XTUUTYUM ARTIKEL 6
“Te khop fon te fraa is te man”
“Te khop fon te fraa is te man.” (1 CORÍNTIOS 11:3)
LIIT 13 Cristo, o nosso exemplo
WAS TUUN MER SIIN? *
1. Wën een letich xwester is am pleene mit weem tuut se sich hayrate, was fer frooche sol se sich mache?
AL TI KRISTE sin unich te autoriteet fon Yeesus Kristus — eene perfekte khop. Awer, wën een kristlich fraa sich hayrate tuut, wërt se tan unich te autoriteet fon eene imperfekte man. Tas is net imer laycht. Tes weeche, wën se pleent sich mit eene pruuter hayrate, sol se sich selepst frooe: ‘Was tsaycht mich tas tiise pruuter wërt eene kuute familye khop sin? Is Yeehoowa tiine tas haupste in tëm sayn leepe? Wën net, was fer uersach hon ich fer se klaape tas, noo unser hayrat, tuut eyer uns helfe ticht pay Yeehoowa plaype?’ Kewis, een xwester sol sich aach frooe: ‘Was fer kwaliteete hon ich woo tuun nutse fer ti hayrat pringe? Sin ich ketultich un krooshërtslich? Hon ich een xtark froyntxaft mit Yeehoowa?’ (Ecl. 4:9, 12) Wën een fraa macht kuute ëntxlise eep se sich hayrat, tas khan tëne sayn hayrat helfe frooer wëre.
2. Was kuke mer in tiise artikel noo?
2 Milyoone fon unsere xwestere kepe fer uns eene xeene payxpiil fon sich unich te autoriteet fon sayn man xtele. Tii fertiine unser loop kriin! Es lost uns iwer froo Yeehoowa mit tiise troye fraae tiine! In tiise artikel, kuke mer ti antwort fer tiise tray frooche noo: (1) Was sin welche xwiirichkheete woo ti ferhayrate fraae mit mache? (2) Warom suucht een fraa raus sich unich te autoriteet fon sayn man xtele? (3) Was khene ti ferhayrate priiter un xwestere lërne mit te payxpiile fon Yeesus, Apikaiil un Maria — Yoosef sayn fraa — iwer sich unich autoriteet xtele?
WAS FER XWIIRICHKHEETE MACHE TI FERHAYRATE XWESTERE MIT?
3. Warom kepts khee perfekt hayrat?
3 Ti hayrat is eene perfekt kexenk fon Yeehoowa, awer ti layt sin imperfekt. (1 João 1:8) Tes weeche, Kot sayn Wort tuut ti pheyerche aan saan tas se tuun propleeme mit mache, woo pexrip sin wii “xwiirichkheete im leepe”. (1 Cor. 7:28) Kuk welche xwiirichkheete woo een ferhayrat fraa mit mache khan.
4. Weeche was fiilaycht mënt een fraa tas sich unich te autoriteet fon sayn man tuun, tuut se niter xtele?
4 Fiilaycht weeche ti aat wii een fraa ketsoo waar, mënt se tas sich unich te autoriteet fon sayn man tuun, is etwas woo tëne niter xtelt. Marisol, woo in te Fereenichte Xtaate fon Amërika woont, saat: “Woo ich kroos kewakst sin, hon se imer fer ti fraae kesaat tas tii sole ekaal wii ti mëner in ales sin. Ich wees tas Yeehoowa hot autoriteet fer ti mëner kep un tas Eyer kepleent hot tas ti fraae sich unich tëne xtele; soo wii soo, fertiine ti fraae respekt. Awer es is net imer laycht ti autoriteet fon mayn man respektiire, wayl ti welt saat tas ich prayche tas net mache.”
