XTUUTYUM ARTIKEL 16
LIIT 64 Meyer tuun froo in te ërntung mit helfe
Wii mee frooheet in te preetich aarwayt fine
“Tiint Yeehoowa mit frooheet.” (PSALM 100:2)
WAS TUUN MER SIIN?
Tiise artikel xprecht iwer 5 tinge woos tuu mache khanst fer mee frooheet in te preetich aarwayt hon.
1. Wii xpiirst tuu tich wëns tuu preetiche keest? (Kuk aach tas pilt.)
WII Yeehoowa sayn tiiner, tuun mer preetiche wayl mer unser himlixe Fater liipe un wole hon tas anere tëm khëne lërne. Fiile puplikatoore tuun kërn preetiche. Awer fer anere, is tas net laycht. Warom? Etliche sin pleet un tenke tas se net kuute leerer sin. Anere fine es net kuut tsu te layt sayn hayser keen wën se net in kelaat waare. Welche hon pang tas ti layt pees wëre. Anere hon kelërnt tas se sole imer mit te anere xtime. Opwool se Yeehoowa aarich fiil liipe, tiise priiter un xwestere fine es xweyer ti kuute notisye fer ti frëmte layt preetiche. Noch soo, wise se tas tiise aarwayt wichtich is un tii tuun ofts preetiche. Yeehoowa wërt wol aarich froo kepe!
Tuust tuu kërn preetiche? (Kuk te apsats 1.)
2. Wëns tuu als mool ti preetich aarwayt net kërn host, warom solst tuu net oone muut plaype?
2 Tuun soo sorte xpiirunge als mool tayn frooheet in te preetich aarwayt xteele? Wën yaa, say net oone muut. Tiise xpiirunge khene tsayche tas tuu teemuutich pist un tas tuu wilst net acht fer tich selepst ruufe. Es tsaycht aach tas tuu wilst net mit te anere tsënke. Un, kewis, nimant wil ti anere pees lose, hauptseechlich wën ma was kuutes mache wil. Tayn himlixe Fater tuut kenau ferxteen wiis tuu tich xpiirst un tee wil tich ti neetich hilef kepe. (Isa. 41:13) Wii khene mer mit soo sorte xpiirunge um keen un frooheet in te preetich aarwayt fine? In tiise artikel, tuun mer 5 itee kuke.
LOS KOT SAYN WORT TICH FERXTËRKE
3. Was hot Yeeremias keholef fer ti anere preetiche?
3 Kot sayn pexeet hot imer sayn tiiner ferxtërkt wën se een xweyer aarwayt erfiile muste. Kuk mool, tsum payxpiil, te profeet Yeeremias. Tee is ëngstlich kep wii Yeehoowa tëm kexikt hot se preetiche. Tee hot kesaat: “Ich wees kaar net xpreche, ich sin noch tsu yung.” (Yee. 1:6) Was hot tëm ti koraaj fer se preetiche kep? Tee hot kraft kriit fon was Yeehoowa tëm kesaat hat. Yeeremias hot aus keleet: “In mayn hërts sin [Kot] sayn wërter wii een fayer woo prënt; wii een fayer woo in mayn knoche inkexpërt is. Tëne pehale hot mich miit kelos; ich khont net mee aus hale.” (Yee. 20:8, 9) Opwool sayn teritooryum net laycht waar, hot Yeeremias kraft kriit fer se xafe torich tas pexeet woo eyer preetiche solt.
4. Was pasiirt wën mer Kot sayn Wort leese un too triwer noo tenke? (Koloser 1:9, 10)
4 Ti kriste kriin ti neetich kraft torich Kot sayn wërter, woo in te Piipel xteen. In sayn priif fer ti koloser, hot te aphostel Phaul kesaat tas mee iwer Yeehoowa sayn wile lërne, teet ti priiter helfe “kexayt foer Yeehoowa [keen]” un “in yeete kuut aarwayt frucht [kepe]”. (Lees Koloser 1:9, 10.) a Too tepay in tiise aarwayt, weyer ti kuute notisye preetiche. Soo, wën mer Kot sayn Wort leese un too triwer noo tenke, ferxtërke mer unser klaape aan Yeehoowa. Meyer tuun aach peser ferxteen warom es soo important is ti kuute notisye fom Raych preetiche.
