1. Weeche was is Yeehoowa sayn familye soo eenich?

ES LOST uns mechtich froo teel fon Yeehoowa sayn familye mache! Weeche was is unser familye soo friitlich un eenich? Een uersach is tas meyer al mache unser pestes fer respektiire tii woo hon een teel autoriteet fon Yeehoowa kriit. In woerheet, woo peser mer tas ferxteen, woo eenicher wëre mer.

2. Was fer frooche tuun mer in tiise artikel antworte?

² In tiise artikel, tuun mer xpreche iwer wii pariirt ti autoriteet in te kemaynt. Meyer fine aach antworte fer ti neekste frooche: Was is ti flicht fon te xwestere? Is es woer tas yeete pruuter is te khop fon yeete xwester? Is ti autoriteet woo ti elteste iwer ti priiter un xwestere hon ti selwich sort autoriteet woo eene man iwer sayn familye hot? Fer se aan fange, wole mer kuke wii sole mer ti xwestere aan siin.

3. Was tuut uns helfe kreeser weyert kepe fer ales was unser xwestere mache?

³ Meyer xetse fiil weyert fer unser xwestere woo xtram xafe fer sayn familye uf phase, fer ti kuute oter preetiche un fer ti anere in te kemaynt helfe. Tii kriin noch kreeser weyert foer unser aue wën mer kuke ti aat wii Yeehoowa un Yeesus tëne aan siin un ti aat wii te aphostel Phaul tëne pehantelt hot.

4. Wii tuut ti Piipel tsayche tas Yeehoowa kept te selwich weyert fer ti mëner un fer ti fraae?

⁴ Ti Piipel tsaycht tas, foer Yeehoowa, ti fraae un ti mëner hon te selwich weyert. Tsum payxpiil, kuk mool was pasiirt is in te  aphostele sayn taache. Yeehoowa hot hayliche kayst fer fraae un mëner kep tas tii khente wunerliche tinge mache, soo wii uf unerxiitliche xprooche xpreche. (Atos 2:1-4, 15-18) Fraae un mëner waare mit hayliche kayst kesalpt un tuun mit Kristus rechiire. (Gál. 3:26-29) Fraae un mëner wëre peloont mit tëm eewiche leepe too hiir uf te eyert. (Apo. 7:9, 10, 13-15) Un mëner un fraae hon ti selwich flicht kriit: ti kuute notisye preetiche un in lërne. (Mat. 28:19, 20) Tsum payxpiil, tas puuch fon Atos xprecht iwer ti kuut aarwayt woo een xwester, Prisila, kemacht hot. Tii un sayn man, Akila, hon Apolo keholef — eene man woo fiil khëntnis hat — ti woerheet peser ferxteen. (Atos 18:24-26)

5. Wii tsaycht Lucas 10:38, 39, 42 tas Yeesus hot ti fraae respektiirt?

⁵ Yeesus hot eer un respekt fer ti fraae kep. Tee hot net ti fariseer noo kemacht, woo ketenkt hon tas ti fraae waare weenicher wii ti mëner kewees, woo hon net forich ti anere mit te fraae fertseelt un woo teete nii mools iwer ti Xrifte mit tëne xpreche. Kans anerste, Yeesus hot iwer tiife woerheete net ploos mit te mëner, awer aach mit te fraae kexproch. * (Lees Lucas 10:38, 39, * 42. *) Un wën eyer reese kang is fer se preetiche, hot eyer erlaupt fraae mit tëm khome. (Luc. 8:1-3) Un Yeesus hot soo kaar fer welche fraae tas priwilëj kep fon tëm sayn ufxtaye fer ti aphostele pekhant mache. (João 20:16-18)

6. Wii hot te aphostel Phaul ketsaycht tas eyer ti fraae respektiirt hot?

⁶ Te aphostel Phaul hot ketsaycht tas eyer fiil respekt fer ti fraae hat. Tsum payxpiil, tee hot Timoteus erinert tas eyer solt ti fraae eere; tee thërft “ti elter fraae wii muter” pehantele un “ti yinger fraae wii xwestere” aan siin. (1 Tim. 5:1, 2) Phaul hot Timoteus fiil keholef een rayfe krist wëre; soo wii soo, hot eyer erkhënt tas es waare Timoteus sayn muter un wowo woo hate tëm iwer ti “hayliche xrifte” in kelërnt. (2 Tim. 1:5; 3:14, 15) In sayn priif fer ti romaaner, Phaul hot welche xwestere torich naame pekriis. Tee hot kemërkt was tiise xwestere kemacht hon un hot aach kesaat tas eyer petanklich weeche tas waar. (Rom. 16:1-4, 6, 12; Fil. 4:3)