5. Was fer ferkheerte mënunge hon welche mëner iwer ti fraae?
5 Awer een fraa is im xtant mit eene man kehayrat woo tenkt tas ti fraae weenicher wii ti mëner sin. Ivon, een xwester woo in Siit Amërika leept, saat: “Too woo ich woone, tuun ti mëner eyerst ese un tan noo heyer ti fraae. Ti kleene meetche thërfe koche un sauwer mache, awer ti puupe sole fon sayn muter un xwestere petiint wëre. Fon khint aan, lërne ti puupe tas se te ‘kheenich fom haus’ sin.” Ti xwester Yingling, woo in Asya leept, saat: “Es kept een xprooch in mayn lant woo saat tas ti fraa praucht net xlau sin orer apiliteete hon. Tëne sayn flicht is ti kanse aarwayt tehëm mache, awer tii thërft net fer sayn man saan was se mënt.” Soo sorte mënunge sin net liiplich un xtime net mit te Piipel. Eene man woo lost sich fon tëne influentsiire macht tas leepe fon tëm sayn fraa xweyer, macht Yeesus net noo un lost Yeehoowa traurich. (Efé. 5:28, 29; 1 Ped. 3:7)
6. Was prauche ti fraae mache fer sayn froyntxaft mit Yeehoowa ferxtërke?
6 Wii mer in tëm letste artikel kesiin hon, Yeehoowa waart tas ti kristliche mëner ti kaystliche, emotsyonaale un materyaalixe neetichkheete fon sayn familye uf phase. (1 Tim. 5:8) Awer ti ferhayrate xwestere sole yeete taach tsayt hoole fer ti Piipel leese, too triwer tenke un hërtsliche kepeete tsu Yeehoowa mache. Tas khan xweyer sin wayl ti fraae hon fiil se tuun. Tan, im xtant, tenke se tas se net kenuuch tsayt orer kraft hon fer tas ales mache kriin. Soo wii soo, es is seer wichtich tas se tiise tsayt hoole. Warom? Wayl Yeehoowa wil hon tas yeete eene fon uns een froyntxaft mit tëm paut un halt. (Atos 17:27)
7. Was lost es laychter fer ti fraa sich unich sayn man xtele?
7 Weeche tas ales, is es tsum ferxteen tas een fraa praucht sich aan xtrenge fer sich unich te autoriteet fon sayn imperfekte man xtele. Awer ti Piipel kept kuute uersache fer tas mache. Un wën ti fraa tiise uersache ferxteet un aan nëmt, wërt tëne laychter ti flicht woo se fon Yeehoowa kriit hot, erfiile.
WAROM SUUCHT EEN FRAA RAUS TI AUTORITEET FON SAYN MAN RESPEKTIIRE?
8. Tëm noo Efésios 5:22-24, warom tuut een ferhayrat xwester raus suuche unich te autoriteet fon sayn man plaype?
8 Een ferhayrat xwester suucht raus unich te autoriteet fon sayn man plaype wayl tas is was Yeehoowa fon tëne hon wil. (Lees Efésios 5:22-24.) * Tii traut uf sayn himlixe Fater wayl tii wees tas eyer tëne liipt un tas eyer teet nii mools etwas ferlange woo net kuut tsu tëne weyer. (Deut. 6:24; 1 João 5:3).
9. Was pasiirt wën een ferhayrat xwester ti autoriteet fon sayn man respektiirt?
9 Ti welt saat tas ti fraae sole Yeehoowa sayn kesetse ap xtose un tas ti autoriteet fon sayn man respektiire tuut se niter xtele. Kewis, tii woo tiise aanunge aus prayte khëne net unser liipliche Kot. Yeehoowa teet nii mools een kepoot fer sayn kiltiche tochter kepe woo tëne niter xtele teet. Een xwester woo xtram xaft fer Yeehoowa aan heere un fer unich te autoriteet fon sayn man plaype, tuut te friit tehëm aan muute. (Sal. 119:165) Weer kriit nutse too truf? Sayn man, sayn khiner un tii selepst.
