1. Wii waar Kot sayn folek orkanisiirt im eyerste yoer hunert?

 WËN Yeehoowa aarwayt fer sayn tiiner kept, wil eyer hon tas se tas orkanisiirt mache. (1 Kor. 14:33) Tsum payxpiil, Kot wil hon tas ti kuute notisye uf te kans eyert kepreeticht wëre. (Mat. 24:14) Yeehoowa hot Yeesus in kextelt fer tiise aarwayt uf phase un Yeesus hot sich sicher kelos tas es orkanisiirt kemacht is. Tsum payxpiil: in Yeruusalem, im eyerste yoer hunert, een krup elteste un aphostele hot ëntxlise kemacht woo al ti kemaynte kefolicht hon. (Aph. 15:2; 16:4) Wii kemaynte uf fiile pletse kekrintet waare, sin elteste in kesetst kep fer ti priiter un xwestere oryentiire. (Aph. 14:23) Wayl ti priiter un xwestere folich waare, “sin ti kemaynte im klaape kextërekt woer un taach tsu taach kreeser kewoer”. (Aph. 16:5)

2. Fon 1919 aan, wii tuut Yeehoowa sayn folek lenke un kaystlich eneere?

² Yeehoowa tuut wayter sayn folek pis hayt orkanisiire. Fon 1919 aan, penutst Yeesus een kleene krup kesalpte mëner fer ti preetich aarwayt orkanisiire un ti oryentiirunge fon te Piipel fer sayn tisipele in te richtich tsayt kepe. a (Luk. 12:42) Es is taytlich tas Yeehoowa ti aarwayt fon tiise krup am seechne is. (Isa. 60:22; 65:13, 14)

3-4. (a) Kep een payxpiil woo tsaycht tas mer nutse kriin wayl mer orkanisiirt sin. (b) Was tuun mer in tiise artikel siin?

 ³ Wën mer net orkanisiirt weyere, khente mer net ti aarwayt mache woo Yeesus uns kep hot. (Mat. 28:19, 20) Meyer hon, tsum payxpiil, ti teritoorye inxtelunge. Wën mer net orkanisiirt weyere, teet yeete eene preetiche uf kwalkee plats woo eyer wolt. Fiilaycht teete mer in etliche pletse noo un noo keen. Awer in anere, teete mer nii preetiche. Khanst tuu tich anere aate traan tenke wii mer nutse kriin wayl mer orkanisiirt sin?

⁴ Soo wii Yeesus sayn tisipele orkanisiirt hot wii eyer too uf te eyert waar, tuut eyer wayter Kot sayn folek hayt orkanisiire. In tiise artikel, siin mer tas payxpiil woo Yeesus kelos hot un wii unser Orkanisatsyoon tas noo macht. Meyer siin aach wii mer tsayche khene tas mer uf Yeehoowa sayn Orkanisatsyoon traue.

UNSER ORKANISATSYOON MACHT YEESUS SAYN PAYXPIIL NOO

5. Wii tuut Yeehoowa sayn Orkanisatsyoon Yeesus sayn payxpiil noo mache? (Yoohan 8:28)

⁵ Yeesus hot mit sayn himlixe Fater kelërnt was se mache un was se saan. Yeehoowa sayn Orkanisatsyoon macht Yeesus sayn payxpiil noo: tii penutst Kot sayn Wort fer uns helfe se wise was richtich un ferkheert is un fer uns oryentiire. (Lees Yoohan 8:28; b 2 Tim. 3:16, 17.) Meyer sin aach ofts erinert tas mer sole ti Piipel leese un aan wëne. Was fer nutse kriin mer fon tiise aanreet?

6. Was is een wichtich nutse woo mer kriin wën mer ti Piipel xtutiire?

⁶ Meyer kriin fiil nutse wën mer ti Piipel xtutiire mit te hilef fon unser puplikatsyoone. Meyer khene, tsum payxpiil, ferklayche was ti Piipel saat mit te oryentiirunge woo mer fon Yeehoowa sayn Orkanisatsyoon kriin. Wën mer siin tas ti oryentiirunge sich aan te Piipel xtaype, traue mer noch mee uf te Orkanisatsyoon. (Rom. 12:2)

7. Iwer was hot Yeesus kepreeticht un wii tuut Kot sayn Orkanisatsyoon tëm noo mache?

⁷ Yeesus hot “ti kuute notisye iwer Kot sayn Raych” kepreeticht. (Luk. 4:43, 44) Tee hot aach sayn tisipele kexikt iwer tiise Raych preetiche. (Luk. 9:1, 2; 10:8, 9) Hayt, al tii woo teel fon Kot sayn Orkanisatsyoon sin, preetiche ti kuute notisye fom Raych — ekaal woo se leepe orer wii fiil flichte se hon in te kemaynt.

