1. Wii fiil weyert kept Yeehoowa fer unser leepe?

 XTEL tich mool foer tas een fraaynt tich een haus kept. Tas haus mus noch mool aan kextrich sin un etliche fon sayn roore sin ferproch. Opwool ti propleeme, tuut tas haus noch milyoone tolare kile. Sicher teest tuu tas haus uf phase un tëm weyert kepe. Kraat soo, hot Yeehoowa uns een weyertlich kexenk kep: tas leepe. In woerheet, Yeehoowa hot sayn Soon fer uns wii fray khaaf opfer kep; un tas tsaycht wii fiil weyert kept eyer fer unser leepe. (Yoo. 3:16)

2. Tëm noo 2^te Korinter 7:1, was tuut Yeehoowa fon uns waarte?

² Yeehoowa is ti Kwel fom leepe. (Psal. 36:9) Te aphostel Phaul hot tas erkhënt wii eyer kesaat hot: “Weeche tëm tuun mer leepe, uns weekele un eksistiire.” (Aph. 17:25, 28) Tes weeche khene mer saan tas tas leepe een kexenk fon Kot is. Tee tuut liiplich fersoriche was mer prayche tas mer khene unser leepe hale. (Aph. 14:15-17) Awer Yeehoowa tuut net wunere mache fer uns lepeentich hale. Xtats tas, waart eyer tas mer unser pestes mache fer uns kaystlich un fiisix kesunt hale. (Lees 2^te Korinter 7:1.) b Warom sole mer unser kesuntheet un leepe uf phase un wii khene mer tas mache?

3. Was is een uersach warom mer uns aan xtrenge sole fer kesunt plaype?

³ Een uersach warom mer sole uns aan xtrenge fer kesunt plaype, is wayl soo khene mer Yeehoowa peser tiine. (Mar.  12:30) Meyer wole unser khërper foer xtele “wii een lepeentich opfer, woo haylich is un woo Kot kefalt”; tes weeche mache mer net tinge woo mer wise uns krank lose khene. (Rom. 12:1) Kewis, ekaal was mer mache, khene mer net karantiire tas mer net krank wëre. Awer mer mache unser pestes fer kesunt plaype, wayl mer wole fer unser Fater im himel tsayche tas mer weyert fer tas leepe kepe.

4. Was wolt te kheenich Tawi mache?

⁴ Te kheenich Tawi hot aus keleet warom eyer weyert fer tas leepe kep hot, wii eyer kexrip hot: “Was fer kuutes tuut mayn toot pringe, wën ich im kraap sin? Meecht te xtaap tich loope? Meecht es iwer tayn troyheet xpreche?” (Psal. 30:9) Im xtant, hot Tawi tiise wërter kexrip neekst am ën fon sayn leepe. Awer tee waar pextimt kesunt un lepeentich plaype soo fiil tsayt wiis meechlich weyer tas eyer khent Yeehoowa wayter loope. Kewis meyer al wole tas selwiche mache.

5. Ekaal wii alt orer krank meyer sin, was khene mer mache?

⁵ Fiilaycht, weeche unser kesuntheet orer wayl mer elter sin, khene mer net mee soo fiil mache wii friier. Tas khan uns oone muut un traurich lose. Awer mer sole wayter unser pestes mache fer unser kesuntheet uf phase. Warom? Wayl ekaal wii alt orer krank mer sin, khene mer wayter Yeehoowa loope, soo wii Tawi kemacht hot. Es muut uns uf se wise tas Kot uns wayter weyert kept soo kaar wën mer krank orer alt sin. (Mat. 10:29-31) Un aach wën mer xtërpe, winxt Yeehoowa uns fom toot uf ruufe. (Yoop 14:14, 15) Soo lang wii mer leepe, wole mer unser pestes mache fer unser kesuntheet un leepe xitse.

6. Mit was se tuun hot mit ese un trinke, was waart Yeehoowa fon uns?

⁶ Etliche piicher leye aus was mer mache sole fer uns kesunt hale orer was mer ese sole; ti Piipel is net soo een sort puuch. Noch soo, saat se uns fiil iwer was Yeehoowa too triwer tenkt. Tsum payxpiil, Yeehoowa tuut uns aan reete “ti xlechte tinge”, woo xaate fer unser khërper mache khene, wech nëme. (Ekl. 11:10) Ti Piipel saat tas mer sole net tsu fiil ese orer alkohool trinke; weeche soo sorte tinge, khene mer xaate fer unser khërper mache un soo kaar xtërpe. (Xpr. 23:20) Yeehoowa waart tas mer selepst kontrol tsayche wën mer raus suuche was un wii fiil mer ese un trinke. (1 Kor. 6:12; 9:25)

7. Wii helft uns te aanreet fon Xpriiche 2:11 kuute ëntxlise iwer unser kesuntheet mache?

⁷ Wën mer ferninftich sin, khene mer ëntxlise mache woo tsayche tas mer petanklich fer tas kexenk fom leepe sin. (Psal. 119:99, 100; lees Xpriiche 2:11. c) Meyer mise, tsum payxpiil, kuut raus suuche was mer ese. Wën mer een ese kërn hon, awer mer wise tas es uns xlecht lost, ese mer tas net. Meyer tsayche aach tas mer ferninftich sin wën mer kenuuch xloofe, reeklich esersiis mache, un aach unser khërper un unser haus sauwer hale.