5. Wii khene mer wërklich nutse kriin fon unser leesung un xtuutyum fon te Piipel?
5 Fer wërklich nutse fon te Piipel kriin, mise mer uns ti tsayt hoole un uns net ayle fer se leese, xtutiire un triwer noo tenke. Wëns tuu een tekst leest woos tuu net ferxteest, los es net soo! Fersuuch mee iwer tiise wersikel lërne mit te Índice das Publicações da Torre de Vigia orer te Guia de Pesquisa para Testemunhas de Jeová. Wëns tuu mit ketult xtutiirst, wërt tayn sicherheet noch xtërker tas was ti Piipel saat, woer is. (1 The. 5:21) Woo xtërker tayn sicherheet is, woo liiper tuust tuu mit anere fertseele iwer was tuu kelërnt host.
TUU TICH KUUT IN RICHTE
6. Warom sole mer uns kuut in richte fer ti preetich aarwayt?
6 Was khan tich helfe net tsu ëngstlich wëre wëns tuu preetichst? Tich kuut in richte. Yeesus hot sayn tisipele keholef sich in richte eep eyer se kexikt hot se preetiche. (Luk. 10:1-11) Ti tisipele hon aan kewënt was se kelërnt hon; tes weeche, hon se fiiles kemacht un tii sin aarich froo kep. (Luk. 10:17)
7. Wii khene mer uns in richte fer ti preetich aarwayt? (Kuk aach tas pilt.)
7 Wii khene mer uns in richte fer ti preetich aarwayt? Meyer mise tenke aan was mer xpreche wole un tan, tas natiirlich mit unser wërter aus leye. Meyer khene uns aach frooe: ‘Wii tuun ti layt sich ofts aan xtele in mayn teritooryum?’ Meyer khene tenke aan 2 orer 3 reaktsyoone woo ofts pasiire un uns foer xtele wii mer antworte tuun. Tan, wën mer mit te layt fertseele, khene mer uns aan xtrenge fer in ruu plaype un fraayntlich sin.
Tuu tich kuut in richte fer ti preetich aarwayt (Kuk te apsats 7.)
8. Wii soo sin ti kriste wii leet waase?
8 Te aphostel Phaul hot een ferklaychung kemacht fer se tsayche was unser flicht in te preetich aarwayt is. Tee hot kesaat: “Meyer hon tiise xats in leet waase.” (2 Kor. 4:7) Was petayt te xats? Ti aarwayt fer Kot sayn Raych preetiche — een aarwayt woo leepe ret. (2 Kor. 4:1) Was petayte ti leet waase? Kot sayn tiiner, woo ti kuute notisye fer ti anere nëme. In Phaul sayn taache, hon ti kexefts layt leet waase penutst fer weyertliche tinge traan, soo wii ese, wayn un kelt. Kraat soo, tuut Yeehoowa uns ti kuute notisye fertraue — een weyertlich pexeet. Mit Yeehoowa sayn hilef, khene mer kenuuch kraft hon fer wayter preetiche.
FERLANG KORAAJ IN KEPEET
9. Wii khene mer torich ti pang fom mënx triwer wech khome? (Kuk aach tas pilt.)
9 Als mool, khene mer pang fom mënx kriin. Wii khene mer too triwer wech khome? Tenk am kepeet woo ti aphostele kemacht hon wii se kexikt waare net mee preetiche. Xtats pang kriin un noo lose se preetiche, hon se Yeehoowa sayn hilef ferlangt fer Sayn “wort mit kans koraaj wayter xpreche”. Yeehoowa hot tiise kepeet klaych keantwort. (Aph. 4:18, 29, 31) Wën mer als mool pang fon te mënxe kriin, sole mer aach hilef tsu Yeehoowa in kepeet ferlange. Peet tas eyer tayn liip tsu te layt ferxtërkt, soo tas tuu net pang kriist fer mit tëne iwer ti kuute notisye fertseele.
Ferlang koraaj in kepeet (Kuk te apsats 9.)
