1-2. (a) Warom tuun fiile hayt es xweyer fine se traue aan tëne woo autoriteet hon? (b) Was tuun mer in tiise artikel siin?

HAYT tsu taach, fiile fine es xweyer se traue aan yemant woo autoriteet hot. Tii mërke tas ti rechiirunge un ti kesetse tuun in te meyerst tsayt xitse tii woo raych un xtark sin, awer lose uf sayt tii woo aarm sin. Ti Piipel xtimt too temit wën se saat: “Ti mënxe [tuun] eene iwer ti anere rechiire, fer sayn aychne xaate.” (Ekl. 8:9) Un noch: etliche relichyeese fiirer mache xlechte tinge; tes weeche, hon fiile noo kelos uf Kot traue. Tan, wën mer ti Piipel mit yemant xtutiire, mise mer tëm helfe uf Yeehoowa traue. Tee mus aach lërne aan te mëner traue woo Yeehoowa too uf te eyert foer xteen.

² Kewis, sin net ploos ti Piipel xtutënte woo mise lërne uf Yeehoowa un sayn Orkanisatsyoon traue. Soo kaar wën mer xon fiile yoore in te woerheet sin, thërfe mer nii net noo lose se traue tas Yeehoowa imer tas richtiches macht. Awer, etliche situatsyoone khene im proop xtele ep mer wërklich uf Yeehoowa traue. In tiise artikel, xpreche mer iwer 3 situatsyoone woo khene unser klaape proope: (1) wën mer etliche xtike fon te Piipel leese, (2) wën mer oryentiirunge fon Yeehoowa sayn Orkanisatsyoon kriin, un (3) wën mer xwiirichkheete in te futuer mit mache.

3. Wii khene etliche piiplixe kexichte im proop xtele ep mer wërklich uf Yeehoowa traue?

 ³ Wën mer ti Piipel leese, fiilaycht khene mer uns frooe: ‘Warom hot Yeehoowa ti persoon pehantelt soo wiis too xteet? Warom hot Yeehoowa tiise ëntxlus kemacht?’ Tsum payxpiil: im puuch Nuumere, leese mer iwer een man woo hot hols im samstaach samer kereft. Yeehoowa hot kexikt tëm um pringe too teweeche. Im puuch 2^te Samuël, leese mer iwer ti sinte woo Tawi kemacht hot fiile yoore xpeeter: tee hot sëks mit een ferhayrat fraa kemacht un hot een man um keprung. Awer Yeehoowa hot tëm fertsayt. (Nuu. 15:32, 35; 2 Sam. 12:9, 13) Im xtant khene mer uns frooe: ‘Warom hot Yeehoowa Tawi sayn xlime sinte fertsayt, awer hot kexikt te aner man um pringe weeche etwas woo net soo xlim aus siit?’ Fer ti antwort fine, kuk mool 3 tinge woo mer uns traan tenke sole wën mer ti Piipel leese.

4. Wii tuun Xeenesis 18:20, 21 un Teuteronoomyum 10:17 uns helfe noch mee uf Yeehoowa sayn ëntxlise traue?

⁴Ti Piipel kept net imer al ti kleenichkheete fon een kexicht. Tsum payxpiil: meyer wise tas Tawi sich wërklich peroyt hot fon sayn sinte. (Psal. 51:2-4) Awer, was fer sort persoon waar te man kewees woo tas kesets fom samstaach net aan keheert hot? Hot eyer sich wërklich peroyt fon was eyer kemacht hat? Hat eyer Yeehoowa sayn kesetse xon friier unfolicht? Hate se xon tëm kesaat fer tas net mache, awer tee wolt net heere? Ti Piipel saat net. Awer meyer khene uns sicher fon een tings sin: Yeehoowa “is nii unkerechtich”. (Teut. 32:4) Ti mënxe tuun eftas sayn ëntxlise mache tëm noo was ti anere saan, tëm noo sayn ferkheerte mënunge, un soo wayter. Tes weeche, mache se ferkheerte kerichte. Awer Yeehoowa is net soo wii ti mënxe: tee hot ti kanse informatsyoone un tee xtaypt sayn ëntxlise too truf. (Lees Xeenesis 18:20, 21; * Teuteronoomyum 10:17. *) Woo mee mer iwer Yeehoowa un sayn kesetse lërne, woo mee tuun mer uf tëm sayn kerichte traue. Meyer khëne  Yeehoowa xon kenuuch fer se wise tas eyer “kerecht in ale sayn weeche” is; meyer sin uns sicher too tefun, soo kaar wën mer ti Piipel leese un frooche fine woo mer yets net antworte khene. (Psal. 145:17)

