Ich hon kelacht wayl ich net ketenkt hon tas mayn fraaynt een relichyeesix persoon waar. “Was weest tuu iwer ti Piipel?” — hon ich tëm kefroot. Tee hot net klaych keantwort. Noo een tsayt, hot eyer kesaat tas sayn mama Yeehoowa sayn Tsayer waar un tas eyer etliche tinge mit tëne kelërnt hat. Ich sin naykerich kep; soo hon ich tëm ferlangt fer mee too triwer xpreche.

Meyer hon torich phaar xtune in te nacht fertseelt. Tee hot mich kesaat tas ti Piipel in lërnt tas Satanaas te rechiirente fon te welt is. (Yoo. 14:30) Fiilaycht weest tuu tas xon torich tayn kanse leepe; awer fer mich, tas waar een nay un interesant itee. Ich hon imer keheert tas een kuut un kerechte Kot ti welt am kontroliire is. Awer tas hot net kextimt mit was ich xon in mayn leepe kesiin hat. Opwool ich ploos 26  yoore alt waar, hat ich xon fiiles kesiin woo mich unruych kelos hot.

Mayn papa waar een luftxif pilot in tëm militeer fon te Fereenichte Xtaate fon Amërika. Tes weeche wii ich noch een khint waar, wust ich kans taytlich tas een nuklear kriich meechlich weyer; tas militeer waar fërtich fer een nuklear pomp xike. Te kriich in Wyetnaam is pasiirt wii ich in te uniwersiteet in California waar. Ich hon mit keholef in te protëste woo ti xtutënte kemacht hon. Polise hon uns noo kexprung un meyer sin aus keris. Weeche ti kaas woo ti polise keeche uns kexmis hon, khonte mer net taytlich siin un mer hon uns ferxlikt. Es waar een tsayt fol torich naner un repelyoon. Politixe fiirer sin um keprung kep, un ti layt hon protëste kemacht un sich repeliirt. Yeete eene hat sayn aychne mënung iwer was kemacht wëre solt. Es waar een kroos torich naner.

In 1970, hon ich aan kefang am nort fon Alaska xafe un ich hon fiil kelt kriit. Tan sin ich pis Lontres kang, hon een moto khaaft un hon aan kefang pis tsum siit reese, mit khee itee woo ich hin keen wolt. Phaar moonate xpeeter, sin ich pis Afrika  hin khom. Wii ich am reese waar, hon ich layt kefun woo wolte aach fon sayn propleeme aus rayse.

Soo, weeche was ich kesiin un keheert hon, ti inlërnung fon te Piipel tas een xlecht kaystlich kriatuer ti welt kontroliirt, hot kextimt. Awer wën Kot net ti welt am kontroliire waar, was waar tee am mache? Ich wolt tas wise.

Phaar moonate xpeeter, hon ich ti antwort kefun. Un mit te tsayt, hon ich aach aan kefang se khëne un liipe fiile mëner un fraae, woo ekaal ti situatsyoon, sich troy tsu te eensiche woere Kot kehal hon.

Wii ich tsurik tsu Lontres kang sin, hon ich mit mayn fraaynt sayn mama kexproch un tii hot mich een Piipel kep. Xpeeter sin ich tsu Amsterdam, Holant, kang; tat hot een Yeehoowa sayn Tsayer mich kesiin ti Piipel unich een lichtphoste am leese un tee hot mich keholef mee fon te Piipel lërne. Xpeeter sin ich pis Dublin, Irlant, kerees un ich hon ti filyaal fon Yeehoowa sayn Tsayer kefun. Ich hon aan te teer keklopt un wii ich rin kang sin, hon ich Arthur Matthews khëne kelërnt — een kluuche pruuter, woo fiil speryens hat. Ich hon een Piipel xtuutyum ferlangt, un tee hot aan kenom ti Piipel mit mich xtutiire.

Ich hon aan kefang mit fiil lust xtutiire un ich wolt leese ti piicher un piichelcher woo Yeehoowa sayn Tsayer puplitsiirt hate. Kewis hon ich aach ti Piipel kelees. Es waar wunerxeen! In te fersamlunge, hon ich kemërkt tas soo kaar khiner wuste ti antworte fer frooche woo kelërntne layt xon hunerte yoore am suuche waare, soo wii: ‘Warom kepts xlechtichkheet? Weer is Kot? Was pasiirt wën mer xtërpe?’ Al mayn fraaynte waare Yeehoowa sayn Tsayer. Un tas waar was laychtes wayl ich hon khee aner persoon im kanse lant kekhënt. Tii hon mich keholef Yeehoowa liipe un te wunx hon fer tëm sayn wile mache.

