aat fer ti anere uf muute un aach fer sayn klaape aan te piiplixe inlërnunge ferxtërke. Awer wii se sich tsu een kreeser kemaynt kewanert hot, waar se net soo ofts keruuft — als mool, noch net een mool torich een kans fersamlung. “Ich sin traurich kep — saat se. — Ich hon kexpiirt wii wën ich een priwilëj ferloer hët. Wën tas noo un noo pasiirt, khan eene aan fange sich frooe ep te fiirer tas fer kërn kemacht hot.”

10. Wii khene mer unser xans ferkreese fer een komentaar kepe?

¹⁰ Host tuu tich xon soo wii Danielle kexpiirt? Wën yaa, fiilaycht xpiirst tuu tas es peser weyer uf kepe un ploos horiche. Awer los net noo tich aan meele fer een komentaar kepe! Was khanst tuu mache? Fiilaycht es khan tich helfe phaar komentaare fer yeete fersamlung foer perayte, net ploos een. Soo, wëns tuu net keruuft wërst am aanfang fom xtuutyum, kriist tuu anere oportuniteete soo lang wii ti fersamlung wayter keet. Wiis tuu tich foer peraytst fer Te Wachthorm xtuutyum, tenk aan wii yeete apsats mim theema fom artikel ferpun is. Wëns tuu tas machst, tuust tuu sicher phaar kuute komentaare hon fer torich tas xtuutyum kepe. Tuu khanst tich aach in richte fer komentaare kepe in apsetse woo iwer tiifer woerheete xpreche. (1 Kor. 2:10) Wayl se een pisye xweyerer sin fer aus leye, im xtant weenicher tuun sich aan meele fer antworte kepe. Awer khan sin tas, opwool tuu tiise itee aan kewënt host, wërst tuu net keruuft torich phaar fersamlunge. Was khanst tuu mache? Tuu khanst mit tëm fiirer foer te fersamlung xpreche un tëm saan was fer frooch tuu antworte wilst.

11. Was tuut Filiper 2:4 uns uf muute se mache?

¹¹ Lees Filiper 2:4. e Te aphostel Phaul waar kelenkt ti kriste uf muute ti interese fon te anere suuche. Wii khene mer tiise aanreet in te fersamlunge aan wëne? Meyer sole uns erinere  tas anere, soo wii uns, wole aach komentaare kepe.

12. Was is een kuut aat fer ti anere in te fersamlunge uf muute? (Kuk aach tas pilt.)

¹² Tenk mool noo: wëns tuu mit tayn fraaynte fertseelst, teest tuu soo fiil xpreche tas se net in te ray khome? Kewis net! Tuu wilst hon tas tii aach xpreche. Kraat soo, in te fersamlunge, meyer wole hon tas soo fiil layt wiis meechlich is antworte kepe. In woerheet, eene fon te peste aate fer unser priiter uf muute, is tëne een xans kepe fer iwer sayn klaape xpreche. (1 Kor. 10:24) Wole mer siin wii mer tas mache khene.

13. Was khene mer mache tas mee layt een xans kriin fer een komentaar kepe?

¹³ Een tings woo mer mache khene, is khortse komentaare kepe. Soo, mee layt kriin ti xans fer se xpreche. Ti elteste un anere puplikatoore woo speryens hon, khene tas payxpiil lose. Soo kaar wëns tuu een khorts komentaar kepst, tuu net iwer tsu fiile phunkte xpreche. Wëns tuu xprechst iwer ales was im apsats is, tuun weenicher phunkte iwrich plaype fer se komentiire. In tiise apsats, tsum payxpiil, sin 2 itee kep: khortse komentaare kepe un net tsu fiile phunkte aus leye. Wëns tuu te eyerste pist woo in kelaat wërt fer een antwort in tiise apsats kepe, was mënst tuu ploos eene fon te phunkte aus leye?