5. Wii tuut ti imperfektsyoon unser kerichte petrefe? (Kuk te khaste “ Ti imperfektsyoon xteert wii mer ti tinge siin”.)

⁵Meyer khene net imer richtich richte wayl mer imperfekt sin. Meyer sin tëm noo Yeehoowa sayn pilt kemacht kep; tes weeche, meyer wole hon tas ti layt kerecht pehantelt wëre. (Xee. 1:26) Awer, wayl mer imperfekt sin, khene mer ti sache als mool ferkheert richte — soo kaar wën mer tenke tas mer ti kanse informatsyoone hon. Tas is mit Yoonas pasiirt. Fiilaycht, erinerst tuu tich tas Yoonas net froo waar wii Yeehoowa parmhërtslichkheet fer ti layt fon Niiniwe ketsaycht hot. (Yon. 3:10–4:1) Awer, tenk mool noo aan was pasiirt is wayl Yeehoowa parmhërtslich waar: mee wii 120.000 layt hon sich peroyt un sin keret kep! Tan, weer waar ferkheert kewees: Yoonas orer Yeehoowa? Kewis, waar es Yoonas kewees woo ti layt ferkheert kericht hot.

6. Warom mus Yeehoowa sich net fer uns aus leye weeche sayn ëntxlise?

⁶Yeehoowa praycht sich net fer ti mënxe aus leye weeche sayn ëntxlise. Es is woer tas, als mool, hot Yeehoowa kelos tas sayn tiiner saan teete was se iwer Sayn ëntxlise kemënt hon. (Xee. 18:25; Yon. 4:2, 3) Un, als mool, hot Yeehoowa sayn ëntxlise aus keleet. (Yon. 4:10, 11) Awer Yeehoowa mus sich net fer uns aus leye. Wayl tee unser Kriatoer is, praycht eyer net unser tsuxtimung hon foer orer noo een ëntxlus mache. (Isa. 40:13, 14; 55:9)

7. Was khan xweyer sin fer uns se mache, un warom?

⁷ Meyer hon khee tswayfel tas Yeehoowa imer tas richtiches macht un tas mer khene uf tëm traue. Awer tas khan xweyer fer uns sin se traue uf te mëner woo Yeehoowa raus kesuucht hot fer sayn Orkanisatsyoon uf te eyert uf phase. Im xtant, khene mer uns frooe: ‘Meechte se wërklich Yeehoowa sayn oryentiirunge noo keen? Orer meechte se sayn aychne ëntxlise mache?’ Fiilaycht, hon etliche in te piiplixe tsayte soo ketenkt. Tenk tich traan fon te payxpiile woo mer im  apsats 3 kesiin hon. Im xtant, hot een parent fon tëm man woo hols samer refe kang is, sich kefroot: ‘Meecht Yeehoowa wërklich fer Mooses kesaat hon tas tee mist um keprung wëre?’ Orer tenk mool noo aan Uriias, Pat-Sëpa sayn man woo Tawi um keprung hot. Fiilaycht, hot eene fon sayn froynte ketenkt: ‘Ah... Tawi waar net um keprung ploos wayl eyer te kheenich is!’ Yeehoowa traut uf te mëner woo eyer raus kesuucht hot fer ti Orkanisatsyoon un ti kemaynt fiire. Tan, wën mer net uf tëne traue, khene mer net saan tas mer uf Yeehoowa traue.