10. Was fer lisyoone lërne mer mit Carol sayn wërter?
10 Es waar Yeehoowa woo raus kesuucht hot autoriteet fer ti anere kepe. Tes weeche, wën een fraa xtelt sich unich sayn imperfekte man, tsaycht se tas se tuut Yeehoowa liipe un respektiire. “Ich wees tas mayn man tuut feeler mache — saat Carol, woo in Siit Amërika leept —, awer ich wees aach tas ti aat wii ich mich forich tiise feeler aan xtele, tsaycht wii fiil weyert kepe ich fer mayn froyntxaft mit Yeehoowa. Tan, fersuuche ich unich te autoriteet fon mayn man plaype wayl ich wil mayn himlixe Fater froo lose.”
11. Was tuut ti xwester Aneese helfe sayn man fertsaye, un was khëne mer mit tëne sayn wërter lërne?
11 Es khan xweyer fer een fraa sin sayn man respektiire un sich unich tëm sayn autoriteet xtele, wën se mërkt tas sayn man khimert sich net mit tëne sayn xpiirunge un soriche. Awer kuk was Aneese, een ferhayrat xwester, macht wën tas pasiirt. Tii saat: “Ich fersuuche net pees wëre. Ich erinere mich tas mer al feeler mache. Mayn tsiil is krooshërtslich fertsaye, soo wii Yeehoowa es macht. Wën ich fertsaye, kriin ich mayn friit tsurik.” (Sal. 86:5) Fer een fraa woo laycht fertsayt, wërt es tsiimlich sicher laychter sich unich te autoriteet fon sayn man xtele.
WAS KHENE MER LËRNE MIT TE PIIPLIXE PAYXPIILE?
12. Was fer payxpiile hot ti Piipel?
12 Welche tenke tas yemant woo sich unich te autoriteet fon te anere xtelt, xwach is. Awer, tas is net woer. Ti Piipel hot fiile payxpiile fon xtarke layt woo hon ti autoriteet fon anere respektiirt. Kuk mool was khene mer mit Yeesus, Apikaiil un Maria lërne.
13. Warom tuut Yeesus Yeehoowa sayn autoriteet respektiire? Lee tas aus.
13 Yeesus respektiirt Yeehoowa sayn autoriteet. Awer, wil tas saan tas eyer khee xlauheet orer apiliteet hot? Kewis net. Sayn keweenlich un taytlich aat fer in lërne pewayst tas eyer seer xlau is. (João 7:45, 46) Yeehoowa hot wërklich fiil weyert fer Yeesus sayn apiliteete kep. Tes weeche, hot eyer Yeesus erlaupt mit tëm xafe fer tas kans Uniwërsum paue. (Pro. 8:30; Heb. 1:2-4) Un, fon Yeesus sayn ufxtaye aan foran, Yeehoowa hot tëm “ti kans autoriteet im himel un uf te eyert kep”. (Mat. 28:18) Opwool Yeesus fiil apiliteet hot, tuut eyer noch Yeehoowa sayn lënkung suuche. Weeche was? Wayl eyer tëm sayn Fater liipt. (João 14:31)
14. Was khene ti mëner lërne fon (a) ti aat wii Yeehoowa ti fraae siit? (b) ti wërter woo in Provérbios 31 xteen?
14 Was khene ti mëner lërne? Yeehoowa hot net ti fraae unich te autoriteet fon sayn mëner kextelt wayl eyer tenkt tas se weenicher sin. Un Yeehoowa hot tas taytlich kelos wën eyer mëner un fraae raus kesuucht hot fer mit Yeesus rechiire. (Gál. 3:26-29) Yeehoowa hot pewayst tas eyer uf sayn Soon traut wën eyer tëm autoriteet kep hot. In te selwich aat, eene kluuche man tuut een teel autoriteet fer sayn fraa kepe. Ti Piipel pexraypt ti sorte tinge woo een kexayt fraa mache khan. Tsum payxpiil, tii khan ti aarwayt tehëm uf phase, lënter khaafe un ferkhaafe, un kexefte mache. (Lees Provérbios 31:15, 16, * 18. *) Tii is net een sklaawin woo khee recht hot fer sayn mënunge kepe. Xtats tas, sayn man traut uf tëne un heert tëne sayn aanunge. (Lees Provérbios 31:11, * 26, 27. *) Wën eene man soo een sort respekt noo sayn fraa tsaycht, tuut se sich froo unich tëm sayn autoriteet xtele.
