1. (a) Was hot Yeesus fer sayn tisipele kesaat iwer wanee tas ën khome teet? (b) Was hot eyer se aan kesaat?

 PHAAR taache foer Yeesus sayn toot, hon 4 fon tëm sayn tisipele tëm kefroot: “Was wërt te tsayche sin (…) fom ën fon tiise sisteem?” (Mat. 24:3) In anere wërter, waare se tsiimlich sicher am frooe: ‘Wii khene mer wise wanee Yeruusalem un te thempel fernicht wëre?’ In sayn antwort, hot Yeesus net ploos iwer tas ën fon Yeruusalem un sayn thempel kexproch, awer aach iwer tas ën fom sisteem woo mer hayt leepe. Yeesus hot kesaat iwer ti tsayt wën tas ën khome teet: “Nimant wees te taach orer ti xtun, noch net mool ti engele im himel orer te Soon: ploos te Fater wees es.” Tan hot eyer sayn tisipele aan kesaat: “Sayt wachsam; playpt wach.” (Mar. 13:32-37)

2. Warom waar es wichtich tas ti kriste im eyerste yoer hunert wachsam plaype teete?

² Ti kriste woo in Yuteea im eyerste yoer hunert keleept hon, miste wachsam plaype — sayn leepe hot too ap kehong. Yeesus hot fer sayn tisipele kesaat was se peopachte solte fer se wise wën tas ën fon Yeruusalem un sayn thempel ticht weyer. Tee hot kesaat: “Wën teyer siit tas militeer um Yeruusalem rom akampiirt, wist tas sayn fernichtung ticht is.” In tiise xtun, miste se Yeesus aan heere un “fer ti përiche aus rayse”. (Luk. 21:20, 21) Tii woo acht tsu Yeesus sayn wërter kep hon, hon iwerleept wii ti romaaner Yeruusalem fernicht hon.

3. Iwer was tuun mer in tiise artikel xpreche?

³ Hayt leepe mer in te tsayt fom ën fon tiise xlechte welt. Tes weeche mise mer ferninftich sin un wachsam plaype. Wii khene mer ferninftich sin soo lang wii mer peopachte was uf te welt pasiirt? Wii khene mer uns selepst uf phase? Wii  khene mer ti tsayt woos noch kept in te pest aat penutse? Tiise frooche wëre in tëm artikel keantwort.

4. Warom sole mer acht kepe aan wii ti ewënte hayt tsu taach piiplixe profetsiie erfiile?

⁴ Meyer hon kuute uersache fer se peopachte wii ti ewënte woo hayt tsu taach pasiire, piiplixe profetsiie erfiile. Tsum payxpiil: Yeesus hot een list mit spetsiifixe ewënte kemacht, woo uns helfe teete se wise wën tas ën fon Satanaas sayn welt ticht weyer. (Mat. 24:3-14) Te aphostel Pheeter hot uns aach uf kemuut acht kepe fer ti erfiilung fon te piiplixe profetsiie; soo teet unser klaape xtark plaype. (2 Phe. 1:19-21) Un tas letste puuch fon te Piipel fangt aan mit te wërter: “Rewelatsyoon fon Yeesus Kristus, woo Kot tëm kep hot, fer se tsayche fer tëm sayn sklaawe ti tinge woo hatich pasiire tuun.” (Apo. 1:1) Tes weeche hon mer interes aan te ewënte woo hayt uf te welt pasiire un wii se piiplixe profetsiie erfiile khene. Un es khan sin tas mer kërn too triwer mit te anere fertseele.

5. Was sole mer net mache, awer was mise mer mache? (Kuk aach ti pilter.)

⁵ Wën mer iwer piiplixe profetsiie fertseele, sole mer net fersuuche se roote was pasiire tuut. Warom net? Wayl mer wole niks saan woo khent ti eenichkheet in te kemaynt fersaue. Tsum payxpiil: im xtant heere mer iwer was etliche fiirer fon te welt mache wole fer een kriich tsum ën nëme un soo friit un sicherheet pringe. Xtats rechne tas sayn wërter tuun ti profetsii fon 1^te Thesalooniker 5:3 erfiile, mise mer acht kepe aan te informatsyoone woo Yeehoowa sayn Orkanisatsyoon khërtslich puplitsiirt hot. Wën unser wërter sich aan te puplikatsyoone xtaype, helfe mer ti kemaynt eenich hale “in te aat fer se tenke”. (1 Kor. 1:10; 4:6)