8. Was is eenlich tswixich was Aphostele sayn Kexicht 16:4, 5 saat un wii Yeehoowa sayn Orkanisatsyoon hayt funtsyoniirt?

⁸ Hayt, Yeehoowa fiirt sayn Orkanisatsyoon too uf te eyert torich “te troye un ferninftiche sklaaw”. (Mat. 24:45) Soo wii ti rechiirente khërperxaft im eyerst yoer hunert, tuut tiise sklaaw Kot sayn folek uf te kans welt uf phase un kept aach oryentiirunge fer ti elteste. (Lees Aphostele sayn Kexicht 16:4, 5.) * Un ti elteste tuun tiise oryentiirunge in te kemaynt aan wëne. Wën mer aan heere ti oryentiirunge fon te Orkanisatsyoon un fon te elteste, tsayche mer tas mer traue aan wii Yeehoowa ti tinge macht.

9. Wanee khan es xweyer fer uns sin te ëntxlus fon te elteste pay xteen, un warom?

 ⁹ Als mool, khan es xweyer fer uns sin uner xtitse ti ëntxlise woo ti elteste mache. Tsum payxpiil: in te letste yoore, sin fiile kemaynte samer ketuun kep. Tes weeche, etliche fon tëne waare fer een aner sirkuyt keënert. Es is als mool pasiirt tas, fer ti Raych Saale peser penutse, hon ti elteste ferlangt tas ti priiter solte fer een aner kemaynt keen. Wën mer tas mit mache, im xtant is es net laycht fer uns unser familye un froynte lose. Meecht Yeehoowa fer ti elteste saan woo se sole yeete puplikatoer xike? Nee. Weeche tas, khan es xweyer fer uns sin ti oryentiirunge woo mer kriin foliche. Awer Yeehoowa traut uf te elteste fer soo sorte ëntxlise mache un meyer sole aach uf tëne traue. *

10. Tëm noo Hepreeyer 13:17, warom sole mer ti ëntxlise fon te elteste uner xtitse?

¹⁰ Warom mise mer ti elteste sayn ëntxlise pay xteen soo kaar wën se anerste sin fon was meyer mache teete? Wayl wën mer tas mache, helfe mer ti eenichkheet tswixich Kot sayn folek hale. (Ëfe. 4:2, 3) Wën ti priiter, mit teemuut, ti ëntxlise fon te elteste khërperxaft aan heere, keet ti kemaynt foran. (Lees Hepreeyer 13:17.) * Un tas haupste: wën mer pay xteen tii woo Yeehoowa traut fer uns uf phase, tuun mer tsayche tas mer uf Tëm traue. (Aph. 20:28)

11. Was khan uns helfe noch mee traue aan te oryentiirunge woo mer fon te elteste kriin?

¹¹ Was khan uns helfe noch mee traue aan te oryentiirunge woo mer fon te elteste kriin? Meyer mise uns traan tenke tas ti elteste ferlange hayliche kayst im kepeet wën se xpreche tuun iwer ti sache woo ti kemaynt petrefe. Tii tuun aach mit acht noo kuke ti oryentiirunge fon te Piipel un fon Yeehoowa sayn Orkanisatsyoon. Tii wole mit sayn kans hërts Yeehoowa kefale un sayn folek in te pest aat wiis meechlich is uf phase. Tiise troye mëner wise tas se tuun aprechnunge mit Yeehoowa mache weeche ti aat wii se tëm sayn folek uf phase. (1 Phe. 5:2, 3) Tenk mool noo: traus in te welt, sin ti layt keteelt weeche relichyoon, ras un politik; awer Yeehoowa sayn folek tuut te eensiche woere Kot in friit, mitsamer aan peete. Soo was is ploos meechlich wayl Yeehoowa tëm sayn Orkanisatsyoon seechent!

