1. Was wil Yeehoowa fon uns hon?

 EENE fon te frooeste momënte fer een pheyerche is wën sayn nëneche uf te welt khomt. Awer opwool se tiise nëneche liipe, wole se net hon tas tas fer imer een nëneche wërt. Wën soo was pasiire teet, sicher teete se sich ketanke mache. Kraat soo, is Yeehoowa froo wën meyer aan fange iwer tëm lërne. Awer tee wil net hon tas mer wayter wii “kaystliche nëneche” plaype. (1 Kor. 3:1) Xtats tas, tee wil hon tas mer “kroos” wëre wii kriste. (1 Kor. 14:20)

2. Was tuun mer in tiise artikel siin?

² Was petayt een rayfe krist wëre? Wii khene mer tas hin kriin? Wii tuut tas xtark kaystlich esmitel uns helfe unser fraayntxaft mit Yeehoowa ferxtërke? Warom mise mer uns wayter aan xtrenge fer uns rayf hale? In tiise artikel, fine mer ti antworte.

WAS PETAYT EEN RAYFE KRIST WËRE?

3. Was petayt een rayfe krist wëre?

³ In te Piipel, tas kreekix wort woo iwersetst is “rayfe mënxe”, khan aach petayte “perfekte”, “komplët” un “folyeeriche mënxe”. a (1 Kor. 2:6) Soo wii een nëneche wakst pis eyer een folyeeriche mënx wërt, mise mer “wakse” in unser fraayntxaft mit Yeehoowa. Soo, wëre mer rayfe kriste. Kewis,  aach wën mer rayf kep sin, sole mer nii noo lose uns ferpesere. (1 Tim. 4:15) Meyer al, soo kaar ti yunge layt, khene rayfe kriste wëre. Awer wii khene mer wise ep mer rayf sin?

4. Wii teest tuu een rayfe krist pexraype?

⁴ Een rayfe krist macht ales was Yeehoowa tëm ferlangt, net ploos was eyer wil. Kewis, wayl eyer imperfekt is, macht eyer aach feeler. Awer tee xtrengt sich yeete taach aan fer se tenke un sich aan xtele wii Yeehoowa wil. Tee hot ti nay personaliteet aan ketsoo un macht sayn pestes fer imer eenlicher wii Yeehoowa tenke. (Ëfe. 4:22-24) Tee hot kelërnt kuute ëntxlise mache, woo sich aan Yeehoowa sayn kesetse un funtamente xtaype. Tes weeche, praycht eyer net fiile reekele fer tëm lenke. Wën eyer een ëntxlus macht, xtrengt eyer sich aan fer tas fërtich pringe. (1 Kor. 9:26, 27)

5. Was khan mit een krist pasiire wën eyer net rayf is? (Ëfeser 4:14, 15)

⁵ Im keeche teel, een krist woo net rayf is, khan laycht hinerkang wëre weeche “fale” un “falxheet”. Fiilaycht klaapt eyer aan te layt woo falxe notisye, kwatxeray un falxe kexichte aus teele. Orer im xtant tuun ti aphostate tëm hinerkeen. b (Lees Ëfeser 4:14, 15.) c Khan sin tas eyer ayfersichtich, tsënkich orer laycht pelayticht is. Orer im xtant macht eyer ofts tas ferkheertes wën ti fersuuchung khomt. (1 Kor. 3:3)

