1. Warom prayche mer Yeehoowa sayn fiirung? Mach een ferklaychung.

 XTEL tich mool foer tas tuu ferloer in een walt pist. Es is aarich kefeerlich weeche ti wilte tiere un kiftiche planse un insëkte. Tuu khanst aach in een loch fale. Sicher weyerst tuu aarich petanklich wën yemant woo tas plats kuut khënt tich fiire teet — yemant woo wees woo ti kefoore sin un wii sich too tefun wech hale. Ti welt is soo wii tiise walt. Es kept fiile kefoore woo khente unser fraayntxaft mit Yeehoowa fersaue. Awer meyer hon te perfekte Fiirer: Yeehoowa. Tee helft uns wech fon te kefoore plaype un fiirt uns tsu unser tsiil: eewiche leepe in te nay welt.

2. Wii tuut Yeehoowa uns fiire?

² Wii tuut Yeehoowa uns fiire? Hauptseechlich torich sayn Wort, ti Piipel. Awer tee penutst aach mënxe fer uns fiire. Tee penutst, tsum payxpiil, “te troye un ferninftiche sklaaw” fer uns kaystlich esmitel fersoriche, woo uns helft kluuche ëntxlise mache. (Mat. 24:45) Yeehoowa penutst aach anere mëner fer uns fiire. Tsum payxpiil: ti sirkuyt superintentente un ti elteste in te kemaynt tuun uns uf muute un oryentiire un tas khan uns helfe ti xweyere tsayte aus hale. Meyer sin petanklich tas Yeehoowa uns soo kuut fiirt torich tiise xweyere letste taache. Tas helft uns unser fraayntxaft mit Yeehoowa hale un im weech fom leepe plaype.

3. Was tuun mer in tiise artikel siin?

³ Awer als mool, khan es xweyer sin Yeehoowa sayn fiirung foliche, hauptseechlich wën tas fon imperfekte mënxe khomt. Warom? Fiilaycht hon mer net kërn was se uns saan. Orer khan sin tas mer tenke tas es net kluuch is un soo, rechne mer tas es net fon Yeehoowa khomt. In soo sorte momënte, is es hauptseechlich wichtich se traue tas Yeehoowa sayn folek lenkt un tas mer nutse kriin wën mer folich sin. Fer uns helfe tiise sicherheet ferxtërke, xprecht tiise artikel iwer (1) wii Yeehoowa sayn folek  kelenkt hot in te piiplixe tsayte, (2) wii Eyer uns hayt lenkt, un (3) was fer nutse mer kriin wën mer folich sin.

WII HOT KOT TI ISRAELIITER KELENKT?

4-5. Wii hot Yeehoowa ketsaycht tas eyer Mooses am penutse waar fer Israël lenke? (Kuk tas pilt am aanfang fom piichelche.)

⁴ Yeehoowa hot Mooses in kesetst fer ti israeliiter ausm Ejipt lenke. Kot hot taytliche pewaysunge kep tas eyer tas folek am lenke waar torich Mooses. Tee hot, tsum payxpiil, een wolk phoste torich te taach fersoricht un een fayer phoste torich ti nacht. (Eeks. 13:21) Mooses is te phoste noo kang, woo tee un ti israeliiter tsum Roote Meer kelenkt hot. Awer ti ejipter hon ti israeliiter noo keyacht. Soo hon ti israeliiter fiil pang kriit — foer tëne waar tas meer un hinich tëne waare ti ejipter. Tii hon kerechent tas Mooses ferkheert waar wën eyer se tsum Roote Meer keprung hot. Awer Mooses hat khee feele kemacht. Yeehoowa hat Mooses penutst fer sayn folek pis tat hin lenke un Kot hot se een wunerlich pefrayung kep. (Eeks. 14:2, 26-28)

⁵ Torich ti neekste 40 yoore, is Mooses wayter te wolk phoste noo kang woo Yeehoowa penutst hot fer sayn folek im tesërt fiire. a Yeehoowa hot fer een tsayt te phoste iwer Mooses sayn parak kextelt un al ti israeliiter khonte tas siin. (Eeks. 33:7, 9, 10) Yeehoowa hot mit Mooses ausm phoste kexproch un tan hot Mooses ti oryentiirunge fer tas folek kep. (Psal. 99:7) Ti israeliiter hate taytliche pewaysunge tas Yeehoowa Mooses am penutse waar fer tëne fiire.