8. Was fer eer hon mer?

⁸ Es is een eer fer uns mit te anere fertseele iwer Kot sayn Raych. Net al hon tiise eer. Tsum payxpiil: wii Yeesus uf te eyert waar, hot eyer ti temoone net kelos tsaye iwer tëm kepe. (Luk. 4:41) Hayt, mus ti persoon xon leepe in een aat woo Kot kefalt wën se aan fangt mit Yeehoowa sayn Tsayer preetiche. Wii khene mer tsayche tas mer weyert fer tiise priwilëj kepe? Meyer mise yeete xans fer se preetiche, penutse. Soo wii Yeesus, wole mer unser pestes mache fer ti soome fon te woerheet in te layt sayn hërts seeye un kiise. (Mat. 13:3, 23; 1 Kor. 3:6)

9. Wii tuut ti Orkanisatsyoon Kot sayn naame pekhant mache?

⁹ Yeesus hot Kot sayn naame pekhant kemacht. Tee hot tsu sayn Fater kepeet: “Ich hon tëne tayn naame pekhant kemacht.” (Yoo. 17:26) Yeehoowa sayn Orkanisatsyoon macht Yeesus noo. Tii xtrengt sich aan fer ti anere helfe Kot sayn naame khëne lërne. Een aat wii se tas macht, is torich ti  Tradução do Novo Mundo da Bíblia Sagrada. Tiise iwersetsung hot Kot sayn naame tsurik ketuun in te pletse woo eyer foer khom is in te orixinaale xprooche. Khan ma tiise iwersetsung fine — in teele orer kans — in mee wii 270 xprooche. In te Apêndices A4 un A5, khanst tuu mee lërne iwer warom un wii Kot sayn naame in te Piipel tsurik ketuun kep is. In te Apêndice C, woo in te Xtuutyum Piipel xteet, sin fiile pewaysunge tas Kot sayn naame sol 237 mool in te Kreekixe Xrifte foer khome.

10. Was lërnst tuu mit te wërter fon een fraa in Myanmar?

¹⁰ Soo wii Yeesus, wole mer soo fiil layt wiis meechlich is helfe Kot sayn naame khëne lërne. Wii een fraa in Myanmar, woo 67 yoore alt waar, tsu wise kriit hot tas Kot een naame hot, hot se aan kefang se prile. Tii hot kesaat: “Kot sayn naame is Yeehoowa… Ich hon xon fiile yoore keleept, awer ploos yets hon ich tas tsu wise kriit. Teyer hot mich tas wichtichste tings in kelërnt!” Wii mer siin khene in tiise speryens, wën ti layt Kot sayn naame khëne lërne, tas khan sayn leepe ënere.

TRAU WAYTER UF TE ORKANISATSYOON

11. Wii khene ti elteste tsayche tas se uf Kot sayn Orkanisatsyoon traue? (Kuk aach tas pilt.)

¹¹ Wii khene ti elteste tsayche tas se uf Kot sayn Orkanisatsyoon traue? Wën se een oryentiirung kriin, mise se tas mit acht leese un tan sich aan xtrenge fer es aan wëne. Tsum payxpiil: tii kriin oryentiirunge, net ploos iwer wii sayn teele in te fersamlunge foer xtele orer wii kepeete foer ti kemaynt mache, awer aach iwer wii Yeesus sayn xeef uf phase. Wën ti elteste al ti oryentiirunge fon te Orkanisatsyoon foliche, tuun ti priiter xpiire tas Yeehoowa se liipt un uf phast.

12. (a) Warom sole mer pay xteen tii woo ti kemaynt fiire? (Hepreeyer 13:7, 17) (b) Warom sole mer uns traan hale aan tëne sayn kwaliteete?

¹² Wën mer oryentiirunge fon te elteste kriin, sole mer tas wilich foliche. Tas lost ti aarwayt fon te elteste laychter. Ti Piipel muut uns uf folich sin un uns unich te autoriteet xtele fon tëne woo ti kemaynt fiire. (Lees Hepreeyer 13:7, c 17. d) Tas khan als mool xweyer sin. Warom? Wayl tiise mëner imperfekt sin. Awer meyer sole uns traan hale aan sayn kwaliteete, net aan sayn xwacheete. Wën net, khente mer unser faynte helfe. Wii soo? Te opjetiiw fon unser faynte is uns tswayfele mache tas Kot ti Orkanisatsyoon penutst fer uns lenke. Soo, wën mer xlechtes iwer ti elteste tenke, khene mer aan fange nekatiiw iwer ti Orkanisatsyoon tenke un noo lose uf tëne traue. Wii khene mer ti liie fon unser faynte itentifitsiire un ap xtose?

LOS NET TI ANERE TAYN FERTRAUNG UF TE ORKANISATSYOON FERXWEECHE

13. Wii fersuuche ti faynte aus siin mache tas ti Orkanisatsyoon xlecht is?

¹³ Kot sayn faynte fersuuche aus siin mache tas ti kuute tinge fon Kot sayn Orkanisatsyoon sin, in woerheet, xlecht. Tsum payxpiil: meyer hon torich ti Piipel kelërnt tas Yeehoowa wil hon tas mer unser khërper, aanxtelung un aanpeetung rayn hale. Tee saat tas weer wayter tas xlechtes macht un sich net ënere wil, khan net in te kemaynt plaype. (1 Kor. 5:11-13; 6:9, 10) Meyer tuun tiise piiplixe  kepoot aan heere. Awer weeche tiise kepoot, unser faynte saan tas mer ti layt net liipe, tas mer se richte un tas mer net aan nëme yemant woo anerste is.