Was khene ti kexayte fraae lërne mit Yeesus sayn payxpiil iwer Yeehoowa sayn autoriteet respektiire? (Kuk te apsats 15.)
15. Was khene ti fraae mit Yeesus sayn payxpiil lërne?
15 Was khene ti fraae lërne? Opwool Yeesus kroose tinge kemacht hot, tenkt eyer net tas Yeehoowa sayn autoriteet respektiire tuut tëm niter xtele. (1 Cor. 15:28; Fil. 2:5, 6) In te selwich aat, een kexayt fraa woo Yeesus sayn payxpiil noo keet, tuut net rechne tas se weenicher is wayl se sich unich te autoriteet fon sayn man xtelt. Tii tuut sayn man uner xtitse, net ploos wayl se tëm liipt, awer hauptseechlich wayl se Yeehoowa liipt un respektiirt.
Apikaiil xikt ese fer Tawi un sayn mëner. Noo heyer, is se foer Tawi kang. Tan, tuut se sich ufm pootem kniie un ferlangt tëm fer net tsurik petsaale un soo pluutxultich wëre (Kuk te apsats 16.)
16. Tëm noo 1 Samuel 25:3, 23-28, was fer xwiirichkheete hot Apikaiil mit kemacht? (Kuk tas pilt am aanfang fom piichelche.)
16 Apikaiil waar mit Napal kehayrat. Tee waar een ekoiistixe, hoochmuutiche un unpetankliche man kewees. Es waar een laycht ausweech kewees fer tëne sayn hayrat tsum ën pringe: Apikaiil praucht ploos ruych plaype un erlaupe tas Tawi un sayn mëner Napal um pringe teete. Awer tii hot tas net pasiire kelos. Xtats tas, hot se kemacht ales was meechlich waar fer Napal un sayn kroos familye xitse. Iwerlee tich wii fiil koraaj praucht Apikaiil hon: tii is forich 400 mëner kang — woo wafe hate — un hot mit respekt iwer te propleem mit Tawi kexproch. Tii waar soo kaar wilich fer ti xult weeche ti aanxtelung fon sayn man iwer sich nëme. (Lees 1 Samuel 25:3, * 23-28. *) Tawi hot klaych kemërkt tas Yeehoowa waar tiise koraajich fraa am penutse fer tëm een aanreet kepe woo tëm um kehal hot een kroose feeler mache.
17. Was khene ti mëner lërne fon Tawi un Apikaiil sayn kexicht?
17 Was khene ti mëner lërne? Apikaiil waar een ferninftich fraa kewees. Wii kuut tas Tawi eene kluuche man waar un hot tëne sayn aanreet aan kenom! Wën net, khent eyer pluutxultich wëre. In te selwich aat, eene kluuche man tuut ti mënunge fon sayn fraa mit ketult noo kuke wën eyer praucht een wichtich ëntxlus mache. Im xtant, tëne sayn mënung tuut tëm um hale een xlechte ëntxlus mache.
18. Was khene ti fraae mit Apikaiil sayn payxpiil lërne?
18 Was khene ti fraae lërne? Een fraa woo Yeehoowa liipt un respektiirt, khan nutse fer sayn familye pringe — soo kaar wën sayn man tuut net Yeehoowa tiine orer Sayn printsiipye noo keen. Tii tuut net fersuuche een weech fine fer sayn hayrat tsum ën pringe. Xtats tas, tuut se sich unich te autoriteet fon sayn man xtele un tëm respektiire. Tas tuut fiilaycht te man uf rechne iwer Yeehoowa lërne. (1 Ped. 3:1, 2) Awer, ekaal was te man raus suucht, wën sayn fraa xtelt sich unich tëm sayn autoriteet, tsaycht se tas se troy tsu Yeehoowa is — un tas lost Yeehoowa aarich froo!