6. Wii hon ti meyerste israeliiter sich aan kextelt foer Yeehoowa sayn fiirung? (Nuumere 14:2, 10, 11)

⁶ Es is xaat, awer ti meyerste israeliiter hon net aan kenom ti taytliche pewaysunge tas Yeehoowa Mooses penutst hot fer Tëm foer xteen. (Lees Nuumere 14:2, b 10, 11. c) Noo un noo, hon se Mooses sayn fiirung ap kextos. Tes weeche, hot Kot se net erlaupt im Ferxprochne Lant rin keen. (Nuu. 14:30)

7. Kep payxpiile fon layt woo Yeehoowa aan keheert hon. (Nuumere 14:24) (Kuk aach tas pilt.)

⁷ Awer etliche israeliiter hon Yeehoowa sayn fiirung aan kenom. Tsum payxpiil, Yeehoowa hot kesaat: “Kalëp (…) is mich wayter noo kang mit sayn kans hërts.” (Lees Nuumere 14:24.) d Yeehoowa hot Kalëp peloont un tee waar soo kaar erlaupt raus suuche woo eyer leepe wolt im Ferxprochne Lant. (Yos. 14:12-14) Ti israeliiter woo khonte im Ferxprochne Lant rin keen, hon Yeehoowa aan keheert un soo een kuut payxpiil kelos. Noo Mooses, is Yosuee wii fiirer fon te israeliiter in kesetst kep un ti israeliiter “hon tëm tiif respektiirt ti kanse taache fon tëm sayn leepe”. (Yos. 4:14) Tes weeche, hot Yeehoowa se keseechent un tas lant kep woo eyer ferxproch hat. (Yos. 21:43, 44)

8. Wii hot Yeehoowa sayn folek kelenkt torich ti tsayt fon te kheeniche? (Kuk aach tas pilt.)

⁸ Yoore xpeeter, hot Yeehoowa richter in kesetst fer sayn folek lenke. Nochter, torich ti tsayt fon te kheeniche, hot Yeehoowa profeete in kesetst fer sayn folek fiire. Ti troye  kheeniche hon ti profeete aan keheert. Tsum payxpiil: te profeet Natan hot te kheenich Tawi korikiirt, woo tas teemuutich aan kenom hot. (2 Sam. 12:7, 13; 1 Kro. 17:3, 4) Te kheenich Yeosafat hot ti lenkung fom profeet Yaasyël aan kenom; un tee hot tas folek fon Yutaa uf kemuut “aan [Kot] Sayn profeete” klaape. (2 Kro. 20:14, 15, 20) Wii te kheenich Esekias propleeme mit kemacht hot, hot eyer hilef fer te profeet Isayas ferlangt. (Isa. 37:1-6) Yeetes mool woo ti kheeniche Kot sayn oryentiirung aan keheert hon, hot Yeehoowa tii un tas folek keseechent un kexitst. (2 Kro. 20:29, 30; 32:22) Aan sich, miste al taytlich ferxtan hon tas Yeehoowa waar sayn folek torich ti profeete am lenke. Awer ti meyerste kheeniche un israeliiter hon Yeehoowa sayn profeete net aan keheert. (Yee. 35:12-15)

WII HOT KOT TI EYERSTE KRISTE KELENKT?

9. Wii hot Yeehoowa ti eyerste kriste kelenkt? (Kuk aach tas pilt.)

⁹ Noo Yeesus sayn ufxtaye, hot Yeehoowa ti kristlich kemaynt orkanisiirt. Wii hot eyer ti eyerste kriste kelenkt? Tee hot Yeesus wii khop fon te kemaynt in kesetst. (Ëfe. 5:23) Awer Yeesus hot net mit yeete tisipel kexproch un kesaat was se mache solte. Tee hot ti aphostele un elteste in Yeruusalem penutst fer ti kriste fiire. (Aph. 15:1, 2) Un in te kemaynte, waare ti elteste in kesetst fer lenkung kepe. (1 The. 5:12; Tit. 1:5)

10. (a) Wii hon ti meyerste kriste sich aan kextelt foer ti lenkung woo se kriit hon? (Aphostele sayn Kexicht 15:30, 31) (b) Warom hon etliche in te piiplixe tsayte net aan kenom ti lenkung fon te mëner woo Kot foer kextan hon? (Kuk te khaste “ Kot penutst mëner fer sayn folek lenke — warom nëme etliche tas net aan?”)