In 1972, hon ich mich taafe kelos. Een yoer xpeeter, sin ich een pyoneer kep un ich sin teel kep fon een kleen kemaynt in Newry, in Nort Irlant. Ich hon een kleen xteen haus kemiit woo neewich een përich waar, wayt wech fon ales. In een khamp tat ticht, es waare khii kewees un ich hon mayn reete foer tëne keiipt. Es hot aus kesiin tas se mich keheert hon, soo lang wii se am khaue waare. Tii khonte mich khee aanreete kepe, awer tii hon mich kelërnt wii fer ti layt kuke wën ich reete kemacht hon. In 1974, sin ich wii spetsyaal pyoneer in kesetst kep. Nigel Pitt hot mit mich ketiint un pis hayt sin mer noch kuute fraaynte.

In tiise tsayt, waar es fiil wyolënts in Nort Irlant. Tes weeche hon etliche tiise rechyoon wii “tas lant  fon te pomp un ti xiis” keruuft. Es waar keweenlich se siin layt uf te xtroose am xtrayte, layt woo kexoos waare un khare woo ferplatst hon. Ti propleeme hate net ploos mit politik se tuun, awer aach mit relichyoon. Awer ti protestant un ti katoolixe layt hon erkhënt tas ti Yeehoowa sayn Tsayer khee sayt in te politik raus kehool hon. Un tes weeche khonte mer mit frayheet un sicherheet preetiche. Ofts wuste ti pewooner wën un woo ti wyolënt situatsyoon pasiire teet; un tii hon uns awisiirt tas mer khonte uns wech fon tëm kefoer hale.

Noch soo, sin kefeerliche situatsyoone pasiirt. Eene taach, hon ich un Denis Carrigan — woo aach een pyoneer waar — in een ticht xtat kepreeticht. Es waar khee Yeehoowa sayn Tsayer tat un mer hate ploos een mool friier tat kepreeticht. Een fraa hot uns akusiirt. Tii hot kesaat tas mer pritaanixe soltaate waare, woo im kehaymnis kexaft hon. Fiilaycht hot se tas kesaat wayl mer net soo wii ti layt in Irlant kexproch hon. Ti akusatsyoon hot uns mit pang kelos. Wëns tuu ploos fraayntlich mit te soltaate weyerst, khenst tuu um keprung wëre orer khente se tich in te kniie xiise. Meyer waare aleen te onipus am waarte un es waar een khalte taach. Too is een khare khom un is foer tas khafi plats woo ti fraa waar, xtil kehal. Ti fraa is raus kang un hot mit te mëner in tëm khare kexproch; un tii hot uns hin ketsaycht. Too sin ti mëner in tëm khare pis uns lamsam kefaart un hon uns phaar frooche iwer ti xtune fom onipus kemacht. Wën te onipus khom is, hon se mit tëm xofeer kexproch. Meyer khonte net heere was se am fertseele waare. Es waar khee aner persoon in tëm onipus kewees; tes weeche waare mer uns sicher tas tii waare am pleene uns aus te xtat nëme un uns wee mache. Awer tas is net pasiirt. Wii ich fom onipus aus kextii sin, hon ich fer te xofeer kefroot: “Ti mëner in te xtat... waare se iwer uns am frooe?” Tee hot keantwort: “Ich wees weer teyer sayt un ich hon tas fer ti mëner in te xtat kesaat. Macht aych khee ketanke. Teyer sayt in sicherheet.”

In 1976, hon ich Pauline Lomax in een rechyonaal konkrës in Dublin khëne kelërnt. Tii waar een spetsyaal pyoneerin fon Englant un waar Irlant am pesuuche. Tii waar een troy, teemuutich un xeen xwester. Tii un sayn pruuter Ray hate ti woerheet sayn kanse leepe kekhënt. Een yoer xpeeter, hon ich un Pauline uns kehayrat un meyer hon wayter wii spetsyaal pyoneere ketiint in Ballymena, in Nort Irlant.