6. Ferklaych ti kaystlich waksung mit te fiisix waksung. (Kuk aach tas pilt.)

⁶ Wii mer eente kesaat hon, ti Piipel ferklaycht ti kaystlich waksung mit te fiisix waksung. Es kept fiile tinge woo een khint net wise tuut; soo, mus tas khint hilef fon een folyeeriche mënx kriin fer tëm xitse un fiire. Wole mer een ferklaychung mache. Een mama un sayn meetche wole tsu te aner sayt fon een xtroos keen. Khan sin tas ti mama ferlangt tas sayn meetche sayn hant hale sol. Wii tas meetche wakst, fiilaycht tuut sayn  mama se erlaupe tsu te aner sayt fon te xtroos aleen keen; awer ti mama tuut se wayter erinere tsu te 2 sayte kuke. Wën tas khint folyeerich wërt, tuut se xon selwer wise wii sich fon tiise kefoore xitse. Soo wii ti khiner mise hilef fon te folyeeriche mënxe kriin fer sich wech fon te kefoore hale, mise ti kriste woo net rayf sin, hilef fon rayfe kriste kriin fer sich net kaystlich wee mache un fer kluuche ëntxlise mache. Im keeche teel, wën rayfe kriste ëntxlise mache mise, tenke se aan was ti Piipel saat fer se ferxteen was Yeehoowa too triwer tenkt. Tan tuun se aan wëne was se kelërnt hon.

7. Mise rayfe kriste hilef fon te anere hon?

⁷ Wil tas saan tas ti rayfe kriste mise nii hilef fon te anere kriin? Nee. Tii khene als mool hilef fon te anere ferlange. Awer yemant woo net rayf is, fiilaycht wil hon tas ti anere tëm saan was eyer mache orer ëntxlise sol. Im keeche teel, wën een rayf krist hilef ferlangt fon tëne woo mee kluucheet un speryens hon, wees eyer tas eyer mus sayn aychne ëntxlise mache un “sayn aychne last traan”. (Kal. 6:5)

8. Wii soo sin ti rayfe kriste net ekaal?

⁸ Ti folyeeriche mënxe sin net ekaal in fiisix aat; kraat soo, ti kwaliteete fon te rayfe kriste sin aach net ekaal. Tsum payxpiil: etliche sin aarich kluuch; anere, koraajich; welche sin krooshërtslich; un noch anere khene fiil empatii tsayche. Wën 2 rayfe kriste een eenlich situatsyoon mit mache, khan sin tas se unerxiitliche ëntxlise mache, awer tii 2 xtaype sich aan te piiplixe funtamente. Tas is hauptseechlich soo wën se ëntxlise mache woo tëm noo tas kewise kelenkt sin. Tes weeche, tuun se sich net naner richte wën sayn ëntxlise anerste sin. Xtats tas, xtrenge se sich aan fer eenich plaype. (Rom. 14:10; 1 Kor. 1:10)

WII KHENE MER RAYFE KRISTE WËRE?

9. Is ti kaystlich waksung automatix? Lee tas aus.

⁹ Soo lang wii ti tsayt rom keet, een khint tuut automatix wakse; awer tas is net soo mit unser fraayntxaft mit Yeehoowa: meyer mise uns aan xtrenge fer tas wakse mache. Tsum payxpiil, ti priiter un xwestere in Korinto hon ti kuute notisye aan kenom, sich taafe kelos, hayliche kayst kriit un fiil mim aphostel Phaul kelërnt. (Aph. 18:8-11) Awer phaar yoore noo sayn taaf, waare etliche noch net rayfe kriste. (1 Kor. 3:2) Was mise mer mache tas soo was net mit uns pasiirt?

10. Was mise mer mache fer rayfe kriste wëre? (Yuutas 20)

¹⁰ Fer rayfe kriste wëre, mise mer eyerst te wunx hon fer tas hin kriin. Tii woo “khee speryens hon” un liipe soo plaype, wëre nii rayfe kriste. (Xpr. 1:22) Meyer wole net wii een folyeeriche mënx sin woo net sayn flichte erfiilt un mus imer ti hilef fon sayn eltere hon fer sayn ëntxlise mache. Xtats tas, wole mer uns aan xtrenge fer kaystlich wakse. (Lees Yuutas 20.) d Wëns tuu tich too traan aan xtrengst, peet tas Yeehoowa tich kept “te wunx un ti macht fer in krayfe”. (Fili. 2:13)

