1-2. Tëm noo Mateus 5:11, wii sole mer ti proope aan siin?

YEESUS hot fer sayn nookeener ferxproch tas se teete wërklich froo sin. Awer tee hot aach tëne aan kesaat tas se teete proope mit mache. (Mat. 10:22, 23; Luc. 6:20-23) Es frayt uns Kristus sayn tisipele sin. Awer, wole mer saan tas tayn familye xtelt sich keeche tich, orer ti rechiirung yacht tich, orer tayn aarwayt orer xuul koleke fersuuche tich etwas ferkheertes mache. Wën mer too triwer tenke, fiilaycht fine mer uns ëngstlich, kël?

² Ti meyerste layt tenke net tas yachtung mit mache is een uersach fer sich fraye. Awer ti Piipel saat tas mer sole anerste tenke. Tsum payxpiil: te tisipel Tyako hot kexrip tas mer sole uns net iwerlaat xpiire wën mer propleeme mit leepe; xtats tas, sole mer uns fraye. (Tia. 1:2, 12) Un Yeesus hot kesaat tas mer sole uns fraye soo kaar wën mer keyacht sin. (Lees Mateus 5:11.) * Awer, wii khene mer es hin kriin? Meyer khene fiil lërne wën mer noo kuke welche wersikele fon tëm priif woo te aphostel Tyako fer ti eyerste kriste kexrip hot. Fer se aan fange, wole mer kuke was fer xwiirichkheete hon tiise kriste mit kemacht.

3. Was is pasiirt klaych tëm noo Tyako een tisipel fon Yeesus woer is?

³ Klaych tëm noo tas Tyako — Yeesus sayn xtif pruuter — een tisipel woer is, ti yachtung keeche ti kriste in Yeruusalem hot aan kefang. (Atos 1:14; 5:17, 18) Un wën te tisipel Xteefan  um keprung waar, fiile kriste hon fon te xtat ap kehau un “waare se ferprayt torich ti lënter fon Yuutea un Samaria”. Mit te tsayt, sin se kans wayt kang, pis Xipre un Antyokia. (Atos 7:58–8:1; 11:19) Khanst tuu tich foer xtele wii fiil kefoore hon ti tisipele mit kemacht? Soo wii soo, ekaal woo se hin kang sin, hon se ti kuute oter mit muut kepreeticht. Tes weeche, es waare fiile kemaynte kekriintet torich tas kanse Romaanix Raych. (1 Ped. 1:1) Awer noch xlimer tsayte khemte.

4. Was fer anere proope hon ti eyerste kriste aus kehal?

⁴ Ti eyerste kriste hon unerxiitliche proope aus kehal. Tsum payxpiil, unkefeer im yoerkang 50 N.K., te romaanix Kayser Klautyus hot al ti yuuter fon Roma fat kexikt. Tan, ti yuuter woo sin kriste kep, waare ketswung sayn hayse hiner lose un sich fer anere pletse wanere. (Atos 18:1-3) Unkefeer im yoerkang 61 N.K., te aphostel Phaul hot kexrip tas fiile fon sayn priiter un xwestere waare forich ti anere ferxënt, in te katee kexmis un kextool kewees. (Heb. 10:32-34) Un, soo wii ti anere layt, ti kriste hon aach aarmheet un krankheete aus kehal. (Rom. 15:26; Fil. 2:25-27)

5. Was fer frooche tuun mer antworte?

⁵ Wii Tyako sayn priif kexrip hot, foer tëm yoer 62 N.K., wust eyer kans kenau was fer proope sayn priiter un xwestere am mit leepe waare. Mit Yeehoowa sayn lënkung, Tyako hot fer ti kriste praktixe aanreete kexrip woo teete tëne helfe froo plaype forich ti proope. Wole mer Tyako sayn priif noo kuke un tiise frooche antworte: Iwer was fer sort frayt hot Tyako kexrip? Was khent een krist sayn frooheet xteele? Un ekaal ti proope woo mer mit mache, wii khene ti kluucheet, te klaape un ti koraaj uns helfe unser frayt hale?

