XTUUTYUM ARTIKEL 17
LIIT 111 Mer hon fiile tings fer uns fraye
Los nii tas kaystlich paratiis!
“Frayt aych un sayt imer froo weeche was ich am mache sin.” (ISAYAS 65:18)
WAS TUUN MER SIIN?
Lërn ti nutse woo mer kriin wayl mer im kaystlich paratiis sin un wii mer ti anere uf muute khene aach too rin khome.
1. Was is tas kaystlich paratiis un was wole mer nii mache?
ES IS meechlich een paratiis hayt too uf te eyert fine! Tas is fol layt — milyoone layt — woo woere friit hon un tas kuutes mache. Tiise layt wole nii fom paratiis raus keen un tii wole hon tas anere tsum paratiis khome. Iwer was sin mer am xpreche? Tas kaystlich paratiis. a
2. Warom khan ma saan tas tas kaystlich paratiis een wuner is?
2 Satanaas sayn welt is fol has, xlechtichkheet un kefoore. Soo, es is een wuner tas Yeehoowa een kaystlich paratiis in kextelt hot, woo Sayn folek khan in friit un eenichkheet woone. (1 Yo. 5:19; Apo. 12:12) Unser liipliche Kot mërkt wii fiil xaate tiise welt fer ti layt macht un tee kept ti neetich sicherheet fer sayn tiiner tas se khene tëm wayter froo aan peete. Ti Piipel pexraypt tas kaystlich paratiis wii een “xuts” un “een kaate mit fiil waser”. (Isa. 4:6; 58:11) Mit Yeehoowa sayn seechen, khene tii woo in tiise paratiis leepe sich froo un kexitst xpiire in tiise xweyere letste taache. (Isa. 54:14; 2 Tim. 3:1)
3. Wii hot Isayas 65 sich erfiilt in te friirixe tsayte?
3 Torich te profeet Isayas, hot Yeehoowa pexrip wii tas leepe in tiise kaystlich paratiis weyer. Meyer fine tiise pexraypung in Isayas 65. Ti wërter tat hon sich eyerst erfiilt in 537 F.K. In tiise tsayt, waare ti yuute woo sich peroyt hate, fon Papiloon pefrayt un tii khonte tsurik tsu sayn haymat lant keen. Yeruusalem un sayn thempel waare fernicht, awer Yeehoowa hot sayn folek keseechent un tëne keholef ti xtat noch mool xeen lose un te thempel wiiter penutse wii tas haupste plats fer Yeehoowa aan peete in Israël. (Isa. 51:11; Sak. 8:3)
4. Wii tuut Isayas 65 sich hayt se taach erfiile?
4 Een tsweete erfiilung fon Isayas sayn profetsii hot aan kefang in 1919 N.K. In tiise tsayt, sin Yeehoowa sayn tiiner fray kemacht kep fon Papiloon ti Kroos, woo al ti falxe relichyoone petayt. Tan hot tas kaystlich paratiis aan kefang sich ferkreese torich ti kans eyert. Flaysiche preeticher fom Raych hon fiile kemaynte uf kemacht un kristliche kwaliteete ketsaycht. Mëner un fraae woo friier wyolënt un imoraal waare, hon ti “nay personaliteet [aan ketsoo], woo tëm noo Kot sayn wile kemacht kep is”. (Ëfe. 4:24) Es is woer tas fiile fon te seechen woo Isayas pexrip hot, tuun sich im futuer, in te nay welt erfiile. Awer xon yets, kriin mer fiil nutse wayl mer im kaystlich paratiis sin. Was fer sin etliche fon tiise nutse? Un warom sole mer tas kaystlich paratiis nii lose? Wole mer tas yets siin.
WII XPIIRE SICH TI LAYT IM KAYSTLICH PARATIIS?