11. Was hot Yeehoowa uns kep fer uns helfe rayfe kriste wëre? (Ëfeser 4:11-13)

¹¹ Yeehoowa waart net tas mer rayfe kriste oone hilef wëre. Tee hot uns xeefer un leerer in te kemaynt kep, woo uns helfe een xtark fraayntxaft mit Yeehoowa hon. Tii helfe uns “folyeeriche mënxe [wëre], soo rayf wii Kristus”. (Lees Ëfeser 4:11-13.) e Yeehoowa kept uns aach sayn hayliche kayst fer uns helfe “Kristus sayn ferxtant” hon. (1 Kor. 2:14-16) Kot hot uns aach ti 4 Ewankeelye kep fer  se tsayche was Yeesus ketenkt, kexproch un kemacht hot too uf te eyert. Wën mer Yeesus sayn ketanke un aktsyoone noo mache, khene mer rayfe kriste wëre.

WAROM TAS XTARK KAYSTLICH ESMITEL NEETICH IS?

12. Was sin “ti eyerste inlërnunge iwer Kristus”?

¹² Fer rayfe kriste wëre, mise mer mee lërne wii ploos “ti eyerste inlërnunge iwer Kristus” — es wil saan, ti haupste inlërnunge. Etliche fon te eyerste tinge woo mer kelërnt hon, hate se tuun mit sich peroye, klaape hon, sich taafe lose un tas ufxtaye fon te toote. (Hep. 6:1, 2) Tiise inlërnunge sin te funtament fom kristlich klaape. Tes weeche, hot te aphostel Pheeter too triwer kexproch wii eyer kepreeticht hot fer een kroos folek im Phingste Taach. (Aph. 2:32-35, 38) Meyer mise tiise inlërnunge aan nëme fer Yeesus sayn tisipele wëre. Tsum payxpiil, Phaul hot ketsaycht tas, wën mer net am ufxtaye fon te toote klaape, khene mer net saan tas mer woere kriste sin. (1 Kor. 15:12-14) Awer fer een rayfe krist wëre, sin tiise haupste inlërnunge net kenuuch.

13. Wii khene mer nutse kriin fon tëm xtark kaystlich esmitel? (Hepreeyer 5:14) (Kuk aach tas pilt.)

¹³ Anerste wii ti haupste inlërnunge, was is tepay aan tëm xtark kaystlich esmitel? Net ploos Yeehoowa sayn kesetse, awer aach sayn funtamente, woo uns helfe ferxteen wii Yeehoowa tenkt. Fer nutse too tefun kriin, mise mer xtutiire, too triwer noo tenke un uns aan xtrenge fer tas aan wëne. Soo, lërne mer ëntxlise mache woo Yeehoowa kefale. f (Lees Hepreeyer 5:14.) g

14. Wii hot Phaul ti korinter keholef rayfe kriste wëre?

¹⁴ Ti kriste woo net rayf sin, fine es xweyer te richtich ëntxlus mache wën khee spetsiifix kesets in te Piipel is. Etliche rechne tas, wën  es khee kesets kept, khene se mache was se wole. Anere tuun fiilaycht een reekel ferlange wën khee reekel neetich is. Tsum payxpiil: siits aus tas ti kriste in Korinto hon Phaul een reekel ferlangt fer se wise ep se ese khonte was tsu een falxe kot keopfert waar. Xtats se saan was se mache solte, hot Phaul ketsaycht tas yeete eene tas “recht fer raus suuche” hat, tëm noo sayn aychne kewise. Tee hot iwer etliche piiplixe funtamente kexproch woo se helfe khonte een ëntxlus mache woo teet net sayn kewise xteere orer anere xtolpere mache. (1 Kor. 8:4, 7-9) Phaul waar ti korinter am in lërne ti Xrifte penutse fer sayn aychne ëntxlise mache, xtats fer ti anere frooe was se mache solte orer reekele suuche. Soo, hot eyer se keholef rayfe kriste wëre.