19. Wanee tuut een fraa sayn man net aan heere?
19 Toch, sich unich te autoriteet fon tëm man xtele wil net saan tas een kristlich fraa tuut ti piiplixe kesetse un printsiipye iwer treete ploos wayl sayn man es ferlangt hot. Tsum payxpiil, iwerlee tich tas een xwester sayn man — woo net Yeehoowa sayn Tsayer is — xikt tëne liie, xteele orer etwas aneres woo ferkheert is mache. Al ti kriste, too tepay ti ferhayrate xwestere, thërfe Yeehoowa im eyerste plats aan heere. Tan, wën een xwester sayn man ferlangt se ti piiplixe printsiipye iwer treete, tii sol tas ap xtose un aus leye — in een liiplich, awer fest aat — warom macht se tas net. (Atos 5:29)
Kuk te apsats 20. *
20. Wii wise mer tas Maria hot een ticht froyntxaft mit Yeehoowa kehat?
20 Maria hot een ticht froyntxaft mit Yeehoowa kehat. Sicher, hot se ti Xrifte kuut kekhënt. Soo lang wii se mit Elisapët — Yoohan te Taafer sayn muter — fertseelt hot, Maria hot wërter fon te Hepreeyxe Xrifte mee wii 20 mools foer keprung. (Luc. 1:46-55) Yets, tenk too traan: opwool Maria waar Yoosëf sayn praut kewees, Yeehoowa sayn engel is net eyerst foer tëm khom. Te engel hot eyerst mit Maria kexproch un tëne kesaat tas se teet ti muter fon Kot sayn Soon wëre. (Luc. 1:26-33) Yeehoowa hot Maria kuut kekhënt un waar sich sicher tas se teet Sayn Soon liipe un uf phase. Un sicher, Maria hot een kuut froyntxaft mit Yeehoowa wayter kehal soo kaar noo tas Yeesus kextorep, uf keruuft un tsum himel kang is. (Atos 1:14)
21. Was khene ti mëner lërne fon was ti Piipel iwer Maria saat?
21 Was khene ti mëner lërne? Eene kluuche man wërt froo wën sayn fraa tuut ti Piipel kuut khëne. Tee tenkt net: ‘Tii wil peser wii ich sin un mayn plats fer sich hoole.’ Kans anerste, tee ferxteet tas een fraa woo ti Piipel un sayn printsiipye kuut khënt, khan fiil nutse fer sayn familye pringe. Kewis, soo kaar wën sayn fraa mee xuul wii tëm hot, is es tëm sayn flicht ti familye aanpeetung un anere kaystliche aktiwiteete fiire. (Efé. 6:4)
Was fer lisyoone khene ti ferhayrate fraae lërne iwer xtutiire un triwer noo tenke mit Maria, Yeesus sayn muter? (Kuk te apsats 22) *
22. Was lërne ti fraae mit Maria?
22 Was khene ti fraae lërne? Een fraa mus sich unich te autoriteet fon sayn man xtele, awer tii praycht noch sayn aychne klaape xtark hale. (Gál. 6:5) Fer es hin kriin, tii mus tsayt hoole fer sayn perseenlich xtuutyum mache un fer triwer noo tenke. Tas tuut tëne helfe Yeehoowa wayter liipe un respektiire un froo wëre wën se sich unich te autoriteet fon sayn man xtelt.
23. Wii tuun ti fraae woo ti autoriteet fon sayn man respektiire nutse fer sich selepst, fer sayn familye un fer ti kemaynt pringe?
23 Ti fraae woo, weeche liip tsu Yeehoowa, ti autoriteet fon sayn man respektiire, wëre frooer un tsufriiter wii tii woo mache tas net. Tii lose een xeene payxpiil fer ti puupe un ti meet. Un tii tuun liip un friit net ploos in te familye uf rechne, awer aach in te kemaynt. (Tito 2:3-5) Hayt, ti meyerste fon Yeehoowa sayn troye tiiner sin fraae. (Sal. 68:11) Awer meyer al — mëner un fraae — hon een wichtich flicht in te kemaynt. Te neekste artikel tuut xpreche iwer wii khan yeete eene fon uns tiise flicht erfiile.