5. Tëm noo was ferxproch waar in Isayas 65:13, wii is ti situatsyoon im kaystlich paratiis?
5 Kesunt un sat. Isayas sayn profetsii hot ti kroos unerxiit ketsaycht tswixich tas leepe im kaystlich paratiis un aus tëm. (Lees Isayas 65:13.) b Yeehoowa kept fer sayn tiiner ales was se prayche tas se khene ticht pay tëm plaype. Meyer hon sayn hayliche kayst, sayn Wort ti Piipel, un fiile piiplixe puplikatsyoone. Tes weeche khene mer ‘ese, trinke un uns fraye’. (Kuk aach Apokalipsis 22:17.) Awer ti situatsyoon is kans anerste fer tii woo net im kaystlich paratiis sin. Tii tuun ‘hungernoot, torst un xaam mit mache’ — es wil saan, sayn kaystliche neetichkheete sin net uf kephast. (Amo. 8:11)
6. Wii tuut Yoël 2:21-24 pexraype tas kaystlich ese woo Yeehoowa uns kept un was fer nutse kriin mer fon tiise kexenke?
6 In Yoël sayn profetsii, hot eyer kexproch iwer neetiche tinge fom leepe — soo wii khërne, wayn un oliiwe eel — fer se tsayche tas Yeehoowa tuut krooshërtslich fer sayn tiiner kepe was se prayche, too tepay tas kaystlich esmitel. (Yoël 2:21-24) Tee macht tas torich ti Piipel, unser piiplixe puplikatsyoone, unser site un aach torich unser fersamlunge un konkrëse. Meyer khene yeete taach nutse too tefun kriin un tes weeche sin mer kesunt un kaystlich sat.
7. Warom tuut unser hërts sich kuut xpiire? (Isayas 65:14)
7 Froo un tsufriite. Kot sayn tiiner “tuun yukse fon frayt” wayl sayn hërts fol petanklichkheet tsu Yeehoowa is. (Lees Isayas 65:14.) c Unser hërts xpiirt sich kuut weeche ti ufmuutiche woerheete un ferxpreche woo in Kot sayn Wort xteen un weeche unser fest hofnung woo sich aan Yeesus sayn opfer xtaypt. Too triwer fertseele mit unser priiter un xwestere, lost uns wërklich froo. (Psal. 34:8; 133:1-3)
8. Was sin 2 wichtiche kwaliteete woo mer im kaystlich paratiis fine?
8 Tswaay wichtiche kwaliteete im kaystlich paratiis sin ti liip un ti eenichkheet fon Kot sayn tiiner. Tas helft uns uns foer xtele wii tas leepe in te nay welt wërt — een tsayt wën ti liip un eenichkheet fon Kot sayn folek noch kreeser wërt. (Kol. 3:14) Een xwester saat was se iwer Kot sayn tiiner kemërkt hot tas eyerste mool woo se tëne ketrof hot: “Ti frooheet waar ploos een traam fer mich; noch net mool in mayn familye waar ich froo. Tas eyerste mool woo ich kesiin hon ti layt sich wërklich liip tsayche, waar wii ich Yeehoowa sayn Tsayer khëne kelërnt hon.” Wën een persoon wil wërklich froo un tsufriite sin, mus se selepst “xmëke” wii tas leepe im kaystlich paratiis is. Ekaal was ti welt iwer Yeehoowa sayn tiiner saat, hon mer een kuute naame foer Tëm un foer al woo Tëm aan peete. (Isa. 65:15)
9. Was ferxprecht Isayas 65:16, 17 iwer ti tinge woo uns hayt phayn pringe?
9 In ruu. (Lees Isayas 65:16, 17.) d Isayas 65:14 saat iwer tii woo raus suuche ausm kaystlich paratiis plaype: “Teyer tuut xraaye wayl ayre hërts phayn xpiirt un tuut prile wayl ayre kayst ferproch is.” Kot sayn folek tuut aach phayn un propleeme mit mache, awer klaych ‘wëre tiise tinge ferkes un fon Kot sayn aue ferxtekelt’. Yeehoowa tuut tiise propleeme wech xafe un mit te tsayt, tuun mer uns ferkese ti phayn woo mer kexpiirt hon weeche tëne.