7. Was fer frooche tuun mer yets antworte?

⁷ Wii mer in te letste apsetse kesiin hon, niks aan te Piipel tsaycht tas ti xwestere weenicher wii ti priiter sin. Unser liipliche un krooshërtsliche xwestere sin wërklich eene kexenk fer ti kemaynt. Un ti elteste sin aarich petanklich weeche tëne sayn hilef fer te friit un ti eenichkheet in te kemaynt uf muute. Awer es feelt noch etliche frooche antworte: Warom ferlangt Yeehoowa tas ti xwestere sayn khop in welche situatsyoone teke sole? Wayl ploos mëner khene elteste un ministeryaale tiiner wëre, wil tas saan tas yeete pruuter is te khop fon yeete xwester in te kemaynt?

8. Tëm noo Efésios 5:23, is yeete pruuter te khop fon yeete xwester? Lee tas aus.

⁸ Eene pruuter is net te khop fon al ti xwestere in te kemaynt — Kristus is. (Lees Efésios 5:23.) * In te familye, te man hot autoriteet  iwer sayn fraa. Een ketaafte soon is net te khop fon sayn muter. (Efé. 6:1, 2) Un in te kemaynt, ti elteste hon ploos een teel autoriteet iwer ti priiter un xwestere. (1 Tes. 5:12; Heb. 13:17) Awer, was khan ma saan iwer een letich xwester woo leept net mee mit sayn eltere? Tii tuut wayter tëne respektiire, awer tii is net mee unich ti autoriteet fon sayn fater. Tii respektiirt aach ti elteste, awer, soo wii ti priiter in te kemaynt, hot se ploos eene khop — Yeesus.

9. Warom prayche ti xwestere sayn khop als mool teke?

⁹ Awer es is woer tas Yeehoowa hot fer ti mëner een flicht kep woo eyer hot net fer ti fraae kep: ti kemaynt in te inlërnung un in Yeehoowa sayn aanpeetung fiire. (1 Tim. 2:12) Warom? Weeche te selwich uersach tas eyer hot Yeesus wii khop fon tëm man in kesetst — sayn familye in ortnung hale. Khan sin tas, weeche een situatsyoon, praycht een xwester etwas mache woo eene pruuter ofts macht; in tiise situatsyoon, ferlangt Yeehoowa tas tii sayn khop teke sol. * (1 Cor. 11:4-7) Weeche was tuut Yeehoowa tas fon te xwestere ferlange? Es is net fer tëne niter xtele, awer tas se khene respekt tsayche fer tii woo Yeehoowa autoriteet kep hot. Yets, wole mer ti frooch antworte: Wii fiil autoriteet hon ti familye khep un ti elteste?

10. Was khan eene elteste uf muute reekle fer ti kemaynt mache wole?

¹⁰ Ti elteste liipe Kristus. Un tii liipe aach “ti xeef” woo Yeehoowa un Yeesus tsu tëne fertraut hon. (João 21:15-17) Wayl eene elteste khimert sich mit te kemaynt, khan eyer fiilaycht tenke tas eyer wii een fater fer ti priiter un xwestere is. Im xtant, rechent eyer tas wayl eene familye khop tas recht hot  fer reekle mache fer sayn familye xitse, eene elteste khan reekle mache fer Kot sayn xeef xitse. Un welche priiter un xwestere khene ti elteste uf muute tas mache — wën se ferlange tas ti elteste een ëntxlus uf tëne sayn plats mache. Awer, hon ti elteste in te kemaynt un ti familye khep ti selwich autoriteet?

11. In was fer aate is ti autoriteet fon te familye khep eenlich wii ti elteste sayns?

¹¹ Te aphostel Phaul hot ketsaycht tas ti autoriteet fon te familye khep is, in welche aate, eenlich wii ti autoriteet woo ti elteste hon. (1 Tim. 3:4, 5) Tsum payxpiil, Yeehoowa wil hon tas ti familye mitkliiter te familye khop aan heere sole. (Col. 3:20) Un tee wil aach hon tas tii in te kemaynt ti elteste aan heere sole. Yeehoowa waart etwas fon te familye khep un ti elteste: tii woo tëne fertraut waare helfe kaystlich xtark plaype. Tii thërfe aach ti emotsyonaale neetichkheete fon tëne woo unich sayn autoriteet sin, uf phase. Un soo wii kuute familye khep, ti elteste helfe ti priiter un xwestere woo xwiirichkheete mit leepe. (Tia. 2:15-17) Un noch, Yeehoowa waart tas ti elteste un ti familye khep ti anere uf muute Tëm sayn kesetse aan heere. In te selwich tsayt, tii thërfe “net iwer ti tinge woo [in te Piipel] kexrip sin” keen. (1 Cor. 4:6)

12-13. Tëm noo Romanos 7:2, was is ti unerxiit tswixich ti autoriteet woo ti familye khep un ti elteste hon?