14. Weer is hinich te liie iwer Kot sayn Orkanisatsyoon?

¹⁴ Ferxtee weer hinich te atake is. Satanaas, te Taywel, is hinich ti falxe kexichte; tee is “te fater fon te liie”. (Yoo. 8:44; Xee. 3:1-5) Soo meyer khene waarte tas Satanaas unser faynte penutse tuut fer falxe kexichte iwer Kot sayn Orkanisatsyoon aus teele. Tas is aach mit Yeesus un ti eyerste kriste pasiirt.

15. Was hon ti relichyeese fiirer keeche Yeesus un sayn tisipele kemacht?

¹⁵ Opwool Kot sayn Soon, Yeesus, perfekt waar un wunere kemacht hot, hot Satanaas etliche mënxe penutst fer fiile liie iwer tëm aus teele. Ti relichyeese fiirer, tsum payxpiil, hon fer ti layt kesaat tas Yeesus hot temoone aus ketriip “torich ti macht fom hërxer fon te temoone”. (Mar. 3:22) Wën Yeesus kericht waar, hon ti relichyeese fiirer tëm akusiirt Kot sayn naame ferfluuche un hon ti layt uf kehetst Yeesus um pringe. (Mat. 27:20) Xpeeter, wii Yeesus sayn tisipele ti kuute notisye kepreeticht hon, hon ti faynte “ti layt fon te natsyoone keeche ti priiter uf kehetst” fer tëne yachte. (Aph. 14:2, 19) A Sentinela 1^te Teetsemper fon 1998 hot iwer Aphostele sayn Kexicht 14:2 kesaat: “Ti yitixe faynte hon tas pexeet net aan kenom. Awer es waar net kenuuch fer tëne. Tii hon aan kefang xrekliche tinge iwer ti kriste saan, soo tas ti layt net acht fer tëne kepe teete un tëne hase teete.”

16. Was sole mer uns erinere wën mer falxe kexichte heere?

¹⁶ Satanaas tuut pis hayt liie. Tee is “ti kans  pewoont eyert am hinerkeen”. (Apo. 12:9) Wëns tuu nekatiiwe kexichte heerst iwer ti Orkanisatsyoon orer iwer ti priiter woo ti kemaynt fiire, eriner tich wii Kot sayn faynte Yeesus un ti eyerste kriste pehantelt hon. Yeesus hot foer raus kesaat tas ti layt teete sich keeche Kot sayn tiiner xtele un liie iwer tëne fertseele un tas tuut kenau soo hayt pasiire. (Mat. 5:11, 12) Ti falxe kexichte tuun uns net hinerkeen wën mer ferxteen weer too hiner traan is un etwas klaych mache fer uns xitse. Wii khene mer uns xitse?

17. Wii khene mer uns xitse keeche ti falxe kexichte? (2 Timoteus 1:13) (Kuk aach te khaste “ Was sole mer mache wën mer falxe kexichte heere?”)

¹⁷ Xtos ti falxe kexichte ap. Te aphostel Phaul hot taytlich kelos was mer mache sole wën mer falxe kexichte heere. Tee hot fer Timoteus kesaat tas eyer solt ‘etliche persoone xike net acht kepe fer falxe kexichte’ un “ti falxe kexichte woo keen keeche was haylich is”, ap xtose. (1 Tim. 1:3, 4; 4:7) Tenk too traan: een nëneche tuut fiilaycht was trekiches fom pootem hoole un in sayn munt rin tuun. Awer een folyeeriche mënx teet nii soo was mache, wayl eyer wees tas es tëm krank lose khan. Kraat soo, xtats acht kepe fer ti falxe kexichte woo fom Taywel khome, hale mer uns traan aan te “nutsliche wërter” fon te woerheet. (Lees 2 Timoteus 1:13.) e

18. Wii khene mer tsayche tas mer uf Kot sayn Orkanisatsyoon traue?

¹⁸ Meyer hon ploos 3 aate kesiin wii Kot sayn Orkanisatsyoon Yeesus noo macht. Wiis tuu ti Piipel xtutiirst, mërk anere aate wii ti Orkanisatsyoon tas macht. Helf aach ti priiter un xwestere in tayn kemaynt noch mee uf te Orkanisatsyoon traue. Un tuu wayter Yeehoowa troy tiine un ticht pay te Orkanisatsyoon plaype, woo eyer penutst fer sayn wile mache. (Psal. 37:28) Wole mer imer petanklich sin fer ti kroos eer woo mer hon: teel fon Yeehoowa sayn liipe un leaal folek sin!