Ich sin uf te welt khom in 1941 in Paris, Frankraych un unser familye hat net fiil kelt. Ich hon kërn imer was nayes kelërnt. Awer een mool, wii ich 10 yoore alt waar, hon ich tuperkulosis kriit. Ich sin aarich traurich kep wii ich khont net mee tsu te xuul keen. Ti toktere hon kesaat tas ich mist tehëm plaype, im pet, wayl mayn lunge xwach waare. Tan, torich phaar moonate — tas ti tsayt xneler rom keengt —, hon ich een wërter puuch kelees un aach ti ratyo Sorbonne kehoricht, fon te Uniwersiteet fon Paris. Wii te tokter kesaat hot tas ich net mee krank waar un tas ich khent tsurik tsu te xuul keen, sin ich mechtich froo kep! Ich hon ketenkt: ‘Was ti toktere mache is wërklich wunerlich!’ Fon tat aan, mayn traam waar ti layt heele. Imer wën mayn fater kefroot hot was ich fon mayn leepe mache wolt, hon ich keantwort: “Ich wil een tokter sin.” Un ich wolt tas mit mayn kans hërts!

Mayn familye waar katoolix kewees. Awer ich wust net fiil iwer Kot. Ich hat haufe frooche, awer kaar khee antwort. Ploos xpeeter, wii ich in te uniwersiteet waar, sin ich mich sicher kep tas yemant tas leepe kemacht hot.

Ich tenke mich noch traan tas eyerste mool woo ich een sëlule fon een pluum kesiin hon mit een mikroskopyo. Es hot mich ferwunert wii ti sëlule sich xitse tuut keeche ti hits un ti khelt. Ich hon aach te citoplasma peopacht (etwas woo in te sëlule is). Wën tee sals treft, wërt eyer kleener; wën tee waser treft, wërt eyer kreeser. Weeche soo sorte apiliteet, khene kleene lepeentiche tinge sich traan keweene mit unerxiitliche situatsyoone. Kewis is ti sëlule net een keweenlich tings. Tas hot mich sicher kelos tas tas leepe hot net aleen aan kefang.

 Ich hon noch mee pewaysunge kesiin tas Kot eksistiirt in mayn 2^te yoer in te uniwersiteet. In te xuul woo mer hate iwer te mënxliche khërper, hon mer kelërnt tas, weeche ti aat wii unser aarm is, khene ti finger sich aus xtreke un piie. Es is wunerlich wii ti muskele un ti knoche ferpunt sin un wii se mitsamer xafe. Tsum payxpiil: ich hon kelërnt tas es een fleks kept woo pine tuut een muskel fon unser aarm mit te tsweete knoche fon unser finger. Tiise fleks, teelt sich in tswaay un macht een sort priik. Tes weeche, khan een aner fleks — woo pis tsum xpits fon te finger keet — ritxe awer aach fest uf sayn plats plaype. Tiise flekse plaype kans ticht pay te knoche fon te finger. Wëns net soo weyer, teete tiise flekse imer xtrak plaype un ti finger teet net kuut funtsyoniire. Ich khont taytlich siin tas tee woo te mënxliche khërper kemacht hot, aarich xlau is.

Awer noch etwas hot mich iwer te Kriatoer ferwunert. Ich hon kelërnt wii ti nëneche aan fange luft in tsiie wii se uf te welt khome. Wii se in te muterlayp sin, prayche se net luft in tsiie wayl se oksixeenyo fon sayn muter kriin. Tes weeche, kepe tëm sayn alvéolos (kleene sorte sek woo in te lung sin) net fol luft. Tan, phaar woche eep tas khint uf te welt khomt, tuut een ekstra supstans ti inerlich sayt fon te alvéolos teke. Tan, khan ma saan tas wii tas nëneche uf te welt khomt, wunere pasiire. Een loch im nëneche sayn hërts keet tsu. Tas xupt tas pluut pis ti lunge. Weeche ti ekstra supstans woo in te alvéolos is, tuun se klaych fol luft wëre. Yawool, in een sekunt khan tas khint luft aleen in tsiie.