10. Wii helft uns Yeehoowa tëm sayn Tsayer sin? (Isayas 43:10-12)
10 Yeehoowa hot uns in kesetst wii sayn Tsayer un tee ferxprecht uns helfe koraajich sin. (Lees Isayas 43:10-12.) b Kuk mool 4 aate wii eyer tas macht. Eyerst: Yeesus is imer mit uns wën mer ti kuute notisye preetiche. (Mat. 28:18-20) Tsweet: Yeehoowa hot sayn engele in kextelt fer uns helfe. (Apo. 14:6) Trit: Yeehoowa kept uns sayn hayliche kayst fer uns helfe traan tenke was mer kelërnt hon. (Yoo. 14:25, 26) Fiert: Yeehoowa kept uns ti priiter un xwestere fer uns helfe. Mit te hilef fon Yeehoowa un unser pruuterxaft, hon mer ales was neetich is fer koraajich sin un wayter preetiche.
PHAS TICH AAN UN HAL TICH POSITIIW
11. Wii khene mer mee layt in te preetich aarwayt fine? (Kuk aach tas pilt.)
11 Es is laycht oone muut wëre wën mer weenich layt tehëm fine. Soo meyer khene uns frooe: ‘Woo sin ti layt fon mayn teritooryum yets? Sin se in te aarwayt? Sin se etwas khaafe kang?’ (Aph. 16:13) Wëns soo is, fiilaycht khanst tuu mee layt trefe wëns tuu uf te xtroose preetichst. Een pruuter woo Joshua heest, saat: “Ich fine oportuniteete fer se preetiche wën ich torich kexefts pletse un anere pletse fol layt laafe.” Tee un sayn fraa, Bridget, trefe aach mee layt tehëm wën se foernachts un suntaachs noo mitaach preetiche. (Ëfe. 5:15, 16)
Phas tich aan (Kuk te apsats 11.)
12. Wii khene mer raus fine was ti layt klaape orer sich ketanke mache?
12 Wën ti layt am aanfang weenich interes tsayche, froo tich: ‘Was klaape ti layt? Mit was mache se sich ketanke?’ Joshua un Bridget penutse ti frooche woo in te pleetche foer khome fer kexpreeche mit te layt aan fange. Tsum payxpiil, mim pleetche Was mënst tuu fon te Piipel?, saan se: “Etliche mëne tas ti Piipel fon Kot heyer khomt, awer anere tenke tas es net soo is. Was mënst tuu too triwer?” Ofts nëmt tas tsu een kexpreech.
13. Wii soo tuun mer unser tsiil erfiile soo kaar wën ti layt net heere wole? (Xpriiche 27:11)
13 Soo kaar wën ti layt net heere wën mer preetiche, tuun mer noch soo unser tsiil erfiile. Warom khene mer tas saan? Wayl mer mache was Yeehoowa un Yeesus wole hon tas mer mache: tsaye kepe. (Aph. 10:42) Soo kaar wën mer nimant fine fer se xpreche orer ti layt ap xtose was mer preetiche, khene mer frooheet fine wayl mer unser Fater im himel kefale. (Lees Xpriiche 27:11.) c
14. Warom khene mer uns fraye wën een aner puplikatoer een interesiirt persoon fint?
14 Meyer khene uns aach fraye wën een aner puplikatoer een interesiirt persoon fint. Te Wachthorm hot xon unser aarwayt ferklaycht mit te aarwayt fer een ferloerne khint suuche. Fiile suuche tas khint uf een plats noom aner. Awer wën yemant tas khint fint, tuun al sich fraye, net ploos ti persoon woo tas khint kefun hot. Kraat soo, al in te kemaynt helfe in te aarwayt fer naye tisipele mache. Al sin neetich fer tas teritooryum teke. Un meyer al fraye uns wën yemant aan fangt tsu te fersamlunge keen.
WËN MER PREETICHE, TSAYCHE MER LIIP TSU KOT UN TI ANERE
15. Wii khene mer unser muut in te preetich aarwayt ferxtërke? (Matheus 22:37-39) (Kuk aach tas pilt .)
15 Meyer khene unser muut in te preetich aarwayt ferxtërke wën mer uns traan tenke tas ti preetich aarwayt is een wunerlich aat fer liip tsu Yeehoowa un ti anere tsayche. (Lees Matheus 22:37-39.) d Xtel tich mool foer wii froo Yeehoowa wërt wën eyer uns siit am xafe. Un tenk wii froo wëre ti layt wën se aan fange ti Piipel xtutiire. Ferkes tich aach net tas tii woo unser pexeet aan nëme un ëntxlise Yeehoowa tiine, khene fer imer leepe. (Yoo. 6:40; 1 Tim. 4:16)
Uns traan hale aan unser liip tsu Yeehoowa un ti anere ferkreest unser frooheet in te preetich aarwayt (Kuk te apsats 15.)