12. Was mise ti elteste noo kuke fer se wise ep een persoon sich wërklich peroyt hot?

¹² Yeehoowa hot ti elteste een wichtich flicht kep: ti kemaynt sauwer hale. Wën yemant een xweyer sint macht, Yeehoowa wil hon tas ti elteste ëntxlise ep tiise persoon in te kemaynt plaype khan orer net. Kewis is net ploos tas; tii mise raus fine ep ti persoon sich wërklich peroyt hot fon was se kemacht hot. Fiilaycht, saat ti persoon tas se sich wërklich keraut hot. Awer meecht se sayn sint hase? Meecht se pextimt sin net mee ti selwiche sint mache? Wën ti persoon ti sint kemacht hot weeche xlechte keselxaft, meecht se wilich sin fer tiise froynte im xtich lose? Ti elteste peete tsu Yeehoowa. Tii kuke aach noo was ti Piipel saat, ales was pasiirt is, un aach was ti persoon iwer sayn feeler xpiirt. Tan, tuun se ëntxlise ep ti persoon in te kemaynt plaype khan. Als mool, mus ti persoon tesasosiirt wëre. (1 Kor. 5:11-13)

13. Mit was khene mer uns ketanke mache wën een froynt orer parent tesasosiirt is?

¹³ Wii khan tiise situatsyoon im frooch xtele ep mer wërklich uf te elteste traue? Wën ti persoon woo tesasosiirt kep is net unser froynt orer parent is, khan es laycht sin ti elteste sayn ëntxlus pay xteen. Awer, un wën ti persoon woo tesasosiirt is een ticht froynt is? Im xtant,  khene mer aan fange uns frooe: ‘Meechte ti elteste al ti informatsyoone noo kekukt hon? Meechte se kericht hon soo wii Yeehoowa richte teet?’ Tan, wole mer siin was uns helfe khan ti elteste sayn ëntxlus pay xteen.

14. Wën een froynt orer parent tesasosiirt is, was khan uns helfe ti elteste sayn ëntxlus pay xteen?

¹⁴ Meyer mise uns imer traan tenke tas Yeehoowa penutst ti tesasosyasyoon fer ti kemaynt sauwer hale. Wën yemant woo een sint macht un sich net peroyt in te kemaynt plaype teet, khent eyer ti anere influentsiire aach sinte. (Kal. 5:9) Ti tesasosyasyoon khan aach helfe ti persoon woo ti sint kemacht hot. Wën se net tesasosiirt weyer, khent se tenke tas sayn sint net soo xweyer waar un tas se mus net sayn ketanke un aktsyoone ënere fer Yeehoowa noch mool kefale. (Ekl. 8:11) Meyer mise uns aach sicher fon een tings sin: ti elteste wise tas es een ërnst flicht is ëntxlise ep yemant sol tesasosiirt sin orer net. Tii wise tas, soo wii ti richter in te friirixe Israël, tuun se “net fer ti mënxe richte, awer fer Yeehoowa”. (2 Kro. 19:6, 7)

15. Warom mise mer hayt, mee wii noch nii, uf Yeehoowa sayn oryentiirunge traue?

¹⁵ Tas ën fon tiise xlecht welt is aarich ticht. Tes weeche, mise mer hayt — mee wii noch nii — traue aan wii Yeehoowa ti tinge macht. Warom? Wayl torich ti kroos tripulatsyoon, tuun mer im xtant oryentiirunge kriin woo xweyer fer se ferxteen orer aan wëne aus siin. Kewis, tuut Yeehoowa net mit uns perseenlich xpreche. Tsiimlich sicher, kriin mer oryentiirunge torich ti mëner woo tëm foer xteen. Es wërt net ti tsayt sin fer tswayfele iwer ti oryentiirunge hon orer sich frooe: ‘Meechte tiise oryentiirunge wërklich fon Yeehoowa khome? Orer sin se ploos ti mënunge fon te mënxe woo ti Orkanisatsyoon fiire?’ Wën mer xon hayt uf Yeehoowa un uf sayn Orkanisatsyoon traue, un tëne sayn oryentiirunge klaych aan wëne, tsiimlich sicher mache mer tas selwiches torich ti kroos tripulatsyoon. (Luk. 16:10)