Torich een tsayt, waar ich een sirkuyt superintentent. Ich un Pauline hon unser priiter in Belfast, Londonderry un anere kefeerliche pletse ketiint. Te klaape fon unser priiter un xwestere hot uns fiil uf kemuut. Fer Yeehoowa tiine, hon se im xtich kelos te prekonseyt, te has un ti relichyeese klaape woo tiif kewortselt waare. Yeehoowa hot tëne sicher keseechent un kexitst.

Ich hon in Irlant torich 10  yoore keleept. Tan in 1981, sin mer in kelaat kep fer te 72^te klaas fon Xileat. Noo unser formatuer, sin mer tsu Sierra Leone kexikt kep, im oëst fon Afrika.

Meyer hon in een misyoneer haus keleept mit 11 wunerliche layt. Meyer hate 1 khiich, 3 paatsimer, 2 duchas, 1 telefoon, 1 wex maxiin un 1 maxiin fer tas tsaych ap trokne. Ofts hot tas licht kefeelt un meyer wuste nii wën tas pasiire teet. Es waare rate in te tach un xlange in te keeler.

Opwool tas plats woo mer kewoont hon net perfekt waar, hot ti preetich aarwayt uns fiil frooheet keprung. Ti layt hon ti Piipel respektiirt un mit acht keheert. Fiile hon ti Piipel xtutiirt un sin Yeehoowa sayn Tsayer kep. Ti layt fom plats hon mich “Hër Robert” keruuft un Pauline, “Fraa Robert”.  Awer xpeeter, mist ich mee tsayt in te filyaal xafe un soo khont ich net soo fiil in te preetich aarwayt sin. Tes weeche hon ti layt aan kefang mayn fraa wii “Fraa Pauline” ruufe un mich wii “Hër Pauline”. Pauline hot tas kaar khee xlecht kefun!

Fiile priiter waare aarm kewees; awer Yeehoowa hot sayn neetichkheete imer fersoricht, als mool in wunerliche aate. (Mat. 6:33) Ich tenke mich noch traan fon een xwester woo hat ploos kenuuch kelt fer ese fer sayn khiner un fer sich selepst fer te taach khaafe; noch soo, hot se sayn kanse kelt fer een pruuter kep woo krank waar, un woo net kelt hat fer malarya metitsiin khaafe. Xpeeter im selwiche taach, wën ti xwester es net kewaart hot, is een fraa khom un hot ti xwester petsaalt fer sayn hoer xeen lose. Soo sorte situatsyoone sin ofts pasiirt.

Meyer sin in Sierra Leone torich 9  yoore keplip. Tan sin mer tsum Petël fon Nikeerya kexikt kep. Yets waare mer in een kroos filyaal. Ich hon wayter ti selwich sort aarwayt kemacht woo ich in Sierra Leone kemacht hon; awer fer Pauline, tas waar een kroos un xweyer ënerung kewees. Yeete moonat, hat se 130 xtune in te preetich aarwayt fertrip un tii hat Piipel xtuutye woo foran kang sin. Awer yets, is se in kesetst kep fer in te neer tsimer xafe; tat hot se te kanse taach fertrip fer tas tsaych noch mool kans lose. Es hot ketauert fer sich aan phase; awer mit te tsayt, hot se kemërkt tas ti anere aarich petanklich weeche sayn aarwayt waare. Un Pauline hot sich traan kehal aan sayn pestes mache fer ti anere peteliter uf muute.

Tas kultuer fon Nikeerya waar nay fer uns un meyer hate fiil fer se lërne. Een mool is een pruuter khom, un tee wolt hon tas ich een xwester khëne lërne teet woo kraat aan kefang hat in Petël se xafe. Wii ich se kriise teet, hot se sich foer mayn fiis kekniit. Ich hon mich ferxrok! Klaych hon ich mich fon 2 tekste traan ketenkt: Aphostele sayn Kexicht 10:25, 26 un Apokalipsis 19:10. Ich hon mich kefroot: “Sol ich tëne saan tas se sol tas net mache?” Awer ich hon ketenkt: “Tii hon se aan kenom fer im Petël tiine... tii wees was ti Piipel in lërnt.”