14. Was khan uns helfe ëntxlise wii ofts tuun mer ti hant heepe? (Kuk aach tas pilt.)

¹⁴ Say ferninftich wëns tuu ëntxlist wii ofts tuu tayn hant heepst fer komentaare kepe. Wën mer unser hant tsu ofts heepe, khan te fiirer sich ketswung xpiire fer uns noo un noo ruufe, opwool ti anere noch net een xans hate. Tas khent ti anere sayn muut xteele fer ti hant heepe. (Ekl. 3:7)

15. (a) Wii sole mer uns aan xtele wën mer net keruuft sin fer komentiire? (b) Wii khene ti fiirer tsayche tas se sich mit ale kaar khimere? (Kuk te khaste “ Wëns tuu te fiirer pist”.)

¹⁵ Wën fiile puplikatoore sich torich een  xtuutyum aan meele, khan sin tas mer net soo ofts komentiire wii mer kërn hëte. Im xtant tuut te fiirer uns als mool net ruufe. Tas khan uns traurich lose, awer wën soo was pasiirt, sole mer fersuuche uns net pelaytiche. (Ekl. 7:9)

16. Wii khene mer anere woo komentiire uf muute?

¹⁶ Wëns tuu net komentiire khanst soo ofts wiis tuu kërn hëst, was mënst tuu ti komentaare fon te anere heere un tëne noo te fersamlung loope? Tayn loop khan ti priiter soo fiil uf muute wii te komentaar woos tuu kepe teest. (Xpr. 10:21) Loop kepe is een aner aat wii mer uns naner uf muute khene.

17. (a) Wii khene ti eltere sayn khiner helfe kuute komentaare foer perayte? (b) Tëm noo te wiiteo, was fer sin ti 4 xrite fer een komentaar foer perayte? (Kuk ti noote.)

¹⁷ Wii noch khene mer uns naner uf muute in te fersamlunge? Wëns tuu khiner host, helf tëne sich foer perayte fer komentaare kepe, tëm noo sayn elter. (Mat. 21:16) Als mool is tas xtuutyum iwer ërnste sache — soo wii propleeme in te hayrat orer iwer een rayn  leepe nëme —, awer fiilaycht kepts eene orer tswaay apsetse woo tayn khiner komentiire khene. Lee tëne aach aus warom se net imer keruuft wëre wën se ti hant heepe. Soo tuun se sich net pelaytiche wën ti anere keruuft wëre, xtats tëne. (1 Tim. 6:18) f

18. Wën mer komentaare kepe, was mise mer mache fer net acht iwer uns selepst ruufe? (Xpriiche 27:2)

¹⁸ Meyer al khene komentaare foer perayte woo Yeehoowa loope un woo unser priiter uf muute. (Xpr. 25:11) Es is woer tas, als mool, khene mer een khorts perseenlich speryens fertseele, awer mer sole net tsu fiil iwer uns selepst xpreche. (Lees Xpriiche 27:2; g 2 Kor. 10:18.) Xtats tas, sole mer uns aan xtrenge fer uns konsentriire aan Yeehoowa, sayn Wort, un sayn folek. (Apo. 4:11) Kewis, wën te apsats een perseenlich antwort ferlangt, sole mer tas kepe. Te neekste apsats hot soo een sort frooch.

19. (a) Was wërt te resultaat sin wën mer uns mit al in te fersamlung khimere tuun? (Romaaner 1:11, 12) (b) Was host tuu te liipst iwer komentaare in te fersamlunge kepe?

¹⁹ Opwool es kept net xtrenge reekle iwer wii komentaare kepe, khene mer uns aan xtrenge fer uns naner uf muute. Fiilaycht khan tas petayte eftas komentaare kepe. Anere mool, khan tas petayte tsufriite sin mit te oportuniteet woo mer hon fer komentaare kepe un froo sin tas ti anere aach komentiire khene. Wën mer uns konsentriire aan te anere sayn interese in te fersamlunge, khene mer uns al ‘eene ti anere uf muute’. (Lees Romaaner 1:11, 12.) h