¹⁰ Hon ti eyerste kriste tiise lenkung aan kenom? Ti meyerste fon tëne waare froo mit te oryentiirunge un hon se wilich aan kewënt. Yawool, tii hon “sich mit tëm troost kefrayt”. (Lees Aphostele sayn Kexicht 15:30, 31.) e Awer wii tuut Yeehoowa sayn folek hayt lenke?

WII TUUT KOT UNS HAYT LENKE?

11. Wii lenkt Yeehoowa tii woo uns hayt fiire? Kep een payxpiil.

¹¹ Yeehoowa tuut wayter sayn folek hayt fiire. Tee macht tas torich ti Piipel un sayn  Soon, te khop fon te kemaynt. Kept tas taytliche pewaysunge tas Yeehoowa aach mëner am penutse is torich unser tsayt? Ia. Kuk mool, tsum payxpiil, was pasiirt is noom yoer 1870. Charles Taze Russell un sayn fraaynte hon aan kefang se ferxteen tas 1914 een important yoer fer Kot sayn Raych weyer. (Tan. 4:25, 26) Tii hon tas raus kefun wayl se ti Piipel unersuucht hon un keklaapt hon tas se teete ti erfiilung fon te profetsiie siin. Sicher waar Yeehoowa too hiner traan kewees. Ti ewënte in 1914 hon pewayst tas Kot sayn Raych tiise yoer aan kefang hat se rechiire. Te 1^te Welt Kriich is aus keproch un es waare krankheete, eyertxutere, un es hot ese kefeelt. (Luk. 21:10, 11) Yeehoowa waar wërklich tiise eerliche Piipel xtutënte am penutse fer sayn folek helfe.

12-13. Was is kemacht kep torich te 2^te Welt Kriich tas ti preetich aarwayt foran keengt?

¹² Tenk aach aan was pasiirt is torich te 2^te Welt Kriich. Priiter in te haupst sets hon Apokalipsis 17:8 xtutiirt un soo hon se ferxtan tas te kriich teet net tsum Armaxeton nëme. In woerheet, es weyer een friitlich tsayt noom kriich woo mer khonte fer noch mee layt preetiche. Soo, opwool tas khent xpasich aus siin in te tsayt, hon ti priiter ti Xileat Xuul kekrintet. Te opjetiiw fon te xuul waar misyoneere iipe fer se preetiche un in lërne in fiile lënter uf te kans welt. Soo kaar torich te 2^te Welt Kriich, waare misyoneere tsu anere lënter kexikt. Te troye sklaaw hot aach te Curso do Ministério Teocrático f orkanisiirt. Sayn opjetiiw waar al in te kemaynt iipe fer peser preeticher un leerer wëre. Soo, waar Kot sayn folek foer perayt fer ti aarwayt woo noch khome teet.

¹³ Hayt khene mer taytlich siin tas Yeehoowa sayn folek am lenke waar torich tiise xweyer tsayt. Fom 2^te Welt Kriich aan, hot Kot sayn folek fray kepreeticht in fiile lënter. Ti aarwayt is wërklich foran kang!

14. Warom khene mer traue aan te lenkung woo fon Yeehoowa sayn Orkanisatsyoon un ti elteste khomt? (Apokalipsis 2:1) (Kuk aach tas pilt.)

¹⁴ Hayt, ti mitkliiter fon te Rechiirente Khërperxaft tuun wayter Yeesus sayn lenkung suuche. Tii wole oryentiirunge fer ti priiter kepe woo xtime mit was Yeehoowa un Yeesus too triwer tenke. Tii penutse aach sirkuyt superintentente un elteste fer ti kemaynte  oryentiire. g Ti kesalpte elteste — un, in woerheet, al ti elteste — sin in Yeesus sayn “rechts hant”. (Lees Apokalipsis 2:1.) h Kewis al ti elteste sin imperfekt un mache feeler. Als mool, hon Mooses, Yosuee un ti aphostele feeler kemacht. (Nuu. 20:12; Yos. 9:14, 15; Rom. 3:23) Awer meyer khene taytlich siin tas Yeesus tuut te troye sklaaw un ti elteste lenke un tee macht tas wayter “ti kans tsayt, pis tsum ën fom sisteem”. (Mat. 28:20) Soo hon mer kuute uersache fer se traue aan te lenkung woo eyer uns kept torich tiise mëner.

