IN TE piiplixe tsayte, wën eene man sich hayrate wolt, mist tee orer sayn familye te prays fon praut petsaale fer ti praut sayn familye. Fiilaycht, khonte se tas petsaale mit weyertliche tinge, fiitsaych orer kelt. Als mool hon se tiise prays mit aarwayt petsaalt. Tas is tsum payxpiil mit Yaakop pasiirt: tee hot aan kenom 7 yoore fer Rakël sayn fater xafe tas tee khont sich mit Rakël hayrate. (Xee. 29:17, 18, 20) Warom hon ti israeliiter te prays fon praut petsaalt?

Carol Meyers, een piiplix unersuucher, saat: “In te familye woo im plantaaj kexaft hon, hot ti aarwayt fon een persoon fiil aus kemacht. Tes weeche, waar fiilaycht te prays fon praut een aat fer ti familye petsaale wayl sayn tochter teet net mee tehëm helfe.” Im xtant, waar te prays fon praut aach een aat fer ti froyntxaft ferxtërke tswixich ti familye woo yets eenich waare weeche ti hayrat. Tiise eenichkheet waar aarich wichtich in xweyere tsayte, wayl tan khonte ti familye sich naner helfe. Te prays fon praut hot aach ketsaycht tas ti fraa een praut waar; yets, teet sayn man, net sayn fater, se uf phase un xitse.

Te prays fon praut petsaale wolt net saan tas ti fraa een tings waar woo ti layt khaafe orer ferkhaafe khente. Een puuch woo xprecht iwer tas leepe in tëm friirixe Israël saat: “Yemant khont tenke tas, wayl te man mist etwas kepe orer petsaale fer ti praut sayn familye, ti israeliitix hayrat een kexeft weyer. Awer es siit aus tas te prays fon praut waar net etwas woo se petsaalt hon fer ti tochter khaafe; es waar etwas woo se fer ti familye kep hon wayl sayn tochter net mee tehëm weyer.”

Hayt, in etliche lënter hon ti layt noch ti kewoonheet fer te prays fon praut petsaale. Wën ti kristliche familye een prays fon praut ferlange, sole se “net xtreng” sin un mee ferlange wii es kerecht is. (Fili. 4:5; 1 Kor. 10:32, 33) Soo tuun se tsayche tas se net kiirich sin orer tas se “tas kelt liipe”. (2 Tim. 3:2) Un wën ti familye een prays fon praut ferlange teet woo tsu tayer is, khent te man sich ketswung xpiire fer ti hayrat uf xupe, pis eyer es petsaale kreecht. Orer khent te man sich ketswung xpiire fer sayn aarwayt wii pyoneer lose fer mee xtune xafe fer te hooche prays petsaale.

Es kept kesetse in etliche lënter woo te prays fon praut kontroliire. In tiise pletse, tuun ti kristliche eltere ti kesetse aan heere. Weeche was? Wayl ti Piipel saat tas ti kriste sole sich unich “te heechere autoriteete hale” un ti kesetse aan heere wën se net keeche Kot sayn kesetse keen. (Rom. 13:1; Aph. 5:29)