Ich wolt peser khëne te Kriatoer fon al tiise wunerliche tinge. Tes weeche, hon ich aan kefang ti Piipel mit acht leese. Ti kesetse iwer kesuntheet, woo Kot fer Israël sayn folek kep hot mee wii 3.000 yoore tsurik, hon mich mechtich ferwunert. Kot hot fer ti israeliiter kesaat tas tii solte sayn eskremënt pekraape, sich eftas mit waser wexe, un in kwarentena tuun yeete eene woo khont een krankheet hon woo aan xtecht. (Lew. 13:50; 15:11; Teut. 23:13) Ti syentiste hon ploos raus kefun wii ti krankheete sich ferprayte in te letste 150 yoore. Awer ti Piipel hot xon too triwer kexproch. Un weeche ti kesetse iwer sëks in Lewiitikus, khont ti kans natsyoon fon Israël kesunt plaype. (Lew. 12:1-6; 15:16-24) Ich hon kemërkt tas Kot hot tiise kesetse fer ti israeliiter kep tas ales kuut mit tëne keengt. Un tee hot aach keseechent tii woo ti kesetse noo kang sin. Ich sin mich sicher kep tas ti Piipel fon Kot khom is. Awer in tiise tsayt wust ich noch net was tëm sayn naame waar.

Wii ich in te uniwersiteet waar, hon ich een meete khëne kelërnt: Lydie. Ich hon se aarich kërn kehat. Meyer hon uns kehayrat in 1965, wii ich xon halp teel fon mayn Metitsiin khurs kemacht hat. In 1971, hate mer xon 3 khiner, un xpeeter hon mer noch 3 kriit. Lydie hot mich imer uner xtitst in mayn aarwayt un in unser familye.

Ich hon 3 yoore in een krankehaus kexaft un tan hon ich mayn aychne klinika uf kemacht. Klaych tëm noo, is een pheyerche khom woo wolt een tratamënt kriin — tas sin ti 2 pasyente woo  ich am aanfang kesaat hon. Kraat wii ich aan kefang hon te resept fer te man xraype, hot ti fraa kesaat: “Piite, tokter, meyer wole khee pluut aan unser metitsiin.” Too hon ich kefroot: “Wërklich? Warom?” “Is wayl mer Yeehoowa sayn Tsayer sin” — hot ti fraa keantwort. Ich hat noch nii keheert iwer Yeehoowa sayn Tsayer orer was se iwer tas pluut in lërne. Ti fraa hot sayn Piipel kehool un hot mich ketsaycht warom se khee pluut aan nëme. (Aph. 15:28, 29) Tan, hon tii un sayn man mich aus keleet was Kot sayn Raych in te futuer mache tuut: tas pringt tsum ën ti eelent, ti krankheete un te toot. (Apo. 21:3, 4) “Tas was teyer mich kesaat hot… is mayn traam fon khint aan! — hon ich froo kesaat. — Ich sin een tokter kep fer ti layt sayn phayn laychter mache.” Ich hat soo kërn was ich keheert hon tas mer een un halpe xtun fertseelt hon. Wii tas pheyerche fat kang is, wolt ich net mee katoolix sin. Un yets wust ich tas te Kriatoer woo mich soo fiil ferwunert hat, een naame hot: Yeehoowa!

Tas pheyerche is noch 3 mool pay te klinika khom un meyer hon imer mee wii een xtun fertseelt. Ich hon se in kelaat fer pis mayn haus khome tas mer mee tsayt hëte fer iwer ti Piipel xpreche. Lydie is pay uns keplip wën mer xtutiirt hon. Awer tii wolt net aan nëme tas etliche katoolixe inlërnunge ferkheert waare. Tes weeche, hon ich een phaater in kelaat fer mit uns fertseele. Meyer hon iwer ti inlërnunge fon te khërich kexproch pis es xon kans nacht waar un mer hon ploos ti Piipel penutst. Tiise kexprech hot Lydie sicher kelos tas Yeehoowa sayn Tsayer ti woerheet in kelërnt hon. Fon tat aan, is unser liip tsu Yeehoowa imer kreeser kep un mer hon uns taafe kelos in 1974.