6. Tëm noo Lucas 6:22, 23, warom khan een krist froo wëre soo kaar wën eyer proope mit macht?

⁶ In te meyerst tsayt, ti layt mëne tas se khene ploos froo wëre wën se kesunt sin, wën se fiil kelt hon un wën se kuut mit sayn familye rom khome. Awer Tyako hot kexrip iwer een unerxiitlich sort frayt: een kwaliteet fon tëm frucht fon Kot sayn kayst, woo hëngt net ap aan te persoon sayn situatsyoon. (Gál. 5:22) Een krist khan frayt hon, orer wërklich froo sin, wën eyer wees tas eyer Yeehoowa kefalt un macht Yeesus sayn payxpiil noo. (Lees Lucas 6:22, 23; * Col. 1:10, 11) Unser frayt khan ferklaycht wëre mit een flame in een lamp. Ti flame tuut wayter prëne wayl se is fom wint un fom reen kexitst. In te selwich aat, meyer khene wayter frayt hon een tuun was in unser leepe pasiirt. Tii ferxweecht sich net wën mer krank wëre, orer wën tas kelt xpitst wërt. Un tii keet net aus wën unser familye orer ti anere uns xpote orer sich keeche uns xtele. Xtats aus keen, ti flame xaynt heler un heler yeete mools woo ti keechner fersuuche se aus mache. Ti proope woo mer weeche unser klaape mit mache, tuun taytlich pewayse tas mer Kristus sayn woere tisipele sin. (Mat. 10:22; 24:9; João 15:20) Tes weeche, Tyako khont xraype: “Mayne priiter, wën teyer unerxiitliche proope mit macht, siit tas wii een uersach fer kroos frooheet hon.” (Tia. 1:2)

7-8. Warom wërt unser klaape ferxtërkt wën mer keproopt sin?

⁷ Tyako saat weeche was noch sin ti kriste wilich fer xrooe proope aus hale: “Ayre keproopte klaape nëmt tsu persewerans.” (Tia. 1:3) Ti proope khene ferklaycht wëre mit tëm fayer woo penutst is fer een ayse xwaart xmite. Wën een xwaart is hays kemacht un ap kekhilt, tas ayse wërt xtërker. In te selwich aat, wën mer proope aus hale, unser klaape is ferxtërkt. Tes weeche, hot Tyako kexrip: “Lost tas ti persewerans sayn aarwayt fërtich pringt, soo tas teyer komplët un in ales oone feeler wërt.” (Tia. 1:4) Wën mer mërke tas unser proope lose unser klaape xtërker, khene mer tëne mit frayt aus hale.

⁸ In sayn priif, Tyako xprecht aach iwer welche tinge woo khente unser frayt xteele. Was sin tiise kefoore, un wii khene mer tëne iwerkhome?

9. Warom prayche mer kluucheet hon?

⁹ Ti kefoer: Net wise was se mache. Wën mer proope mit leepe, meyer wole ëntxlise mache  woo Yeehoowa kefale, woo nutse fer unser priiter un xwestere pringe un woo uns helfe troy tsu Yeehoowa plaype. (Jer. 10:23) Meyer prayche kluucheet hon fer se wise was se mache un was se saan fer tii woo sich keeche uns xtele. Awer wën mer wise net was se mache, khene mer uns oone ausweech fine un unser frayt ferliire.

10. Tëm noo Tiago 1:5, was sole mer mache fer kluucheet kriin?

¹⁰ Ti solutsyoon: Ferlang kluucheet fer Yeehoowa. Wën mer wole unser proope mit frayt aus hale, prayche mer eyerst kluucheet fer Yeehoowa im kepeet ferlange tas mer kriin kuute ëntxlise mache. (Lees Tiago 1:5.) * Awer wii sole mer uns aan xtele wën mer mëne tas Yeehoowa hot unser kepeet net klaych keantwort? Tyako hot kesaat tas mer sole noo un noo fer Kot ferlange. Yeehoowa wërt net pees mit tas; tee tuut uns net xëne. Xtats tas, wën mer kluucheet fer unser himlixe Fater ferlange fer unser proope aus hale, tuut eyer uns ‘krooshërtslich kepe’. (Sal. 25:12, 13) Tee mërkt ti propleeme woo mer hon, xpiirt mitlayt un hot een kroose wunx fer uns helfe. Kewis, tas is een kuut uersach fer uns fraye! Awer, wii tuut Yeehoowa uns kluucheet xenke?