10. Warom pist tuu petanklich tas tuu teel fon Kot sayn Orkanisatsyoon pist? (Kuk aach tas pilt.)
10 Xon hayt, xpiire mer uns in ruu wën mer tsu unser fersamlunge keen. In tiise fersamlunge, lose mer uf sayt ti ëngstlichkheete woo khome weeche ti propleeme fon tiise welt. Meyer helfe aach unser priiter un xwestere sich in ruu xpiire wën mer kwaliteete soo wii liip, frooheet, friit, fraayntlichkheet un tsaamheet tsayche — kwaliteete woo fon Kot sayn kayst khome. (Kal. 5:22, 23) Meyer sin aarich petanklich tas mer teel fon Kot sayn Orkanisatsyoon sin. Tii woo im kaystlich paratiis plaype, tuun mit sayn aychne aue siin ti kans erfiilung fon Kot sayn ferxpreche iwer “naye himel un een nay eyert”.
Es is een seechen teel fon Kot sayn familye sin im kaystlich paratiis (Kuk te apsats 10.) h
11. Tëm noo Isayas 65:18, 19, wii xpiire mer uns wayl mer im kaystlich paratiis sin?
11 Petanklich un ufkemuut. Isayas leet aus warom mer sole uns fraye un “imer froo” sin im kaystlich paratiis: Yeehoowa hot tiise paratiis in kextelt. (Lees Isayas 65:18, 19.) e Soo, is es tsum ferxteen warom Yeehoowa uns penutst fer ti layt helfe fon te orkanisatsyoone fon tiise welt raus keen — woo soo wii een tesërt in kaystlich aat sin — un tsum kaystlich paratiis khome. Meyer sin froo weeche ti seechen woo mer hon wayl mer in te woerheet sin un meyer sin ufkemuut mit te anere too triwer fertseele. (Yee. 31:12)
12. Wii xpiirst tuu tich iwer tas ferxpreche woo in Isayas 65:20-24 xteet un warom?
12 Meyer sin aach petanklich un ufkemuut weeche ti hofnung woo mer hon wayl mer in tiise kaystlich paratiis leepe. Iwerlee tich ales was tuu siin un mache tuust in Kot sayn nay welt. Ti Piipel ferxprecht: “Tat, es wërt khee nëneche woo ploos phaar taache leepe tuut orer elter layt woo net sayn kanse yoore leepe tuun.” Meyer “tuun hayser paue un in tëne woone; un tuun traupe kriste plantse un tëne sayn friichte ese”. Meyer “tuun net umsonst xweyer xafe”, wayl mer wëre “fon Yeehoowa keseechent sin”. Tee ferxprecht uns een froo leepe kepe, mit een tswek. “Soo kaar eep [mer] aan hale”, tuut Yeehoowa xon wise was mer prayche un tee tuut “te wunx fon ales was lepeentich is” erfiile. (Isa. 65:20-24; Psal. 145:16)
13. Wii pexraypt Isayas 65:25 ti ënerunge woo ti layt mache wën se aan fange Yeehoowa tiine?
13 In friit un kexitst. Mit te hilef fon Kot sayn kayst, tii woo wyolënt, krop orer uneerlich waare, hon kroose ënerunge kemacht. (Lees Isayas 65:25.) f Tii hon sich fiil aan kextrengt fer sayn xlechte kwaliteete im xtich lose. (Rom. 12:2; Ëfe. 4:22-24) Sicher, Kot sayn tiiner sin net perfekt; soo meyer tuun wayter feeler mache. Awer Yeehoowa tuut “ale sorte mënxe” samer hale torich ti ferpiinung fon liip un friit — een ferpiinung woo niks ferpreche khan. (Tit. 2:11) Tas is een wuner woo ploos te Ale Mechtiche Kot mache khent.
