Ti Piipel lost taytlich tas Yeehoowa te futuer foer raus saan khan. (Isa. 45:21) Awer tii kept net ti kanse kleenichkheete iwer wii un wanee eyer tas macht un aach net wii fiil eyer raus suucht se wise. Tes weeche, ferxteen mer net ales iwer tiise apiliteet fon Kot. Awer es kept etliche tinge woo mer wise.

Yeehoowa hot khee krëns, ploos tii woo eyer sich selepst xtelt. Yeehoowa khan sayn iwermeesich kluucheet penutse fer kwalkee tings woo eyer ëntxlist, foer raus saan. (Rom. 11:33) Awer wayl eyer aach perfekt selepst kontrol hot, khan eyer raus suuche net wise was pasiire tuut. (Kuk aach Isayas 42:14.)

Yeehoowa macht tas sayn wile erfiilt wërt. Wii helft uns tas ferxteen Yeehoowa sayn apiliteet fer te futuer foer raus saan? Isayas 46:10 leet aus: “Fom aanfang aan tuun ich tas ën foer raus saan, un xon lang heyer ti tinge woo noch net kemacht kep sin. Ich saan: ‘Mayn ëntxlus tuut pexteen plaype, un ich tuun ales mache was meer kefalt.’”

Soo, een uersach warom Yeehoowa te futuer foer raus saan khan, is wayl eyer ti kraft hot fer ti tinge pasiire mache. Als mool tuun mer ploos tas ën fon een film kuke fer se wise was pasiire tuut. Awer Yeehoowa praycht net soo was mache fer se wise was im futuer pasiire tuut, wii wën al ti ewënte xon pasiirt sin un Yeehoowa kukt se ploos noo. Xtats tas, khan Yeehoowa ëntxlise tas etwas in een spetsiifix xtun pasiire tuut un tan es pasiire mache wën ti tsayt khomt. (Eeks. 9:5, 6; Mat. 24:36; Aph. 17:31)

Tes weeche, penutst ti Piipel wërter soo wii “foer perayt”, “kemustert hot” un “tsiil kextelt hot” fer se pexraype was Yeehoowa macht iwer etliche ewënte woo im futuer pasiire. (2 Khe. 19:25; Isa. 46:11) Tiise iwersetsunge khome fon een wort in te orixinaal xprooch woo se tuun hot mim wort “muster”. (Yee. 18:4) Soo wii een kwap muster khan leet tsu een xeen waase mustere, khan Yeehoowa ti tinge mustere orer lenke fer sayn wile erfiile. (Ëfe. 1:11)

Yeehoowa lost ti layt sayn aychne ëntxlise mache. Tee tuut net foer heyer pextime was in yeete persoon sayn leepe pasiire tuut. Un tee macht net tas kuute layt xlechte tinge mache woo tsu sayn fernichtung nëme khente. Tee lost tas yeete eene ëntxlist wii eyer leepe wil; awer in te selwich tsayt tuut eyer in lërne ti pest aat fer se leepe.

Kuk mool 2 payxpiile. Tas eyerste hot se tuun mit Niiniwe sayn pewooner. Yeehoowa hat foer raus kesaat tas ti xtat fernicht weyer weeche sayn xlechtichkheet. Awer wii ti niniwiiter sich peroyt hon, hot Yeehoowa “triwer noo ketenkt iwer was eyer kesaat hat, un hot se net kextrooft”. (Yon. 3:1-10) Yeehoowa hot keënert was eyer foer raus kesaat hat wayl ti niniwiiter ëntxlist hon sich ënere noo se Yeehoowa sayn pexeet tsu tëne keheert hon.

Tas tsweete payxpiil is fon te profetsii iwer een man woo Sirus keheest hot. Eyer teet ti yuute pefraye un aach xike tas Yeehoowa sayn thempel noch mool uf kepaut weyer. (Isa. 44:26–45:4) Te kheenich Sirus fon Përsya hot tiise profetsii erfiilt. (Ëst. 1:1-4) Awer Sirus hot net te woere Kot aan kepeet. Yeehoowa hot Sirus penutst fer tiise profetsii erfiile, awer Sirus waar net ketswung Yeehoowa tiine. (Xpr. 21:1)

Kewis tas sin net ti kanse phunkte woo se tuun hon mit Yeehoowa sayn apiliteet fer te futuer foer raus saan. Khee mënx khan ferxteen ales was Yeehoowa tenkt un macht. (Isa. 55:8, 9) Awer was mer iwer Yeehoowa ferxteen, lost uns sicher tas eyer imer tas richtiches macht, aach wën eyer te futuer foer raus saat.