LIIT 131 Yeehoowa halt uns paysamer
^ parágrafo 5 Yeehoowa hot kepleent tas, in te familye, ti ferhayrat fraa sol sich unich te autoriteet fon sayn man xtele. Was is too tepay? Ferhayrate priiter un xwestere khene iwer tiise sache lërne mit te payxpiile fon Yeesus, Apikaiil un Maria.
^ parágrafo 8 (Efésios 5:22-24) Ti fraa sol sich uner te autoriteet fon sayn man xtele soo wii tsum Hër, 23 wayl te man is te khop fon te fraa soo wii Kristus te khop fon te kemaynt un reter fom khërper is. 24 Soo wii ti kemaynt is uner Kristus sayn autoriteet, soo sol ti fraa sich unich te autoriteet fon sayn man xtele, in ales.
^ parágrafo 14 (Provérbios 31:15, 16) Tii xtayt aach uf wëns noch nacht is, tii kept ese fer tii woo in sayn haus woone; un fer ti tiinerine, kept se tëne sayn teel. 16 Tii ëntxlist een xtik lant khaafe un khaaft es; mit was se fon sayn aarwayt fertiint, plantst se een traupe krist.
^ parágrafo 14 (Provérbios 31:18) Tii mërkt tas sayn kexefte kelt mache; nacht oomt sayn lamp macht sich net aus.
^ parágrafo 14 (Provérbios 31:11) Sayn man tuut hërtslich uf tëne traue, un tëm feelt niks woo weyert hot.
^ parágrafo 14 (Provérbios 31:26, 27) Tii tuut sayn maul mit kluucheet uf mache; tas kesets fon kuutheet is in sayn tsung. 27 Tii phast ti aarwayte fon sayn haus uf, un est net tas proot fon faulheet.
^ parágrafo 16 (1 Samuel 25:3) Te man, woo nookhomer fon Kalëp waar, hot Napal keheest un sayn fraa, Apikaiil. Ti fraa waar ferninftich un xeen kewees, awer te man waar krop un xlecht.
^ parágrafo 16 (1 Samuel 25:23-28) Klaych wii Apikaiil Tawi kesiin hot, is se fon sayn esel runer kextii un hot sich forich Tawi kexmis, mit sayn kesicht ufm pootem. 24 Tii hot sich tan aan tëm sayn fiis kexmis un kesaat: “Tas ti xult iwer mich falt, mayn hër. Los mich, tayn tiinerin, xpreche; un horich ti wërter fon tayn tiinerin. 25 Mayn hër, piite, kep net acht fer tiise unutsliche man, Napal, wayl eyer fertiint te naame woo eyer kriit hot. Tee heest Napal un tee is wërklich tum. Awer ich, tayn tiinerin, hon net kesiin ti mëner woos tuu kexikt host. 26 Un yets, mayn hër, soo sicher wiis tuu leepst un wii Yeehoowa leept: es is Yeehoowa woo tich um kehal hot pluutxultich wëre un mit tayn aychne hënt tsurik petsaale. Tas tayn faynte un ti mëner woo tich xaate mache wole, soo wii Napal wëre! 27 Awer yets, mayn hër, kep tiise kexenk woo tayn tiinerin fer tich keprung hot fer ti mëner woo mit tich sin. 28 Piite, fertsay tayn tiinerin wën se tich keëricht hot. Ich sin mich sicher tas Yeehoowa macht tas tayn haus, mayn hër, lang tauert; wayls tuu, mayn hër, tuust Yeehoowa sayn kriiche khëmpfe un niks xlechtes waar, torich tayn kanse leepe, aan tich kefun.
^ parágrafo 75 PILTER AUSLEYUNGE: Soo lang wii se mit Elisapët — Yoohan te Taafer sayn muter — fertseelt hot, hot Maria wërter fon te Hepreeyxe Xrifte fom hërts aus fiil mools foer keprung.
^ parágrafo 77 PILTER AUSLEYUNGE: Een ferhayrat fraa hoolt tsayt fer ti Piipel xtutiire un sayn klaape xtark hale.