 ¹² Awer, ti autoriteet fon een elteste is, in etliche phunkte, kans anerste wii ti autoriteet fon eene familye khop. Tsum payxpiil, Yeehoowa hot ferlangt tas ti elteste — net ti familye khep — richte sole. Un wën yemant peroyt sich net fon sayn sinte, is ti elteste sayn flicht tëm fon te kemaynt raus tuun. (1 Cor. 5:11-13)

¹³ Uf te aner sayt, ti familye khep hon een sort autoriteet fon Yeehoowa kriit woo ti elteste hon net. Tsum payxpiil, te familye khop hot autoriteet fer reekle fer sayn familye mache un sich sicher sin tas se aan keheert wëre. (Lees Romanos 7:2.) * Fer eene payxpiil kepe: eene familye khop hot tas recht fer se ëntxlise aan was fer xtun sole sayn khiner nacht oomt tehëm sin. Un tee hot aach tas recht fer sayn khiner tisipliniire wën se tas net aan heere. (Efé. 6:1) Kewis, eene liiplich familye khop xprecht eyerst mit sayn fraa eep eyer reekle fer sayn familye macht wayl, am ën, ti tswaay sin ploos “een flayx”. * (Mat. 19:6)

14. (a) Tëm noo Marcos 10:45, warom xtimt es tas Yeehoowa hot Yeesus wii khop fon te kemaynt in kesetst? (b) Was is ti flicht fon te Rechiirente Khërperxaft? (Kuk te khaste “ Ti flicht fon te Rechiirente Khërperxaft”.)

¹⁴ Torich tas fray khaaf opfer, hot Yeehoowa tas leepe kekhaaft fon yeete eene in te kemaynt un fon yeete eene woo aan Yeesus  klaapt. (Lees Marcos 10:45; * Atos 20:28; 1 Cor. 15:21, 22) Tan, es xtimt tas Eyer hot Yeesus — woo hot sayn leepe fer uns wii fray khaaf opfer kep — wii khop fon te kemaynt in kesetst. Tes weeche, hot Yeesus ti autoriteet fer reekle se mache iwer was ti layt, ti familye, un ti kans kemaynt mache sol. Un tee hot aach tas recht fer sich sicher sin tas tiise reekle aan keheert wëre. (Gál. 6:2) Awer Yeesus tuut mee wii ploos reekle mache — tee phast uns uf un liipt yeete eene fon uns. (Efé. 5:29)

15-16. Was lërnst tuu mit te wërter fon te xwester Marley un fon tëm pruuter Benjamin?

¹⁵ Es waar Yeesus Kristus kewees woo hot ti mëner in kesetst fer ti fraae uf phase. Wën ti xwestere tëne aan heere, tsayche se tas se Kristus respektiire. Fiile xwestere tenke soo wii Marley, woo in te Fereenichte Xtaate fon Amërika leept. Tii saat: “Ich kepe fiil weyert fer mayn flichte wii ferhayrat fraa un xwester in te kemaynt. Ich mus wayter xtram xafe fer respekt tsayche fer ti autoriteet woo Yeehoowa hot fer mayn man un fer ti elteste kep. Awer, mayn man un ti priiter in te kemaynt tuun mich respektiire un tsayche tas se weyert xetse fer was ich mache. Tes weeche, is es mich laychter unich tëne plaype.”

¹⁶ Ti priiter tsayche tas se ferxteen was fer sort autoriteet hon se fon Yeehoowa kriit wën se ti xwestere respektiire un eere. Benjamin, eene pruuter woo in Englant woont, saat: “Ich hon xon wërklich fiil kelërnt mit te xwestere sayn antworte in te fersamlunge. Un tii hon aach xeene aanunge iwer wii ti Piipel xtutiire un wii peser im preetich xafe. Ich mëne tas ti aarwayt woo se mache hot wërklich fiil weyert.”

17. Warom sole mer respektiire tas Yeehoowa hot autoriteet fer welche layt kep?

¹⁷ Yeehoowa hot autoriteet fer welche layt kep. Wën al in te kemaynt — ti mëner, fraae, familye khep un elteste — tas ferxteen un respektiire, kepts friit in te kemaynt. Un noch wichticher: pringe mer loop fer unser liipliche Fater im himel, Yeehoowa. (Sal. 150:6)