6. Was fer lisyoone khene mer fon 2^te Pheeter 3:11-13 lërne?

⁶ Lees 2^te Pheeter 3:11-13. b Te aphostel Pheeter helft uns ferninftich sin wën mer ti piiplixe profetsiie noo kuke. Tee saat tas mer sole ‘in unser ketanke fest hale te taach fon Yeehoowa sayn presens’. Warom? Net wayl mer raus fine wole “te taach un ti xtun” wën Yeehoowa te Armaxeton pringt; awer wayl mer wole ti tsayt woos noch kept penutse fer uns “haylich aan xtele un aktsyoone fon aanpeetung tsu Kot pratikiire”. (Mat. 24:36; Luk. 12:40) In anere wërter: meyer wole uns richtich aan xtele un uns sicher sin tas ales was mer tsu Yeehoowa mache is weeche unser tiif liip tsu tëm. Fer uns wayter too traan hale, mise mer uns selepst uf phase.

7. Wii tsayche mer tas mer uns selepst uf phase? (Lukas 21:34)

⁷ Yeesus hot fer sayn tisipele kesaat tas tii solte acht kepe, net ploos fer ti ewënte uf te welt, awer aach fer sich selepst. Tas is taytlich kep in Yeesus sayn wërter in Lukas 21:34. c (Lees.) Mërk mool was Yeesus kesaat hot: “Phast aych fiil uf.” Yemant woo sich selepst uf phast, kept fiil acht fer kwalkee kefoer woo khent tëm  sayn fraayntxaft mit Yeehoowa fersaue un halt sich too tefun wech. Soo playpt eyer wayter in Kot sayn liip. (Xpr. 22:3; Yuu. 20, 21)

8. Was fer aanreet hot Phaul fer ti kriste kep?

⁸ Te aphostel Phaul hot ti kriste aan kereet tas se solte sich uf phase. Tee hot, tsum payxpiil, fer ti kriste in Ëfeso kesaat: “Tuut aych uf phase fer net wii tume sin, awer wii kluuche.” (Ëfe. 5:15, 16) Unser faynt, Satanaas, tuut imer fersuuche unser fraayntxaft mit Yeehoowa fersaue. Tes weeche, tas mer khene uns fon al Satanaas sayn atake xitse, tuut ti Piipel uns uf muute: “Ferxteet was Yeehoowa sayn wile is.” (Ëfe. 5:17)

9. Wii khene mer ferxteen was Yeehoowa sayn wile fer uns is?

⁹ Ti Piipel xprecht net iwer al ti kefoore woo khente unser fraayntxaft mit Yeehoowa fersaue. Als mool, mise mer ëntxlise iwer etliche sache mache un khan sin tas ti Piipel net kraat too triwer xprecht. Soo, fer kluuche ëntxlise mache, mise mer ferxteen “was Kot sayn wile is”. Fer tas hin kriin, mise mer Kot sayn Wort reeklich xtutiire un too triwer noo tenke. Was tuut pasiire wën mer Kot sayn wile peser ferxteen un “Kristus sayn ferxtant” ëntwikele? Meyer tuun uns kluuch aan xtele, soo kaar wën mer khee reekel hon fer uns saan was se mache. (1 Kor. 2:14-16) Tas is wichtich wayl etliche kefoore khene laycht sin fer se mërke; awer anere sin net soo taytlich.

10. Was sin etliche kefoore woo mer mise uns wech hale?

¹⁰ Was is tepay aan te kefoore woo mer mise uns wech hale? Romantix interes aan yemant tsayche ploos fer sich ferkniiche, tsu fiil trinke orer ese, wërter saan fer ti anere wee mache, sich ferkniiche mit wyolënte tinge, pornokrafii kuke un soo wayter. (Psal. 101:3) Unser faynt, te Taywel, is imer een xans am suuche fer unser fraayntxaft mit Yeehoowa fersaue. (1 Phe. 5:8) Wën mer net uf phase, khan Satanaas in unser ketanke un hërts soome fon nayt, uneerlichkheet, kiirichkheet, has, hoochmuut un piter xpiirunge plantse. (Kal. 5:19-21) Am aanfang khan sin tas tiise xpiirunge net soo xtark sin. Awer meyer mise se klaych aus rope; wën net, tuun se wayter wii een kiftiche plants wakse un propleeme fer uns pringe. (Tya. 1:14, 15)