11. Was noch mise mer mache fer Kot sayn kluucheet kriin?

¹¹ Yeehoowa xenkt uns kluucheet torich sayn Wort. (Pro. 2:6) Fer tiise kluucheet kriin, prayche mer ti Piipel un unser puplikatsyoone xtutiire. Awer ploos unser khëntnis ferkreese is net kenuuch — meyer mise Kot sayn aanreete aan wëne. Tyako hot kexrip: “Tuut tas wort aan wëne, net ploos horiche.” (Tia. 1:22) Wën mer tas mache, wëre mer friitlicher, ferninfticher un parmhërtslicher.  (Tia. 3:17) Ekaal ti xwiirichkheete woo foer khome, mit tiise kwaliteete kriin mer tëne phake un unser frooheet hale.

12. Warom is es wichtich ti Piipel kuut khëne?

¹² Kot sayn Wort is wii een xpiichel — tii heleft uns siin aan was khene mer uns ferpesere un wii tas hin kriin. (Tia. 1:23-25) Tsum payxpiil, wole mer saan tas mer sin ti Piipel am xtutiire un mërke mer tas mer prauche unser wuut kontroliire. Mit Yeehoowa sayn hilef, lërne mer wii tsaam plaype wën ti layt orer ti propleeme uns pees lose. Wayl mer tsaam sin, keen mer peser mit te propleeme um, tenke mer taytlicher un mache mer peser ëntxlise. (Tia. 3:13) Wii wichtich es is ti Piipel kuut khëne, kël?

13. Warom is es kuut ti piiplixe payxpiile xtutiire?

¹³ Als mool lërne mer was net mache ploos noo tas mer xon etwas ferkheertes kemacht hon. Awer tas is een xweyer aat fer se lërne. Es kept een peser aat fer kluucheet kriin: se lërne mit was ti anere richtich orer ferkheert kemacht hon. Tes weeche, tuut Tyako uns uf muute welche payxpiile in te Piipel kuke, wii Apraham, Rahap, Yoop un Eliias sayns. (Tia. 2:21-26; 5:10, 11, 17, 18) Tiise troye tiiner fon Yeehoowa hon proope mit kemacht woo khonte tëne sayn frayt xteele; awer tii hon tas aus kehal. Tëne sayn payxpiil tsaycht uns tas, mit Yeehoowa sayn hilef, khene mer tas selwich mache.

14-15. Warom thërfe mer net unser tswayfele mit khee antwort lose?

¹⁴ Ti kefoer: Tswayfele iwer unser klaape hon. Manich mool, khene mer es xweyer fine etwas in Kot sayn Wort ferxteen, orer fiilaycht Yeehoowa tuut net unser kepeete antworte in te aat wii mer kewaart hon. Tas khan tswayfele foer pringe. Wën mer unser tswayfele in te ek lose, tii tuun unser klaape ferxweeche un xaate fer unser froyntxaft mit Yeehoowa mache. (Tia. 1:7, 8) Un weeche tëne, khene mer soo kaar unser hofnung fer ti futuer ferliire.

¹⁵ Te aphostel Phaul hot unser hofnung fer ti futuer mit een anker ferklaycht. (Heb. 6:19) Wën een weter xtorm pasiirt, een anker halt tas xif fest un lost tëm net witich ti xteen khome. Awer, wën ti khete woo ti anker am xif fest hale sich ferpreche, wërt ti anker unutslich. Kraat soo wii te rost frest ti khete fon een anker un lost se xwach, ti tswayfele woo net keantwort sin ferxweeche unser klaape. Tan, wën mer proope mit mache, khene mer unser klaape ferliire tas Yeehoowa tuut sayn ferxpreche erfiile. Wën ma te klaape ferliirt, ferliirt ma ti hofnung. Wii Tyako saat, weer tswayfele hot “is wii een wele fom meer woo te wint hiner un heyer xupt”. (Tia. 1:6) Tsiimlich sicher, een persoon woo sich soo fint, tuut nii mools frayt xpiire.