8. Was lërnt uns ti Piipel iwer wii wichtich unser sicherheet fer Yeehoowa is?

⁸ Yeehoowa hot fer ti israeliiter kesetse kep woo ketsaycht hon wii khonte se sich fon unfale tehëm un in te aarwayt xitse. (Eeks. 21:28, 29; Teut. 22:8) Wën een israeliit  een aner persoon um keprung hot — soo kaar wën tas net fer kërn waar —, hot eyer xlime konsekwënse mit kemacht. (Teut. 19:4, 5) Un tëm noo tas Kesets, soo kaar tii woo xaate kemacht hon fer een khint woo noch net uf te welt khom is — aach wën tas net fer kërn waar — teete kextrof sin. (Eeks. 21:22, 23) Yawool, ti Piipel lost es taytlich tas Yeehoowa wil hon tas mer uns mit te sicherheet khimere.

9. Was khene mer mache fer uns wech fon unfale hale? (Kuk aach ti pilter.)

⁹ Meyer tsayche tas mer weyert fer tas leepe kepe wën mer ti sicherheet tehëm un in te aarwayt hale. Tsum payxpiil: wën mer mise metitsiin orer kiftiche un xarfe tinge wech xmayse, mache mer tas in een aat woo khee xaate fer ti anere pringe khan. Meyer lose uns aach sicher tas ti khiner net soo sorte tinge fine. Meyer phase aach uf wën mer fayer aan mache, wën mer waser hays mache orer wën mer feramente penutse; un wën mer too traan xafe, tuun mer tas net aleen lose un was aneres mache keen. Meyer faare aach net te khare wën mer metitsiin in kenom hon woo  tas kefeerlich lose khan, wën mer alkohool ketrunk hon orer wën mer tsu miit sin fer mit sicherheet faare. Un meyer hale aach net unser selulaar soo lang wii mer faare tuun.

10. Was khene mer mache foer un torich een unklik?

¹⁰ Als mool, khene mer net um hale tas kefeerliche ewënte pasiire — soo wii natuer unklike, epitemiie un wyolënte khëmpf. Awer wën soo was pasiirt, khene mer fersuuche uns soo sicher wiis meechlich is hale un tas kefoer iwerleepe. Tes weeche sin mer folich wën se uns xike fom plats faart keen orer wën mer anere oryentiirunge fon te autoriteete kriin. (Rom. 13:1, 5-7) Es is meechlich uns foer perayte fer etliche emerxënse. Tes weeche, wën ti rechiirung uns oryentiirunge kept fer uns foer perayte fer een emerxëns, sole mer tas aan heere. Es khan nutslich sin, tsum payxpiil, een kit de primeiros socorros uf raume un een xtok mache fon waser un ese woo net fertërpe.

11. Was sole mer mache wën een krankheet woo aan xtecht sich im plats woo mer woone ferprayte tuut?

¹¹ Was sole mer mache wën een krankheet woo aan xtecht sich im plats woo mer woone ferprayte tuut? Meyer mise ti oryentiirunge fon te rechiirung aan heere — soo wii ti hënt wexe, uns wayt wech hale, maskare aan tuun, in kwarentena plaype un soo wayter. Wën mer tiise tinge mache, tsayche mer tas mer weyert fer tas kexenk fom leepe kepe.

12. Wii khan Xpriiche 14:15 uns helfe raus suuche was fer informatsyoone se horiche wën een unklik pasiirt?

¹² Als mool, wën een emerxëns pasiirt, tuun unser fraaynte, nochpere orer ti notisye etliche tinge saan woo net woer sin. Xtats “aan yeete wort” woo mer heere klaape, sole mer horiche ti richtichste informatsyoone woo fon te rechiirung un ti toktere khome. (Lees Xpriiche 14:15.) d Ti Rechiirente Khërperxaft un ti filyaale mache sayn pestes fer kenaue informatsyoone kriin eep se uns oryentiirunge kepe iwer ti fersamlunge un ti preetich aarwayt. (Hep. 13:17) Wën mer sayn oryentiirunge aan heere, xitse mer uns selepst un ti anere fom xaate. Meyer helfe aach ti anere een kuut mënung iwer Yeehoowa sayn Tsayer hon. (1 Phe. 2:12)

13. Wii tsayche mer tas mer weyert fer tas leepe kepe wën mer Yeehoowa sayn kesets iwer tas pluut aan heere?

¹³ Fiile layt wise tas Yeehoowa sayn Tsayer klaape tas tas pluut haylich is. Meyer tuun Yeehoowa sayn kesets iwer tas pluut aan heere un khee pluut transfusyoon aan nëme, soo kaar wën een emerxëns pasiirt. (Aph. 15:28, 29) Awer tas wil net saan tas mer xtërpe wole. Kans anerste: meyer kepe fiil weyert fer tas leepe, tas kexenk woo Kot uns kep hot. Meyer suuche toktere woo wilich sin fer kuute tratamente kepe, woo khee pluut penutse.