Wën ich kelërnt hon was Yeehoowa fer ti mënxe pleent, hon ich keënert was tas haupste in mayn leepe waar. Fer mich un fer Lydie, Yeehoowa tiine is im eyerste plats khom. Meyer wolte unser khiner tsiie tëm noo te oryentiirunge fon te Piipel. Meyer hon tëne in kelërnt Yeehoowa un ti layt liipe un tas hot uns tichter wii familye kexaft. (Mat. 22:37-39)

Unser khiner wuste tas, wii eltere, hon ich un Lydie imer kextimt; als mool tuun mer soo kaar lache wën mer too traan tenke. Tii wuste tas tehëm, hon mer Yeesus sayn kepoot aan keheert: “Wën teyer ‘yaa’ saat, tas sol ‘yaa’ petayte; un wën teyer ‘nee’ saat, tas sol ‘nee’ petayte.” (Mat. 5:37) Tsum payxpiil: wii eene fon unser meetche  17 yoore alt waar, hot Lydie se net erlaupt mit een krup yunge xpatsiire keen. Awer too hot een meetche fom krup kesaat: “Wën tayn mama tich net lost, ferlang fer tayn papa!” “Tas tuut net pariire… — hot unser meetche keantwort. — Tii tuun imer eene mim aner xtime.” Yawool, unser 6 khiner wuste tas mer imer in ferxtant waare mit was se tuun hot mit piiplixe oryentiirunge foliche. Un meyer sin aarich froo tas fiil in unser familye tuun Yeehoowa hayt tiine.

Ti woerheet khëne hot wërklich keënert was tas haupste in mayn leepe waar. Awer ich wolt noch penutse was ich wii tokter kelërnt hon fer Kot sayn folek helfe. Tes weeche, hon ich mich aan kepoot fer wii tokter xafe — eyerst im Petël fon Paris un xpeeter im Petël in Louviers. Ich hon xon neekst 50 yoore im Petël wii tokter keholef. Torich tiise tsayt, hon ich froyntxaft kemacht mit fiile peteliiter; etliche fon tëne hon yets mee wii 90 yoore! Un etwas kans interesantes is pasiirt wii ich een naye peteliite kekhënt hon: 20 yoore tsurik, hat ich sayn muter keholef tëm uf te welt pringe!

Torich ti yoore, hon ich kesiin wii Yeehoowa tëm sayn Orkanisatsyoon penutst fer sayn folek lënke un xitse. Tas hot mayn liip tsu tëm ferkreest. Tsum payxpiil: unkefeer in 1980, hot ti Rechiirente Khërperxaft een naye prokram in te Fereenichte Xtaate fon Amërika aan kefang. Tas opjetiiw waar ti toktere un anere woo in krankehayser xafe helfe peser ferxteen warom Yeehoowa sayn Tsayer khee pluut aan nëme.

Tan, in 1988, hot ti Rechiirente Khërperxaft een nay apteelung in Petël aan kefang: ti Informatsyoone iwer Krankehayser Apteelung. Am aanfang, hot tiise apteelung ti Krankehaus Ferpiinungs Komisyoone (KFK) uf kephast, woo sin in te Fereenichte Xtaate fon Amërika in kextelt kep fer Yeehoowa sayn Tsayer helfe toktere fine woo unser ëntxlus iwer tas pluut respektiire. Nochter, waare tiise komisyoone uf te kans welt in kextelt, too tepay too im Frankraych. Es is wunerlich se siin wii Yeehoowa sayn Orkanisatsyoon liiplich uf phase tuut unser kranke priiter un xwestere wën se tas te meyerst prayche.

Mayn traam waar een tokter sin fer ti layt heele. Awer, wii ich noo ketenkt hon iwer was tas haupste in mayn leepe waar, hon ich kemërkt tas tas wichtichste waar ti layt helfe Yeehoowa — ti Kwel fom leepe — khëne un tiine. Tes weeche, noo tas ich mich aposentiirt hon, hon ich un Lydie aan kefang wii rekulaare pyoneere xafe un mer hon fiile xtune penutst fer ti kuute notisye fom Raych preetiche. Pis hayt, mache mer unser pestes in tiise aarwayt woo leepe rete tuut.

Ich mache noch was ich khan fer ti kranke layt helfe. Awer ich wees tas, soo kaar te peste tokter khan net al ti krankheete heele orer te toot um hale. Tes weeche, tuun ich hërtslich waarte te taach woo ti krankheete, ti phayn un te toot net mee eksistiire tuun. Klaych khomt ti nay welt. Tat, tuun ich ti eewichkheet hon fer iwer ti kriatsyoon lërne, too tepay ti wunerlich aat wii Yeehoowa te mënxliche khërper kemacht hot. Yawool, een teel fon was ich ketreemt hat wii ich een khint waar, hot sich xon erfiilt. Awer ich sin mich sicher tas tas pestes noch khomt!