16. Was thërfe mer mache wën mer tswayfele hon?

¹⁶ Ti solutsyoon: Pring tayn tswayfele tsum ën un ferxtërk tayn klaape. Tuu etwas xnel mache! In te taache fon tëm profeet Eliias, Yeehoowa sayn folek hot tswayfele iwer sayn klaape kehat. Tes weeche, hot Eliias tëne kesaat: “Wii lang tuut teyer noch tswixich tswaay mënunge wakle? Wën Yeehoowa te woere Kot is, keet tëm noo! Awer, wën es Paal is, tan keet tëm noo!” (1 Reis 18:21) Hayt tsu taach, kilt tas noch. Meyer prayche unersuuchunge mache tas mer kriin fer uns selepst pewayse tas Yeehoowa te woere Kot is, tas ti Piipel tëm sayn Wort is un tas Yeehoowa sayn Tsayer tëm sayn folek sin. (1 Tes. 5:21) Tas ales mache khan unser tswayfele tsum ën pringe un unser klaape ferxtërke. Un wën mer hilef prayche fer unser tswayfele antworte, khene mer ti elteste suuche. In khortse wërter:  fer wayter Yeehoowa mit frooheet tiine, thërfe mer xnel in krayfe!

17. Was tuut pasiire wën mer unser koraaj ferliire?

¹⁷ Ti kefoer: Oone muut plaype. Ti Piipel saat: “Wëns tuu oone muut in te xweyere tsayte wërst, tayn kraft tuut weenich sin.” (Pro. 24:10) Tas hepreeyx wort woo iwersetst is “oone muut wëre”, khan aach petayte “ti koraaj ferliire”. Wëns tuu tayn koraaj ferliirst, tuust tuu tayn frayt xnel ferliire.

18. Was petayt persewerans?

¹⁸ Ti solutsyoon: Trau uf Yeehoowa fer ti koraaj fer aus hale kriin. Meyer prayche koraaj hon fer ti proope aus hale. (Tia. 5:11) Tas wort woo Tyako penutst hot, woo iwersetst is “persewerans”, kept ti aanung fon yemant woo xteen, fest uf sayn plats playpt. Fiilaycht tenke mer in eene koraajixe soltaat woo kept khee xrit tsurik, soo kaar wën ti faynte tëm atakiire.

19. Was khene mer mit tëm aphostel Phaul sayn payxpiil lërne?

¹⁹ Te aphostel Phaul hot een xeen payxpiil fon koraaj un persewerans kelos. Als mool, hot eyer sich xwach kexpiirt; awer eyer khont aus hale wayl eyer hot uf Yeehoowa ketraut fer ti neetich kraft kriin. (2 Cor. 12:8-10; Fil. 4:13) Meyer khene ti selwich kraft un koraaj hon, wën mer mit teemuut erkhëne tas mer prayche Yeehoowa sayn hilef hon. (Tia. 4:10)

20-21. Fon was khene mer uns sicher sin?

²⁰ Meyer khene uns sicher sin tas ti proope woo mer mit leepe, sin net een xtroof fon Yeehoowa. Tyako kept uns ti sicherheet: “Nimant sol saan wën eyer keproopt wërt: ‘Kot is mich am proope.’ Wayl, mit xlechte tinge, Kot khan net keproopt wëre un proopt tee aach nimant.” (Tia. 1:13) Wën mer uns sicher too triwer sin, xafe mer uns tichter pay unser liipliche Fater im himel. (Tia. 4:8)

²¹ Yeehoowa “ënert sich net”. (Tia. 1:17) Wën ti eyerste kriste proope mit kemacht hon, hot Eyer tëne uner xtitst. Un hayt is tas net anerste. Tuu hërtslich tsu Yeehoowa peete, un ferlang tëm hilef fer kluucheet, klaape un koraaj kriin. Tee tuut tayn kepeete antworte. Tuu khanst tich sicher sin tas eyer tuut tich helfe tayn frayt hale soo lang wiis tuu proope aus halst!