14. Wii hot Isayas 65:25 sich erfiilt im leepe fon eene pruuter?
14 Khene ti layt wërklich sayn personaliteet ënere? Kuk mool tiise speryens. Eene man woo 20 yoore alt waar un xon ofts in kexpërt waar, hat een imoraalix un wyolënt leepe. Tee is in te katee khom wayl eyer hayser un khare kextool hot un weeche anere krime. Tee waar imer fërtich fer se khëmpfe. Wii eyer aan kefang hot iwer ti Piipel lërne un tsu te fersamlunge keen, hot eyer kemërkt tas eyer een opjetiiw fer sayn leepe kefun hat: Yeehoowa aan peete im kaystlich paratiis. Noo sayn taaf, hot eyer ofts ketenkt wii ti wërter fon Isayas 65:25 fer tëm kekilt hon. Friier waar eyer wyolënt soo wii een leep; yets waar eyer friitlich soo wii een lam.
15. Warom wole mer ti anere helfe mit uns im kaystlich paratiis sin un wii khene mer tas mache?
15 Isayas 65:13 fangt soo aan: “Soo saat te Soweraan Hër Yeehoowa.” Un tas letste teel fom wersikel 25 hot ti wërter: “Saat Yeehoowa.” Yawool, Kot selepst tuut tas saan un sayn ferxpreche tuun sich imer erfiile. (Isa. 55:10, 11) Tas kaystlich paratiis eksistiirt xon yets. Yeehoowa hot een familye fon aanpeeter woo wërklich ekstra is. Wayl mer teel fon tiise familye sin, hon mer hayt soo fiil friit wiis meechlich is un meyer xpiire uns sicher in tiise wyolënt welt. (Psal. 72:7) Tes weeche, wole mer soo fiil layt wiis meechlich is helfe tsu unser pruuterxaft khome. Fer tas hin kriin, mise mer uns traan hale in te aarwayt fer tisipele mache. (Mat. 28:19, 20)
WII KHENE MER TI ANERE UF MUUTE TSUM KAYSTLICH PARATIIS KHOME?
16. Was khan ti layt uf muute tsum kaystlich paratiis khome?
16 Yeete eene fon uns khan sayn teel mache fer tas kaystlich paratiis noch xeener fer ti anere lose. Fer tas hin kriin, mise mer Yeehoowa noo mache. Tee tswingt net ti layt tsu sayn Orkanisatsyoon khome. Xtats tas, tuut eyer ti layt mit liip “tsiie”. (Yoo. 6:44; Yee. 31:3) Eerliche layt woo Yeehoowa sayn liip un anere kwaliteete khëne lërne, sin natiirlich tsu tëm ketsoo. Wii khene unser kuute kwaliteete un xeen aanxtelung ti layt uf muute tsum kaystlich paratiis khome?
17. Wii khene mer ti layt uf muute tsum kaystlich paratiis khome?
17 Wën mer liiplich un kuut mit unser priiter un xwestere sin, tas khan ti layt uf muute tsum kaystlich paratiis khome. Wën ti layt tsu unser fersamlunge khome, wole mer hon tas se tas selwiche xpiire wii ti layt woo ti kemaynt in Korinto pesuucht hon. Tii hon kesaat: “Kot is wërklich tswixich aych.” (1 Kor. 14:24, 25; Sak. 8:23) Soo meyer mise wayter te aanreet aan wëne fer “friitlich eene mit te anere” sin. (1 The. 5:13)
18. Was khan ti layt uf muute tsu unser Orkanisatsyoon khome?
18 Meyer sole imer fersuuche unser priiter un xwestere siin wii Yeehoowa se siit. Fer tas hin kriin, mise mer uns traan hale aan sayn kwaliteete, net aan sayn imperfektsyoone. In woerheet, im futuer, tuun tiise imperfektsyoone net mee eksistiire. Meyer khene kwalkee propleem tswixich uns mit liip resolwiire wën mer imer ‘kuut eene mit te anere sin, hërtslich mitlaytich un uns krooshërtslich fertsaye’. (Ëfe. 4:32) Soo ti layt woo wole aach liiplich pehantelt wëre, wëre uf kemuut tsum kaystlich paratiis khome. g
PLAYP WAYTER IM KAYSTLICH PARATIIS
19. (a) Tëm noo te khaste “ Tii sin faart kang un yets tsurik khom”, was hon etliche kesaat wii se tsurik tsum kaystlich paratiis khom sin? (b) Was sole mer pextimt sin se mache? (Kuk aach tas pilt.)