16. Wii khene mer frooheet fine in unser preetich aarwayt wën mer tehëm plaype mise? Kep payxpiile.
16 Khanst tuu net aus tayn haus keen? Wën yaa, hal tich traan aan was tuu mache khanst fer liip tsu Kot un ti layt tsayche. Torich ti pantemii fon coronavirus, miste Samuel un sayn fraa Dania tehëm plaype. Torich tiise xweyer tsayt, hon se ofts torich telefoon un priife kepreeticht un Piipel xtuutye torich Zoom kefiirt. Samuel hat kreeps un waar een tratament am mache. Tee hot kepreeticht fer tii woo eyer ketrof hot im plats woo eyer te tratament kemacht hot. “Wën mer propleeme mit mache — saat eyer —, khene mer ëngstlich un miit wëre un unser klaape khan keproopt wëre. Meyer mise frayt in Yeehoowa sayn tiinst fine.” Torich tiise tsayt, is Dania kefal un must 3 moonate im pet plaype. Tan is se uf een raatxtul 6 moonate keplip. Tii saat: “Ich hon fersuucht mayn pestes mache. Ich hon kepreeticht fer ti krankexwester woo mich pesuucht hot un aach tsu te layt woo tinge in unser haus ap kep hon. Ich hat aach kuute kexpreeche torich telefoon mit een fraa woo ekipamënte fer krankehayser ferkhaaft hot.” Opwool Samuel un Dania net soo fiil mache khonte wii se friier kemacht hon, hon se kemacht was meechlich fer tëne waar un tii sin froo too temit kep.
17. Wii khene mer mee nutse fon te itee fon tiise artikel kriin?
17 Fersuuch aan wëne ti 5 itee woo in tiise artikel foer khom sin. Yeete itee is wii een inkretyent woo mer in een resept penutse. Wën al ti inkretyente fon te resept mitsamer sin, hon mer een kuut resultaat — etwas woo kuut xmekt. Wëns tuu al ti itee aan wënst, wërst tuu peser foer perayt fer mit nekatiiwe xpiirunge um keen un tuu tuust mee frooheet in te preetich aarwayt fine.
WII KHENE TI NEEKSTE TINGE TICH HELFE FROOHEET IN TE PREETICH AARWAYT FINE?
-
Tsayt hoole fer sich kuut foer perayte
-
Koraaj in kepeet ferlange
-
Tich erinere tas ti preetich aarwayt tsaycht liip tsu Yeehoowa un ti anere
LIIT 80 “Xmekt un siit wii Yeehoowa is kuut”
a (Koloser 1:9, 10) Es is aach weeche tas, tas tsayt tëm taach woo mer es keheert hon, hon mer net noo kelos iwer aych peete un ferlange tas teyer fol kept mit te kenau khëntnis fon tëm sayn wile, in ale kluucheet un ferxtëntnis iwer kaystliche sache, 10 tas teyer kexayt foer Yeehoowa keet un tee in ales tsufriite lost, soo lang wii teyer wayter in yeete kuut aarwayt frucht kept un in Kot sayn kenau khëntnis wakst.
b (Isayas 43:10-12) “Teyer sayt mayn tsayer”, saat Yeehoowa, “yaa, mayne tiiner woo ich raus kesuucht hon, tas teyer mich khënt un aan mich klaapt, un ferxteet tas ich te selwiche sin. Foer mich waar es khee aner Kot kemacht kep un noo mich tuuts wayter khee aner kepe. 11 Ich sin Yeehoowa: es kept khee aner reter.” 12 “Ich hon es kesaat, keret un pekhant kemacht, wën es khee frëmte kot tswixich aych waar. Tes weeche sayt teyer mayn tsayer”, saat Yeehoowa, “un ich sin Kot.
c (Xpriiche 27:11) Say kluuch, mayn soon, un mach mayn hërts froo, tas ich khan een antwort kepe fer tee woo mich pelayticht.
d (Matheus 22:37-39) Eyer hot tëm kesaat: “‘Liip Yeehoowa, tayn Kot, mit tayn kans hërts, mit tayn kans seel un mit tayn kans ferxtant.’ 38 Tas is tas kreeste un eyerste kepoot. 39 Tas tsweete woo eenlich is, saat: ‘Liip ti anere wii tich selepst.’