15. Wii hot Phaul ti hepreeyxe kriste keholef kaystlich foran keen?

¹⁵ Meyer lërne een aner wichtich lisyoon mit Phaul sayn wërter fer ti hepreeyer. Etliche hon noo kelos kaystlich wakse. Un noch xlimer: tii praychte “noch mool milich, net xtark esmitel”. (Hep. 5:12) Tii hon net kelërnt un aan kenom ti naye inlërnunge woo Yeehoowa torich ti kemaynt kep hat. (Xpr. 4:18) Tsum payxpiil: unkefeer 30 yoore noo Yeesus sayn opfer tas ën fom Kesets keprung hot, hon etliche yuute woo kriste kep sin, noch kesaat tas tas mosayxe Kesets am kile waar. (Rom. 10:4; Tit. 1:10) Sicher, 30 yoore waar mee wii kenuuch tsayt fer ti kriste sayn ketanke ënere! Soo, hot Phaul sich aan kextrengt fer tëne helfe ti tiife woerheete ferxteen. Sayn priif hot se keholef se siin tas ti nay aat fer Yeehoowa aan peete, woo sich aan Yeesus xtaypt, waar fiil peser. Es hot tëne aach ti koraaj kep fer wayter preetiche opwool ti yachtung fon te yuute. (Hep. 10:19-23)

WAROM MISE MER UNS AAN XTRENGE FER UNS RAYF HALE?

16. Mee wii rayfe kriste wëre, was noch mise mer mache?

¹⁶ Meyer mise uns aan xtrenge fer net ploos rayfe kriste wëre, awer aach fer uns rayf hale. Soo, meyer mise uf phase fer net tenke tas mer xon rayf sin un tas mer prayche net mee unser fraayntxaft mit Yeehoowa ferxtërke. (1 Kor. 10:12) Meyer mise wayter uns selepst “in proop xtele” fer se siin ep mer wayter am foran keen sin. (2 Kor. 13:5)

17. Wii tuut Phaul sayn priif fer ti koloser tsayche tas mer mise uns rayf hale?

 ¹⁷ In sayn priif fer ti koloser, hot Phaul noch mool ketsaycht tas mer mise uns rayf hale. Opwool se xon rayfe kriste waare, hot Phaul fer ti koloser kesaat tas se miste fiil uf phase fer net hinerkang wëre fon te welt sayn itee. (Kol. 2:6-10) Un Epafras, woo sicher ti kemaynt kuut kekhënt hot, hot noo un noo kepeet tas se solte sich “komplët”, orer rayf, hale. (Kol. 4:12) Was lërne mer too temit? Phaul un Epafras hon ferxtan tas wën mer wole uns rayf hale, mise mer Kot sayn hilef hon un uns aan xtrenge. Tii wolte hon tas ti koloser sich rayf hale teete, opwool ti propleeme woo se mit kemacht hon.

18. Was khent mit een rayfe krist pasiire? (Kuk aach tas pilt.)

¹⁸ Phaul hot ti hepreeyer aan kesaat tas een rayfe krist woo sich net uf phast, khent Yeehoowa sayn tsuxtimung fer imer ferliire. Wën tee Yeehoowa net heere wil, khent eyer sich soo wayt ap lenke tas eyer sich net mee peroye khent fer Yeehoowa sayn fertsayung kriin. Tsum klik, waare ti hepreeyer net in tiise situatsyoon. (Hep. 6:4-9) Awer was khene mer saan iwer tii woo hayt se taach inatiiw wëre orer tesasosiirt sin un xpeeter sich peroye? Wën se sich teemuutich peroye, tsayche se tas se anerste sin wii tii woo Phaul kexproch hot. Awer wën se tsurik tsu Yeehoowa khome, mise se ti hilef kriin woo Eyer fersoricht. (Ese. 34:15, 16) Ti elteste tuun im xtant fer een rayfe pruuter orer xwester ferlange tëne helfe sayn fraayntxaft mit Yeehoowa noch mool uf paue.

19. Was sole mer uns aan xtrenge fer se mache?

¹⁹ Wëns tuu tich aan xtrengst, khanst tuu es hin kriin een rayfe krist wëre! Tuu wayter tiife woerheete fon te Piipel lërne un xtreng tich aan fer yeete taach eenlicher wii Yeehoowa tenke. Un wëns tuu xon rayf pist, xtreng tich aan fer soo plaype — yets un fer imer!