19 Meyer tuun imer tanke wayl mer teel fom kaystlich paratiis sin! Es waar noch nii soo xeen un pewoont kewees un meyer sole wayter petanklich too teweeche sin. Yeete persoon woo wil sich kaystlich kesunt, froo, in ruu un kexitst xpiire, mus in tiise kaystlich paratiis rin khome un nii raus keen. Awer meyer mise uns uf phase, wayl Satanaas tuut sich aan xtrenge fer uns fom kaystlich paratiis ap lenke. (1 Phe. 5:8; Apo. 12:9) Los tas net pasiire! Wole mer uns wayter aan xtrenge fer unser xeen, phuer un friitlich kaystlich paratiis xitse!
Tii woo sich im kaystlich paratiis hale, tuun aach nutse kriin fom fiisix Paratiis, woo im futuer khomt (Kuk te apsats 19.)
WII TEEST TUU ANTWORTE?
-
Was is tas kaystlich paratiis?
-
Was fer seechen kriin mer wayl mer im kaystlich paratiis sin?
-
Wii khene mer anere uf muute tsum kaystlich paratiis khome?
LIIT 144 Hal tayne aue uf te seechne!
a TUU PESER FERXTEEN: Meyer sin in een “kaystlich paratiis” wën mer Yeehoowa in sicherheet un eenichkheet aan peete. In tiise paratiis, hon mer friit mit Yeehoowa un eene mit te anere.
b (Isayas 65:13) Tes weeche, soo saat te Soweraan Hër Yeehoowa: “Kukt! Mayne tiiner tuun ese, awer teyer tuut hungernoot mit mache. Mayne tiiner tuun trinke, awer teyer tuut torst mit mache. Mayne tiiner tuun sich fraye, awer teyer tuut xaam mit mache.
c (Isayas 65:14) Mayne tiiner tuun yukse fon frayt wayl sayne hërts sich kuut xpiirt, awer teyer tuut xraaye wayl ayre hërts phayn xpiirt un tuut prile wayl ayre kayst ferproch is.
d (Isayas 65:16, 17) Soo tas yeete eene uf te eyert woo een seechen fer sich selepst suucht wërt fon te Kot fon te woerheet keseechent. Un yeete eene uf te eyert woo een ferxpreche macht, tuut torich te Kot fon te woerheet ferxpreche. Wayl ti kanse traurichkheete fon te ferkangne yoore wëre ferkes; tii wëre fon mayn aue ferxtekelt. 17 Wayl kukt! Ich mache naye himel un een nay eyert; un ti ferkangne tinge wëre net mee erinert un tuun net mee ins hërts khome.
e (Isayas 65:18, 19) Tes weeche, frayt aych un sayt imer froo weeche was ich am mache sin. Wayl kuk mool! Ich tuun Yeruusalem mache wii een uersach fer sich fraye un sayn folek, wii een uersach fer froo sin. 19 Ich tuun mich mit Yeruusalem fraye un froo wëre weeche mayn folek. Tat, tuut ma net mee heere yemant am prile orer unruych am krayxe.”
f (Isayas 65:25) Te wolf un tas lam tuun mitsamer futer frese; te leep tuut wii te xtiier xtroo frese un te xlang tuut xtaap frese. Uf mayn kanse hayliche përich tuun se khee xaate un khee fernichtung mache”, saat Yeehoowa.
g Kuk te wiiteo Wii sin se yets? Alena Žitníková: Wii mayn traam sich erfiilt hot, im jw.org. Mërk ti seechen woo een xwester kriit hot wayl se im kaystlich paratiis is.
h PILT AUSLEYUNG: Fiile fertseele eene mit te anere in een fersamlung un kriin nutse too tefun, awer eene pruuter halt sich aleen.