14. Wii khene mer ti xans ferkleene fer een ërnst tratament prayche?

¹⁴ Wën mer ti itee fon tiise artikel aan wëne un unser kesuntheet uf phase, im xtant wërts net neetich een sirurxii orer een aner ërnst tratament mache. Un soo kaar wën mer een sirurxii mache mise, wën mer uns kesunt hale, ti tsayt woo es nëmt fer peser traan sin, wërt khërtse. Meyer khene aach ti xans ferkleene fer een sirurxii uf een  mool prayche, wën mer unser haus un tas plats woo mer xafe sicher hale un wën mer ti kesetse iwer wii se faare, aan heere.

15. (a) Warom is es wichtich tas mer een khaart Diretivas Antecipadas mit informatsyoone woo noch kile imer mit uns nëme? (Kuk aach tas pilt.) (b) Tëm noo te wiiteo, wii khene mer kuute ëntxlise mache iwer kesuntheet tratamente woo mit pluut se tuun hon?

¹⁵ Wayl mer weyert fer tas leepe kepe, tuun mer tas khaart Diretivas Antecipadas e Procuração para Tratamento de Saúde aus fiile un imer mit uns nëme. In tiise khaart, tsayche mer was unser wunx iwer pluut transfusyoon un iwer anere tratamente is. Meechte ti informatsyoone in tayn khaart noch kile? Wëns tuu must een khaart aus fiile orer een nay mache, tuu tas net uf xupe. Taytlich xraype was unser wunx is, tuut uns helfe een tratament xneler kriin, wayl es wërt net neetich mit te toktere too triwer fertseele un, soo, tsayt ferliire. Tas lost es aach sicher tas mer net een tratament orer metitsiin kriin woo khan kefeerlich fer uns sin. e

16. Was khanst tuu mache wëns tuu tich net sicher pist iwer wii te khaart Diretivas Antecipadas aus fiile?

¹⁶ Ekaal wii yung orer kesunt mer sin,  meyer al khene een unfal orer een krankheet mit mache. (Ekl. 9:11) Tes weeche is es kluuch een khaart Diretivas Antecipadas aus fiile. Wëns tuu tich net sicher pist iwer wii tiise tokument aus fiile, ferlang hilef fer ti elteste in tayn kemaynt. Tii xtrenge sich aan fer se wise wii tiise tokument aus fiile. Awer tii tuun net ëntxlise fer tich mache: tas is tayn responsapiliteet. (Kal. 6:4, 5) Noch soo, khene se tich helfe ferxteen was fer tratamente tuu raus suuche khanst un tan tich helfe wëns tuu te tokument aus fiilst.

17. Mit was se tuun hot mit kesuntheet, wii khene mer tsayche tas mer net xtreng sin?

¹⁷ Fiile fon unser ëntxlise iwer kesuntheet un kesuntheet tratamente xtaype sich aan was ti Piipel in lërnt. (Aph. 24:16; 1 Tim. 3:9) Wën mer unser ëntxlise mache un mit te anere too triwer fertseele, sole mer uns erinere was Filiper 4:5 saat: “Al ti mënxe sole tsum wise kriin tas teyer net xtreng sayt.” Wën mer net xtreng sin, tuun mer uns net tsu fiil ketanke mit te kesuntheet mache un meyer tswinge aach net ti anere unser selwich mënung hon. Meyer liipe un respektiire unser priiter un xwestere, soo kaar wën sayn ëntxlise anerste wii unseres sin. (Rom. 14:10-12)

18. Wii khene mer tsayche tas mer petanklich fer tas kexenk fom leepe sin?

¹⁸ Meyer tsayche unser petanklichkheet tsu Yeehoowa, ti Kwel fom leepe, wën mer unser leepe xitse un unser pestes tëm kepe. (Apo. 4:11) Hayt mise mer mit unklike un krankheete um keen. Awer unser Kriatoer wil net hon tas mer soo leepe. Klaych tuut eyer uns eewiche leepe kepe, oone phayn orer toot. (Apo. 21:4) Foerlaywich, wii kuut tas mer lepeentich sin un tas mer khene unser liipliche Fater im himel, Yeehoowa, tiine!