MEYER KRIIN NUTSE WËN MER KOT SAYN FIIRUNG FOLICHE

15-16. Was lërnst tuu mit te speryense fon tëne woo Yeehoowa aan keheert hon?

¹⁵ Xon hayt, kriin mer seechen wën mer Yeehoowa sayn lenkung foliche. Tsum payxpiil, Andy un sayn fraa Robyn hon te aanreet aan kenom fer sayn leepe keweenlich lose. (Kuk ti xtuutyum noote “focado” in Matheus 6:22.) Tes weeche, khonte se sich aan piite fer in te paueray proyëkte fon te Orkanisatsyoon helfe. Robyn saat: “Ofts hon mer in pletse keleept woo kans kleen waare; noch net mool een khiich hate se! Ich must aach fiile fotokraafixe ekipamënte ferkhaafe, opwool ich keliipt hon pilter ap nëme. Tas mache, hot treene tsu mayn aue keprung. Awer soo wii Apraham sayn fraa, Sara, wolt ich foran kuke, net tsurik.” (Hep. 11:15) Was fer nutse hot tas pheyerche kriit? “Meyer sin froo — saat Robyn —, wayl mer kepe ales was mer hon fer Yeehoowa. Wën mer xafe in te insetsunge woo ti Orkanisatsyoon uns kept, khene mer xon ‘xmeke’ wii tas leepe in te nay welt wërt.” Andy xtimt too temit un saat: “Meyer sin froo, wayl mer kepe unser kans tsayt un kraft fer tas Raych pay xteen.”

¹⁶ Wii noch kriin mer nutse wën mer Yeehoowa sayn fiirung foliche? Noo se fërtich mit te mitel xuul waar, wolt Marcia te aanreet aan heere fer een pyoneerin sin. (Mat. 6:33; Rom. 12:11) Tii saat: “Es waar mich aan kepoot 4 yoore kratis in te uniwersiteet xtutiire. Awer ich wolt mayn pestes fer Yeehoowa kepe. Soo, xtats tsu te uniwersiteet keen, hon ich raus kesuucht een aarwayt lërne. Tas teet mich helfe kenuuch kelt kriin fer pyoneerin sin. Es waar eene fon te peste ëntxlise woo ich kemacht hon. Ich tiine hayt froo wii pyoneerin un, wayl  ich raus suuche khan wii fiil xtune ich xafe, khan ich in Petël helfe un anere wunerliche tinge fer Yeehoowa mache.”

17. Was fer anere nutse kriin mer wën mer Yeehoowa aan heere? (Isayas 48:17, 18)

¹⁷ Als mool, kriin mer oryentiirunge fon te Orkanisatsyoon woo uns xitse. Tsum payxpiil: meyer wëre aan kesaat iwer wii kefeerlich es is tas kelt liipe un tinge mache woo khene uns influentsiire Kot sayn kesetse unfoliche. Wën mer Yeehoowa in tiise sache aan heere, kriin mer nutse. Meyer hale een sauwer kewise un xoone uns fon fiile propleeme. (1 Tim. 6:9, 10) Soo, khene mer Yeehoowa mit unser kans hërts tiine un niks khan uns mee frooheet un friit pringe. (Lees Isayas 48:17, 18.) i

18. Warom wilst tuu Yeehoowa wayter aan heere?

¹⁸ Sicher, tuut Yeehoowa wayter mënxe penutse fer uns lenkung kepe torich ti kroos tripulatsyoon un torich ti Tausent Yoore Rechiirung. (Psal. 45:16) Soo kaar wën mer rechter was aneres mache teete, meechte mer tiise oryentiirunge aan nëme? Es wërt laychter fer uns tas mache wën mer Yeehoowa sayn oryentiirunge xon yets aan heere. Soo, wole mer Yeehoowa sayn lenkung imer foliche, too tepay ti oryentiirunge woo mer kriin fon te mëner woo eyer in kesetst hot fer uns uf phase. (Isa. 32:1, 2; Hep. 13:17) Meyer hon kuute uersache fer uf unser Fiirer Yeehoowa traue, wayl tee halt uns wech fon ales woo uns kaystlich xaate mache khent un fiirt uns tsum eewiche leepe in te nay welt.