Te rest fom kexpreech, waar ich ferxeemt kewees. Xpeeter hon ich een unersuuchung kemacht. Ich hon raus kefun tas was ti xwester kemacht hat, noch een xtark kewoonheet waar in etliche pletse fom lant. Ti mëner sin aach tiise kewoonheet noo kang. Es waar een aat fer  respekt tsayche; es waar net een aktsyoon fon aanpeetung. Soo kaar ti Piipel hot eenliche payxpiile. (1 Sam. 24:8) Ich sin froo tas ich niks fer ti xwester kesaat hon woo khent se ferxeemt hon.

Torich ti yoore, hon mer fiile priiter un xwestere in Nikeerya khëne kelërnt woo een xtarke klaape ketsaycht hon. Kuk mool tas payxpiil fon Isaiah Adagbona. a Tee hot ti woerheet kelërnt wii eyer yung waar; awer tan hot eyer tsum wise kriit tas eyer lëpra hat. Tee is pis een plats kexikt kep woo ti leproose kewoont hon un tat waar eyer ti eensiche Yeehoowa sayn Tsayer. Opwool ti opositsyoon, hot eyer mee wii 30 leproose keholef ti woerheet lërne; tee hot aach keholef een kemaynt im plats aan fange.

In 1996, sin mer kexikt kep tsu te filyaal fon Keenya. Tas waar tas eyerste mool woo ich tsurik tsu Keenya kang sin tsayt te pesuuch woo ich am aanfang fom kexicht fertseelt hon. Meyer hon in Petël keleept. Un tswixich tii woo Petël pesuucht hon, waare phaar afe. Wën ti xwestere friichte am nëme waare, sin se als mool fon te afe kextool kep. Een taach, hot een xwester sayn fënster uf kelos. Wën se tsurik tsu sayn tsimer khom is, hot se een familye afe kefun. Tii waare am ese ales was se im tsimer kefun hon. Tii hot kexraayt un is raus kexprung. Ti afe hon aach kexraayt un hon aus te fënster kehupst.

Ich un Pauline hon in een swahili kemaynt ketiint. Noo een khorts tsayt, sin ich in kesetst kep fer ti Kemaynt Piipel Xtuutyum fiire. Awer ich khont net ti xprooch kuut xpreche. Ich hon ti apsetse foer ti fersamlung xtutiirt, tas ich khont ti frooche leese. Awer wën ti antworte fon te priiter een pisye anerste waare wii was kexrip waar, hon ich se net ferxtan. Ich hon mich aarich ferxeemt! Ich sin traurich weeche ti priiter kep; awer es hot mich ferwunert tas se, mit ketult un teemuut, aan kenom hon tas ich ti fersamlung fiire teet.

Meyer sin weenicher wii een yoer in Keenya keplip. Tan in 1997, sin mer in kelaat kep fer in Petël in Brooklyn, Nay York, tiine. Yets waare mer in een lant woo ti layt fiile materyaalixe tinge hate un tas khan sayn aychne propleeme pringe. (Xpr. 30:8, 9) Awer aach in soo een sort lant, tuun unser priiter een xtarke klaape tsayche. Tii penutse sayn tsayt un aychentum net fer raych wëre, awer fer Yeehoowa sayn Orkanisatsyoon uner xtitse.

Torich ti yoore, hon mer te klaape fon unser priiter un xwestere kesiin in unerxiitliche situatsyoone. In Irlant, hon mer tëne sayn klaape kesiin opwool ti wyolënts. In Afrika, hon mer ti priiter sayn klaape kesiin, opwool se aarm waare un in pletse keleept hon woo khee Yeehoowa sayn Tsayer waare. In te Fereenichte Xtaate fon Amërika, hon mer ti priiter sayn klaape kesiin opwool te raychtum fom lant. Sicher wërt Yeehoowa aarich froo wën eyer siit layt woo sayn liip tsu tëm tsayche in ale sort situatsyoone.

Ti yoore sin xnel rom rang — ‘xneler wii ti pupiin fon te wewer’. (Yoop 7:6) Yets xafe mer in te haupst sets in Warwick, Nay York, un es frayt uns mit layt tiine woo wërklich eene ti anere liipe. Meyer sin froo un tsufriite tas mer unser pestes mache fer unser Kheenich Yeesus pay xteen, woo klaych peloone tuut ale tii woo troy sin. (Mat. 25:34)