16. Was fer situatsyoon in te futuer khan im proop xtele ep mer wërklich uf Yeehoowa sayn kerichte traue?

¹⁶ Meyer mise aach triwer noo tenke aan wii mer uns aan xtele tuun foer Yeehoowa sayn kerichte am ën fon tiise xlecht welt. Hayt, hon mer noch ti hofnung tas tii woo Yeehoowa net aan peete — too tepay unser parente — ëntxlise aan fange tëm tiine. Awer, torich te Armaxeton, tuut Yeehoowa Yeesus penutse fer yeete persoon richte. (Mat. 25:31-33; 2 The. 1:7-9) Sin net meyer woo raus suuche tuun weer Yeehoowa sayn parmhërtslichkheet kriit. (Mat. 25:34, 41, 46) Meechte mer uf Yeehoowa sayn kerichte traue? Orer tuun mer noo  lose tëm tiine wayl mer mit tëm sayn ëntxlise net xtime? Kewis, mise mer hayt uf Yeehoowa noch mee traue tas mer, in te futuer, uf tëm kans traue tuun.

17. Was fer kuute tinge tuun pasiire weeche Yeehoowa sayn kerichte am ën fon tiise xlecht welt?

¹⁷ Xtel tich mool foer: wii meechte mer uns in te nay welt xpiire wën mer siin te resultaat fon Yeehoowa sayn kerichte? Ti falx relichyoon tuut net mee eksistiire. Ti kiiriche kexefte un ti rechiirunge — woo ti layt xon soo fiil uner trikt hon — tuun aach rom keen. Meyer tuun net mee layte weeche krankheete, altheet, orer weeche te toot fon yemant woo mer liipe. Satanaas un ti temoone wëre tausent yoore in kexpërt. Tas kanse xlechtes woo pasiirt is weeche tëm sayn repelyoon, tuut ferxwine. (Apo. 20:2, 3) Meyer wëre wool aarich petanklich sin tas mer ketraut hon uf te aat wii Yeehoowa ti tinge macht!

18. Tëm noo Nuumere 11:4-6 un 21:5, was fer lisyoone khene mer lërne fon was mit te israeliiter pasiirt is?

¹⁸ Un, in te nay welt? Meechte mer etwas mit mache woo im proop xtele khan ep mer wërklich traue aan wii Yeehoowa ti tinge macht? Tsum payxpiil: tenk mool noo aan te israeliiter. Tii waare sklaawe im Ejipt kewees. Awer klaych wii se raus khom sin, hon etliche aan kefang sich pexweere wayl se ferlangre hate fon tëm ese fom Ejipt. Tii hon soo kaar kesaat tas te manaa unutslich waar. (Lees Nuumere 11:4-6; * 21:5. *) Meechte mer uns kraat soo aan xtele noom Armaxeton? Meyer wise net wii fiil aarwayt es wërt sin fer ti eyert sauwer lose un fon tëne een paratiis mache. Tsiimlich sicher, tuun mer fiil xafe un khan sin tas, am aanfang, wërt tas leepe net soo laycht sin. Meechte mer uns pexweere weeche was Yeehoowa uns in tiise tsayt kept? Meyer khene uns sicher fon een tings sin: wën mer xon hayt petanklich sin fer was Yeehoowa uns kept, tuun mer noch petanklicher sin fer was Yeehoowa uns in te futuer xenkt.

19. Tuu in khortse wërter aus leye ti haupste phunkte fom artikel.

¹⁹ In tiise artikel, hon mer kelërnt tas Yeehoowa imer tas richtiches macht. Meyer mise uns sicher too tefun sin. Meyer hon aach kesiin tas mer mise uf te mëner traue woo Yeehoowa raus kesuucht hot fer sayn folek uf phase. Tuu tich nii net ferkese fon was Yeehoowa uns saat torich te profeet Isaiias: “Ayre kraft khomt fon in ruu plaype un aan mich traue.” (Isa. 30:15)