11. Was is een kefoer woo net soo taytlich is un warom mise mer uns too tefun wech hale?

¹¹ Een kefoer woo net soo taytlich is, sin ti xlechte keselxafte. Kuk mool ti neekst situatsyoon. Tuu xafst mit yemant woo net Yeehoowa sayn Tsayer is. Tuu wilst hon tas eyer een kuut mënung iwer uns hot; tes weeche pist tuu fraayntlich un wilich fer tëm helfe. Als mool tuust tuu soo kaar mit tëm mitaachs ese; awer klaych, wërt tas een kewoonheet. Manich mool xprecht ti persoon iwer imoraalixe tinge. Am aanfang host tuu tas net kërn, awer mit te tsayt tuust tuu tich too traan keweene un es tuut tich net mee ëriche. Tan, eene taach, tuut tayn koleke tich in laate fer etwas trinke noo te aarwayt un tuu nëmst tas aan. Mit te tsayt, fangst tuu aan se tenke soo wii tayn koleke. Es tauert net lang un tuu fangst aan ti selwiche tinge mache woo tayn koleke macht. Kewis meyer sin fraayntlich un mer tsayche respekt fer ale kaar. Awer mer mise uns erinere tas mer wëre soo wii ti layt sin mit weem mer raus suuche tsayt aus kepe. (1 Kor. 15:33) Wën mer Yeesus aan heere un acht iwer uns selepst kepe, tuun mer net uneetiche keselxaft hon mit tëne woo Yeehoowa sayn kesetse net aan heere. (2 Kor. 6:15) Meyer siin tas kefoer un hale uns too tefun wech.

12. Was solte Yeesus sayn tisipele mache soo lang wii se kewaart hon tas ën fom sisteem?

¹² Yeesus wolt hon tas sayn tisipele fiil se tuun hëte soo lang wii se tas ën fom sisteem kewaart hon. Tes weeche hot eyer tëne een aarwayt kep: ti kuute notisye preetiche “in Yeruusalem, soo wii in kans Yuteea un Samaria, un pis tsum letste ek fon te eyert”. (Aph. 1:6-8) Tas waar wërklich een kroos aarwayt! Wii ti tisipele sich in te preetich aarwayt aan kextrengt hon, hon se sayn tsayt in te pest aat penutst.

13. Warom mise mer unser tsayt in te pest aat penutse? (Koloser 4:5)

¹³ Lees Koloser 4:5. d Fer uns selepst uf phase, mise mer ërnst tenke aan wii mer unser tsayt penutse. “Tinge woo mer net waarte” khene mit kwalkee eene fon uns pasiire. (Ekl. 9:11) Unser leepe khent uf een mool tsum ën khome.

14-15. Wii khene mer unser tsayt in te pest aat penutse? (Hepreeyer 6:11, 12) (Kuk aach tas pilt.)

¹⁴ Meyer khene unser tsayt in te pest aat penutse wën mer Yeehoowa sayn wile mache un unser fraayntxaft mit tëm ferxtërke. (Yoo. 14:21) Meyer mise ‘fest un xtram sin un imer fiil hon fer im Hër sayn aarwayt se mache’. (1 Kor. 15:58) Soo, wën  tas ën fon unser leepe orer fon te welt khomt, tuun mer net tenke: ‘Ich hët mise mee fer Yeehoowa kemacht hon…’ (Mat. 24:13; Rom. 14:8)

¹⁵ Hayt tuut Yeesus wayter sayn tisipele lënke soo lang wii se uf te kans eyert ti kuute notisye fon Kot sayn Raych preetiche — tee hot sayn ferxpreche erfiilt. Torich Yeehoowa sayn Orkanisatsyoon, tuut Yeesus uns iipe fer se preetiche; un tee kept uns ti feramente woo mer prayche fer ti kuute notisye aus prayte. (Mat. 28:18-20) Meyer mache unser teel wën mer flaysich preetiche, ti layt in lërne un wachsam plaype soo lang wii mer waarte Kot tas ën fon tiise welt pringe. Wën mer te aanreet fon Hepreeyer 6:11, 12 e aan wëne, hale mer unser hofnung xtark “pis aans ën”. (Lees.)

16. Was sin mer pextimt se mache?

¹⁶ Yeehoowa hot xon ëntxlist wën eyer tas ën fon Satanaas sayn welt pringt. Wën tiise taach khomt, tuut Yeehoowa al ti ferxpreche woo in te Piipel xteen, erfiile. Foerlaywich, khene mer als mool tenke tas tas ën tsu fiil tsayt am nëme is fer se khome. Awer Yeehoowa sayn taach “tuut sich net ferxpeete!” (Hap. 2:3) Tes weeche wole mer pextimt sin wayter “uf Yeehoowa wachsam hofe” un “ketultich uf te Kot fon [unser] retung waarte”. (Mik. 7:7)